1, 2. (a) Alamete gari reyote yoo yinisi manchi gedeeti yineemmohu mayiraati? (Hanafote noo misile lai.) (b) Tini busha alame baꞌanno wote, hedate dandoo noonsa kalaqo huluullantannokki coyi maati?

 “REYINO MANCHI HAꞌRANNI NO!” Togo yitinori agaraasine mitto bunshe loosatenni egennamino mancho usuru mininni fushshite haadhe hadhanni heedheeti. Insa konne mancho hatto yitinohu mayiraati? Manchu ordo keeraanchoho; qoleno iso dhibbu diamadinosi. Ikkollana, iso agaraasine shinanni bayicho haadhe hadhanni no. Hakku reyote yoo yinoonnisi manchi reyinohu gedeeti. a

² Tenne alame garino hakkoye shinasira haaꞌne haꞌnanni heeꞌnoonni manchi gedeeti. Tini busha alame baꞌanno gede yoo yininkunni barru keeshshino; qoleno baꞌꞌanno yanna gambissino. Qullaawu Maxaafi ‘Alame saꞌanno’ yaanno. (1 Yoh. 2:17) Alamete goofimarchi daasi gatannokkireeti. Ikkirono, alamete baonna aleenni kulli usuranyi reyo baxxitanno gede assannohu mittu coyi no. Mitu manni usuranyaho yinoonni yoo taashsho nookkite yee, woy miteekke yinoonni yoo jeefote soorrinanni yee hede coye kayisannoha ikkara dandaanno. Ikkollana, alamete yoo  yiinohu Kalqete Alamera Aliidiha ikkinoho guuta Mootichaati. (Mar. 32:4) Hakko daafira, alame baꞌanno barri yinoonniwiinni disaꞌꞌanno; hattono yinoonni yoo digaraho yee huluullamannohu diheeꞌranno. Alame baꞌanno wote kalqete alamera heedhannoti hedate dandoo noonsa kalaqo, Yihowa assinoonniri taashsho noore ikkasi dihuluullantanno. Hatte yannara qarru baalunkunni fooliishshiꞌneemmo!

3. Maganu Mangiste dagganno wote baꞌꞌannohu shoolewa gaamme ronseemmo coyi maati?

³ Ikkina, ‘saꞌanno’ yini ‘alame’ maati? Yannankera lowo manni noo gedeenni heeꞌrannohu gede asse hedannohu lowo coyi saꞌꞌanno woy baꞌꞌanno. Kuni busha duduwooti? Deeꞌni! Isinni Maganu Mangistehu “danchu duduwi” giddo mittu konneeti. (Mat. 24:14) Konni daafira, hanni Maganu Mangiste dagganno yannara mayi baꞌꞌannoro hasaambo. Hatte yannara baꞌꞌanno coye shoolewa gaamme ronseemmo; insano: busha manna, busha dirijjituwa, busha loosonna yaachishanno coyeeti. Mitto mittonka coye ronseemmo wote, (1) hakku coye gawajjannonke gara, (2) hakkoye coye Yihowa hiissannoronna (3) hakku coyi hiikkuyi danchu coyinni riqiwamannoro hasaambeemmo.

4. Bushu manni xa gawajjanni noonkehu hiittoonniiti?

⁴ Bushu manni gawajjanni noonkehu hiittoonniiti? Soqqamaasinchu Phaawuloosi qullaawu ayyaani massageennasi, heeꞌnoommo yanna ‘qarrissannota’ ikkitannota masaalihu gedensaanni togo yee borreessino: ‘Awaawuranno manni wole soꞌrisiisanninna insano soꞌranni bunshete aana bunshe ledanno.’ (2 Xim. 3:1-5, 13) Kuni masaalotenni kulloonniri woꞌmanna laꞌe egennootto? Ninke giddo batinye manna waajjishiishshannori, halashshite heddannokkirinna jaddo loossannori gawajjitino woti no. Insa giddo mitu keedisa bushuulleeti; wolootu kayinni busha assootensa mannu afannokki gede maaxxannoreeti. Insa ninke gawajjite egentinokkiha ikkiro nafa, wolu garinni gawajjitanni noonke. Togoo manni assinoha busha coye macciishshineemmo wote dadillineemmo. Bushu manni, qaaqquulle, geerranna umonsa gargadhite affannokkire beebba assiꞌrinota macciishshineemmo wote bisu shorodhi yaannonke. Togoo manni ikkanno ikkito, insa mannu maaꞌne, saadatenna agaanintete gedeere ikkitinoha lawissanno. (Yai. 3:15) Yihowa Qaali kayinni, bushu duduwi bayicho dancha duduwo kulanno.

5. (a) Bushu mannira mittu mittu manchi deerrinni mayi faro faꞌnante noonsa? (b) Bunshete doogo agure higa giwanno manni jeefote hiikkanno?

⁵ Yihowa maa assanno? Yihowa xa bushu manni bunshe agure higanno faro fane noonsa. (Isa. 55:7) Isi mittu mittu manchi deerrinni jeefote yoo diyiino. Isi yoo yee noohu tenne busha alameraati. Busha coye agure higa giwanno manni yaano bayiru qarri daa geeshsha tenne busha alame irkisanno manni hiikkannoyya? Yihowa busha manna uullate aaninni hegerera hunannota coyiꞌrino. (Faarso 37:10 nabbawi.) Bushu manni togoo coyi iillannonsakkihu gede asse hedara dandaanno. Yannankera lowo manni assannore maaxanna qorichishamikkinni saꞌꞌa roso assiꞌrino. (Iyo. 21:7, 9) Ikkollana, Qullaawu Maxaafi togo yaanno: “Maganu mannu haꞌranno doogo baala illaallisanno; qaafosi baala laꞌꞌanno. Bunshe loossannori Maganuwiinni maaxama didandiitanno; dhiꞌmote tunsichi giddo nafa maaxante diaffanno.” (Iyo. 34:21, 22) Magano Yihowa maaxamme gata didandiinanni. Awaawuranno manni iso balalsa didandaanno; qoleno gawalo nookkita afate dandoosinni coye qonqolche afannokki gede assanno tunsichi woy diime horo dino. Armagedooni gedensaanni biꞌreera bushu  manni heeꞌrannowa laꞌneemmoha ikkara dandaanno, kayinni insa hakko diheedhanno. Insa hegerera baꞌanno!—Far. 37:12-15.

6. Bushu manni bayicho hiittoo manni heeꞌranno? Kuni dancha duduwooti yineemmohu mayiraati?

⁶ Bushu manni baꞌꞌanno wote hiittoo manni gatanno? Yihowa togo yitannota hagiirsiissanno hexxo uyinonke: “Shaqqaddu kayinni baatto ragidhanno; atootenna keere afidhe hagiidhitanno.” Tenne faarsoranni togo yitanno hedo no: “Keeraano baatto ragidhanno; ise aanano hegererano heedhanno.” (Far. 37:11, 29) “Shaqqaddu” woy jooguullunna “keeraano” yiniri hiittoo mannaati? Jooguullu Yihowa rosiisannorenna aanno biddishsha maahoyye yite adhitannoreeti; keeraano kayinni Yihowa albaanni gara ikkino coye assa baxxannoreeti. Yannankera alamete aana keeraanchu manninni bushu manni rooranno. Ikkollana, daggannote haaro alamera, keeraanchu manni bushu manninni diegemmamanno woy keeraanchu manni rooreenna bushu manni giddonsa diheeꞌranno; korkaatuno hattee yannara heeꞌrannohu keeraancho manna callaho. Ee, togoo dagoomi uulla gannate ikkitanno gede assanno!

7. Busha dirijjituwa gawajjitanni noonkehu hiittoonniiti?

⁷ Busha dirijjituwa gawajjitanni noonkehu hiittoonniiti? Yannankera alamete aana bushu coyi batiꞌranno gede assannohu mitto mitto mancho ikkikkinni, dirijjituwate. Hanni lowo miliyoone ikkanno manna doggannote ammaꞌnote dirijjituware hedi; insa mannu Maganu ewelumma afannokkinna Qullaawa Maxaafa addaxxannokki gede assitanno; qoleno Maganu albillittete uullatenna mannaho hedinori, hattono wole togoo hajo daafira gara ikkinokkire rosiissanno. Addi addi gashshootino olanna gosa insa insaneewa giwantanno gede assanno; hattono buxanenna wolqa hoogginore gadadisanno; qoleno gubbo yoranno manni batiꞌrannonna gosoomu kalaqamanno gede assanno. Hafuuraame daddalu dirijjituwano lowo manni buxe heeꞌreenna jiro hogoofiꞌrate yite qooxeessa daaffanno, kalaqamu jiro garimale horoonsidhanno, hattono dikkiꞌranno manna beebba assidhanno. Ee, alamete aana bushu coyi batiꞌranno gede assitinoti busha dirijjituwa ikkitinoti teeꞌlitinota diꞌꞌikkitino.

8. Qullaawu Maxaafi giddo kulloonni garinni, yannankera mannu baꞌannokkihu gede asse hedanno dirijjituwa hiikkitanno?

⁸ Yihowa maa assanno? Bayiru qarri hanafannohu poletiku silxaane afidhinori fotaanchote yinita Bayira Baabiloone yaano kaphu ammaꞌno dirijjituwa baala huntanno woteeti. (Aju. 17:1, 2, 16; 18:1-4, NW) Hatte yannara kaphu ammaꞌno dirijjituwa baala raaphite baꞌanno. Ikkina, wole busha dirijjituwa baala hiikkitannoyya? Qullaawu Maxaafi mannu baꞌukkinni heedhannohu gede asse hedannota batinye dirijjituwa ilaallatenna giddichuwatenni lawisiise coyiꞌranno. (Yohaannisi Ajuuja 6:14 nabbawi.) Maganu Qaali giddo addi addi gashshootinna dirijjitubba baala darginsanni shafantannota masaalloonni. Bayiru qarri gumulamannohu tenne alame gashshooti baalunna Maganu Mangiste gibbanno dirijjituwa baala baꞌanno woteeti. (Erm. 25:31-33) Hakkuyi gedensaanni busha dirijjituwa horo diheedhanno!

9. Haaro uulla amanyootu noota ikkitannota huluullammeemmokkihu mayiraati?

⁹ Busha dirijjituwa mayi riqiwanno? Armagedooni gedensaanni uullate aana heedhanno dirijjite no? Qullaawu Maxaafi togo yaanno: “Ninke kayinni uyinonke hexxo garinni keeraanchimma heedhannoha haaro gordonna haaro baatto agadhineemmo.” (2 Phe. 3:13) Akkalu gordinna akkala uulla yaano bushu gashshootinna togoo gashshooti hunda  heeꞌrannohu bushu manni baꞌꞌanno. Insa riqiwannori maati? ‘Haaru gordinna haaro baatto’ yitanno yaatto, mittu haaru gashshootinna hakko gashshooti hunda uullate aana haaru dagoomi heeꞌrannota leellishshanno. Yesuusi massagannoti Maganu Mangiste, amanyootu Magani Yihowa akatta guutu garinni leeltanno gede assitanno. (1 Qor. 14:33) Konni daafira, “haaro baatto” woy uulla orte baꞌinota ikkitukkinni amanyootu noote. Hatte yannara uullate aana coye laꞌꞌannohu danchu manni heeꞌranno. (Far. 45:16) Insa Yesuusinna isi ledo kaaꞌlante gashshitannori 144,000 gashshaano uyitannonsa biddishsha harunsitanno. Hanni busha dirijjituwa baala baꞌeenna, mittimma nootinna horo baꞌannokkiti mitte dirijjite calla heedhanno yanna hedi!

10. Ati heeꞌratto qachira noohu gara ikkinokki coyi maati? Tini atenna minikki manna gawajjitinohu hiittoonniiti?

¹⁰ Bushu loosi gawajjanni noonkehu hiittoonniiti? Heeꞌnoommohu bunshe woꞌmitino alame giddooti. Alamete anna amanyootu maaeelle, ammanama hooga hattono finqille woꞌmitino. Ooso noonsa manni togoohu bushu coyi oosonsa gawajjannokki gede gargadhate sharramanno. Boohaarshu dirijjituwa gara ikkinokkire danchuri gede assite leellishshanno; konni garinni insa Yihowa garanna gara ikkinokki coye lainohunni fushshino higge mishiishshanno. (Isa. 5:20) Addu Kiristaani togoo hedo heedhannonsakki gede qorophanno. Insa, Yihowa fushshino hige ajinshe laꞌnanni gede assannohu bushu coyi woꞌmino alamera heeꞌre ammaname heeꞌrate sharrama hasiissannonsa.

11. Yihowa Soddoomahonna Gomooraho yiino yoonni maa ronseemmo?

¹¹ Yihowa busha looso hiissanno? Isi biꞌre Soddoomahonna Gomooraho bunshe woꞌmitu yannara assinore hedi. (2 Pheexiroosi 2:6-8 nabbawi.) Keeraanchu manchi Looxi, isinna maatesi heedhanno qooxeessira bunshe woꞌmitu yannara baasa qarramino. Yihowa hakko qooxeessira heeꞌranno manna gudasi, isi hakkiinni bunshe huninoha calla ikkikkinni albillittete assannori noota leellishshannote. Isi tenne assinohu, insa ‘cubbo loossannorira baalaho’ lawishsha ikkitanno gedeeti. Yihowa hakka waro noo maaeelle baala huninte gede, tenne alame hunanno wote yannankera nooha busha coye baala hunanno.

12. Tini alame baꞌu gedensaanni ati loosate halchattohu mitu loosi maati?

¹² Busha looso mayi riqiwanno? Gannate ikkitino uulla aana hagiirsiisanno looso loonseemmo. Uulla gannate assate loosi, hattono uminkeranna banxeemmo mannira mine mina mageeshshi geeshsha hagiirsiissannoro hanni hedi. Qoleno, reyotenni kaꞌꞌannoha lowo miliyoone ikkanno manna haarate, hattono insara Yihowa doogorenna isi mannu oosora assinore kultanno xagge rosiisate looso hedi. (Isa. 65:21, 22; Soq. 24:15) Hatte yannara loonseemmo loosi baalu hagiidhineemmonna Yihowa guwisiꞌneemmo gede assannoho.

13. Sheexaanu, Addaaminna Heewani Maganoho hajajama giwansa yaachishshanno coyi heeꞌranno gede assitinohu hiittoonniiti?

¹³ Yaachishanno coyi gawajjanni noonkehu hiittoonniiti? Bushu manni, busha dirijjituwanna bushu loosi gamba yee uullate aana heeꞌnanni heeshsho yaachishshannota ikkitanno gede assino. Olu, buxima woy gaꞌre bade giwa gawajjite egentinokkihu nooni? Xibbunna reyona? Togoo qarri iillannokkihu dino. Kuni qarri dayinohu sasu kalaqami yaano Sheexaanu, Addaaminna Heewani Yihowara hajajama giwinohuraati. Ninke giddo insa hajajama giwansa abbitino qarra xa miliqe gata dandaannohu dino.

14. Yihowa yaachishanno coye hiissanno? Mitto lawishsha kuli.

 ¹⁴ Yihowa yaachishanno coye hiissanno? Hanni olunnire hedi. Yihowa olu heeꞌrannokki gede assannota coyiꞌrino. (Faarso 46:8, 9 nabbawi.) Dhibbuna? Isi dhibba gobbate aaninni hunanno. (Isa. 33:24) Reyo hiissannoyya? Yihowa reyo hegerera hunanno. (Isa. 25:8) Isi buxima heedhannokki gede assanno. (Far. 72:12-16) Yihowa yannankera yaandanni gede assino coye baala hunanno. Isi busha “ayyare” nafa baꞌanno gede assanno; korkaatuno hatte yannara Sheexanunna agaaninte jeefote raaphite baꞌanno daafira, bushare assinanni gede xixxiiwannori diheeꞌranno.—Efe. 2:2.

15. Armagedooni gedensaanni hegerera baꞌꞌannohu mitu coyi maati?

¹⁵ Olu, dhibbu woy reyo nookki alamera heeꞌra mageeshshi geeshsha hagiirsiissannoro hanni hedi? Olanto, baaru aani olanto woy olu jettenni olantannori diheedhanno! Olu uduunnichi woy saino olire qaagate yine assinanniri diheeꞌranno. Hospitaale, dokitorootu woy nersootu diheedhanno; fayyimmate inshuraanse diheedhanno; reyino manna keeshshiinshanni mini, wiꞌlate mini, woy waammate base diheedhanno! Jaddo loosannohu heeꞌrannokki daafira, baqqi assanno uduunnichi, woy polise diheedhanno; qulfenna makafachu nafa heeꞌrannokkiha ikkara dandaanno! Wodaninkenna surrenke yaaddanno gede assannohu kuni baalu coyi horo diheeꞌranno.

16, 17. (a) Armagedooni gatte saꞌannori hiittoo coyinni fooliishsho afidhanno? Xawisi. (b) Tini alame baꞌanno wote gante saꞌꞌa dandiineemmohu hiittoonniiti?

¹⁶ Yaachishanno coyi baꞌꞌanno yannara hiittoo heeshsho heeꞌnanni? Hatte yannara heeshsho hagiirsiissannota ikkitannoti teeꞌlitinota diꞌꞌikkitino. Tenne alame heeshsho biso assiꞌnoommo daafira, alamete giddo noo coyi lowo geeshsha yaachishannoha ikkinota qaangeemmokkiha ikkara dandaanno. Xa mannu batiꞌrannowa baaburu xaawi qooxeessira heeꞌranno manni, albillittete canco dimacciishshanno; xa ishine tunganni qooxeessira heeꞌranno manni albillittete bowanni qarrisannonsari diheeꞌranno. Yihowa togoo coye baala hunanno wote fooliishsho afiꞌneemmo.

¹⁷ Xa yaachishannonke coye mayi riqiwanno? Faarso 37:11 jooguullu “atootenna keere afidhe hagiidhitanno” yitanno. Tini hagiidhatto gede diassitannohe? Aleenni kulliri Yihowa atera hedinoreeti. Konni daafira, tenne qarrissannote goofimarchu yannara Maganu Yihowawanna dirijjitesiwa shiqate dandaamihere baala assi! Hexxokki naadi hattono ise daafira seekkite hedde surrekkiranna wodanikkira xabbe leeltannohe gede assiꞌri; tenne wolu mannirano kuli. (1 Xim. 4:15, 16; 1 Phe. 3:15) Hatto assittoro, tini yoo yine heeꞌnoonni alame baꞌanno wote ise ledo dibaꞌꞌatto. Hatteentenni gatte saꞌe hegerera hagiidhitanni heeꞌratto!