1, 2. (a) Elfaazinna Beldaadi, Maganu isira soqqamate yine assineemmore ma garinni laꞌꞌannohu gede assite coyidhino? (b) Yihowa isira soqqamate yine assineemmore naadannota leellishinohu hiittoonniiti?

 “HALAALINTA mannu Maganoho kaaꞌlannori nooni? Egannaamu nafa Maganoho ledannosiri nooni? Keeraanchimmakki Woꞌmanka Dandaanno Magano hagiirsiissannoni? Doogikki suwashsho ikkite isira ma leddannosi?” (Iyo. 22:1-3) Ati togoo xaꞌmuwa hedde egennootto? Temaanichu Elfaazi, kuri xaꞌmuwa Iyyoobi xaꞌmi wote ninke Maganoho soqqamate yine assineemmori Maganoho kaaꞌlannori woy ledannori dino yee hedinoti dihuluullissannote. Isi ledo marinohu Shuhichu Beldaadi isinni, mannu ooso Maganu albaanni keeꞌraaꞌma dandiitannokkihu gede asse coyiꞌrino.—Iyyoobi 25:4 nabbawi.

² Suꞌmira Iyyoobi sheshifachishate martinori kuri mannooti, Yihowara ammanamme soqqamate assineemmori Isira kaaꞌlannori nookkihu gede, hattono Isi ninke biletenna daꞌmuulchunni roorse laꞌꞌannonkekkihu gede assite coyidhino. (Iyo. 4:19; 25:6) Coye iimi adda laꞌniro, Elfaazinna Beldaadi hatto yite coyidhinohu umonsa heeshshi assite laꞌannohura lawara dandaanno. (Iyo. 22:29) Qoleno, jawu ilaali iimira fulle woy horophillu giddo heeꞌne maskootete  widoonni woro qolle laꞌneemmo wote, mannu ooso uullate aana assitannori garire dilawanno. Ikkina, Yihowa lowo geeshsha gotti yiino bayichisira heeꞌre uulla hige laꞌꞌanno wote, ninke Mangistesi looso loosate assineemmore laꞌꞌannohu hakko garinniiti? Yihowa Elfaazi, Beldaadinna Soofaari gara ikkinokkire coyidhinotera insa rufasinna Iyyoobi ‘borojjichoꞌya’ yee coyiꞌrasi, Isi ninke assineemmmore naadannota leellishshanno. (Iyo. 42:7, 8) Konni daafira, mannu ooso assitannori “Maganoho kaaꞌlannori” no.

3. Eelihu Yihowara soqqamate assineemmori daafira mayyiino? Isi hatto yiinohu mayyaateeti?

³ Yihowa Eelihu togo yiinotera dirufinosi: “Ati keeraancho ikkittoro Maganoho maricho ledatto? Isi atewiinni mittorichono dihasiꞌranno.” (Iyo. 35:7) Eelihu togo yiinohu Maganoho soqqamate assineemmore Isi gaꞌriri gede asse dilaꞌꞌanno yaara hedeeti? Deeꞌni. Eelihu hatto yiinohu Magano magansiꞌnummorono magansiꞌra hoongummorono xeannosiri dino yaara hedeeti. Yihowa hooginori dino. Ninke iso dureessa woy jawaata assa didandiineemmo. Isinni noonketi dancha akatta, dandoo woy jawaante Maganu uyinonkete; isi uyinonkere ma garinni horoonsiꞌneemmoro laꞌꞌanno.

4. Yihowa mannaho assineemmoha dancha coye mayinni lawise coyiꞌrino?

⁴ Yihowa soqqamaanosira assinanniha dancha coye isira assinoonnihu gede asse laꞌꞌanno. Lawishsha 19:17 togo yitanno: “Buxanete aannohu Kaaliiqira liqiissanno; Kaaliiqino assino danchummara daware aannosi.” Yihowa buxanete assineemmoha mitto mittonka dancha coye laꞌꞌanno yaate? Kalqete alame Kalaqaanchi, mannu ooso assitinoha dancha coye isira liqiissitinohu gede asse laꞌꞌanno yine coyiꞌra dandiineemmo? Qoleno, assinoommore asalu gede asse kiire qolannonke woy maassiꞌrannonke yaate? Ee, Maganu Beetti umisi tenne coyiꞌrino.—Luqaasi 14:13, 14 nabbawi.

5. Kawiinni aanchine hiikkuri xaꞌmuwara dawaro afiꞌneemmo?

⁵ Yihowa masaalaancho Isayaasi Iso riqiwe coyiꞌranno gede koyisino; tini, Yihowa isira ammanante soqqantannoti mannu ooso loosisira kaaꞌlantanno gede assa hagiirsiissannosita leellishshannote. (Isa. 6:8-10) Isayaasi tennera maahoyye yiino. Yannankerano lowo kume ikkanno manni Yihowara soqqamanno; togo assansa “ani haꞌreemmona, ane soqqi” yiinohu gedeeti. Ikkollana mittu Kiristaanchi togo yee hedannoha ikkara dandaanno: ‘Ani asseemmori kaaꞌlannori no? Yihowa isira soqqameemmosi gede koyisasi dancha ikkiturono, ani looso kaaꞌlummokkinni loosisi loosamanno gede assa didandaanno?’ Kuriuu xaꞌmuwa dawaro afate hanni Dibooranna Baaraaqi waro ikkinore xiinxallino.

6. Israeelete manninna Yaabiini olanto mereero noo badooshshi maati?

⁶ Kanaꞌꞌaani Moote Yaabiini Israeelete manna 20 diro “kade gashshino.” Hakko heeꞌranno manni waajje qaensara hosanno. Olantote illenni laꞌniro, insara diinnansa qasannohu woy gargadhannohu garihu olu uduunni dinonsa; diinnansara kayinni 900 siwiilu faradi-gaare woy olu saragalli noonsa.—Eje. 4:1-3, 13; 5:6-8. a

7, 8. (a) Yihowa Baaraaqi mayyee hajajino? (b) Israeele Yaabiini olanto qeeltinohu hiittoonniiti? (Hanafote noo misile lai.)

⁷ Ikkollana Yihowa Baaraaqira masaalaancho Diboora widoonni togo yee xawise kulino: “Niftaaleminninna Zaabilooninni 10,000 manna haadhe Taaboori ilaala fuli. Anino Yaabiini olanto hajajaancho Sisaara,  faradi gaarisinninna olantosi ledo Qishooni Wayiwa daanno gede kayiseemmo. Isono angakkira sayise eemmohe.”—Eje. 4:4-7.

⁸ Olamanno hasiissannota mannaho kulli. Hakkiinni uminsa fajjonni olamate qixxaawino manni Taaboori Ilaalira gamba yii. Baaraaqi Yihowa uyinosi biddishsha hakka wontenni harunsino. (Ejjeetto 4:14-16 nabbawi.) Insa Tainaaki olantanni heedheenna, hendoonnikkiha biite xeena ganeenna gobba lixa ikkitu. Baaraaqi Sisaara olanto qase Hatsoori geeshsha 24 km shorrino. Sisaara xooqe xooqe yiiti, albira waajjishannoha ikkirono xa mitte kaaꞌlono afiꞌrinokki saragallisi aaninni dirre, lekkatenni Tsainayimi xooqi; kuni bayichi Kedeeshira mule nooha ikkara dandaanno. Isi Qenaawichu Hebeeri beetti galte Iyaeeliwa mare maaxami; Iyaeeli iso dukkanu giddora eanno gede assitusi. Sisaara daafurino daafira goxi; isi hakko goxe heeꞌreenna Iyaeeli waajjitukkinni iso shitu. (Eje. 4:17-21) Konni garinni Israeele qeeltu! b

9. Ejjeetto 5:20, 21 giddo, Israeele Sisaara ledo olantu yannara ikkinore xawinse kulloonnihu hiittoonniiti?

⁹ Ejjeetto fooliishsho 4 nna 5 giddo, mittete kulloonnikkire wolete kulloonni daafira tenne lamenta fooliishsho mitteenni xiinxallanke danchate. Lawishshaho Ejjeetto 5:20, 21 giddo togo yine borreessinoonni: “Gordoho noo beeddahe olantu; haꞌrinshonsanni Sisaara ledo gaarantu. . . . Qishooni Wayi fee haaꞌre haꞌrinsa.” Kuni qummeeshshi, Israeele sokkaano kaaꞌlitino yaanni noonso gordunni mitiri uwe diinnansa gudinota kulanni no? Tennera Qullaawu Maxaafi xawise kulannori dino. Ikkirono, hasiissanno baseranna yannara xeena gananno gede asse 900 olu saragalli goofanno gede assinohu Magano agurranna wolere ikka dandaannoni? Ejjeetto 4:14, 15 giddo Israeelete qeelle uyinohu Yihowa ikkinota sase hinge kulloonni. Konni daafira, Israeele qeelle adhitinotera uminsa fajjonni fulte olantinota 10,000 olamaasine naaxxitanno gede assannonsari dino.

10, 11. Meroozi yiniri maati? Insa rummoonnihu mayiraati?

¹⁰ Dibooranna Baaraaqi Yihowa qeelle uyinsa yannara iso guwisiꞌranni faarsino faarso giddo coyiꞌrinori dhagge ikkannoreeti, insa Yihowa sokkaasinchi, “Kaaliiqira haꞌlite wolqaataamo diina qasatenna, isi qote uurrate didagginona, Meroozi [daga] lowo geeshsha rumme!” yiinota coyiꞌrino.—Eje. 5:23.

¹¹ Meroozi daga rummoonni garinni raaphite baꞌukki digattino; hakko daafira, hakku katami hiikkoyetiro xa bande afa didandiinanni. Kuni katami, mannu olaho kaaꞌlamanno gede kakkayinsanni heeꞌnoonnite hattee yannara, coye dulli asse giwino manni heeꞌrinoho ikka? Sisaara hakko katami giddoonni hige xooqinoha ikkiro, hakko heeꞌranno manni iso saꞌꞌannota hoola dandee heeꞌrenni sammi yee agurino ikka? Kuni manni Yihowa mannu olaho kaaꞌlamanno gede koyisi yannara macciishshikki gatinohu hiitto ikkeeti? Insa qooxeessira heeꞌrannohu tonnu kumi manni olamate fulino. Meroozi daga, mase quuxxi yiinohu urungichu gaadisiisaanchi callichisi insa laꞌanna qachinsa giddoonni hige xooqanni saino gara heda dandaatto. Tini woleteemmero insa Yihowa hedinori woꞌmanno gede assatenna isi atoote afiꞌrate kaaꞌlitannonsate dancha farooti. Insa tenne quuxxote yannara mitore assa dandiite heedhenni assitukkinni gattinohu, affanni heedhenni coye dulli assitinohuraati ikka? Iyaeeli kayinni insawiinni horo baxxitinote; aante noo kiirora kulloonninte gede ise waajjitukkinni diina shitino.—Eje. 5:24-27.

12. Ejjeetto 5:9, 10 giddo Maganu mannira hiitti babbaxxitino lao noonsata kulloonni? Ninke tenne xaggenni maa rosa hasiissannonke?

 ¹² Ejjeetto 5:9, 10 giddo, Baaraaqi ledo olaho haꞌrino manninna haꞌrikkinni gatino mannira babbaxxitino lao noonsata kulloonni. Dibooranna Baaraaqi, ‘uminsanni kakkaꞌe’ mannu ledo olaho hadhinota “Israeelete ejjeetto” galattino. Insa bulla ‘harre gulufannohu’ naaxxaleessu manniwiinni horo baxxitinoreeti; qoleno, insa ‘gilaasete koorira [“kaajja dadora,” NW] ofoltannorinni’ woy dancha heeshsho heeꞌra hasidhannoriwiinni lowo geeshsha baxxitinoreeti. Tini ejjeetto Baaraaqi ledo hadhe kinna woꞌmitinohu Taaboori ilaaliranna sabbaawinohu Qishooni lagira olantino; qawaaxxote heeshsho heeꞌra doodhitinori “doogote hadhannori” kayinni hatto diassitino. Qawaaxxaame heeshsho heeꞌra hasidhinore baala ikkitonsa wodana assitanno gede kulloonninsa. Ee, insa Yihowara soqqamate faꞌnantinonsa faro sammi yite agurtinota heda hasiissinonsa. Insante gede yannankera Maganu looso woꞌma wolqansanni loossannokkirino tenne heda hasiissannonsa.

13. Roobeeli, Daaninna Aseeri gaꞌrera noonsa lao Zaabilooninna Niftaaleemi gaꞌrera noonsa laowiinni baxxitannohu hiittoonniiti?

¹³ Olaho uminsa fajjonni olamate fulturi, Yihowa bayira Magano ikkinota leellishannore illensanni laꞌino. Insa Yihowa uyinonsa qeelle mannaho kultanno wote laꞌinore coyiꞌra dandiitanno. (Eje. 5:11) Ejjeetto 5:15-17 giddo bande kulloonniti Roobeeli, Daaninna Aseeri gaꞌre kayinni, Yihowara soqqamantenni maalaamittete coye yaano hoshsha, howolonna malka roorsidhino. Zaabilooninna Niftaaleemi manni kayinni “lubbonsa mararikkinni” Dibooranna Baaraaqi kaaꞌlino. (Eje. 5:18) Yihowara uminsa fajjonni kae soqqaminonna soqqama giwino mannire kultanno xaggenni lowore ronseemmo.

14. Yannankara Yihowa aliidimma irkinseemmota leellisha dandiineemmohu hiittoonniiti?

¹⁴ Yannankera ninke Maganu aliidimma kaaꞌlate ola olama dihasiissannonke; ikkirono, waajjinummokkinni hattono diinaggaambe soqqamme Isi aliidimma irkinseemmota leellinsheemmo. Yihowa dirijjitera  uminsa fajjonni soqqamanno manni albinni roore hasiisanno. Lowo miliyoone ikkannohu labbaanna meya roduuwi baabbaxxitinota woꞌma yanna soqqansho eꞌꞌe soqqamanno; lawishshaho Beeteelete, Mangistete Addaraashe minatenna jajjabba gambooshshi bayicho towaatate looso loossanno. Qoleno, Hospitaalete Ledo Xaadissanno Komite giddonna jajjabba gambooshshe qineessitannota majjaha ikkinokki looso loossanno cimeeyye heda dandiitinanni. Yihowa umiꞌne fajjonni kaꞌine assitinannire baasa naadannotanna hawannokkita deꞌinoonte.—Ibi. 6:10.

15. Yihowa looso dulli assinoommokkitanna teꞌee afa dandiineemmohu hiittoonniiti?

¹⁵ Baalunku ninkeneeto togo yine xaꞌma hasiissannonke: ‘Wolootu lowo looso duqqitanna ani sammi yee noommo? Yihowara soqqamantenni roore maalaamittete coyiꞌra quwa sae illachishanni noommo? Yihowa aannoe looso ammanatenni hattono waajjummokkinni loosate Baaraaqi, Diboora, Iyaeelinna olaho fulihu 10,000 manni gede dandeemmore baala asseemmo? Loosoho yee wole katama woy wole gobba haꞌrate hedanni noommoha ikkiro, tini maateꞌya woy songo kaaꞌlitanno woy gawajjitanno gara huuccattotenni hedeemmo?’ c

16. Yihowa hooginori nookkiha ikkirono, ninke isira maa aa dandiineemmo?

¹⁶ Yihowa aliidimmasi irkinseemmo faro fanenke, ayirrisannonketa leellishino. Daawuloosi mannu ooso Maganoho finqiltanno gede assi yannanni kayise, mannu isi faale haꞌrara hasiꞌranno; ikkollana, ninke Yihowa gashshoote irkinseemmoha ikkiro ayera haꞌlineemmoro leellinsheemmo. Ammananke, hattono Yihowara ammanamme soqqammeemmo soqqansho Iso hagiirsiissanno. (Law. 23:15, 16) Ninke Yihowara ammanamme assineemmori, xonannosihura Sheexaaneho dawaro qolate kaaꞌlannosi. (Law. 27:11) Konni daafira, Yihowara ammanammeemmoha ikkiro isi lowo geeshsha naadannore uyinanni heeꞌnoommo yaate; tini isi lowo geeshsha hagiidhanno gede assitanno.

17. Ejjeetto 5:31 albillittete mayi ikkannota leellishshanno?

¹⁷ Muli yannara uullate aana baalunkurinni roore Yihowa aliidimma balaxisiisanno manni woꞌmanno. Hattee yanna quqquxamme agadhineemmo! Dibooranna Baaraaqi togo yee faarsino: “Kaaliiqa, baarigaarrakki baala togo ikkite baꞌo; ate baxxannori kayinni soodo arrishsho gede ikkite xabbo”; ninkerano insate gedee hedo noonke. (Eje. 5:31) Yihowa, Sheexaanu moohinota tenne alame hunanno yannara tini woꞌmitanno! Armagedooni oli hanafanno yannara, Yihowa diinnasi gudate ninke kaaꞌlo dihasiꞌranno. Hattee yannara ‘darga darganke calla amande’ sammi yine uurrine, Yihowa gatisannonke gara laꞌneemmo. (2 Dud. 20:17) Hakka geeshsha kayinni, waajjinummokkinni, hattono diinaggaambe Yihowa aliidimma irkinseemmota leellinsheemmoti lowo faro faꞌnante noonke.