1. Efesooni Sokka 6:10-13 yitanno garinni, Yihowa ninke daafira addinta hedannota leellishanno doogga giddo mitte maati? Xawisi.

 YIHOWA ninke daafira addinta hedannota leellishanno doogga giddo mitte, diinnanke ledo olammeemmo gede kaaꞌlasiiti. Qara diinnanke Sheexaanehonna durriisaho woy agaanintete. Yihowa tenne diinnanke daafira kule qorowisiisannonke; hattono insa ledo olamate hasiisannonkere aannonke. (Efesooni Sokka 6:10-13 nabbawi.) Yihowa aannonke kaaꞌlo adhineemmohanna woꞌmunni woꞌma iso addaxxineemmoha ikkiro, Daawuloosi qeela dandiineemmo. Ninkeno soqqamaasinchu Phaawuloosi gede beꞌe yinummokkinni, “Maganu ninke ledo heeꞌriro, qeelankera dandaannohu ayeti?” yine coyiꞌra dandiineemmo.—Rom. 8:31.

2. Konni birxichira maa ronseemmo?

² Addu Kiristaana ikkinoommo daafira, Daawuloosinna agaanintete daafira afate diquqquxammeemmo. Hatteentenni Yihowa daafira rosatenna isira soqqamate aana illachinsheemmo. (Far. 25:5) Ikkirono, Sheexaanu manna soꞌrisiisannota qara doogga afa hasiissannonke. Mayira? Tenne afanke Sheexaanu dogannonkekki gede kaaꞌlitannonke. (2 Qor. 2:11) Konni birxichira Sheexanunna agaaninte manna soꞌrisiisate horoonsidhannota mitte qara doogo ronseemmo. Hattono insa qeela dandiineemmo gara laꞌneemmo.

3-4. (a) Agaanintete loosi maati? (b) Agaanintete looso ammanannohu mageeshshi mannaati?

³ Sheexaanunna durriissa manna soꞌrisiissannoti qara doogo, agaanintete loosi widoonniiti. Agaanintete looso loossannori,  mannu afara woy assara dandaannokkire afa woy assa dandiineemmo yitanno. Lawishshaho, kiilaanonna ayyaanto albillittete yanna daafira afa dandiineemmo yitanno. Wolootu kayinni reyino manna coyishiisha dandiitannoha lawisate woꞌnaaltanno. Digintete looso loossannorinna manna bitidhannorino no. b

⁴ Agaanintete looso ammanannohu mageeshshi mannaati? Laatinete Ameerikiranna Karibiyani giddichuwara noote 18 gobbuwa giddo assinoonni xiinxallo leellishshanno garinni, sasu manni giddo mittu diginte, kiilonna bita ammananno; qoleno hakkeeshsha meddi yaanno manni ekera hasaawisa dandiinanni yee ammananno. Afirikahono 18 gobbuwa aana xiinxallo assinoonni. Tenne xiinxallo assinoonni manni giddo rooru kiilo ammananno. Heeꞌneemmowi ikkiwano ikkiro, agaanintete loosiwiinni xeertiꞌra hasiissannonke. Korkaatuno Sheexaanu ‘kalqe woy alame baala soꞌrisiisate’ qodhe kaino.—Aju. 12:9.

5. Yihowa agaanintete looso ma garinni laꞌꞌanno?

⁵ Yihowa ‘halaalu Maganooti.’ (Far. 31:5) Konni daafira isi agaanintete looso effiꞌre giwanno! Yihowa Israeelete dagara togo yiino: “Kiꞌne mereero oososi giire kakkalannohu, kiilaanchu, bitaamu, moora laꞌꞌannohu, qaallichu, woy gojaamu, golfa woshshannohunna ekera hasaawisannohu giddoꞌne horontanni heeꞌroonke. Konne coye assannoha baalanka Kaaliiqi dibaxanno.” (Mar. 18:10-12) Kiristaanu Yihowa Israeelete uyino Seeri hunda galannoha diꞌꞌikkino. Ikkollana, Yihowara agaanintete loosi daafira noosi lao xaano soorrantinokkita anfoommo.—Mil. 3:6.

6. (a) Sheexaanu manna gawajjate agaanintete looso horoonsiꞌrannohu hiittoonniiti? (b) Rosiisaancho 9:5 yitanno garinni reyino manni hiitto ikke no?

⁶ Yihowa agaanintete loosiwiinni xeertiꞌneemmo gede qorowisiisinonkehu Sheexaanu tenne hayyo horoonsiꞌre manna gawajjannota afino daafiraati. Sheexaanu agaanintete loosi widoonni ‘Reyino manni wole alame haꞌre heeꞌranni no’ yaannohanna wole togo kapho tareessanno. (Rosiisaancho 9:5 nabbawi.) Qoleno Sheexaanu mannu waajjannonna Yihowawiinni xeertiꞌranno gede assate agaanintete looso horoonsiꞌranno. Sheexaanu mixo agaanintete looso loossannori, Yihowa agurte busha ayyaanna addaxxitanno gede assate.

7. Yihowa maa rosiisannonke?

⁷ Aleenni laꞌnummonte gede, Yihowa Sheexaanu soꞌrisiisannonkekki gede kaaꞌlanno roso rosiisannonke. Hanni Sheexaanunna agaanintete ledo gaaramate assa dandiineemmoha mito coye laꞌno.

8. (a) Busha ayyaanna tareessitanno kapho giwa dandiineemmoti qara doogo hiitteeti? (b) Faarso 146:4 Sheexaanu reyitinori daafira kaphanno kapho xawo fushshitannohu hiittoonniiti?

⁸ Maganu Qaale nabbabbe, hattono hiince. Busha ayyaanna tareessitanno kapho giwa dandiineemmoti qara doogo tenneeti. Diina qeelate kaaꞌlitannote iibbado bise gede, Maganu Qaalino Sheexaanu kapho xawo fushshanno. (Efe. 6:17) Lawishshaho Maganu Qaali, ‘Reyitinori lubbote noo manni ledo hasaawa dandiitanno’ yine rosiinsanni rosi kapho ikkinota kulanno. (Faarso 146:4 nabbawi.)  Qoleno albillittete yanna daafira halaale ikkinore masaala dandaannohu Yihowa calla ikkinota xawisanno. (Isa. 45:21; 46:10) Ganyine Maganu Qaale nabbambeemmohanna hiincineemmoha ikkiro, agaaninte tareessitanno kaphinni didogammeemmo; hattono konne kapho effiꞌne gimbeemmo.

9. Agaanintete loosi ledo xaadooshshe afiꞌrinohu hiittoo assootiwiinni xeertiꞌra hasiissannonke?

⁹ Agaanintete loosi ledo xaadooshshe afiꞌrino coye baala gibbe. Addu Kiristaana ikkinoommo daafira, aye doogonnino agaanintete loosira dikarsammeemmo. Lawishshaho, reyitinore hasaawissannoriwa dihaꞌneemmo, woy aye doogonnino reyitinore hasaawisate diwoꞌnaalleemmo. Sai birxichira ronsummonte gede, ‘Reyitinori wolewa hadhe heedhanni no’ yaanno kaphi aana xintaminohu madaarshu budira dikarsammeemmo. Qoleno ayyaantonniwa woy kiilaanonniwa haꞌne albillittete yanna daafira afate diwoꞌnaalleemmo. (Isa. 8:19) Togoo assooti baalu buutote qarra abbannoha ikkinotanna Sheexaanunna agaanintesi ledo xaandeemmo gede assankera dandaannota anfoommo.

10-11. (a) Umi xibbi diro mitu manni halaale rositi maa assino? (b) Umi Qorontoosi 10:21 yitanno garinni umi xibbi diri Kiristaani lawishsha harunsa hasiissannonkehu mayiraati? Hatto assa dandiineemmohu hiittoonniiti?

¹⁰ Digintete loosi ledo xaadooshshe afiꞌrino uduunne hunne. Umi xibbi diro Efesooni katamira heeꞌrino manni giddo mitu agaanintete loosi ledo xaadooshshe afiꞌrinore assannoho. Insa halaale rossuti, konne assoote facci assite agurtino. “Lowo kiilaano kiilunnita maxaaffansa gamba assite mannu baalu albaanni giirtu.” (Soq. 19:19) Insa busha ayyaannawiinni xeertiꞌrate dandiiture baala assitino. Digintete looso loosate horoonsidhanno maxaaffa lowo woxe hirtannote. Ikkirono insa maxaaffansa mannaho diuyitino, woy wolootaho dihirtino, hatteentenni giirte huntino. Insa maxaaffate waagi aana ikkikkinni, Yihowa hagiirsiisate aana illachishshino.

 ¹¹ Ninke insa lawishsha harunsa dandiineemmohu hiittoonniiti? Digintete loosi ledo xaadooshshe afiꞌrinohu aye coyiwiinnino xeertiꞌranke hayyote. Budate xagicho, quraama woy kitaawa woy mannu busha ayyaanna gargadhate wodhannore baala giwa hasiissannonke.—1 Qorontoosi 10:21 nabbawi.

12. Boohaarsha lainohunni ninkeneeto mayine xaꞌma hasiissannonke?

¹² Boohaarsha qorophitine doodhe. Ateneeto togo yite xaꞌmi: “Interneetete aana digintete daafira kultanno maxaaffa, metseetta, woy birxichuwa nabbaweemmo? Macciishsheemmo muuziiqi, laeemmo filmenna televizhiinete pirogiraame woy godoꞌleemmoti viidiyote godoꞌle digintete loosi ledo xaadooshshe afidhinote? Boohaareemmo boohaarshi agaanintete loosi ledo xaadooshshe afiꞌrino? Lawishshaho bulgo, reedaana woy mannu wolqara aleenni ikkitino ogimma leellishanno? Digintete loosi, bita woy goju mittoreno gawajjannokkihu gede asse leellishanno?’ Hige mannu boohaarara yine kalanqanniti qalote xagge baala agaanintete ledo xaadooshshe afidhinote yaa diꞌꞌikkino. Boohaarsha doodhatto woyite Yihowa giwanno coyi baalunkuwiinni xeertiꞌrate murciꞌri. Maganu albaanni danchu tiiꞌꞌi heeꞌrannonke gede dandiinummore baala assa hasiissannonke.—Soq. 24:16. c

13. Maa assineemmokki gede qoropha hasiissannonke?

¹³ Agaanintete daafira kultanno xagge hasaabbinoonte. Tenne hajo lainohunni Yesuusi lawishsha harunsa hasiissannonke. (1 Phe. 2:21) Isi uullara daara albaanni iima heeꞌrino daafira, Sheexaanunna agaanintete daafira  lowore afino. Ikkollana, Yesuusi kuri busha ayyaanna assitinore dihasaawino. Yesuusi uullara dayinohu Yihowa daafira farciꞌrateeti ikkinnina, Sheexaane egensiisate diꞌꞌikkino. Ninkeno agaanintete daafira kultanno xagge tareessa agurre Yesuusi lawishsha harunsa dandiineemmo. Hatteentenni ‘wodaninke dancha coye malannota’ yaano halaalaancho ikkinota coyiꞌneemmorinni leellisha dandiineemmo.—Far. 45:1.

14-15. (a) Busha ayyaanna waajja hasiissannonkekkihu mayiraati? (b) Yannankera Yihowa mannasi agarannota leellishshanno taje maati?

¹⁴ Busha ayyaanna waajjitinoonte. Tenne heeꞌnoommo alame aana bushu coyi tuncu yaankera dandaanno. Dano, dhibbu, woy reyo hedeweelcho daggara dandiitanno. Ikkollana woꞌmante yannara togoo qarra abbitannori busha ayyaannaati yine heda dihasiissannonke. Qullaawu Maxaafi “yannanna hendoonnikki coyi baalunkura” iillankera dandaannota kulano. (Ros. 9:11, NW) Qoleno Yihowa agaanintetenni roortino wolqa noosita leellishino. Lawishshaho Maganu, Sheexaanu Iyyoobi shaanno gede difajjino. (Iyo. 2:6) Qoleno Yihowa Muse waro Gibitsete heedhanno bitaanonni roortino wolqa noosita leellishino. (Ful. 8:18; 9:11) Lowo ayirrinye adhinohu Yesuusino Yihowawiinni afiꞌrino wolqanni Sheexaanenna agaaninte iiminni uullara tuge insatenni roore wolqa noosita leellishino. Qoleno muli yannara, Yesuusi kuri busha ayyaanna mittono gawajja dandiitannokkiwa diimete tugannonsa.—Aju. 12:9; 20:2, 3.

¹⁵ Xaa yannara Yihowa mannasi agarannota leellishshannoti lowo taje no. Hanni mite mite laꞌno: Alame woꞌmate aana halaale sabbankanninna rosiinsanni heeꞌnoommo. (Mat. 28:19, 20) Konni garinni, Sheexaanunniha busha looso xawo fushshinanni heeꞌnoommo. Sheexaanu dandaannoha ikkoommero loonseemmo looso baala hoola hasiꞌrannoti egennantinote; ikkollana hoola didandaanno. Konni daafira busha ayyaanna waajja dihasiissannonke. “Isira gudisante aamantinore jawaachishate, Kaaliiqi baatto baala” illaallisannota anfoommo. (2 Dud. 16:9) Yihowara ammanammummo geeshsha, agaaninte geedote gawajjo abbitankera didandiitanno.

16-17. Busha ayyaanna giwate worbuulle ikka hasiissannota leellishanno lawishsha kuli.

¹⁶ Busha ayyaanna giwate worbuulle ikka hasiissanno; hakko iso ninkera heddanno jaallanke woy fiixinke ammananke giwannoha ikkiro hatto assa shota diꞌꞌikkitanno. Ikkirono, Yihowa togoo worbimma leellishshannore maassiꞌranno. Hanni Gaanu gobbara heedhannote Eriika yinanni rodoo lawishsha laꞌno. Ise Qullaawa Maxaafa xiinxalla hanaffinohu 21 diriti heedheeti. Annise agaanintete ledo xaadooshshe afidhino magansiꞌra giddo kakkalaancho ikke soqqamanno; konnira Eriika annise magannara kakkalloonni maala iti yinoonnise. Ise hakkonne maala ita gibbuta mininsa manni ise magannansa mishshinohu gede asse hedino. Insa magannansa dhiwana abbite guddannonke yee waajjino.

¹⁷ Eriika maate ise hakkonne bude harunsitanno gede giddeessate woꞌnaaltino; ise kayinni mininni fushshine shorrinoonniseha ikkirono, hakko budira dikarsantino. Mininni fushshine shorrinise yannara mitu roduuwi ise minensa heedhanno gede assino. Konni garinni Yihowa Eriikara haaro maate yaano ammanate roduuwa oye maassiꞌrinose. (Maq. 10:29, 30) Maatese ise beettonke diꞌꞌikkitino yite kaaddinose; hattono jajjase giirte huntino. Ikkirono Eriika Yihowara ammanantino, hattono cuuantino; ise xa woꞌma yanna suwisaancho ikkite soqqantanni no. Ise agaaninte waajjite sheke diyitino. Eriika maatese daafira coyidhanni togo yitino: “Maateꞌya Yihowa daafira ronse afiꞌnanni atootenna baxillaanchu Maganinkera soqqamme afiꞌnanni wolapho afidhanno gede barru baala huucciꞌreemma.”

18. Yihowa addaxxinummoro mayi atoote afiꞌneemmo?

¹⁸ Togoohu ammananke fonqolanno coyi baalunkura iilla hoogankera dandaanno. Ikkollana ninke baalunku busha ayyaanna giwanna Yihowa addaxxa hasiissannonke. Hatto assinummoro lowo atoote afiꞌneemmo; hattono Sheexaanu kaphinni didogammeemmo. Qoleno agaaninte waajjine sheke diyineemmo. Baalunkunni roore Yihowa ledo noonke jaaloomi kaajjanno. Rosaanchu Yaiqoobi togo yee borreessino: “Kunnira Maganoho ceamme; Daawuloosi kayinni gibbe; isino kiꞌnewiinni fafanno. Maganunniwa shiqqi yiiyye; isino kiꞌnewa shiqqi yaanno.”—Yai. 4:7, 8.