1-2. Yesuusi yaadinohu mayiraati?

 YESUUSI manna ikke uullate aana heeꞌrinohu jeefote barra baasa yaadino. Isi shiima yanna gedensaanni, bushu manni anga qarrame reyanno. Ikkollana isi yaadinohu reyannota afino daafira calla diꞌꞌikkino. Yesuusi Annasi baxanno; hattono iso hagiirsiisa hasiꞌranno. Yesuusi ammaname hakkonne fonqolo sairo, Sheexaanu Maganu daafira coyiꞌrinori kapho ikkinotinna ayirrinyu hasiisannosihu Yihowa ikkinoti leeltannota afino. Yesuusi mannano baxanno; isi ninke hegere heeshsho afiꞌra dandiineemmohu isi ammanaminoha ikke reyiro ikkinota huwatino.

² Yesuusi lowo geeshsha yaadinoha ikkirono, giddiidi keerisi dibaino. Isi soqqamaasinesira, “Keereꞌya eemmoꞌne” yiino. (Yoh. 14:27) Yesuusira “Maganu keeri” yaano mittu manchi Yihowa ledo muxxe jaalooma kalaqiꞌriro afiꞌrannoti giddiidi harshammo noosi. Kuni keeri, Yesuusira wodanisinna surresi geꞌanno gede assino.—Fil. 4:6, 7.

3. Konni birxichira maa xiinxallineemmo?

³ Ninkera Yesuusira iillino geeshshihu buutote qarri diꞌꞌiillannonke; ikkirono Yesuusi harunsaano baalantera fonqolu iillannonsa. (Mat. 16:24, 25; Yoh. 15:20) Konni daafira Yesuusi gede yaandeemmo woyiti heeꞌrara dandaanno. Ikkina quwa saꞌne yaandeemmokki gedenna yaaddo keerenke huntannokki gede maa assa dandiineemmo? Hanni Yesuusi uullate aana soqqami yannara assinoha sase coyenna fonqolu iillannonke woyite isi lawishsha harunsa dandiineemmo gara laꞌno.

4. Umi Teselonqe 5:17 yitanno garinni, Yesuusi uullate aana heeꞌrinohu jeefote barra duucha hige huucciꞌrinota leellishshanno lawishshuwa kuli.

⁴ Umi Teselonqe 5:17 nabbawi. Yesuusi uullate aana heeꞌrinohu jeefote barra duucha hige huucciꞌrino. Isi reyosi qaagooshshi ayyaana xinti woyite timahonna woyinete huuccino. (1 Qor. 11:23-25) Rosaanosi ledo Faasika ayirrissino bayichiwiinni hadhara albaanni insa ledo huuccatto assiꞌrino. (Yoh. 17:1-26) Hashsha rosaanosi ledo Geetesemaane yinanniwa mari yannara, hakko marro marro hige huucciꞌrino. (Mat. 26:36-39, 42, 44) Yesuusi reyara kae heeꞌre nafa huuccatto assiꞌrino. (Luq. 23:46) Isi hakko barra ikkinohu mittu mittunku coyi daafira Yihowa huucciꞌrino.

5. Yesuusi soqqamaasine iillinonsa fonqolo worbimmatenni qeelte saꞌꞌa hoogginohu mayiraati?

⁵ Yesuusi iillinosi fonqolo qeelanno gede kaaꞌlinosi coyi giddo mittu, Annisi kaaꞌlannosi gede huucciꞌrasiiti. Soqqamaasinesi kayinni hakko hashsha huccattotenni dijaattino. Hakko daafira, iillinonsa fonqolo worbimmatenni kaajjite saꞌꞌa didandiitino. (Mat. 26:40, 41, 43, 45, 56) Ninkeno iillannonke fonqolo ammanamme qeela dandiineemmohu Yesuusi gede ‘agurrummokkinni huucciꞌneemmoha’ ikkiro callaati. Ikkina mayi daafira huucciꞌra dandiineemmo?

6. Ammana keerinke baꞌꞌannokki gede kaaꞌlitannonkehu hiittoonniiti?

⁶ Yihowa “[Ammana] ledinke” yine huucciꞌra dandiineemmo. (Luq. 17:5; Yoh. 14:1) Sheexaanu Yesuusi harunsaano baala fonqolanno daafira ammana hasiissannonke. (Luq. 22:31) Qarru hoode hoodete iillannonke woyite ammana keerinke baꞌꞌannokki gede kaaꞌlitannonkehu hiittoonniiti? Ammana, fonqolo qeelate  wolqanke assitu geeshsha sharrammummo gedensaanni, qarranke Yihowara tuqqine agurreemmo gede assitannonke. Yihowara ninkenni lowo geeshsha roortino egennonna wolqa noosita addaxxineemmo daafira, giddoyidi salaame afiꞌneemmo.—1 Phe. 5:6, 7.

7. Roduu Rooberti woꞌnaalshinni maa rosootto?

⁷ Huuccatto aye geeshshi fonqoli iillinkerono, giddoyidi keerinke baꞌꞌannokki gede kaaꞌlitannonke. Hanni 80 diri balla ikkannosihu Rooberti yinannihu songote cimeessi lawishsha laꞌno. Isi togo yiino: “Filiphisiyusi Sokka 4:6, 7te noo amaale heeshshoꞌya giddo iillinoeha batinye fonqolo qeelate kaaꞌlitinoe. Angate anje amaddinoe woyiti no. Qoleno mite yanna geeshsha cimeessa ikke soqqamate qoossoꞌya hoogoommo.” Ikkina Rooberti giddoyidi keerisi baikkinni heeꞌranno gede kaaꞌlinosiri maati? Isi togo yiino: “Yaadeemmo woyite bayichonko huuccatto assiꞌreemmo. Marro marro hige huucciꞌrummo kiiro, giddoꞌya gabbi yitanno.”

8. Yohaannisi 8:29te kulloonni garinni, Yesuusi giddoyidi keere afiꞌranno gede kaaꞌlinosihu wolu coyi maati?

⁸ Yohaannisi 8:29 nabbawi. Yesuusi Annasi hagiirsiisanni noota afino daafira, dartu iillisi yannara nafa giddoyidi keerisi baikkinni heeꞌrino. Isi Maganoho hajajama qarra ikkitannosi gede assannori iillisi yannara nafa hajajamino. Yesuusi Annasi baxanno daafira heeshshosi diro woꞌma isira soqqamate aana illachishino. Isi uullara daara albaanni, qara loosaasincho ikke Maganoho soqqamino. (Law. 8:30) Qoleno uullate aana noo yannarano Annisire mannaho diinaggaawe rosiisino. (Mat. 6:9;  Yoh. 5:17) Kuni loosi Yesuusi lowo geeshsha hagiidhanno gede assinosi.—Yoh. 4:34-36.

9. Sabbakate looso diinaggaawe loosanke keerinke baikkinni heeꞌrate kaaꞌlitannonkehu hiittoonniiti?

⁹ Ninkeno Yihowara hajajammeemmohanna ‘Mootichu looso woꞌmanka woyite agurrummokkinni loonseemmoha’ ikkiro, Yesuusi lawishsha harunsinanni heeꞌnoommo. (1 Qor. 15:58) Sabbakate looso diinaggaambe loonseemmoha ikkiro, iillannonke qarrira gara ikkitino lao heedhannonke. (Soq. 18:5) Lawishshaho, duucha woyite sabbankanni xaandeemmo mannira ninkehunni roorino qarri iillannonsa. Ikkollana insa Yihowa baxxanninna amaalesi harunsitanni hadhanno woyite, heeshshonsa woyyaabbanno daafira hagiirraamma ikkitanno. Mannu konni garinni woyyaawanna laꞌnummo kiiro, Yihowa ninkeno towaatannonketa albinni roore addaxxineemmo. Iso addaxxanke giddoyidi keerinke baikkinni heeꞌneemmo gede kaaꞌlitannonke. Bayicho assidhino yaaddo amaddinosetinna tidhoommari dinoote yite heddannoti mitte rodoo tini halaale ikkitinota wodanchitino. Ise togo yitino: “Diinaggaawe sabbakeemma woyite giddoyidiꞌya harshammi yaanno, hattono roore hisataame ikkeemma. Korkaatuno soqqansho fuleemma woyite, albinni roore Yihowawa shiqoommata hedeemma.”

10. Birenda woꞌnaalshinni maa rosootto?

¹⁰ Hanni Birenda yinanni rodoo woꞌnaalsha laꞌno. Isenna meya qaaqqose buutote dhibbi (meltipili iskileroosisi) waadannonsa. Birenda milli yaa dandiitannohu bisu xeꞌne noonsari ofoltanno gaarenni callaati; qoleno kuni dhibbi isera wolqa quursannose. Ise dandiitanno woyite minunni mine hadhe soqqantanno; roore woyite kayinni farcidhannohu mannaho sokka borreessiteeti. Birenda togo yitino: “Tini alame noo geeshsha dhibbiꞌya hurannokkiha ikkinota ammane adhaꞌya, soqqanshote aana illachisheemma gede assitinoe. Isinni soqqameemma woyite, yaachishannoere haweemma. Korkaatuno woꞌmunni woꞌma illachisheemmahu songonke qoqqowira noo manna kaaꞌlate aanaati. Qoleno soqqansho albillittete hexxoꞌya qaageemma gede assitannoe.”

11-13. (a) Yesuusi soqqamaasinenna wolootu isira addu jaalla ikkitinota leellishshinohu hiittoonniiti? (b) Insa assitinori Yesuusira kaaꞌlinohu hiittoonniiti?

¹¹ Yesuusi uullate aana heeꞌre soqqami yanna baalantera ammanantino soqqamaasinesi addu jaallasi ikkitinota leellishshino. Insa “Mitu [jaali] fiixunni roore gamba yaanno” yitanno yaatto halaale ikkitinota leellishshino. (Law. 18:24) Yesuusi togoo jaallasi lowo geeshsha naadanno. Isi uullate aana soqqami yannara maalu roduuwisi giddo mittu nafa iso diammanino. (Yoh. 7:3-5) Isinni mitte yannara fiixisi iso wodana difayyino yee hedino. (Maq. 3:21) Yesuusi reyara albaanni noo hashsha ammanantino soqqamaasinesi daafira kayinni togo yiino: “Kiꞌne qarriꞌya yannara ane ledo kaajjitine uurritinoonni.”—Luq. 22:28.

¹² Yesuusi soqqamaasine iso koffi assitino yanna nooha ikkirono, isi insa loossino soꞌro aana ikkikkinni ammanansa aana illachishino. (Mat. 26:40; Maq. 10:13, 14; Yoh. 6:66-69) Yesuusi uullate aana heeꞌrinohu jeefote hashsha reyara albaanni konne ammanamino manna togo yiino: “Anniꞌyawiinni macciishshoommore baala kuloommoꞌne daafira, jaallaꞌya yoommoꞌne.” (Yoh. 15:15) Yesuusi jaalla isira jawaantete buicho ikkitinositi dihuluullissannote. Insa soqqanshosi yannara kaaꞌlitinosi kaaꞌlo, Yesuusi lowo geeshsha hagiidhanno gede assitinosi.—Luq. 10:17, 21.

¹³ Yesuusira soqqamaasinesino agurranna wolu labballunna meya jaalla noosi; kuni manni sabbakate loosono ikko wolere asse  kaaꞌlinosi. Insa giddo mitootu Yesuusi ledonsa sagaꞌlanno gede koyissannosi. (Luq. 10:38-42; Yoh. 12:1, 2) Wolootu kayinni ledosi hadhe woxinsanni Yesuusira hasiisannore wonshitannosi. (Luq. 8:3) Yesuusi dancha jaalla afiꞌrinohu isi umisi dancha jaala ikkino daafiraati. Isi jaallasira dancha coye assanno, hattono wolqansara aleenni ikkinore asse diyaannonsa. Yesuusi guuta ikkirono, guuntete xeꞌne noonsa jaallasi assitannosire naadanno. Insa Yesuusira giddoyidi keerisi baikkinni heeꞌranno gede kaaꞌlitinositi dihuluullissannote.

14-15. Dancha jaalla kalaqiꞌra dandiineemmohu hiittoonniiti? Togoo jaalla kaaꞌlitannonkehu ma garinniiti?

¹⁴ Dancha jaalla Yihowara ammanamme heeꞌneemmo gede kaaꞌlitannonke. Togoo jaalla afiꞌra dandiineemmoti qara doogo, ninke uminke dancha jaalla ikkate. (Mat. 7:12) Lawishshaho, Qullaawu Maxaafi ninkeneeto qooffantummokkinni “hoogginore” woy kaaꞌlo hasiissannonsare kaaꞌlineemmo gede jawaachishannonke. (Efe. 4:28) Songoꞌne giddo kaaꞌla dandaattohu no? Geedhimmatenni woy fayyimmate hoonginni kainohunni mininni fula dandiitannokkire mitore assite kaaꞌla dandaatto? Angate anje amaddinonsa maatera sagale aa dandaatto? jw.org^® webisayitenna JW Layibirerii yinanni appilikeeshiine horoonsiꞌnanni gara afoottoha ikkiro, wolootu songokki miillano horoonsidhanno gede kaaꞌla dandaatto? Woloota kaaꞌlate aana illachinsheemmoha ikkiro, albinni roore hagiirraamma ikkineemmo.—Soq. 20:35.

¹⁵ Konni garinni kalaqiꞌnoommo jaalla qarru yannara dodde iillitannonke; hattono giddoyidi keerinke baikkinni heeꞌneemmo gede  kaaꞌlitannonke. Eelihu Iyyoobi iillinosi qarra hasaaphanna macciishshinte gede, jaallankeno yaachishinonkere hasaaphineemmo woyite cincite macciishshitannonke. (Iyo. 32:4) Jaallanke assa hasiissannonkere kultankera agadhineemmokkiha ikkirono, Qullaawu Maxaafi aana xintantino amaale uyitannonke woyite macciishsha hasiissannonke. (Law. 15:22) Moote Daawiti jaallasi uyitinosi kaaꞌlo umosi heeshshi asse adhino; ninkeno naaxxine jaallanke uyitannonke amaale adha giwa dihasiissannonke. (2 Sam. 17:27-29) Addanko, togooti dancha jaalla Yihowa eltooti!—Yai. 1:17.

16. Filiphisiyusi Sokka 4:6, 7 kultanno garinni, giddoyidi keerinke baikkinni heeꞌra dandiineemmoti mitticho doogo maati? Xawisi.

¹⁶ Filiphisiyusi Sokka 4:6, 7 nabbawi. Yihowa isi aannonke keere afiꞌra dandiineemmohu “Kiristoosi Yesuusi” widoonni ikkinota kulinonkehu mayiraati? Korkaatuno geedannoha surretenna wodanu keere afiꞌra dandiineemmohu, Maganu loosi giddo Yesuusi qeechi maatiro huwantummoronna ammannummoro callaati. Lawishshaho, cubbinke baalunkura maaro afiꞌneemmohu Yesuusite wodote kakkalo widoonniiti. (1 Yoh. 2:12) Tenne afanke harshammi assitannonke! Yesuusi Maganu Mangiste Moote ikkino daafira, Sheexaanunna isi gashshino alame abbitinonke shetto baala hunanno. (Isa. 65:17; 1 Yoh. 3:8; Aju. 21:3, 4) Tini lowo geeshsha sheshifachishshanno hexxooti! Qoleno Yesuusi shota ikkinokki looso uyinonke; ikkirono isi alamete gumulo geeshsha ledonke heeꞌre kaaꞌlannonke. (Mat. 28:19, 20) Tenne afanke worbuulle ikkineemmo gede assitannonke! Harshammo, hexxonna worbimma surrete keerinke baikkinni heeꞌneemmo gede baasa kaaꞌlitannonke.

17. (a) Mittu Kiristaanchi giddoyidi keerisi baikkinni heeꞌra dandaannohu hiittoonniiti? (b) Yesuusi Yohaannisi 16:33te qaale eino garinni maa assa dandiineemmo?

¹⁷ Ikkina buutote fonqoli iillannohe woyite, keerikki baikkinni heeꞌra dandaattohu hiittoonniiti? Yesuusi assinore assatenniiti. Umihunni, huuccatto assiꞌri; qoleno baxi coyi tuncu yiiherono huucciꞌra agurtooti. Layinkihunni, coyi shota ikka hoogihero nafa, Yihowara hajajami, hattono diinaggaabbe sabbaki. Sayikkihunni, jaallakki uyitannohe kaaꞌlo adhi. Hatto assittoro, Maganu keeri surrekkinna wodanakki agaranno. Hattono Yesuusi gede aye fonqolono qeela dandaatto.—Yohaannisi 16:33 nabbawi.