Winisteni, hanni umo Maganu daafira afate sharramootto gara kulinke.

Lophoommohu Awustiraaliyaho Kuwinsilaandi yinanniwa irshaho noo mineeti; maatenkera ammaꞌno dinonsa. Heeꞌneemmohu xeertowa ikkino daafira, maateꞌya agurranna wolootu ledo hakkeeshshi geeshsha dixaadeemmo. Magano hasiꞌra hanafoommohu mitu 12 dirihu heeꞌreeti. Maganu isi daafira halaale afeemmo gede kaaꞌlaera huucciꞌroommo. Yannate gedensaanni irshunni fule Wodiidi Awustiraaliyira nooha Adeleedi yinanni qooxeessa haꞌrummo. Hakkiinni 21 dirihu heeꞌre Sidinii yinanni katama fooliishshote haꞌroommowa Paami ledo egennamummo; ise Biritaaniyu Israeele yinanni ammaꞌno harunsanno manni daafira kultue; tenne ammaꞌno harunsanno manni, Biritaaniyu daga biꞌre baꞌinote Israeelete gaꞌre widooti yee ammananno. Insa yitanno garinni, baꞌinota Israeelete gaꞌre yinanniri, 8^ki sani K.A. qafadante hadhinote Aliyye Israeelete tonne gaꞌreeti. Fooliishshotewiinni Adeleedi higummoti, mittu ledoꞌya loosanno manchira tenne hajo daafira kulummosi; isi hakkawoyite Yihowa Farciꞌraasine ledo Qullaawa Maxaafa xiinxalla hanafe no. Isi ledo shiima saate hasaambummo; roore hasaamboommohu Yihowa Farciꞌraasine ammaꞌno daafiraati; hakkiinni, anje heeꞌre huucciꞌroommo huuccattora dawaro afiꞌranni noommota huwatummo. Kalaqaanchiꞌyanna Mangistesi daafira halaale rosummo! “Lowo waaga afidhino inqu” afiꞌroommo!—Mat. 13:45, 46, NW.

Paami, atino tenne inqu hasiꞌra hanafoottahu anjekkinni kayisseeti. Afiꞌroottahu hiittoonniiti?

Lophoommahu Niwu Saawuzi Welsira Koofisi Harberi yinanniwa ammaꞌno noonsa maate giddooti. Anniꞌyanna amaꞌya, hattono amaꞌya anninna ama Biritaaniyu Israeele yinanni ammaꞌno harunsitannoreeti. Ane, maaꞌne rodooꞌyanna bayira rodooꞌya, hattono abbiꞌya ooso Maganu Biritaaniyu sircho wolu baalunkunni roorse laꞌꞌanno yine rosiinsanni  lossinoonninke. Ikkollana kulloonnieri ammansiisinoekki daafira, ayyaanaamittete gooroꞌya difuloomma. Tonaashoolu diriti heeꞌre Angilikaani, Baaptistinna Adiventiste, hattono wole beetekiristaanna haꞌroomma. Ikkollana insa ayyaanaamittete gooroꞌya fuleemma gede dikaaꞌlitinoe.

Yannate gedensaanni mininke manni ledo Sidinii haꞌne heeꞌra hananfummo; hakkiicho fooliishshote dayinohu Winisteni ledo egennamumma. Isi ledo ammaꞌnote daafira hasaambummo; isi aleenni qummi assinte gede, konni hasaawinni kainohunni Yihowa Farciꞌraasine ledo xiinxalla hanafi. Winisteni hakkuyi gedensaanni soyannoe sokka giddo lowo qummeeshsha borreesse soyannoe! Noore coyiꞌniro, umi qara tini yaachishshinoe, hattono mito woyite giirtannoe. Gale hosanni kayinni borreessannori halaale ikkinota wodanchumma.

Winisteniwa roore gamba yaate 1962nni Adeleedi haꞌrumma. Isi Toomaasinna Jaaniisi Isloomeni yinanni minaanninna minaama ledo heeꞌreemma gede qixxaawo assie; kuri roduuwi hakkawoyite Paappuwa Niwu Giinii misiyoone ikke soqqamannoreeti. Insa lowo danchumma leellishinoe; hatte yannara anera 18 dirolla ikkannoe; kuri minaanninna minaama Yihowa daafira lowore roseemma gede kaaꞌlinoe. Konni daafira anino Maganu Qaale xiinxalla hanafumma; qoleno shiima yanna giddo halaale afiꞌroommata huwatumma. Aninna Winisteni adhammummo gedensaanni woꞌma yanna soqqansho hananfummo; fonqolo ikkannori iillinkerono woꞌma yanna soqqansho giddo lowo atoote afiꞌnoommo. Tini soqqansho afiꞌnoommota muxxe inqu roore naandeemmo gede assitinonke.

Winisteni, hanni Yihowara soqqama hanafitto yannare kulinke.

Paami ledo adhammummohunni shiima yanna gedensaanni, Yihowa isira roore soqqammeemmosi gede ‘doogo faninke.’ (1 Qor. 16:9) Umo tenne doogo kulinonkehu songonkera woradu aliidi laꞌꞌaancho ikke soqqamannoho Jaaki Poorteri yinanni rodooti. (Xa isi ledo mitteenni Awustiraaleezhiyaho Sinu Biiro Komite miilla ikkine soqqammanni heeꞌnoommo.) Jaakinna minaamasi Rooziliini woꞌma yanna suwisaano ikkineemmo gede jawaachishinonke; woꞌma yanna suwisaano ikkine onte diro soqqammoommo. Lemiina honse diro ikkieta, aninna Paami Wodiidi Paasifike Giddichuwara woradu looso loonseemmo gede sonkinke; hakkawaro hatte giddichuwara loonsanni loosonke Fijii gobbati sinu biiro towaattanno. Kuri giddichuwa Ameeriku Samowa, Samowa, Kiribaati, Nauru, Niyuwe, Tokilawu, Tonga, Tuvaalunna Vanuwaatu yinannite.

Hatte yannara mite xeertote noo giddichuwara heeꞌranno manni Yihowa Farciꞌraasine huluullamanno daafira, hayyoota ikka hasiissinonke. (Mat. 10:16) Songuwa shiimmaadda ikkitino daafira, ninkera galleemmowa qixxeessa qarra ikkitannonsa. Konnira qooxeessu manni gashshannonke gede huucciꞌneemmo; insa woꞌmanka woyite danchumma leellishinonke.

Winisteni, ati tirote looso lowo geeshsha baxatto. Konne looso baxatto gede assinoheri maati?

Hatte yannara, Tonga giddichora heedhanno roduuwira Tonga Afiinni qixxeessinoonniti boode tiraaktuwanna buukileetuwa calla noonsa. Insa soqqantanno woyite manna xiinxallisate Ingilizete afiinni qixxaawinoha Hegere Heeshshowa Massanno Halaale yaanno maxaafa horoonsidhanno. Shoole lamala keeshshinohu cimeeyyete rosi mini yannara, qooxeessunniri sase cimeeyye Ingilizete Afoo gari geeshsha dandiitannokkiha ikkirono konne maxaafa Tonga Afiira qolte tirate sumuu yitu. Paami angatenni borreessinoonni borro kompiyuterenni borreessitu gedensaanni attammanni gede Ameerika sonkummo. Woꞌma looso sette lamala giddo loonse gundoonni. Tirroonni gari lowo geeshsha danchaho yinanniha ikka hoogirono, kuni maxaafi batinyu Tonga Afoo coyiꞌranno manni halaale rosanno gede kaaꞌlino. Aninna Paami tirote looso loonseemmokkiha ikkirono, kuni tunceenyi konne looso banxeemmo gede assinonke.

Paami, giddichuwate heedhinoonni heeshsho Awustiraaliyu ledo heewisiisatta woyite hiittooti?

Lowo geeshsha baxxitanno! Giddicho giddichote gari babbaxxinoha ikkirono, shekkeerete biinne, iibbillunna qiidu, yemahu, dhibbunna mite yannara qole sagalete anjenni qarrammoommo woyiti no. Wole widoonni kayinni, hawarranno woyite Samowa manni woshshanno garinni feeli yinanni mininkera  heeꞌne wuqiyaanoose laꞌneemmo woyite giddonke gabbi yitanno; feeli Poolineezhiyu qooxeessira mine miꞌninanni garaati; kuni buuyyo fukkinoonnihonna girgidda afiꞌrinokki mineeti. Hashsha aganu waraꞌa yee xawanno woyite, saattu haqqe, hattono wuqiyaanoosete aana ubbinoti aganu hincilaallo leeltanno. Togoota hagiirsiissanno coyibba laꞌneemmo woyite, hiincineemmo hattono huuccatto assiꞌneemmo; hakko daafira tini xeinonke coye agurre danchu coyi aana illachinsheemmo gede kaaꞌlitinonke.

Kuri giddichuwara baxisanno qaaqquullinni xaandeemmo; faranje ikkinoommo daafira insa seekkite laꞌannonke. Niyuwe daaꞌꞌantanni heeꞌneenna mittu shiimu qaaqqi Winisteni angara noo danancho amammadanni “Ordakki hiitto baxissaate” yiino. Qaaqqu hatto yiinohu kageeshshi danancho afiꞌrino manna lae egenninokki daafira yaannori baeennasiiti!

Hakkiicho rooru manni buxino gara laꞌnummoti lowo geeshsha dadillinoommo. Gobbansa biifado ikkiturono, akimete mininna anganni wayi hakkeeshsha bashilinoha diꞌꞌikkino. Ikkollana roduuwinke tennera diyaaddanno. Insa togoo heeshsho rossino. Maatensa ledo mitteenni heeꞌransanni, magansiꞌrate gamba yitanno bayicho afiꞌransanninna Yihowa guwisiꞌra dandaansanni hagiirraammaho. Insa lawishshi, ninkeno balaxisiisa hasiissannonke coye illachinsheemmonna bikku heeshsho heeꞌneemmo gede kaaꞌlinonke.

Paami, bashsho assite egennoottakkire assa lawishshaho baletenni waa hinkiiꞌlanna giira giidhite sagale qishiꞌra hasiissinohe woyiti noota kuloottanke. Hatto assa dandiittahu hiittoonniiti?

Anniꞌya qajeelsinoe daafira galaxxeemmasi. Isi lowoha dancha coye rosiisinoe; lawishshaho, giira giire sagale qishanna shiimu coyinni heeꞌra dandiinanni gara rosiisinoe. Mitte hinge Kiribaati yinanniwa towaantanni heeꞌne, buuyyo fukkinoonnihunna wayi giddonni fushshinoonni kinna qansoonnihu shiimu leemmu minira galloommo. Shiima sagale qishiꞌra hasiꞌroomma daafira boosaallo seekkiꞌrumma; hakkiinni kokonaatete qoshsha haqqete gede asse giidhumma. Waa dirrirammara mitte wayi balewa mare qooxeessu meenti ledo salfumma. Kuri meenti waa hinkiiꞌlate seendille lame meetire ikkannoha guunxote shaalado siiwo usurroonni haqqa horoonsiꞌranno; kuni haqqi qulxuꞌme woshshaaxxinanni siqqo lawanno. Ikkollana siiwote umoho manxaqqo ikkikkinni baalde usurroonni. Baalunku meenti tarinsa iillanno woyite, siiwo tugi gedensaanni iillitanno woyite baalde galchanno. Hakkiinni baalde haawiiteenna wayi woꞌmanno. Tariꞌya iilleenna woꞌnaalamma geeshsha, konni garinni waa hinkiila shota labbinoe. Siiwo duucha hige tugoommaha ikkirono, baalde waa haaꞌra gibbue! Baalunku meenti osoꞌli gedensaanni, mitte mancho kaaꞌlitinoe. Hakko qooxeessira heeꞌranno manni danchahonna shaqqaddaho.

Lamunku giddichuwate soqqamaꞌnenni hagiirraammaho. Hanni hakkawaro iillinoꞌneha mito baxxino coye kullenke.

Winisteni: Mito bude rosa shota diꞌꞌikkitinonke. Lawishshaho, roduuwu mininsara koyissannonke woyite, noonsa sagale baala gudisse shiqishshannonke. Umi qara, sagale insara gatisa hasiissannonketa dianfoommo. Hakko daafira shiqqino sagale mucci assine inteemmo! Budensa ronsummo gedensaanni kayinni sagale gatisa hananfoommo. Soꞌro loonseemmoha ikkirono, roduuwinke marartinonke. Qoleno insa towaatate lee agana keeshshine marreemmo kiiro lowo geeshsha hagiidhitanno. Hatte yannara hakko heedhanno roduuwi ninke agurranna wole Yihowa Farciꞌraasine diaffino.

Qoleno ninke hakkira haꞌranke lowore kaaꞌlitino. Batinyu qooxeessu mannira, kuri roduuwi harunsanno ammaꞌno hakko calla noota labbannonsa. Konni daafira, qooxeessu manni mittu soqqamaanchi minaamasi ledo wole gobbanni daye roduuwa towaatanna laꞌe hedonsa biddi assidhino, hattono maalaꞌlitino.

Paami: Kiribaatira shiimu roduuwi noota mitte songo towaantanni heeꞌneenna ikkinore horo dihaweemma. Hatte songora cimeessa ikke soqqamannohu Sinakayi Mateera yinanni rodii ninke towaatate dandiire baala assanno. Mitto barra isi qummiichote mitto quuphicho wore abbinke. Hakkiinni, “Kiꞌnera abboommo” yii. Hatte yannara lukkuwu quuphe shiqisha baxxino koyishshaati. Kuni shiima aamamooshshe ikkirono shaqqillunni uyinonke daafira tashshi yiinonke.

 Paami, shiimu diri gedensaanni umo kaoottata kuloottanke. Tenne xisso cincatta gede kaaꞌlinoheri maati?

Aninna Winisteni 1973nni Wodiidi Paasifikera heeꞌneenna goduwu gatie. Hakko daafira Awustiraaliya hingummo; hakkiinni shoolu agani gedensaanni umo kaumma. Tennera lamunku lowo geeshsha xissiisiꞌnoommo. Gale hosanni wodaniꞌya xissonni beya afiꞌroommoha ikkirono, woꞌmunni woꞌma sheshifatoommahu Dotteessa 15, 2009ta Agarooshshu Shae nabbawumma gedensaanniiti. Tenne metseetera “Nabbawaano Xaꞌmitanno Xaꞌmo” yaanno gafi hunda “Amate godowira heeꞌre reyino qaaqqira kaote hexxo noosi?” yitanno xaꞌmo fultino. Kuni birxichi, qaaqqinke heeshsho Yihowa anga noota kule sheshifachishinoe; Yihowa woꞌmanka woyite gara ikkinore assanno Maganooti. Yihowa baxillunni Beettisi “Daawuloosi looso diiganno” gede hajajanno; hakkawoyite tini busha alame madiissitinonke mada baala hurtanno. (1 Yoh. 3:8) Qoleno kuni birxichi Yihowa daga ikkankenni afiꞌnoommota muxxe “inqu” roore naadeemma gede assinoe! Maganu Mangiste hexxo hooggoommero tasinke bae hoogino!

Qaaqqinke bai gedensaanni, wirro woꞌma yanna soqqansho hananfoommo. Awustiraaliyu Beetelera boode agana soqqammummo gedensaanni wirro woradu loosira qollinke. Niwu Saawuzi Welsinna Sidinii gaxarrara shoole diro soqqammummo gedensaanni, 1981nni Awustiraaliyunnite sinu biirora [hatte yannara woshshinanni suꞌmaati] soqqammeemmo gede koyinsinke; hatte yannanni kayise hakko soqqammanni heeꞌnoommo.

Winisteni, Wodiidi Paasifikera soqqantanni afiꞌrootto woꞌnaalshi Awutiraaleezhiyunnite Sinu Biiro Komite miila ikkite soqqamate kaaꞌlinoheha lawannohe?

Ee, duucha doogganni kaaꞌlinoe. Umihunni, Awustiraaliyunniti sinu biiro Ameeriku Samowaranna Samowa loonsanni looso aleenni higge laꞌanno gede assinoonni. Hakkiinni Niwuzilaandennita sinu biiro Awustiraaliyunnite ledo mitte assinoonni. Xaa yannara, Awutiraaleezhiyunniti sinu biiro, Awustiraaliya, Ameeriku Samowa, Samowa, Kuuki Giddichuwa, Niwuzilaande, Niyuwe, Timoori-Leste, Tokilawunna Tonga mitteenni amaddinote; sinu biiro riqiwaancho ikke kuri gobbuwa giddo duucha towaatate qoosso afiꞌroommo. Giddichuwate soqqantannori ammanantino roduuwi ledo soqqamanni afiꞌroommo woꞌnaalshi, xa sinu biirora heeꞌre kuri roduuwira soqqameemmo woyite lowo geeshsha kaaꞌlannoe.

Jeefote, aninna Paami lowo diri albaanni uminke heeshshonni laꞌnoommo garinni Maganu daafira afa hasiꞌrannohu jajjabba manna calla diꞌꞌikkino. Wedellu, mininsa manni hasiꞌra hoogiro nafa “lowo waaga afidhino inqu” afiꞌrate sharramanno. (2 Mot. 5:2, 3; 2 Dud. 34:1-3) Yihowa ajuno akkaluno heeshsho afiꞌrara hasiꞌrannoha baxillaancho Magano ikkinota dihuluullammeemmo!

Aninna Paami 50 diri albaanni Magano hasiꞌra hananfummo yannara, maa afiꞌneemmoro dianfoommo! Maganu Mangiste halaali lowo waaga afidhino inqu gede ikkinoti huluullammannire diafidhino! Konni daafira, jeefote geeshsha tenne inqu cuꞌmiꞌne heeꞌrate murciꞌnoommo!