1. Baalanti Maganu soqqamaasine maa assa hasidhanno? Mayira? (Aaniidi qoolira noo misile lai.)

YESUUSI KIRISTOOSI harunsaanosi, “Hadhine gosa baala . . . rosaanoˈya assensa” yee hajajino. (Mat. 28:19) Ammanantinori Maganu soqqamaasine baalunku uyinoonninsaha konne looso woˈma giddonni “wonsha” woy umo fushsha dandiitanno gara rosa hasidhanno. (2 Xim. 4:5) Korkaatuno kuni loosi, wolu baalunkunni roorinohonna lowo geeshsha hasiisannoho; hattono wiinamme loosa hasiissannoho. Ikkollana, hasiˈnoommo geeshshi yanna soqqama qarra ikkitankera dandiitanno.

2. Soqqanshonkera guficho ikkannohu mitu coyi maati?

² Loosa hasiissannonkehu yannankenna wolqanke gudannohu wolu duuchu loosi no. Uminkeranna maatenkera hasiisannore wonshate barru giddo seeda saate loosa hasiissannonkeha ikkara dandaanno. Ninke woy maatenke miilla dhibbu waadannonsaha, yaaddo woy diru akalle amadddinonsaha ikkara dandaanno. Ikkina togoo fonqolo qeelle woˈma giddonni soqqama dandiineemmohu hiittoonniiti?

3. Yesuusi Maatewoosi 13:23te coyiˈrinorinni maa huwata dandiineemmo?

³ Heeshshonke gari Yihowara hasiˈnoommo geeshsha soqqammeemmokki gede guficho ikkinkero, hexxo mudha dihasiissannonke. Yesuusi, ninke baalunku Maganu Mangiste guma taalo laala dandiineemmokkita afino. (Maatewoosi 13:23 nabbawi.) Yihowa isira soqqamate dandiinummore baala assineemmota lowo geeshsha naadanno. (Ibi. 6:10-12) Wole widoonni kayinni, albinni roore soqqama dandeemmo yine hendeemmoha ikkara dandaanno. Konni birxichira heeshshonke giddo soqqansho balaxisiisa dandiineemmo gara,  heeshshonke bikkunnita assiˈra dandiineemmo garanna sabbakatenna rosiisate dandoonke woyyeessiˈra dandiineemmo gara ronseemmo. Balanxe kayinni, woˈma giddonni soqqamate yaa mayyaatero laˈneemmo.

4. Woˈma giddonni soqqamate yaa mayyaate?

⁴ Maganoho woˈma giddonni soqqamate yaa, sabbakatenna rosiisate looso wolqanke assitu deerrinni diinaggaambe loosate yaate. Ikkollana, hatto yaa seeda yanna soqqama calla diˈˈikkitino. Yihowa isira soqqammeemmo gede kakkayisannonkeri maatiro laˈˈanno. Yihowanna manna banxeemmo daafira, Kiristaanu soqqanshonke * woˈma lubbonni soqqammeemmo. (Maq. 12:30, 31; Qol. 3:23) Maganoho woˈma lubbonni soqqamate yaa, ninkeneeto gudinse uyine soqqamate yaate, yaano dhukinke assi deerrinni wolqanke gudinse isi soqqanshora horoonsiˈrate yaate. Uyinoonninkeha muxxe sabbakate looso naandeemmoha ikkiro, dancha duduwo dandaaminke deerrinni batinyu mannira kulate sharrammeemmo.

5-6. Mittu manchi yanna ajjusirono, sabbakate looso balaxisiisa dandaanno gara lawishshunni kuli.

⁵ Hanni rosiisa baxannoha mitto aja beetto hedi. Isi afiˈri yanna baalantera rosiisa baxanno. Yannate gedensaanni kuni beetti gillete rosi mine Qidaamenna Sambata rosiisa hanafi. Ikkollana afiˈranno woxi hasiisannosire wonshiˈrate diˈˈikkannosi. Konni daafira, isi Sanyotenni Arbete geeshsha sagalete mine woxe amadannoha ikke loosa hanafi. Isi roore yanna sayisannohu sagalete mine ikkirono, rosiisa roorse baxanno. Rosiisate dandoosi roore woyyeessiˈre woˈma yanna rosiisa halchanno. Ikkirono, shiima yannano ikkituro, afiˈri faro baala horoonsiˈre rosiisanno.

⁶ Hatteente gede, atino sabbakate looso hasiˈrootto geeshsha loosa dandaattokkiha ikkara dandaanno. Ikkirono konne looso baxatto. Konni daafira dandookki woyyeessidhe mannu wodana kakkayisanno garinni rosiisate sharramatto. Qoleno yannakki gudannohu lowo coyi noo daafira ‘Sabbakate looso  balaxisiisa dandeemmohu hiittoonniiti?’ yite hedattoha ikkara dandaanno.

7-8. Soqqanshote Yesuusite gedee lao heedhannonke gede assiˈra dandiineemmohu hiittoonniiti?

⁷ Yesuusira soqqanshote noosi lao ninkera dancha lawishsha ikkitannonke. Isi heeshshosi giddo Maganu Mangistere sabbakate looso balaxisiisino. (Yoh. 4:34, 35) Yesuusi dandaamisi deerrinni batinyu mannira sabbakate yee lowo xibbe ikkitanno kiilo meetire lekkatenni haˈrino. Isi afiˈrino tunceenya baala horoonsiˈre minunni mine haˈreno ikko mannu noowa baalankawa sabbakino. Yesuusi heeshshosi woˈmatenni soqqanshote aana illachishino.

⁸ Ninkeno Yesuusi lawishsha harunsine, aye woyiteno mannu heeˈrannowa baalawa dancha duduwo kulleemmo faro hasiˈneemmo. Wongeelu looso loosate yine uminke horo facci assine agurreemmo. (Maq. 6:31-34; 1 Phe. 2:21) Songote giddo mitootu baxxitino suwisaano, woˈma yanna suwisaano, woy kaaˈlaano suwisaano ikkite soqqantanno. Mitootu kayinni haaro qaale rossanno, hattono sabbakkannori roore hasiissannowa hadhe soqqantanno. Ikkollana roore anga wongeelu looso loossannori, songonsara heedhe wolqansa assitu geeshsha ganyite soqqamate sharrantanno halashshaanooti. Soqqammeemmo yanna ikkitu geeshshitano ikkituro, Yihowa wolqankera aleenni ikkinore asse diyaannonke. Isi ninke baalunku hagiirraamu “Maganire kulannohu ayirrado dancha duduwo” dudumbeemmo woyite soqqanshonkenni hagiirraamma ikkinammora hasiˈranno.—1 Xim. 1:11; Mar. 30:11.

9. (a) Phaawuloosi umisi looso loosiˈra hasiissinosiha ikkirono, sabbakate looso balaxisiisinohu hiittoonniiti? (b) Soqqamaasinete Looso 28:16, 30, 31 Phaawuloosira soqqanshote noosi lao kultannohu hiittoonniiti?

⁹ Soqqamaasinchu Phaawuloosi heeshshosi giddo soqqansho balaxisiise dancha lawishsha ikkinonke. Isi layinkimeeshsho misiyoone ikke haˈri yannara Qorontoosi katamira heeˈreenna hasiisannosire wonshiˈrate woxu hasiisinosi daafira mite yanna geeshsha dunkaana gowino. Ikkollana isi dunkaana gowa qaru loosisi gede asse dilaino. Isi konne looso loosinohu hasiisannosire afiˈre Qorontoosi heeˈranno mannira ‘woxe baantisikkinni’ dancha duduwo duduwateeti. (2 Qor. 11:7) Phaawuloosi boode yanna umisi looso loosinoha ikkirono, isi soqqanshosi balaxisiisino, hattono Sambatu kiiro sabbakino. Yannate gedensaanni kayinni albinni roore sabbakate loosi aana illachishino. Isi “‘Yesuusi Kiristoosaati’ yaanni isire Ayihudootaho farciˈranninna rosiisanni hosanno.” (Soq. 18:3-5; 2 Qor. 11:9) Yannate gedensaanni isi Roomaho lame diro usurame heeˈre, laˈˈasira daanno mannira sabbakino, hattono babbaxxitinota borrote sokka borreessino. (Soqqamaasinete Looso 28:16, 30, 31 nabbawi.) Phaawuloosi aye coyino soqqanshosira guficho ikkara diwodhino. Isi “Tenne soqqansho afiˈnoommo daafira . . . wolqa dibaˈneemmo” yee borreessino. (2 Qor. 4:1) Ninke Phaawuloosinte gede, uminke looso loosiˈra hasiissannonkeha ikkirono, heeshshonke giddo Maganu Mangiste looso balaxisiinseemmo.

10-11. Fayyimmate qarrinni kainohunni dhukinke ajirono woˈma giddonni soqqama dandiineemmohu hiittoonniiti?

¹⁰ Diru akkallenni woy fayyimmate hoongenni kainohunni albi geeshsha minunni mine haˈne sabbaka dandiineemmokkiha ikkiro nafa, wolu garinni soqqama dandiineemmo. Umi xibbi diro heeˈrino Kiristaani mannu heeˈrannowa baalawa sabbakino. Insa afidhu faro baalantera yaano minunni mine hadhe, gudumaaleho, woy sabbakate fultinokki yannara halaale rosiissino. (Soq. 17:17; 20:20) Seeda doogo haˈne anfeemmokkiha ikkiro, gudumaaleho woy doogote ofolline saˈˈaahu  higaahura farciˈra dandiineemmo. Qoleno uminke dilgo assiˈnanni heeˈne farciˈra, sokka borreessine woy silketenni farciˈra dandiineemmo. Batinye dhuku anje noonsa halashshaano konni garinni farcidhe lowo hagiirre afidhino.

¹¹ Fayyimmate qarri nooheha ikkirono, woˈma giddonni soqqama dandaatto. Xaano hanni soqqamaasinchu Phaawuloosi lawishsha laˈno. Isi “Tini jawa wolqa Maganunnite ikkinnina ninketa [diˈˈikkitino]” yiino. (2 Qor. 4:7) Isi mitte hige misiyoone ikke haˈri woyite dhiwamino daafira tini wolqa hasiissinosi. Phaawuloosi Galaatiyu Kiristaanira togo yee borreessino: “Dhiwame kiˈnewa heeˈraˈya, umo Dancha Duduwo kulammoˈnera doogo ikkitinoeta affinoonni.” (Gal. 4:13) Aterano fayyimmate qarri, akimootahonna towaatannohehu wolu mannira dancha duduwo kulatto faro fanahera dandaanno. Kuni manni roore woyite loosu basera hosanno daafira, halashshaano minunni mine hadhe soqqantanno woyite xaada hooggara dandiitanno.

12. Illenke “xunsite laˈannota” assiˈrate yaa mayyaate?

¹² Yesuusi togo yiino: “Mannimmate caabbichi illete; kunnira illeˈne keere [“xunsite laˈannota,” NW] ikkituro, mannimmaˈne baala xawaabba ikkitanno.” (Mat. 6:22) Yesuusi hatto yaasi mayyaate? Hatto yaa, hedonke billaallisanno coyiwiinni xeertiˈne heeshshonke bikkunnita assiˈra yaano mitte mixo aana illachishate yaate. Yesuusi umisi soqqanshote aana illachishe dancha lawishsha ikkinonke; rosaanosino woˈmante  yannara Yihowa soqqanshonna Mangistesi aana illachishshanno gede rosiisinonsa. Ninkeno ‘balanxe Maganu Gashshootenna keeraanchimmasi hasiˈne’ heeshshonke giddo Kiristaanu soqqanshonke illachinsheemmoha ikkiro, Yesuusi lawishsha harunsinanni heeˈnoommo yaate.—Mat. 6:33.

13. Soqqanshonke illachishate mayi kaaˈlankera dandaanno?

¹³ Soqqanshonke aana illachisha dandiineemmo doogga giddo mitte, bikku heeshsho heeˈrate; hatto assanke mannu Yihowa afannonna baxanno gede kaaˈlineemmota lowo yanna afiˈneemmo gede assitannonke. * Lawishshaho lamalate giddo seeda saate soqqama dandiineemmo gede, uminke looso loonseemmo yanna biddi assiˈra dandiineemmo? Yannanke gudannoha mito boohaarsha agura dandiineemmo?

14. Mittu minaanninna minaama albinni roore soqqanshonsa aana illachishate yee maa assino?

¹⁴ Iiliyaasi yinannihu songote cimeessinna minaamasi hatto assino. Iiliyaasi togo yiino: “Hakkawoyintenni suwisaano ikka hoongummorono, albinni roore sabbaka dandiineemmo doogo noota hendummo. Konni daafira hatto assate kaaˈlannonkeha shiima shiima coye biddi assiˈra hananfummo. Lawishshaho, fushshineemmo woxe ajinshummo, seeda saate boohaara agurrummo, hattono loosiisaanonke loonseemmo saate ajishshannonke gede xaˈmiˈnummo. Konni garinni hawarro hawarro soqqama, haammata manna Qullaawa Maxaafa xiinxallisa, hattono aganu kiiro lamalate giddo Sanyotenni Arbete geeshsha noo barri giddo lame hinge soqqansho fula hananfummo. Tini hagiirraamma ikkineemmo gede assitinonke!”

15-16. Umi Ximootewoosi 4:13, 15 kultanno garinni, sabbakatenna rosiisate dandoonke woyyeessiˈra dandiineemmohu hiittoonniiti? (“ Woˈma Giddonni Soqqamate Kaaˈlitannoe Mixo” yitanno saaxine lai.)

¹⁵ Woˈma giddonni soqqama dandiineemmoti wole doogo, sabbakate dandoonke woyyeessiˈrate. Mite ogimma noonsa manni egennonsanna dandoonsa lexxitanno gede woˈmanka woyite rosanna qajeela hasiissannonsa. Hatteente gede, sabbakate loosinkenni albinni roore dancha guma afiˈra dandiineemmo gara woˈmante yannara rosa hasiissannonke.—Law. 1:5; 1 Ximootewoosi 4:13, 15 nabbawi.

¹⁶ Ikkina sabbakatenna rosiisate dandoonke woyyeessiˈra dandiineemmohu hiittoonniiti? Lamalate kiiro assiˈneemmohu Kiristaanu Heeshshonna Soqqansho Gambooshshiwa uyinanninke biddishsha seekke harunsatenniiti. Konni gambooshshiwa sabbakate dandoonke dirimu dirimunni woyyeessiˈra dandiineemmo gara qajeelleemmo. Lawishshaho, gambooshshu liqambartichi kifile shiqishshino rosaanora amaale aanno woyite ninkeno soqqanshonke woyyeessiˈra dandiineemmo doogga ronseemmo. Aantanno yannara soqqansho fulleemmo woyite, tenne amaale harunsa dandiineemmo. Soqqanshonke gaamohu aliidi laˈˈaanchi kaaˈlannonke gede xaˈmiˈra woy gikki yiino halashshaanchi, suwisaanchi woy woradu aliidi laˈˈaanchi ledo soqqamankeno kaaˈlitannonke. Mitte mittenta Rosiisate Horoonsiˈneemmo Borro seekkine horoonsiˈra ronsummoro, sabbakatenna rosiisate loosi roore hagiirsiisannonke.

17. Maganoho woˈma giddonni soqqamakki mayi atoote afiˈratto gede assitannohe?

¹⁷ ‘Maganu ledo loosa’ lowo ayirrinyeeti! (1 Qor. 3:9) ‘Woyyanno coye woy roore hasiisanno coye badde affe’ Kiristaanu soqqanshokki aana illachishattoha ikkiro, Yihowa ‘hagiidhitanni magansiˈra’ dandaatto. (Fil. 1:10; Far. 100:2) Aye geeshshi qarri iilliherono woy dhuku anje amadduherono, Maganu soqqamaancho ikkootto daafira, isi woˈma giddonni soqqama dandaatto gede wolqa aannoheta huluullantooti! (2 Qor. 4:1, 7; 6:4) Nootto gari ikkihano ikkiro, woˈma giddonni soqqamitto geeshsha ‘umikkira kuˈlattore afiˈratto.’ (Gal. 6:4) Woˈma giddonni soqqamattoha ikkiro, Yihowanna manna baxattota leellishatto. “Hatto assittoro, ateneenna macciishshitannohere gatisatto.”—1 Xim. 4:16.