1-2. Yesuusi haruma haˈra dandiineemmohu hiittoonniiti? Lawishsha kuli.

HANNI jaallakki ledo waajjishanno qooxeessira sabbitino doogo hadhanni noottohu gede assite hedi. Albaˈneenni haˈranni noohu doogo seekke afino manchooti. Isi haˈranno woyite sabbu aana harumisi leellanno. Gedensaanni kayinni harumisi ikkinnina isi dileellannoˈne. Ikkirono waajjitine dijajjartinanni. Hatteentenni atinna jaallakki albaˈneenni haˈranni noo manchi haruma dandaamiˈne deerrinni seekkitine harunsitinanni!

² Heeˈnoommoti tini busha alameno addu Kiristaanira waajjishanno qooxeessi gedeete. Yihowa kayinni guuta Massagaancho Beettosi Yesuusi Kiristoosa uyinonke; ninke harumasi seekkine harunsa dandiineemmo. (1 Phe. 2:21) Pheexiroosi Yesuusa albaanni haˈranni doogo leellishanno manchi ledo heewisiisino. Massaganno manchi harumi leellannonte gede, Yesuusino lawishsha ikkinonke. Hanni xa Yesuusi haruma haˈrate yaa mayyaatero, isi haruma haˈra hasiissannonkehu mayiraatironna hatto assa dandiineemmohu hiittoonniitiro laˈno.

3. Mittu manchi haruma haˈrate yaa mayyaate?

³ Mittu manchi haruma haˈrate yaa mayyaate? Qullaawu Maxaafi giddo “qaafa” woy “lekka” yaanno qaale mittu manchi assoote kulate horoonsiˈnoonni woyiti no. (Kal. 6:9; Law. 6:18) Mittu manchi heeˈranno heeshsho harumisi ledo heewisiisa dandiinanni. Hakko daafira mittu manchi haruma haˈrate yaa isi lawishsha harunsate yaate.

4. Yesuusi haruma haˈrate yaa mayyaate?

 ⁴ Ikkina Yesuusi haruma haˈrate yaa mayyaate? Haranchunni isi lawishsha harunsate. Soqqamaasinchu Pheexiroosi cuˈmote qummeeshshira, Yesuusi iillinosi qarra dandee sae dancha lawishsha ikkinonketa coyiˈrino; ikkirono Yesuusi faale haˈra dandiineemmoti wole batinye doogga no. (1 Phe. 2:18-25) Yesuusi heeˈrino heeshsho woˈmantenni yaano coyiˈrinorinna assinori baalunkunni dancha lawishsha ikkinonke.

5. Guuntete xeˈne noonkere ikkinummorono Yesuusi lawishsha harunsa dandiineemmo? Xawisi.

⁵ Guuntete xeˈne noonkere ikkinummorono Yesuusi lawishsha harunsa dandiineemmo? Ee dandiineemmo. Guuntete xeˈne noonkere ikkinoommo daafira Yesuusi lawishsha woˈmunni woˈma harunsa dandiineemmokkiti egennantinote. Ikkollana dandaaminke deerrinni isi faale haˈrate woˈnaalleemmoha ikkiro, soqqamaasinchu Yohaannisi “Kiristoosi heeˈrino garinni [heedhe]” yee amaalinonke amaale harunsinanni heeˈnoommo.—1 Yoh. 2:6.

6-7. Yesuusi haˈruma haˈra Yihowawa shinqeemmo gede assitannonke yineemmohu mayiraati?

⁶ Yesuusi haruma haˈra Yihowawa shinqeemmo gede assitannonke. Hatto yineemmohu mayiraati? Umihunni, Yesuusi Magano hagiirsiisanno garinni heeˈra dandiineemmo gede kaajja lawishsha ikkinonke. (Yoh. 8:29) Hakko daafira, Yesuusi haruma haˈnummoro Yihowa hagiirsiinseemmo. Iimi Anninke isi jaala ikkate dandiiture baala assitannoriwa shiqannota addaxxa dandiineemmo.—Yai. 4:8.

⁷ Layinkihunni, Yesuusi guutu garinni Annisi lawishsha harunsino. Yesuusi, “Ane afinohu annaˈyano afino” yiinohu iseraati. (Yoh. 14:9) Yesuusi dhiigu amadino mancho mararino, dhibbu waadannose mancho qarri leellinosi  hattono shiidhe xissiisidhinore mararinonsa; ninkeno isi lawishsha harunsine mannaho togoo akatta leellinsheemmoha ikkiro Yihowa lawishsha harunsinanni heeˈnoommo. (Maq. 1:40, 41; 5:25-34; Yoh. 11:33-35) Yihowa lawishsha harunsinummo kiiro albinni roore isiwa shinqeemmo.

8. Yesuusi haruma haˈra tenne alame ‘qeelleemmo’ gede kaaˈlitannonke yineemmohu mayiraatiro xawisi.

⁸ Yesuusi haruma haˈra tini busha alame hedonke billaallissannokki gede kaaˈlitannonke. Yesuusi uullate aana heeˈrinohu jeefote hashsha “Ani tenne gobba [alame] qeeloommo” yiino. (Yoh. 16:33) Isi hatto yaasi tini alame hedosi huntara hattono mixosinna assootesi soorritara wodhinokkita leellishshanno. Yesuusi uullara dayinohu mayiraatiro horo dideino; isi dayinohu Yihowa suˈmi qullaawanno gede assateeti. Ninkena? Tenne alamera hedonke billaallitanno gede assara dandaannohu lowo coyi no. Ikkirono Yesuusi gede Yihowa fajjo assate illachinshummoro ninkeno tenne alame ‘qeelleemmo.’—1 Yoh. 5:5.

9. Hegere heeshsho doogonni fullummokkinni heeˈrate maa assa hasiissannonke?

⁹ Yesuusi haˈruma haˈra hegere heeshsho afiˈnanni gede assitanno. Mittu dureessu wedellichi hegere heeshsho afiˈrate maa assa hasiissannosiro Yesuusa xaˈmita isi, “Hoodeˈya amo!” yiinosi. (Mat. 19:16-21) Yesuusi isi Kiristoosa ikkinota ammanannokkihu mitu Yihudu mannira togo yiino: “Geˈreewiˈya . . . hoodeˈyano haˈranno. Ani insara hegere heeshsho eemmo.” (Yoh. 10:24-29) Sanihediriini shongo miila ikkinohu Niqoodimoosi Yesuusi rosiisannore afa hasiˈrino; Yesuusi isira togo yiinosi: “[Ane] ammaˈninohu baalu hegere heeshsho afiˈranno.” (Yoh. 3:16) Yesuusa ammanneemmota leellisha dandiineemmohu isi coyiˈrenna lawishsha ikke rosiisinonkere harunsineeti. Hatto assineemmoha ikkiro, hegere heeshsho doogonni fullummokkinni heeˈneemmo.—Mat. 7:14.

10. Yesuusa seekkine afate maa assa hasiissannonke? (Yohaannisi 17:3)

¹⁰ Yesuusi haruma haˈnammora albaanni balanxe iso afa hasiissannonke. (Yohaannisi 17:3 nabbawi.) Yesuusa “afa” mitte hinge calla assine agurrannire diˈˈikkino. Iso albinni roore egennate yaano akattasi, hedosinna heeshshosi daafira afate sharrama hasiissannonke. Halaalu mine keeshshinoommo diri ikki geeshshihano ikkiro Yihowanna Beettosi roore afate agurrummokkinni sharrama hasiissannonke.

11. Shoole Wongeelluwa maa amaddino?

¹¹ Yihowa Beettosi anfeemmo gede kaaˈlate, Qaalisi giddo shoolu Wongeelli heeˈranno gede assino. Kuni Wongeelli Yesuusi heeshshorenna soqqanshore kultanno xagge amadino. Tenne xaggenni Yesuusi coyiˈrinore,  assinorenna macciishshaminosiri maatiro ronseemmo. Kuni shoolunku maxaafi Yesuusi lawishsha seekkine hendeemmo gede kaaˈlannonke. (Ibi. 12:3) Tini maxaaffa Yesuusi haruma leellishshanno yaa dandiinanni. Hakko daafira kuri Wongeelluwa xiinxalline Yesuusa albinni roore afa dandiineemmo. Togo assanke isi faale harunsate kaaˈlitannonke.

12. Wongeelluwatenni woˈma horo afiˈra dandiineemmohu hiittoonniiti?

¹² Wongeelluwatenni woˈma horo afiˈrate nabbawatenni sainore assa hasiissannonke. Kuri Wongeelluwa seekkine xiinxallatenna hiincate yanna gaaˈma hasiissannonke. (Iyyaasu 1:8te ledo heewisiisi.) Hanni Wongeelluwa hiincatenna nabbamboommore loosu aana hosiisate kaaˈlitannonketa lame hedo laˈno.

13. Wongeelluwate giddo noo xagge xabbe leeltannohe gede assiˈra dandaattohu hiittoonniiti?

¹³ Umihunni, Wongeelluwate giddo noo xagge xabbe leeltannohe gede assiˈri. Hedate dandookki horoonsidhe ikkanni noore laˈˈate, macciishshatenna xaggete giddo kulloonni mannira macciishshaminonsare wodanchate woˈnaali. Togo assate Yihowa dirijjite qixxeessitinota xiinxallate kaaˈlitanno borro horoonsiˈri. Nabbabbanni nootto xaggera qooxeessaho noo hedo xiinxalli. Xaggete giddo kulloonni manninna bayichi daafira ledde afate woˈnaali. Nabbabbanni nootto xagge wolu Wongeelli giddo kulloonnite ledo taashshite lai. Mito woyite mittu Wongeelli giddo xawinse kulloonnikki xagge wolu Wongeelli giddo xawinse kullanni.

14-15. Wongeellu giddonni ronsommore loosu aana hosiisate maa assa hasiissannonke?

¹⁴ Layinkihunni, Wongeellu giddonni rosoottore loosu aana hosiisi. (Yoh. 13:17) Wongeellu giddo noo xagge seekkite xiinxallittohu gedensaanni ateneeto togo yite xaˈmi: ‘Tenne xagge giddo ani harunsa dandeemmo hedo no? Tenne xagge horoonsiˈre woloota kaaˈla dandeemmohu hiittoonniiti?’ Tenne xagge horoonsidhe kaaˈla dandaatto mancho  hedi; hakkiinni maltino yannara baxillunninna hayyotenni rosoottore kulisi.

¹⁵ Hanni tenne lamenta hedo harunsa dandiineemmo gara leellishanno lawishsha laˈno. Yesuusi qullaawu mini giddo lainote buxicho gunnitte xagge xiinxallineemmo.

16. Maarqoosi 12:41 noo xagge giddo ikkara dandaannori maatiro xawisi.

¹⁶ Xagge xabbe leeltannohe gede assiˈri. (Maarqoosi 12:41 nabbawi) Ikkanni noore hedi. Yanna Niisaani 11, 33 M.D.; Yesuusi reyara mitte lamala ikkitannokki yanna gatte no. Yesuusi hakko barra qullaawa mine rosiisanni hosino. Ikkirono gibbannosiri ammaˈnote massagaano wotto wortinosi. Hakkuyira albaanni insa giddo mitu loososi loosannohu ayi uyinosi silxaanenniitiro xaˈmitinosi. Mitootu qolte dawaro qole diafanno yite heddanno gedee xaˈmo xaˈmate woˈnaaltino. (Maq. 11:27-33; 12:13-34) Hakkiinni Yesuusi qullaawu mini giddo noote wole basewa mari. Kuni bayichi Meentu Yoo Mine yine woshshinanniwa ikkikkinni digatino; isi hakko heeˈre mannu woxe tuganno saaxine laˈˈa dandaanno. Isi mannu woxe fushshinanni saaxine giddo woxe woranna lai. Yesuusi lowohu dureeyye manni saantuwa saaxinete tuganna laino. Isi ofollinohu tunganni saantuwa qililli yitannohu macciishshamannowa ikkara dandaanno.

17. Maarqoosi 12:42 kulloonniti buxicho gunnitte maa assitino?

¹⁷ Maarqoosi 12:42 nabbawi. Hakkunni gedensaanni Yesuusi mitte mancho lai. Ise ‘buxicho gunnitteeti.’ (Luq. 21:2) Isera heeshsho lowo geeshsha qarraho; hattono heeˈrate hasiisannosere nafa afiˈra qarra ikkitinoseha ikkara dandaanno. Ikkirono ise woxe tunganni saaxinewa marte mannu afikkinni lame shiimaadda saante tuggu; tuggino saantuwa hakkeya qililli nafa yitinokkiha ikkara dandaanno. Yesuusi ise hatte yannara horoonsiˈnannita lame lepiteni yinannita shiimaadda saantuwa tugginota afino. Tini saantuwa rakasunni hidhinannita mitte gurraicho hidhate nafa diˈˈikkitannote.

18. Maarqoosi 12:43, 44 kultanno garinni Yesuusi gunnitte mancho uyitino woxi daafira mayino?

¹⁸ Maarqoosi 12:43, 44 nabbawi. Yesuusi tini gunnitte assitinore lae lowo geeshsha dhagge assiˈrino. Hakkiinni rosaanosi woshshe buxicho gunnitewa hige coyiˈranni togo yiinsa: “Woxe tugi manni baalunkunni aleenni, tini gunnitte roorsite uyitino. Wolu manni baalu [roorenkanni dureeyye], ikke gatinosihu giddonni uyino. Ise kayinni buxxe heedhenni, mittoreno gatisidhukkinni noosere raabbe uyitino.” Tini gunnitte mancho nooseha tayisse uyitinohu Yihowa towaatannoseta addaxxitino daafiraati.—Far. 26:3.

19. Yesuusi buxicho gunnitte daafira coyiˈrinorinni hiikkonne kaajja roso ronseemmo?

¹⁹ Tenne xaggenni rosoottore loosu aana hosiisi. Ateneeto togo yite xaˈmi: ‘Yesuusi buxicho gunnitte daafira coyiˈrinorinni maa roseemmo?’ Tenne gunnitte mancho daafira hedi. Ise anga assitoommesero Yihowara hakkiinni roorsite aa hasidhannoti dihuluullissannote. Ikkirono ise dandiiture baala assitino; Yihowara aate wolqase assitu geeshsha sharrantino. Yesuusi ise uyitinore Annisi lowori gede asse laˈˈannota afino. Tennenni maa ronseemmo? Yihowa woˈmu wodaninkenninna woˈma lubbonkenni soqqammeemmosiha ikkiro hagiidhanno. (Mat. 22:37; Qol. 3:23) Isira soqqamate dandiinummore baala assineemmota laˈˈanno woyite Yihowara tashshi yaannosi! Tini yannankenna wolqanke dandiinummo deerrinni Yihowa magansiˈrate lawishshaho soqqansho fulatenna gambooshshe  haˈrate horoonsiˈneemmo gede assitannonke.

20. Gunnitte manchore kultanno xaggenni rosoottore loosu aana hosiisa dandaattohu hiittoonniiti? Lawishsha kuli.

²⁰ Gunnitte mancho xaggenni rosoottore loosu aana hosiisa dandaattohu hiittoonniiti? Assitanni noori Yihowa hagiirsiisannota kulittonsaro jawaattara dandiitanno roduuwa hedi. Lawishshaho, wolqate anjenni woy fayyimmate hoongenni kainohunni Yihowara albi geeshsha soqqama hooggino daafira ‘Waagu dinoe’ yite heddannoti afoottoti jawa rodoo no? Woy darga assiˈrino dhibbinni kainohunni Gambooshshu Addaraashe haˈre gambooshshe ganye assiˈra hoogino rodii no? ‘Dhaawanno’ coye coyidhe togoo roduuwa kaaˈla dandaatto. (Efe. 4:29) Buxicho gunnittere kultanno xaggenni rosoottoha jawachishanno roso kulattonsara dandaatto. Ati kulattonsati jawaachishshanno hedo, woˈma giddonkenni soqqammummosiro Yihowa hagiidhannota qaagganno gede assitannonsa. (Law. 15:23; 1 Tes. 5:11) Wolootu Yihowara uyidhannori shiimare lawiro nafa, isira wolqansa assitu geeshshire uyitanni noo daafira galatattonsaha ikkiro, Yesuusi lawishsha seekkite harunsitanni nootto.

21. Maa assate murciˈrootto?

²¹ Yihowa Wongeelluwate giddo Yesuusi daafira lowore borreessiisino daafira galanteemmosi; mayira yiniro kuri Wongeelluwa Yesuusi haˈruma haˈneemmo gede yaano isi lawishsha seekkine harunsineemmo gede kaaˈlitannonke. Hojju xiinxallo woy Maatete Magansiˈra assidhinanni yannara kuri Wongeelluwa xiinxalla dandiitinanni. Xiinxallonkenni horo afiˈrate, xagge xabbe leeltannonke gede assiˈranna ronsoommore loosu aana hosiisa hasiissannonketa deˈnoonke. Assineemmorinni Yesuusi faale haˈra hasiissannonke; qoleno isi coyiˈrinore macciishsha hasiissannonke. Aananno birxichira Yesuusi reyara albaanni coyiˈrinorinni maa ronseemmoro laˈneemmo.