Yesuusi reyara albaanni Daawiti Faarso 22:1te coyiˈrinore qummi assinohu mayiraati?

Yesuusi reyara albaanni coyiˈrinori giddo mitte, Maatewoosi 27:46te noo hedooti; qummeeshshu “Maganoˈya, Maganoˈya, mayira agurittoe?” yaanno. Yesuusi hatto yee coyiˈrasi, Faarso 22:1te faarsaasinchu Daawiti coyiˈrinori woˈmanno gede assitino. (Maq. 15:34) Yesuusi hatto yee coyiˈrinohu Yihowara koˈmeeti woy shiima yanna geeshshano ikkiro ammanasi shoshshoggitino daafiraati yine heda digaraho. Yesuusi reya hasiissinosihu mayiraatiro seekke afino; qoleno reyate maahoyye yiino. (Mat. 16:21; 20:28) Hattono reyanno yannara, Yihowa isira agarooshshu ‘huxxa ikka’ agura hasiissannosita afino. (Iyo. 1:10) Yihowa, Yesuusa shinanni gari ikkihano ikkiro, isi woˈmunni woˈma ammanaminoha ikkinota leellishanno gede fajjino.—Maq. 14:35, 36.

Ikkina Yesuusi tenne faarsora noo hedo coyiˈrinohu mayiraati? Tenne daafira woˈmunni woˈma anfoommokkiha ikkirono, hanni isi hatto yiinohu mayira ikkara dandaannoro laˈno. *

Yesuusi hatto yee coyiˈrinohu, Yihowa mereero eˈˈe reyotenni gatisannosikkita xawisateeti ikka? Yesuusi Yihowa kaaˈlo nookkiha wodo ikka hasiissinosi. Isi “baalunku daafira” reya hasiissinosi.—Ibi. 2:9.

Isi tenne faarso giddonni boodere qummi asse coyiˈrinohu, mannu woˈma faarso qaaganno gede assateeti ikka? Hakka waro Yihudu mannira faarsote maxaafa wodanaho wodhate rosichi noonsa. Insa mitte faarso giddonni mitte kiiro  qummi assiniro woˈma faarso qaaggara dandiitanno. Yesuusi hatte faarso qummi assinohu isera ikkiro, Yihudu wido ikkitino harunsaanosi hatte faarsora kulloonnita Yesuusi reyo ledo xaadooshshe afidhino masaalo qaagganno gede kaaˈlinonsaha ikkara dandaanno. (Far. 22:7, 8, 15, 16, 18, 24) Qoleno hatte faarso jeefora noo hedo, Yihowara guweenyu hasiisannositanna isi uulla woˈmate Moote ikkinota qaagganno gede assitannonsa.—Far. 22:27-31.

Yesuusi Daawiti coyiˈrinore qummi assinohu, beebbaataamo ikkinota xawisateeti ikka? Yesuusi reyara albaanni seerimale kassanse Magano xonino yine yoo yinoonnisi. (Mat. 26:65, 66) Yesuusi hajo laˈnoonnihu hashsha gawa gawa assineeti; qoleno tini hakkawaro harunsinanni wodho ledo sumuu diyitannote. (Mat. 26:59; Maq. 14:56-59) Konnira Yesuusi Faarso 22:1te noo hedo qummi assi woyite “Maganoˈya, Maganoˈya, hunoommori nookkiha mayira agurittoe?” yaanni noohu gedeeti; isi hatto yiinohu, beebbaataamo ikkinota kulate ikkara dandaanno.

Yesuusi Daawiti coyiˈrinore qummi assinohu, isono Maganu giwinosikkita xawisateeti ikka? Yihowa Daawitira qarru iillanno gede fajjinoha ikkirono, tini iso giwinota leellishshannota diˈˈikkitino. Daawiti xaˈmino xaˈmo ammana ajjinosita leellishshannota diˈˈikkitino. Daawiti hatto yee xaˈmihu gedensaanni, Yihowa mannasi gatisannotanna iso woˈmanka woyite maassiˈrannosita addaxxannota coyiˈrino. (Far. 22:23, 24, 27) Hatteente gede, “Daawiti Beetti” Yesuusino qarru haqqira shetinoha ikkirono, tini Yihowa Yesuusa giwinota leellishshannota diˈˈikkitino.—Mat. 21:9.

Yesuusi hatto yiinohu, woˈmunni woˈma ammanaminoha ikkinota leellishanno gede Yihowa iso agara agurinotera xissiisiˈrinota xawisateeti ikka? Yihowa umo Beettisi qarramaranna reyara dihedino. Yesuusi reya hasiissinosihu Addaaminna Heewani finqilino daafiraati. Yesuusi huninori dino; ikkollana Sheexaanu kayisino xaˈmora dawaro qolatenna mannu ooso hoogginore wirro afidhanno gede wodo ikkate isi qarramanna reya hasiissinosi. (Maq. 8:31; 1 Phe. 2:21-24) Kuni ikkara dandaannohu, Yihowa shiima yanna geeshshano ikkiro Beettosi agara aguriro callaati; heeshshosi giddo Yihowa iso agarinokkihu hakka woyiteeti.

Yesuusi hatto yee coyiˈrinohu, Yihowa konni garinni reyara fajjinohu mayiraatiro harunsaanosi huwattanno gede kaaˈlateeti ikka? * Yesuusi jaddo loosinohu gede assine haqqaho sunte shinannisi woyite lowo manni gufiˈrannota afino. (1 Qor. 1:23) Harunsaanosi Yesuusi reya hasiissinosihu mayiraatiro garunni huwatturo, iso jaddo loosinohu gede ikkikkinni Gatisaanchinsa gede assite laˈanno.—Gal. 3:13, 14.

Yesuusi Daawiti coyiˈrino hedo qummi assino korkaati ikkihano ikkiro, isira iillanni noosiri Yihowa fajjo ikkinota huwatino. Isi hatte faarsora noo hedo coyiˈrihu gedensaanni, “Xaate ikkino” yiino. (Yoh. 19:30; Luq. 22:37) Yihowa shiima yanna geeshshano ikkiro Yesuusa agara agurasi, Yesuusi uullate aana assara dayinore woˈmunni woˈma wonshanno gede assitino. Qoleno “Musera uyinoonni Seeri, Himannatenna Faarsuwate borro giddo” isi daafira borreessinoonniri woˈmanno gede assitino.—Luq. 24:44.