1. Yihowa maanke laˈˈanno?

MAGANU YIHOWA “mannisinni hagiidhanno.” (Far. 149:4) Tini lowo geeshsha hagiirsiissanno hedooti! Yihowa dancha akattankenna dandoonke laˈˈanno; hattono isiwa shinqeemmo gede assannonke. Yihowara ammanamme heeˈnummoro, hegerera jaallasi ikkineemmo.—Yoh. 6:44.

2. Mitootu Yihowa baxannonsata huluullantannohu mayiraati?

² Mitootu ‘Yihowa mannasi gaamote deerrinni baxannota afoommo; kayi ane baxannoeta mayinni afeemmo?’ yite heddannoha ikkara dandaanno. Mittu manchi hatto yee hedanno gede assasira dandaannori maati? Oksaana * yinanniti anje heedhe baasa qarrantino rodoo togo yitino: “Cuuamummanna suwisaancho ikke soqqama hanafumma woyite lowo geeshsha hagiidhoomma. Tonaaontu diri gedensaanni kayi, qaaqqo heeˈreenna iillinoere qaaganni baasa xissiisiˈroomma. ‘Yihowa hagiirsiisa didandeemma, qoleno isi baxannoe gedeeta diˈˈikkoomma’ yee hedoomma.” Yuwa yinanniti anje heedhe qarrantinoti suwisaancho rodoono togo yitino: “Yihowa hagiirsiisa hasiˈroomma daafira, heeshshoˈya isira sayise oyomma. Ikkirono, ‘Yihowa horo dibaxannoe’ yee hedoomma.”

3. Konni birxichira maa ronseemmo?

³ Aleenni kullihu ammanamino Kiristaani gede, atino Yihowa lubbora baxattoha ikkirono, isi baxannoheta kayi huluullamattoha ikkara dandaanno. Isi ate daafira lowo geeshsha hedannota ammana hasiissannohehu mayiraati? Gara ikkitinokki hedo waaddannohe woyite tenne qeeˈlate kaaˈlahera dandaannori maati? Hanni xa kuri xaˈmuwa xiinxallino.

4. Yihowa baxannonketa huluullama gawajjitannonke yineemmohu mayiraati?

⁴ Baxillu loosoho kakkayisanno. Yihowa baxannonketanna irkisannonketa addaxxineemmoha ikkiro, qarru iillinkero nafa  isira woˈmu wodaninkenni soqqamate murciˈneemmo. Maganu ninke daafira hedannota huluullammeemmoha ikkiro kayinni, ‘jawaante dianfeemmo.’ (Law. 24:10) Hexxo mudhineemmohanna Maganu baxannonketa huluullammemmoha ikkiro, Sheexaanu xagarro qeela qarra ikkitannonke.—Efe. 6:16.

5. Maganu baxannonketa huluullama gawajjitannohu hiittoonniiti?

⁵ Yannankera mitu Kiristaani Yihowa baxannonsatanna towaatannonsata huluullamino daafira, ayyaanaamittensa shoshshoggitino. Jeemsi yinanni cimeessi togo yiino: “Beeteeletenna wole gobba afiinni massanganni songora hagiirrunni soqqameemmoha ikkirono, ‘Isi Yihowa kakkaloˈya adhanni no?’ yee huluullamoommo. Mitte yannara isinni, Yihowa huuccattoˈya macciishshannota nafa huluullamoommo.” Iiva yinanniti Beeteelete soqqantanno rodoo togo yitino: “Yihowa baxannonketa huluullama lowo geeshsha gawajjitannota huwatoomma; korkaatuno tini Yihowara woˈma giddonni soqqammeemmokki gede assitanno. Qoleno ayyaanaamittete coyira hasatto heedhannonkekki gedenna Yihowara soqqammeemmo soqqanshonni hagiirraamma ikkineemmokki gede assitanno.” Songote cimeessanna woˈma yanna suwisaancho ikke soqqamannohu Mayikili yinanni rodii, “Maganu ninke daafira hedannota huluullammeemmoha ikkiro, isiwiinni xeertiˈnammora dandiineemmo” yiino.

6. Maganu baxannonketa huluullama hananfummoro maa assa hasiissannonke?

⁶ Kuri woˈnaalshuwa gara ikkitinokki hedo ayyaanaamittenke mageeshshi geeshsha gawajjitara dandiitannoro leellishshanno. Ikkina Maganu baxannonketa huluullama hananfummoro maa assa hasiissannonke? Tenne huluullo bayichonkonni hooˈla hasiissannonke! Huluullama agurtinanni gedenna ‘wodanaˈnenna hedoˈne agarannoha Maganu keere’ aannoˈne gede Yihowa huuccidhe. (Fil. 4:6, 7) Togoo hedo macciishshantannoˈneri kiˈne calla ikkitinoonnikkita qaagge. Woloota ammanantino roduuwano gara ikkitinokki hedo waaddannonsa. Hunda heedhinote Maganu soqqamaasinera nafa togoori iillinonsa. Hanni xa soqqamaasinchu Phaawuloosi lawishshinni maa rosa dandiineemmoro laˈno.

7. Phaawuloosira qarra ikkinosiri maati?

⁷ Loosu batiˈreennahe ‘Konne baala looso xa hiitto asse looseemmo?’ yite yaadde  egennootto? Hatto ikkiro, Phaawuloosi yaachishinosiri maatiro leellannohe. Isi mitte songora calla ikkikkinni “beetekiristaannate [“songuwa baalate,” NW] daafira” yaadino. (2 Qor. 11:23-28) Bayicho assiˈrino dhibbi waadanni hagiirrikki baˈˈanno gede assinohe? Phaawuloosino ‘mannimmasi utu gede qasanno qarri’ qussanni waadinosi; kuni dhibba ikkara dandaanno; isi kuni qarri aanisinni hoˈlara hasiˈrino. (2 Qor. 12:7-10) Mito woyite ate umikki laanfe yaachishshannohe? Phaawuloosirano togoori macciishshaminosi woyiti no. Isira dancha ikkinore assa gooddo ikkitinosi daafira, “Ani horo tidhoommokki manchooti” yee coyiˈrino.—Rom. 7:21-24, NW.

8. Phaawuloosi iillinosi qarra dandee saˈˈanno gede kaaˈlinosiri maati?

⁸ Phaawuloosira lowo fonqolinna hexxo mudhanno gede assanno qarri iillisirono, Yihowara soqqama diagurino. Isi hatto assate jawaante afiˈrinohu hiikkiinniiti? Phaawuloosi xeˈne noosiha ikkinota seekke afinoha ikkirono, wodote kakkalora kaajja ammana noosi. Isi, “[Yesuusa] ammanannohu baalunku hegere heeshsho afiˈranno” yee Yesuusi coyiˈrino hedo seekke afino. (Yoh. 3:16; Rom. 6:23) Phaawuloosino wodote kakkalo ammanannoha ikkinoti dihuluullissannote. Isi, Yihowa jawa cubbo loosse maaro eˈinore nafa gatona yaate qixxaawinoha ikkinota addaxxino.—Far. 86:5.

9. Phaawuloosi Galatiyu Sokka 2:20te coyiˈrinorinni maa ronseemmo?

⁹ Phaawuloosi Maganu lowo geeshsha baxannosita dihuluullamino; korkaatuno Maganu Beettosi soyinohu isira yee ikkinota afino. (Galatiyu Sokka 2:20 nabbawi.) Phaawuloosi konni qummeeshshira jawaachishshanno hedo coyiˈrino; isi ‘Maganu Beetti baxinoe’ hattono ‘Ane daafira yee isonooto sayise uyino’ yiino. Phaawuloosi, ‘Yihowa roduuwaˈya baxannota afoommo. Ane kayi baxannoeha dilawannoe’ yee, Maganu baxillira dannu noohu gede asse dicoyiˈrino. Isi Roomu Kiristaanira “Cubbaataamma ikkine heeˈneennanni Kiristoosi ninke daafira [reyino]” yiino. (Rom. 5:8) Ee, Maganu baxillira dannu dino!

10. Roomu Sokka 8:38, 39 noo hedonni maa ronseemmo?

¹⁰ Roomu Sokka 8:38, 39 nabbawi. Phaawuloosi Maganu baxilli geedonniha ikkinota addaxxino. Isi “Maganu baxilliwiinni badankera dandaannori nookkita afoommo” yee borreessino. Phaawuloosi, Yihowa Israeelete daga cincino gara afino. Yihowa iso umosi maarinosi garano wodanchino. Konnira Phaawuloosi ‘Yihowa ane daafira reyanno gede Beettosi soyi geeshsha, Isi baxannoeta huluullameemmo  gede assannoeri maati?’ yiinohu gedeeti.—Rom. 8:32.

11. Phaawuloosi 1 Ximootewoosi 1:12-15te kulloonni gedee cubbo loosinoha ikkirono, Maganu baxannosita huluullaminokkihu mayiraati?

¹¹ Umi Ximootewoosi 1:12-15 nabbawi. Phaawuloosi alba loosino soˈro hedanno woyite lowo geeshsha xissiisiˈrannoti dihuluullissannote. Isi “Cubbaataammu baalunni rooru cubbaataami aneeti” yee coyiˈrasi dhagge diˈˈikkitannonke. Isi halaale rosara albaanni, addi addi katammara Kiristaana baasa waadino; mitu usurantanno gede assino; woloota kayinni shinanni gede mala malino. (Soq. 26:10, 11) Phaawuloosi annansanna amansa shiishiishino oosonni xaadanno woyite hiitto ikkannoha lawannohe? Isi loosino soˈrora gaabbinoha ikkirono, sainore qola dandaannokkita afino. Kiristoosi reyinohu isira ikkinota ammanino daafira “Maganu eltonni xa noommo gedeeha ikkoommo” yee mitte giddonni coyiˈrino. (1 Qor. 15:3, 10) Tennenni maa ronseemmo? Kiristoosi atera yee reyinotanna Yihowa ledo muli jaalooma kalaqiˈratto gede doogo biddi assinoheta ammante adhi. (Soq. 3:19) Maganu, Yihowa Farciˈraasine ikkinummo gedensaanni woy ikkinammora albaanni loonsoommota albi soˈro ikkikkinni, xa assinanni heeˈnoommorenna konni kaˈa assineemmore illachishanno.—Isa. 1:18.

12. ‘Ditidhoommoho’ woy ‘Banxannie gedeeha diˈˈikkoommoho’ yine hendeemmoha ikkiro, 1 Yohaannisi 3:19, 20 kaaˈlitannonkehu hiittoonniiti?

¹² Yesuusi cubbokki hayishshe hoolate reyinota hedatto woyite, ‘Ani tennera diˈˈikkoommoho’ yaattoha ikkara dandaanno. Hatto yite hedattohu mayira ikkara dandaanno? Guuta ikkinokki wodaninke, ‘Ani ditidhoommoho’ woy ‘Banxannie gedeeha diˈˈikkoommoho’ yine hendeemmo gede asse soˈrisiisankera dandaanno. (1 Yohaannisi 3:19, 20 nabbawi.) Togoo woyite ‘Maganu wodaninkera  aliidiha’ ikkinota qaaga hasiissannonke. Yihowa dibaxannoe woy gatona diyaannoe yine hendummoro nafa, isi baxannonke, hattono gatona yaannonke. Yihowa baxannonketa ammanne adhate sharrama hasiissannonke. Hatto assate, Maganu Qaale xiinxalla, huuccatto jaante assiˈranna Yihowa magansiˈranno manni ledo ganyine gamba yaa hasiissannonke. Hatto assa lowo geeshsha hasiissannota ikkitinohu mayiraati?

13. Maganu Qaale xiinxalla kaaˈlitannonkehu hiittoonniiti? (“ Maganu Qaali Kaaˈlinonsa Gara” yitanno saaxineno lai.)

¹³ Maganu Qaale barru baala xiinxalli; hatto assittoro Yihowara baxissanno akatta noosita albinni roore huwatatto. Qoleno isi lowo geeshsha baxannoheta wodanchatto. Maganu Qaale barru baala nabbawanna hiinca gara ikkitino lao heedhannohe gedenna wodanikkira noo coye suwisate kaaˈlitannohe. (2 Xim. 3:16) Alba isiniitira gari ayirrinyi noosikkihu Keveni yinanni cimeessi togo yiino: “Faarso 103 nabbawaˈyanna hiincaˈya hedoˈya biddi assiˈreemmo gedenna Yihowa ane ma garinni laˈˈannoero huwateemmo gede kaaˈlitinoe.” Aleenni kulliti Iiva togo yitino: “Barru baala hashsha hashsha Yihowa hedo daafira hiinceemma. Tini giddiidi keere afiˈreemma gedenna ammanaˈya kaajjitanno gede kaaˈlitinoe.”

14. Huuccatto kaaˈlitankera dandiitannohu hiittoonniiti?

¹⁴ Agurittokkinni huucciˈri. (1 Tes. 5:17) Mittu manchi ledo noonke jaaloomi kaajjanno gede isi ledo ganyine hasaambeemmo, hattono giddonketa mimmitoho hasaaphineemmo. Yihowa ledo noonke jaaloomino hattooti. Huuccattotenni giddonketa isira hasaaphineemmohanna huluullinonkere kuˈlineemmoha ikkiro, Yihowa addaxxineemmotanna isi baxannonketa ammanneemmota leellinsheemmo. (Far. 94:17-19; 1 Yoh. 5:14, 15) Aleenni kulliti Yuwa togo yitino: “Huuccatto assiˈreemma woyite barra assanni hosoommare calla kule diagureemma. Hatteentenni giddoˈyata Yihowara gudise hasaapheemma. Gale hosanni, Yihowa mitte dirijjite murrichi gede ikkikkinni oososi baxanno Anni gede asse laˈˈa hanafoomma.”—“ Nabbawootto?” yitanno saaxine lai.

15. Yihowa ninke daafira hedannota leellishinohu hiittoonniiti?

¹⁵ Yihowa magansiˈranno manni ledo gamba yii; insa Yihowa eltooti. (Yai. 1:17) Iimi Anninke Yihowa ‘aye woyiteno’ baxxannonketa ayyaanaamittete maate oye ninke daafira hedannota leellishino. (Law. 17:17) Phaawuloosi Qolasiyaasi Kiristaanira borreessino sokkara kaaˈlinosiha mito Kiristaana qummi assi woyite, insa lowo geeshsha ‘jawaachishshinosita’ coyiˈrino. (Qol. 4:10, 11) Yesuusi Kiristoosira nafa wolootu kaaˈlo hasiissinosi woyiti no; iso  sokkaasineno kaaˈlitinosi; Yesuusi kaaˈlitinosire galatinonsa.—Luq. 22:28, 43.

16. Ammanate roduuwinke Yihowawa shinqeemmo gede kaaˈlitannonkehu hiittoonniiti?

¹⁶ Yihowa uyinoheri ammanate roduuwi kaaˈlitannohe gede maahoyye yaatto? Yaachishinonkere gikki yiino rodiiri hasaapha saallannire diafidhino; isinni hatto assa agarooshshe ikkitankera dandiitanno. Aleenni kullihu Jeemsi togo yiino: “Gikki yiino Kiristaaniwa aanaˈya lowo geeshsha kaaˈlitinoe. Gara ikkitinokki hedo waaddannoe woyite, kuri muxxe roduuwiˈya hasaaphanna cincite macciishshitannoe, hattono baxxannoeta kultannoe. Insa widoonni, Yihowa baxannoetanna ane daafira hedannota huwatoommo.” Konnira, ammanate roduuwinke ledo muli jaalooma kalaqiˈne heeˈra lowo geeshsha kaaˈlitannonke!

17-18. Macciishsha hasiissannonkehu ayi yaannonkereeti? Mayira?

¹⁷ Sheexaanu hexxo mudhine gara ikkinore assa agurrammora hasiˈranno. Isi ‘Yihowa dibaxannoe, hattono gato dihasiissannoeho’ yine hendeemmo gede assate woˈnaalanno. Ikkollana, konni birxichira ronsummonte gede hatto yee heda gara diˈˈikkitino!

¹⁸ Yihowa baxannohe. Ati isi albaanni muxxete! Isira hajajamittoro Yesuusi gede hegerera ‘baxillisinni heeˈratto.’ (Yoh. 15:10) Konnira Sheexaanu yaannore macciishshitooti; wodanikkino dogahera wodhitooti. Hatteentenni mittu mittunku manchita dancha akatta laˈˈannoha Yihowa macciishshi. Yihowa atennino ikko ‘mannisinni hagiidhannota’ huluullantooti!