1. Mittu qaaqqi kaote hexxo seekke ammanannota leellishinohu hiittoonniiti?

 MITTO Maatiwu yinanni qaaqqo buutote dhibbi amadinositanna duucha hinge darre xagisa hasiissannota kulli. Isi lamalu dirihu heeˈreenna mitte yannara isinna maatesi JW Biroodikaaste laˈanni no. Insa pirogiraamete jeefora, reyotenni kaino manna anga fanne haaˈnanna leellishshannota muuziiqu viidiyo laˈu. b Pirogiraame gooffuhu gedensaanni Maatiwu annisinna amasi anga amade togo yii: “Anna, awu laˈini? Anino reyummoro nafa kaeemmo. Reyotenni kaˈˈammo geeshsha agartinannie.” Hanni kuni anninna ama qaaqqinsara kaote hexxo xabbe leeltinosita afiti mageeshshi geeshsha hagiidhinoro hedde!

2-3. Kaote hexxo daafira hiinca hasiissannonkehu mayiraati?

² Ninke baalunku Qullaawu Maxaafi kulannote kaote hexxo daafira yannate kiiro hiinca hasiissannonke. (Yoh. 5:28, 29) Mayira? Korkaatuno, hedeweelcho buutote dhibbi amadankera woy banxeemmo manna shiiˈnammora dandiineemmo. (Ros. 9:11; Yai. 4:13, 14) Kaote hexxo togoo qarra dandiine saˈneemmo gede kaaˈlitannonke. (1 Tes. 4:13) Qullaawa Borro iimi Anninke seekke egenninonketanna lowo geeshsha baxannonketa buuxissannonke. (Luq. 12:7) Hanni Yihowa reyinummoro galagalle heeshshotenni heeˈneemmo gede assate ayimmankenna ninke daafira baalankare mageeshsha afinoro hedi. Yihowa lowo geeshsha baxannonke daafira hegerera heeˈneemmo faro faninonke; isi reyinummoro nafa reyotenni kayisannonke!

³ Konni birxichira umo, kaote hexxo ammanneemmohu mayiraatiro hasaambeemmo. Hakkiinni cuˈmote qummeeshshira noota “Rodiikki reyotenni kaˈˈanno” yitannota ammana kaajjishshannota  Qullaawu Maxaafi giddo kulloonni xagge xiinxallineemmo. (Yoh. 11:23) Jeefote, kaote hexxo roore xabbe leeltannonke gede assiˈra dandiineemmohu hiittoonniitiro ronseemmo.

4. Uyinoonninke hexxo ammanate maa buuxa hasiissannonke? Lawishsha kuli.

⁴ Kaote hexxo ammanate, hexxo uyinonke Maganira tenne hexxo wonshate hasattonna wolqa woy dandoo noosita ammana hasiissannonke. Hanni lawishshaho wolqaataame bubbe minekki lowo geeshsha gawajjitino yine hendo. Hakkiinni jaalikki daye ‘Minekki galagalte gatamadhatto gede kaaˈleemmohe’ yiihe. Isi coyiˈrinohu godowinta ikkiro ate kaaˈla hasiˈrannota addaxxatto. Isira mine minate dandoonna mine minnanni uduunnichi noosita afittoro qolte kaaˈlahera dandaannota buuxatto. Hakko daafira isi einohe qaale ammanatto. Maganu uyinonketi kaote hexxona? Isira tenne hexxo wonshate addinta hasattonna wolqa noosi?

5-6. Yihowara reyitinore kayisate hasatto noosita huluullammeemmokkihu mayiraati?

⁵ Yihowara reyitinore kayisate hasatto noosi? Ee noosi. Isi batinye Qullaawu Maxaafi borreessaano albillittete kao daafira borreessitanno gede assino. (Isa. 26:19; Hos. 13:14; Aju. 20:11-13) Qoleno Yihowa qaale eiro woˈmanka woyite eino qaale wonshanno. (Iya. 23:14) Isinni Yihowa reyitinore kayisate quqquxamanno. Hatto yineemmohu mayiraati?

⁶ Hanni Iyyoobi coyiˈrinore laˈno. Isi reyiro nafa Yihowa iso reyotenni kayisate quqquxamannota ammanino. (Iyo. 14:14, 15) Yihowa iso magansidhannore baala reyotenni kayisate quqquxamanno. Isi insa reyotenni kaˈe ordu fayyimmanna hagiirre afidhe heedhanno gede assate quqquxamanno. Yihowa daafira rosate faro afiˈrikkinni reyinohu lowo biliyoone ikkanno manni hiikkannoyya? Baxillaanchu Maganinke insano reyotenni kayisa hasiˈranno. (Soq. 24:15) Yihowa insa isi jaala ikkatenna uullate aana hegerera heeˈrate faro afidhanno gede assa hasiˈranno. (Yoh. 3:16) Addanko Yihowara reyitinore kayisate hasatto noosi.

7-8. Yihowara reyitinore kayisate wolqa noosita huluullammeemmokkihu mayiraati?

⁷ Yihowara reyitinore kayisate wolqano noosi? Ee! Isi ‘Woˈmanka Dandaannoho.’ (Aju. 1:8) Hakko daafira isira baalanka diina wole agurina reyo nafa qeelate wolqa noosi. (1 Qor. 15:26) Tenne afanke jawaantenna shesho afiˈneemmo gede assitannonke. Hanni Eema Arnoldi yinanni rodoo woˈnaalsha laˈno. Layinkihu Alamete Oli yannara iseranna maatesera ammanansa fonqolannohu buutote qarri iillinonsa. Naazite usuranyu kaampera shiidhe dadillitino beettose sheshifachishate Eema togo yitino: “Reyino manni horonta reyotenni kaˈˈannokkiha ikkiro, diininke reyo Maganunni roore wolqaataamete yaate; kuni qole ikkannokki coyeeti.” Yihowate geeshshi wolqa afiˈrinori horonta dino! Heeshsho kalaqinohu woˈmanka dandaanno Magani reyitinori galagalte heeshshotenni heedhanno gede assa dandaannoti dihuluullissannote.

⁸ Maganu reyitinore kayisa dandaanno yineemmo gede assannonkehu wolu korkaati, isi baalankare qaaga dandaannoha ikkasiiti. Isi mitte mittenta beeddahe suˈminsanni woshshanno. (Isa. 40:26) Qoleno reyitinore qaaganno. (Iyo. 14:13; Luq. 20:37, 38) Yihowa reyotenni kayisanno manniha mitto mittonka coye qaaganno; lawishshaho danansanna akatansa, heedhino heeshsho hiittootero hattono qaagganno coye dihawanno.

9. Yihowa albillitte reyitinore kayisate eino qaale ammanattohu mayiraati?

 ⁹ Yihowara hasattonna wolqa noosita anfoommo daafira isi albillitte reyitinore kayisate eino qaale wonshannota ammanneemmo. Hanni kaote hexxo ammanneemmo gede assannonkeha wole korkaatano laˈno: Yihowa konni albaanni reyitinore kayisino. Isi hundi waro boodu manninna Yesuusi reyitinore kayissanno gede wolqa uyinonsa. Hanni xa Yohaannisi Fooliishsho 11 kulloonnita Yesuusi reyotenni kayisinohunnita mittu manchi xagge laˈno.

10. Yesuusi Biitaaniyunni kae Yordaanoosi tayise sae sabbakanni noo yannara mayi ikkino? Isi maa assiyya? (Yohaannisi 11:1-3)

¹⁰ Yohaannisi 11:1-3 nabbawi. Hanni 32 M.D. jeefora Biitaaniyaho ikkinore hedi. Hakko qachira Yesuusira muli jaalla ikkitinori Alaazaarinna lame roduuwisi yaano Maariyaaminna Maarta heeˈranno. (Luq. 10:38-42) Kayinni Alaazaari baasa dhiwamino; hakko daafira roduuwisi lowo geeshsha yaadino. Insa Biitaaniyunni kaˈne Yordaanoosi tayinse lekkatenni lame barra haˈne iillinanniwa noohu Yesuusira sokka soyi. (Yoh. 10:40) Sonkoonni sokkaanchi Yesuusiwa iilli balla kayinni Alaazaari reyino. Yesuusi jaalisi reyinota afinoha ikkirono hakkiicho lame barra keeshshino; isi hakkiinni kae Biitaaniya haˈri. Hakko daafira Yesuusi hakkira iilli yannara Alaazaari reyinkunni shoole barra ikkino. Yesuusi jaallasi kaaˈlannorenna Maganoho ayirrinye abbannore assa hasiˈrino.—Yoh. 11:4, 6, 11, 17.

11. Tenne xaggenni jaaloomu daafira maa ronseemmo?

¹¹ Tenne xaggenni jaaloomu daafira ronseemmori no. Hanni tenne hedi: Maariyaaminna Maarta Yesuusira sokka sokku woyite isi Biitaaniya daanno gede dikultino. Insa muli jaalisi dhiwaminotalla kultino. (Yoh. 11:3) Alaazaari reyita Yesuusi hasiˈroommero noowa heeˈrenni iso reyotenni kayisa dandaanno. Ikkirono isi jaallasiwa Maariyaamiwanna Maartawa haˈra doodhino. Atera kaaˈlannohe gede kuˈlittokkinni kaaˈlanno jaali noohe? Nooheha ikkiro togoo jaali “qarru barra” iillannoheta addaxxa dandaatto. (Law. 17:17) Ninkeno Yesuusi gede wolootaho togoo jaalla ikka dandiineemmo. Hanni galagalle xaggenniwa hinge hakkiinni aane mayi ikkinoro laˈno.

12. Yesuusi Maartara mayyee qaale einose? Ise konne qaale ammana dandiitannohu mayiraati? (Yohaannisi 11:23-26)

¹² Yohaannisi 11:23-26 nabbawi. Maarta Yesuusi Biitaaniyu qooxeessa dayinota affu. Ise rakke fulte Yesuusinni xaadde togo yitu: “Mootichaˈya, ati kawiicho heeˈroottoha ikkoommero rodiiˈya direyanno.” (Yoh. 11:21) Addanko isi Alaazaari hursa dandaanno. Ikkollana Yesuusi hakkiinni sainoha mitto dhagge ikkanno coye assara hedino. Isi “Rodiikki reyotenni kaˈˈanno” yee qaale eino. Qoleno isi Maarta konne qaale ammantanno gede assannoseha wole korkaata kulanni “Kaonna heeshsho aneeti” yiino. Addanko Yihowa Yesuusira reyitinore kayisate wolqa uyinosi. Yesuusi  hakkuyira albaanni reyite shiima saate keeshshitino beetto kayisino; qoleno mitto wedellichano reyotenni kayisino; iso kayisinohuno reyi barranni ikkara dandaanno. (Luq. 7:11-15; 8:49-55) Kayinni isi reye shoole barra keeshshinohanna bisisi shola hanafino mancho reyotenni kayisa dandaanno?

13. Yohaannisi 11:32-35 kultannonte gede Yesuusi Maariyaaminna wolu manni wiˈlanna lae hiitto ikkino? (Misileno lai.)

¹³ Yohaannisi 11:32-35 nabbawi. Hanni hakkiinni aane ikkinore hedi. Alaazaariti wole rodoo Maariyaami Yesuusinni xaadate fultu. Iseno “Mootichaˈya, ati kawiicho heeˈroottoha ikkoommero rodiiˈya direyanno” yitu. Isenna ledose noo manni lowo geeshsha xissiisiˈrino. Insa wiˈlitanna laitinna macciishshiti Yesuusi lowo geeshsha dadillino. Jaallasi lowo geeshsha mararino daafira isino wiˈlino. Isi banxanni manna shiiˈra mageeshsha xissiissannoro huwatino. Yesuusi insa wiˈlitanno gede assannore hoolate quqquxaminoti dihuluullissannote!

14. Yesuusi Maariyaami wiˈlitanna lae ikkinoti Yihowa daafira maa rosiissannonke?

¹⁴ Yesuusi Maariyaami wiˈlitanna lae ikkinoti Yihowa lowo geeshsha shaqqado Magano ikkinota anfeemmo gede assitannonke. Hatto yineemmohu mayiraati? Sai birxichira ronsummonte gede Yesuusi annisi akata guutu garinni leellishino. (Yoh. 12:45) Hakko daafira Yesuusi xissiisidhino jaallasi lae marare wiˈlinota kultanno xagge nabbambeemmo woyite, Yihowano xissiisiˈne wiˈlineemmo woyite lowo geeshsha mararannonketa huwata dandiineemmo. (Far. 56:8) Tini shaqqadu Maganinkewa shiqatto gede diassitannohe?

15. Yohaannisi 11:41-44 kultanno garinni Alaazaari waammawa ikkinori maati? (Misileno lai.)

¹⁵ Yohaannisi 11:41-44 nabbawi. Yesuusi Alaazaari madaarroonniwa mare waammate afiira tuˈnoonni kincho hoollanni gede kuli. Maarta reeshshu ‘xa bowannowe’ yite kultu. Hakkiinni Yesuusi, “Ammanittaha ikkiro Maganu ayirrinye laˈˈatta diyoommohe?” yii. (Yoh. 11:39, 40) Yesuusi hakkiinni iima hige laˈˈanni mannu albaanni huucciˈri. Isi hakkiinni aane ikkannorira baalaho ayirrinye  Maganoho uyinara hasiˈrino. Hakkiinni isi “Alaazaari amo fuli!” yee woshshi. Alaazaarino waammate giddonni fule dayi! Yesuusi mitu manni ikkara didandaannoreeti yee hedino coye assino.

16. Yohaannisi fooliishsho 11te noo xagge kaote hexxora noonke ammana kaajjishshannohu hiittoonniiti?

¹⁶ Yohaannisi fooliishsho 11te noo xagge kaote hexxora noonke ammana kaajjishshanno. Hiittoonni? Yesuusi Maartara “Rodiikki reyotenni kaˈˈanno” yiinota qaagi. (Yoh. 11:23) Annisinte gede Yesuusira konne qaale wonshate hasattonna wolqa noosi. Isi wiˈlasi reyonna reyo abbitanno xisso addinta hoolate quqquxamannota leellishshanno. Alaazaari waammate giddonni fuli yannarano Yesuusi xaano reyitinore kayisate wolqa noosita leellishino. Qoleno Yesuusi Maartara mayyee qaagiissinosero hedi; Isi “Ammanittaha ikkiro Maganu ayirrinye laˈˈatta diyoommohe” yiinose. (Yoh. 11:40) Maganu reyitinore kayisannota kule eino qaali woˈmanno yine ammanneemmo gede assannonkehu ikkadu korkaati noonke. Ikkina tini hexxo roore xabbe leeltannonke gede assiˈrate maa assa dandiineemmo?

17. Qullaawu Maxaafi giddo kulloonnita kaote xagge nabbambeemmo woyite maa heda hasiissannonke?

¹⁷ Alba reyotenni kaino manni daafira kultanno xagge nabbawi hattono hiinci. Qullaawu Maxaafi reyotenni kae galagale uullate aana heeˈrinohu settu manni xagge kulanno. c Mitte mittenta xagge seekkite xiinxalli. Tenne xagge xiinxallatto woyite kuni reyotenni kaino labballi, meentinna qaaqquulli addinta heeˈrino manna ikkinota qaagi. Tenne xaggenni rosatto roso wodanchi. Mitte mittenti xagge Maganoho reyitinore kayisate hasattonna wolqa noosita leellishshanno gara hedi. Baalunkunni roore lowo geeshsha hasiissannota Yesuusi kao hiinci. Yesuusi reyotenni kainota lowo  xibbe ikkanno manni lainotanna tini ammanankera kaajja xinta ikkitinota qaagi.—1 Qor. 15:3-6, 20-22.

18. Kaote hexxo daafira kultanno faarsuwa dancha gede horoonsiˈra dandiineemmohu hiittoonniiti? (Lekkaalliidi qaagiishshano lai.)

¹⁸ Kaote hexxo daafira kultanno faarso dancha gede horoonsiˈri. d (Efe. 5:19) Kuri faarsuwa kaote hexxo roore xabbe leeltannonke gedenna tenne hexxora noonke ammana kaajjitanno gede assitanno. Kuri faarso macciishshe, rosiisidhe hattono maatete magansiˈraˈne yannara faarsote kiiro woy giximi tiro hasaabbe. Faarsote giximi surreˈneranna wodaniˈnera qaˈmiˈranno gede assidhe. Hakkiinni reyineemmo yitine waajjitinanni gede assannoˈneri iillannoˈne woyite woy shiidhinanni woyite Yihowa ayyaani kuri faarsuwa qaagginanni gede kaaˈlannoˈne; hattono tini faarso jawaantenna shesho afidhinanni gede assitannoˈne.

19. Kaote daafira maa heda dandiineemmo? (“ Insa Mayite Xaˈmatto?” yitanno saaxine lai.)

¹⁹ Hedate dandooˈne horoonsidhe. Yihowa hedate dandoo oye kalaqinonke daafira, haaro alamera heeˈnoommohu gede assine heda dandiineemmo. Mitte rodoo togo yitino: “Haaro alamera daraaro daraartanna suˈniissanni noommahu gede asse hedanni lowo yanna keeshsheemma.” Xaadattoha hundi waro heeˈrinoha ammanamino meentonna labballo hedi. Ayeoonni xaadate quqquxamatto? Insa hiikkuri xaˈmuwa xaˈmatto? Qoleno xaadattoha shiiˈrootto manna hedi. Insanni umo xaadatto woyite coyiˈrattore, hanqaffe rimmi assatto garanna hagiirrunni wiˈlatto gara hedi.

20. Maa assate murciˈra hasiissannonke?

²⁰ Kaote hexxo uyinonke daafira Yihowa lowo geeshsha galanteemmosi! Yihowara eino qaale wonshate hasattonna wolqa noosi daafira eino qaale wonshannota addaxxa dandiineemmo. Tenne muxxe hexxora noonke ammana woˈmanka woyite kaajjitanno gede assiˈrate murciˈno. Hatto assineemmoha ikkiro, shiiˈnoommo manni kaˈˈannota kule hexxo uyinonke Maganiwa albinni roore shiqa dandiineemmo.