1. Yihowa maa assinammora hasiˈranno?

 MITTO minaannanna minaama lowo geeshsha hagiirsiisannonsa coyi giddo mittu ooso ilate. Kayinni annunna ama qaaqqonsa baxannoha ikkirono hegerera daaima ikke heeˈrara dihasiˈranno. Isinni insa qaaqqu lopha giwiro lowo geeshsha yaaddanno. Hatteente gede Yihowa isi daafira rosa hananfeemmo woyite hagiidhannoha ikkirono, ayyaanaamittetenni gincammora dihasiˈranno. (1 Qor. 3:1) Hatteentenni isi ‘hedonkenni jajjabbu gedeere ikkineemmo gede’ jawaachishinonke.—1 Qor. 14:20.

2. Konni birxichira maa xiinxallineemmo?

² Hedonkenni jajjabbu gedeere ikkate yaa mayyaate? Ayyaanaamittetenni gikki yinoommore ikka dandiineemmohu hiittoonniiti? Kaajjado ayyaanaamittete sagale ayyaanaamittetenni lophineemmo gede kaaˈlitannonkehu hiittoonniiti? Quwa saˈne umonke addaxxa qoropha hasiissannonkehu mayiraati? Konni birxichira kuri xaˈmuwara dawaro qollanni.

AYYAANAAMITTETENNI GIKKI YAA MAYYAATE?

3. Hedonkenni jajjabbu gedeere ikkate yaa mayyaate?

³ Qullaawu Maxaafi giddo, ‘hedonkenni jajjabbu gedeere ikka’ yine tirroonniha Giriikete afii qaale, “gikki yaa” ‘guutanna woˈma ikka’ yineno tira dandiinanni. a (1 Qor. 2:6) Mittu qaaqqi jawa ikka geeshsha lophannonte gede, ninkeno woˈmanka woyite Yihowa ledo noonke jaaloomi lexxanno gede assiˈra hasiissannonke. Hatto assinummoro ayyaanaamittetenni gikki yinoommore ikkineemmo. Hige tenne mixo wonshiˈnummohu gedensaannino ayyaanaamittetenni lopha agura dihasiissannonke. (1 Xim. 4:15) Ninke baalunku lawishshaho, wedellootuno  ayyaanaamittetenni gikki yaa dandiineemmo. Ikkina mittu Kiristaanchi ayyaanaamittetenni gikki yiinota leellishannori maati?

4. Gikki yiino Kiristaancho bande afa dandiinannihu hiittoonniiti?

⁴ Ayyaanaamittetenni gikki yiino Kiristaanchi Maganu aanno biddishsha baalanka harunsanno ikkinnina, iso baxisinosiha calla doore diharunsanno. Isi guuntete xeˈne noosiha ikkino daafira soˈro loosannoti egennantinote. Ikkirono togoo manchi mitto coye hedannohunna assannohu, Maganu fajjo ledo sumuu yaanno garinni ikkinota barru barrunku heeshshosinni leellishanno. Isi haaro mannimma uddiˈrino; hattono Maganu hedanno garinni hedate woˈmanka woyite sharramanno. (Efe. 4:22-24) Qoleno Yihowa seeranna xintu seera horoonsiˈne dancha doorsha doodhinanni gara rosino; hakko daafira maa assa hasiissannosiro kulannohu lowo seeri dihasiisannosi. Mitto doorsha doodhiro hakkonne doodhino coye assate sharramanno.—1 Qor. 9:26, 27.

5. Ayyaanaamittetenni gikki yiinokki Kiristaanchira qarra ikkannori mayi tuncu yaannosi? (Efesooni Sokka 4:14, 15)

⁵ Ayyaanaamittetenni gikki yee heeˈrannokki Kiristaanchi kayinni, “mannu awaawurshinninna xagarrotenni” dogamara dandaanno; hattono haafa hedo tuqissannorinna kaadaasine doggasira dandiitanno. b (Efesooni Sokka 4:14, 15 nabbawi.) Togoo manchi woloota hinaasara, gaance kalaqara, mulla kae hanqara woy fonqoloho qeelamara dandaanno.—1 Qor. 3:3.

6. Ayyaanaamittete lopho mittu qaaqqi lopho ledo heewisiisa dandiinannihu hiittoonniiti? (Misileno lai.)

⁶ Aleenni kulloonninte gede, Qullaawa Borro giddo ayyaanaamittete lopho mittu qaaqqi lopho ledo heewisiinsoonni. Mittu qaaqqi afibbeelo ikkino daafira jawu manchi agarooshshinna towaanyo hasiissannosi. Lawishshaho, mitte ama shiinqa qaaqqose doogo tayisse saˈanno woyite angase amaxxitanno gede kultasera dandiitanno. Qaaqqo lophituhu gedensaanni ama doogo umisenni tayisse saˈanno gede kultasera dandiitanno; ikkirono qaaqqose lophituhu gedensaannino doogo tayisse saˈanno woyite kawanna kaˈa laˈanno gede kultannose. Qaaqqo jawa ikkituhu gedensaanni kayinni gawajjanno coye ise umisenni badde affe qorophitanno. Qaaqquulleho gawajjanno  coye kulannonsahu jajjabbu manni hasiisannonsante gede, gikki yiinokki Kiristaanirano ayyaanaamittensa gawajjannore qorophanno gedenna dancha doorsha doodhanno gede gikki yiino Kiristaani kaaˈlo hasiissannonsa. Ayyaanaamittetenni gikki yiino Kiristaani kayinni mitto doorsha doodhanno woyite, hatte hajo daafira Yihowa hedo maatiro afate Qullaawu Maxaafiha xintu seera seekke xiinxallanno; hakkiinni xiinxallinore loosu aana hosiisanno.

7. Gikki yiino Kiristaanira wolootu kaaˈlo hasiissannonsa?

⁷ Hatto yaa gikki yiino Kiristaanchira wolootu kaaˈlo horo dihasiissannosi yaateni? Deeˈni. Ayyaanaamittetenni gikki yiino Kiristaanirano wolootu kaaˈlo hasiissannonsa woyiti no. Ikkollana ayyaanaamittetenni gikki yiinokki Kiristaanchi, maa assa hasiissannosiro wolootu kultannosi gede xaˈmiˈrara woy isi umisi doodha hasiissannosi doorsha wolootu doortannosi gede kulara dandaanno. Ayyaanaamittetenni gikki yiino Kiristaanchi kayinni, Yihowa ‘umisi duha duqqara’ hasiˈrannota afino daafira hayyonna woˈnaalshsha afiˈrate woloota amaaˈlanno.—Gal. 6:5.

8. Ayyaanaamittetenni gikki yiino Kiristaani babbaxxannohu ma garinniiti?

⁸ Jajjabbu manni baalu dana mitto ikkinokkinte gede, ayyaanaamittetenni gikki yiino Kiristaanino akatunni babbaxxanno. Lawishshaho, mitu hayyootaho, mitu worbuulleho, mitu shaqqaddaho, mitu mararannoho. Qoleno lamu ayyaanaamittetenni gikki yiino Kiristaanira mittu gari coyi tuncu yiinsaro Qullaawa Borro ledo sumuu yaannoha kayinni addi addi doorsha doodhitara dandiitanno. Roorenkanni mittu Kiristaanchi tiiˈˈisi yaannore macciishshannoha ikkiro togoori kalaqamara dandaanno. Insa tenne huwattino daafira doodhitino doorshi babbaxxinoha ikkiro mimmito busha diassitanno. Hatteentenni mittimmansa baˈukki heedhanno.—Rom. 14:10; 1 Qor. 1:10.

AYYAANAAMITTETENNI GIKKI YAA DANDIINEEMMOHU HIITTOONNIITI?

9. Iimi uullanni kaˈne ayyaanaamittetenni lopha dandiineemmo? Xawisi.

⁹ Mannimmanke sunu sununni lophitara dandiitanno; kayinni aye manchino iimi uullanni kae ayyaanaamittetenni lopha didandaanno. Lawishshaho, Qorontoosi heeˈranno Kiristaani dancha duduwo macciishshe adhino, cuuamino, qullaawa ayyaana adhino hattono soqqamaasinchu Phaawuloosi jawaachishinonsa. (Soq. 18:8-11) Ikkirono cuuantuhunni boodu diri gedensaanni insa giddo batinyu ayyaanaamittetenni gicce gibbino. (1 Qor. 3:2) Ninkerano togoori iillannonkekki gede qoropha dandiineemmohu hiittoonniiti?

10. Ayyaanaamittetenni gikki yaate maa assa hasiissannonke? (Yihuda 20)

¹⁰ Ayyaanaamittetenni gikki yaate balanxe hasatto heedhannonke gede assiˈra hasiissannonke. ‘Hambensanni’ heeˈra baxxannori yaano ayyaanaamittetenni daaima ikkite heedhannori gikki diyitanno. (Law. 1:22) Jajjabba ikkituhu gedensaannino mito coye assitanno gede anninsanna amansa kulansara hasidhannori gedeere ikka dihasiˈneemmo. Hatteentenni ayyaanaamittetenni lophate uminkenni sharrammeemmo. (Yihuda 20 nabbawi.) Ayyaanaamittetenni gikki yaate sharrantinanni heedhinoonniha ikkiro, Yihowa ‘hasattonna loosoho kaˈinanni gede wolqa aannoˈne gede’ huuccidhe.—Fil. 2:13, NW.

11. Ayyaanaamittetenni lophineemmo gede kaaˈlannonkere Yihowa maa qixxeessinonke? (Efesooni Sokka 4:11-13)

¹¹ Yihowa uminke sharronni calla ayyaanaamittetenni gikki yinammora dihasiˈranno. Kiristaanu songo giddo allaalaasinenna rosiisaano ikkite soqqantannori, ayyaanaamittetenni lophineemmo gede yaano “Kiristoosi guutanna woˈma ikkinonte gede ninke baalunku woˈma manna” ikkineemmo gede kaaˈlitannonke. (Efesooni Sokka 4:11-13 nabbawi.) Qoleno  Yihowa ‘Kiristoosi wodani’ woy hedo heedhannonke gede kaaˈlannonkeha qullaawa ayyaanasi aannonke. (1 Qor. 2:14-16) Hakkiinni saeno isi, Yesuusi uullate aana noo waro hedinore, coyiˈrinorenna assinore anfeemmo gede kaaˈlannonkeha shoole Wongeella ayyaanisinni borreessinanni gede assino. Heddinannirinninna assitinannirinna Yesuusi lawishsha harunsitine ayyaanaamittetenni gikki yaate fushshidhinoonni mixo wonshiˈra dandiitinanni.

KAAJJADO AYYAANAAMITTETE SAGALE KAAˈLITANNONKE GARA

12. ‘Kiristoosi daafira uyinoonnihu umi rosi’ maati?

¹² Ayyaanaamittetenni gikki yinoommore ikkate, “Kiristoosi daafira uyinoonniha umi roso” yaano Kiristaanunniha xinta ikkino roso rosatenni sainore assa hasiissannonke. Lawishshaho togoohu xinta ikkino rosi giddo gamu maaro eate, ammanate, cuuamatenna kaote. (Ibi. 6:1, 2) Kiristaanu rosannohu safote rosi giddo gamu konneeti. Hakko daafira soqqamaasinchu Pheexiroosi Phenxeqosxete ayyaani yannara konne roso rosiisino. (Soq. 2:32-35, 38) Kiristoosi rosaancho ikkate konne umi roso rosa hasiissannonke. Lawishshaho, Phaawuloosi kaote daafira kulanno roso giwannohu Kiristaancho ikkannokkita kule qorowisiisino. (1 Qor. 15:12-14) Hakko daafira, Qullaawu Maxaafiha qara roso ronse calla kassi yaa dihasiissannonke.

13. Ibiraawoota 5:14 kulloonni garinni, kaajjado ayyaanaamittete sagalenni horo afiˈrate maa assa hasiissannonke? (Misileno lai.)

¹³ Kaajjado ayyaanaamittete sagale Yihowa seera calla ikkikkinni xintu seerano amaddinote; xintu seeri qole Yihowa hedo maatiro huwanteemmo gede kaaˈlannonke. Ayyaanaamittete sagalenni horo afiˈrate Maganu qaale xiinxalla, hiincanna ronsoommore loosu aana hosiisa hasiissannonke. Hatto assineemmoha ikkiro, Yihowa hagiirsiisanno doorsha doodhinanni gara ronseemmo. c—Ibiraawoota 5:14 nabbawi.

14. Phaawuloosi Qorontoosi heeˈranno Kiristaani ayyaanaamittetenni gikki yaanno gede kaaˈlinonsahu hiittoonniiti?

¹⁴ Ayyaanaamittetenni gikki yiinokki Kiristaani, Qullaawu Maxaafiha xintu seera harunse doodha hasiissannonsari tuncu yaannonsa woyite, duucha woyite hatto assa qarra  ikkitannonsa. Konne assi konne assitooti yaannohu Qullaawu Maxaafi seeri heeˈrannokki woyite mitootu hasidhure assa dandiitannoha lawannonsa. Wolootu kayinni seeru hasiisannokki coyira seera hasidhara dandiitanno. Lawishshaho, Qorontoosi heeˈranno Kiristaani kaphu magannara kakkalloonni sagale ita dandiitannoronna teˈee kulanno seeri nooro Phaawuloosi xaˈmitinoha ikkara dandaanno. Phaawuloosi insa maa assitannoro kulantenni mittu mittunku Kiristaanchi tiiˈˈisi yaannore macciishshe doodha dandaannota ammanino. Isi mittu mittunku Kiristaanchi tiiasi xursiisannokkihanna woloota gawajjannokkiha dancha doorsha doodhanno gede kaaˈlannonsaha xintu seera kulinonsa. (1 Qor. 8:4, 7-9) Phaawuloosi Qorontoosi heeˈranno Kiristaani wolu manni shombinni foolantenni woy seera calla hasiˈrantenni Qullaawa Borro horoonsiˈre uminsa doorsha doodhanno gede rosiisinonsa; konni garinni isi insa ayyaanaamittetenni gikki yitanno gede kaaˈlate sharramino.

15. Phaawuloosi Ibiraawootu Kiristaani ayyaanaamittetenni lophanno gede kaaˈlinonsahu hiittoonniiti?

¹⁵ Phaawuloosi Ibiraawootu Kiristaanira borreessino sokkanni kaajja roso ronseemmo. Mitu ayyaanaamittetenni lopha agurtino; insa ‘kaajjado ayyaanaamittete sagale ita agurte’ ado aga hasidhino. (Ibi. 5:12) Insa songote widoonni yanna yannate kiiro xawinsanni halaale huwattukki gattino. (Law. 4:18) Lawishshaho mitu 30 diri albaanni Kiristoosi kakkalo Muse seera huntinoha ikkirono, batinye Yihudu ammanaano Muse seera agadha hasiissanno yitanni rosiissino. (Rom. 10:4; Tit. 1:10) Woleteemmero hakkunni 30 diri giddo Yihudu Kiristaani xaate Muse seera agadha hasiissannokkita huwata dandaanno! Phaawuloosi qullaawu ayyaaninni Ibiraawootu Kiristaanira borreessino sokka nabbawanno manni baalu konni maxaafi giddo nooti kaajjado ayyaanaamittete sagale ikkitinota buuxa dandaanno. Kuri Kiristaani Yihowa magansiˈrate qixxeessinoonni qixxaawo wole baalantenni roortannota ikkitinota albinni roore ammananna Yihudu manni giwinsarono woˈmanka woyite sabbakate worbimma hasiissinonsa.—Ibi. 10:19-23.

QUWA SAˈINE KIˈNENEETO ADDAXXA QOROPHE

16. Ayyaanaamittetenni lopha hasiissannonketano agurranna wolere maa assa hasiissannonke?

¹⁶ Ayyaanaamittetenni gikki yaate calla ikkikkinni gikki yee heeˈrateno sharrama hasiissannonke.  Hatto assate quwa saˈne umonke addaxxa qoropha hasiissannonke. (1 Qor. 10:12) Ayyaanaamittetenni lophinanni heeˈnoommoro buuxate ninkeneeto ‘fonqolle layiˈra’ hasiissannonke.—2 Qor. 13:5.

17. Phaawuloosi Qolasiyaasi Kiristaanira borreessino sokka ayyaanaamittetenni gikki yee heeˈra hasiissannota leellishshannohu hiittoonniiti?

¹⁷ Phaawuloosi Qolasiyaasi heeˈranno Kiristaanirano, ayyaanaamittetenni gikki yee heeˈra hasiissannota luphi asse kulino. Insa ayyaanaamittetenni gikki yitino Kiristaana ikkiturono, Phaawuloosi alamete hedo xaxxabbe amaddannonsakki gede qoropha hasiissannonsata kulinonsa. (Qol. 2:6-10) Qoleno Qolasiyaasi songora noo Kiristaana seekke afinohu Ephafira, ‘insa kaajjite uurritanno gede’ woy ayyaanaamittetenni gikki yitanno gede woˈmanka woyite huuccatto assanno. (Qol. 4:12) Ninke tennenni maa ronseemmo? Phaawuloosinna Ephafira ayyaanaamittetenni gikki yee heeˈrate ninke uminkenni sharramanna Maganu kaaˈlo hasiissannonketa huwattino. Insa Qolasiyaasi heeˈranno Kiristaani qarra ikkannori heeˈrirono ayyaanaamittetenni gikki yite heedhara hasidhino.

18. Ayyaanaamittetenni gikki yiino Kiristaanchi ma ikkara dandaanno? (Misileno lai.)

¹⁸ Phaawuloosi Ibiraawootu Kiristaanira ayyaanaamittetenni gikki yiino Kiristaanchi Magano hagiirsiisa hoogara dandaannota kule qorowisiisino. Mittu Kiristaanchi wodanisi dillaawiro loosino cubbira gaabba hoogaranna Maganu maaro afiˈra hoogara dandaanno. Ibiraawootu Kiristaanira kayinni togoo coyi tuncu diyiinonsa. (Ibi. 6:4-9) Xaa yannara ayyaanaamittetenni qiiddinori woy songotenni bohante gedensoonni maaro eˈinorina? Insa umonsa heeshshi assite maaro eansa Phaawuloosi kulino manni gedeere ikkitinokkita leellishshanno. Ikkirono insa Yihowawa higganno woyite isi qixxeessino qixxaawo hasiissannonsa. (Hiz. 34:15, 16) Songote cimeeyye insa galagalte ayyaanaamittetenni jawaattanno gede, gikki yitino roduuwi kaaˈlitannonsa gede assitara dandiitanno.

19. Hiittoo mixo fushshiˈra hasiissannonke?

¹⁹ Ayyaanaamittetenni gikki yaate sharrantanni noottoha ikkiro mixokki wonshiˈra dandaatto! Kaajjado ayyaanaamittete sagale sagaˈla agurtooti; hattono Yihowa hedanno garinni hedate sharrami. Qoleno ayyaanaamittetenni gikki yoottoha ikkiro gikki yite heeˈrate dandiittore baala assi.