ISRAEELETE wido ikkitinokki labballi Daawiti olanto ikkite soqqantino; insa giddo mitu, Amoonichu Tseleqiiti, Hitichu Ooriyooti hattono Moaabichu Yutimaati. a (1 Dud. 11:39, 41, 46) Qoleno Daawiti olanto ‘Keritootaho, Felitootahonna Gaati mannaati.’ (2 Sam. 15:18, NW) Keritootunna Felitootu Filisxeemootu ledo fiixooma xaaddanno yine hendanni. (Hiz. 25:16) Gaati manni Filisxeemete katamira Gaati heeꞌrannoha ikkikki digatino.—Iya. 13:2, 3; 1 Sam. 6:17, 18.

Daawiti Israeelete wido ikkinokki labballi olantosi ikkanno gede fajjinohu mayiraati? Daawiti insa isira roorenkanni Yihowara ammanantinore ikkitannota addaxxino. Lawishshaho, mittu Qullaawa Maxaafa tiranno maxaafi, Keritootunna Felitootu daafira kulanni togo yiino: “Insa Daawiti moohinote lowo geeshsha qarrissanno yannara isira ammanante heedhino.” Hiittoonni? Israeelete manni baalunku Moote Daawiti agure “Saaba yinannihu yawaawulu manchi” hoode haꞌrita, Keritootunna Felitootu Daawitira ammanante heedhino; hattono Saaba finqille ittisate Daawitira halantino. (2 Sam. 20:1, 2, 7) Wole yannara Moote Daawiti beetti Adooniyaasi zuufaane ragiꞌrate gano gaꞌnino. Ikkirono Keritootunna Felitootu Daawitira ammanante heedhino; hattono Yihowa doorinohu Moote Selemooni Daawiti lekkise moohanno gede kaaꞌlitino.—1 Mot. 1:24-27, 38, 39.

Daawitira ammaname heeꞌrinohu wolu Israeelicha ikkinokkihu Itayiiti. Itayinna 600 xibbe olantosi, Moote Daawiti beetti Abeseloomi finqili yannaranna Israeelete manni mootete finqilanno gede assi yannara Daawiti kaaꞌlitinosi. Daawiti umi qara Itayi Israeelicha ikkinokki daafira isira kaaꞌlame olamannokkita kulinosi. Itayi kayinni togo yiino: “Heeshshote Kaaliiqinna ate halaali afanna, reyono heeshshono ikkituro ati haꞌrittowa haꞌreemmo.”—2 Sam. 15:6, 18-21.

Keritootu, Felitootunna Gaati manni Israeelete wido ikkitinokkiha ikkirono, Yihowa halaalaancho Magano ikkinota hattono Daawiti Yihowa buurinoha ikkinota huwatino. Daawiti kuri ammanantino labballi kaaꞌlitinosi daafira lowo geeshsha hagiidhinoti dihuluullissannote!