Ilamoommohu 1955nniiti; sasu labballi giddo ani maaꞌneho. Lophoommohu Finilaandete wodiidoonni baaru qacceraati; konne qooxeessa xaa yannara Vaanta katama yinanni.

Amaꞌya cuuante Yihowa Farciꞌraasincho ikkitinohu ani ilamammora boodu diri albaanniiti. Ikkirono anniꞌya halaale dibaxanno; hattono amaꞌya Qullaawa Maxaafa xiinxallissankeranna songote gambooshshe haadhe hadhankera dihasiꞌranno. Hakko daafira amanke anninke mine heeꞌrannokki yannara, Qullaawu Maxaafiha xinta ikkino halaale rosiissannonke.

Anjeꞌyanni hanafe Yihowara halamoommo. Lawishshaho, mitte yannara 7 dirihu heeꞌreenna rosiisaanchoꞌya Veerilaatiya (Finilaandennite mundee karsiinse loonsanni keekeeti) ita giwoommo daafira, hanqite fuu yitino. Ise mitte angasenni afooꞌya fante teꞌee angasenni shukkunni keeke haadhe afiiꞌyara worate woꞌnaaltino. Ani kayinni shukka angasenni hooꞌloommo.

Ani 12 dirihu heeꞌreenna anniꞌya mannu aalo ikkino. Hakkunni gedensaanni songote gambooshshe haꞌra hanafoommo. Songote giddo noo roduuwi anera heddannoeta leellishshino; tini ayyaanaamittetenni lopheemmo gede assitinoe. Barru baala Qullaawa Maxaafa nabbawanna borronke diinaggaawe xiinxalla hanafummo. Konne coye ganye asseemmo daafira, Woxawaajje 8, 1969nni 14 dirihu heeꞌre cuuammoommo.

 Roso gudummohu gedensaanni mulenni woꞌma yanna suwisaancho ikke soqqama hanafummo. Boode lamala gedensaanni sabbakkannori roore hasiissannoha Finilaandete gobbara nooha Pilivaasi yinanni qoqqowo haꞌrummo.

Pilivaasi Siriika yinanni beetto ledo egennamummo; gedensoonni ise ledo adhammummo. Ise dhukase affinotanna ayyaanaamittetenni lowo geeshsha worba ikkitinohura lowo geya baxissinoe. Ise mannu jajannota ikka woy maalaamittete qawaaxxo dihasidhanno. Lamunku soqqammeemmo soqqansho ikkitutano ikkituro, dandiinummo deerrinni Yihowara soqqama halchinoommo. Hakkiinni Badheessa 23, 1974nni adhammummo. Adhammummohu gedensaanni walli yaate wolewa haꞌra agurre sabbakkannori lowo geeshsha hasiissannowa Kartuula haꞌnoommo.

Adhammummohunni kayise Gashshootesi balaxisiinsummo geeshsha, Yihowa maalaamittetenni hasiisannonkere wonshannonketa leellishino. (Mat. 6:33) Lawishshaho, Kartuulaho heeꞌnoommo waro makeenu dinonke. Umi qara haꞌneemmohu sayikiletenniiti. Ikkirono hakkiicho hawado qiidu lowo geeshsha batiꞌranno. Xeertiꞌre noo qooxeessira sabbakate makeenu hasiisannonke. Kayi mitto makeena nafa hidhate woxu dinonke.

Hedeweelcho bayiru rodiiꞌya laꞌꞌankera dayi. Isi shaqqillunni makeenasi uyinke. Makeenu inshuraanse baantoonniho. Ninke nadaajella hidha hasiissannonke. Hakkunni gedensaanni hodhishshaho hasiisannonke makeena afiꞌnoommo.

Yihowa maalaamittetenni hasiisannonkere wonshanni noota leellishinonke. Ninke Gashshootesi balaxisiisalla hasiissannonke.

Suwisaanote Rosi Mine 1978nni ronsanni heeꞌneenna, rosiisaanonke giddo mittu Riimo Kukaaneni a yinanni rodii Giiliyaadi rosi minira forme wonshineemmo gede jawaachishinonke. Hakko daafira tennera ikkadda ikkate Ingilizete afoo rosa hananfummo. Ikkirono 1980nni forme wonshinammora albaanni, Finilaandete noote sinu biirora soqqammeemmo gede koyinsinke. Hatte yannara Beeteelete soqqantannori Giiliyaadi eꞌe rosa didandiitanno. Ikkirono ninke hasiꞌnoommo bayicho ikkikkinni Yihowa hasiꞌranno bayicho soqqama hasiꞌnoommo. Hakko daafira Beeteelete  soqqamate maahoyye yinoommo. Ikkirono Giiliyaadi rosi mine eꞌꞌe rosate forme wonshinammora dandiineemmo yine hendoommo daafira, Ingilizete afoo rosa diagurroommo.

Boodu diri gedensaanni Aliidi Bisi Beeteelete soqqantannori Giiliyaadi rosi mine eꞌe rosate forme wonshitanno gede fajjino. Hakkiinni bayichonkonni forme wonshinummo; kayinni forme wonshinoommohu Beeteelete soqqama gimboommo daafira diꞌꞌikkino. Ikkadda ikkinummoro sabbakkannori roore hasiissannowa haꞌre sabbakate ninkeneeto shiqisha hasiꞌnoommo. Hakkiinni Wocawaaro 1985nni Giiliyaadi rosi mine 79^ki kifile eꞌne ronse maassammummo. Hakkiinni Kolombiyaho soqqammeemmo gede gaammoonninke.

Kolombiyaho umo sinu biirora soqqammeemmo gede gaamminke. Uyinoonnie looso loosate danduummore baala assoommo; ikkirono sinu biirora mitto diro soqqammummohu gedensaanni wolu gari soqqansho soqqama hasiissannonke yee hedummo. Heeshshoꞌya giddo mite yee wole looso uyinannie gede xaꞌmiꞌrummo. Hakkiinni Huula qoqqowira Niiva yinanni katamira misiyoone ikkine soqqammeemmo gede sonkinke.

Woꞌmanka woyite qanchu soqqansho lowo geeshsha baxeemmo. Finilaandete suwisaancho ikke soqqameemmohu ane calla ikkoommo daafira, mito woyite soodonni kayise hawarro geeshsha sabbakeemmo. Siriikanna ani haarote adhammoommore ikkinoommo daafira, barra woꞌma sabbankanni honseemmo. Xeertote noo qooxeessira sabbankeemmo woyite mite yannara makeeninke giddo gonxeemmo. Tini makeenunni haꞌneemmo yanna ajishatenna aananno barra soodonni kaꞌneemmo gede kaaꞌlitannonke.

Misiyoone ikkine soqqammeemmore ikkinoommo daafira bashshonte gede soqqanshote laalaanteemmore ikkinoommo. Songonkeno kiiro lexxitino; hattono Kolombiyaho noo roduuwi manna ayyirrissannore, mimmito baxxannorenna galattannore ikkitino.

Ninke soqqammeemmohu Niiva katami mule Yihowa Farciꞌraasine nookki katamma no. ‘Kuri qooxeessira halaalu iillanno gede ma garinni assa dandiinanni?’ yee yaadoommo. Ikkirono hakko katamira shittu noo daafira, wole gobbanni dayino mannira hakko heeꞌra gawajjitannote. Hakko daafira hatte katamma giddo Yihowa Farciꞌraasinchi heeꞌranno gede huucciꞌroommo. ‘Halaale rosanno gede hakku manchi Niiva katamira heeꞌra hasiissannosi’ yee hedoommo. Qoleno kuni manchi cuuamihu gedensaanni ayyaanaamittetenni gikki yaanno gedenna sabbakate ilamino katama higanno gede huucciꞌroommo. Yihowa ani hedoommohunni woyyino mala qixxeesse noota hakka woyite dihuwatoommo.

Shiima yanna gedensaanni Fernaando Gonzaleezi yinanni wedellicha Qullaawa Maxaafa xiinxallisa hanafummo. Isi Aljesiraasi yinanniwa heeꞌranno; kuni katami Yihowa Farciꞌraasine nookki katamma giddo mittoho. Fernaando 50 kiilomeetire saꞌanno doogo looso loosate Niiva katama haꞌranno. Isi xiinxallote dancha gede qixxaawanno; hattono bayichonko baalanka gambooshshe haꞌra hanafino. Fernaando xiinxallo hanafihunni mitte lamala gedensaanni ilamino katami giddo manna gamba asse Qullaawu Maxaafinni rosinore kula hanafino.

 Fernaando Qullaawa Maxaafa xiinxalla hanafihunni 6 agani gedensaanni yaano Arfaasa 1990nni cuuamino. Hakkiinni isi woꞌma yanna suwisaancho ikkino. Aljesiraasi mittu Yihowa Farciꞌraasinchi noo daafira xa sinu biiro hakko qooxeessira baxxitino suwisaano soya dandiitanno. Ammajje 1992nni hakko katamira songo xintantino.

Fernaando isi ilamino katamira calla sabbakinoni? Deeꞌni! Isi mine kalaqiꞌrihu gedensaanni minaamasi ledo Saani Visenti deeli Kaguuni yinanni katama haꞌrino; kuni katamino Yihowa Farciꞌraasine dinooho. Insa hakkiicho songo xintantanno gede kaaꞌlitino. Hakkiinni 2002nni Fernaando woradu aliidi laꞌꞌaancho ikke shoomamino; qoleno isinna minaamasi Olga xaa geeshsha woradu looso loosanni no.

Uyinanninkehu tiokiraasete loosi daafira bande kulle Yihowa huucciꞌra lowo geeshsha hasiissannota rosoommo. Yihowa ninke assa dandiineemmokkire assanno. Qoleno midote loosi ninkeha ikkikkinni isiho.—Mat. 9:38.

Hakkiinni 1990nni woradu looso loonseemmo gede gaamminke. Umo woradu looso qaru katamira Bogota yinanniwa loonsoommo. Konne looso loosa lowo geeshsha waajjinoommo. Minaamaꞌyaranna anera baxxitino dandoo dinonke. Qoleno mannu batiꞌranno katamira heeꞌne diegenninoommo. Ikkirono Yihowa Filiphisiyusi Sokka 2:13 eino qaale wonshino. Qummeeshshu togo yaanno: “Maganu hagiidhanno coyira hasatto heedhannoꞌne gedenna loosoho kaꞌinanni gede wolqa aannoꞌne.”

Gedensoonni hanafote kulummo katami giddo noohu Medeliini yinanni qooxeessira mittu woradi giddo soqqammeemmo gede gaamminke. Hakkiicho heeꞌranno manni finqilu manni assannore biso assiꞌrino daafira, finqille kaꞌanno woyite bashshi diassanno. Lawishshaho, mitto barra mitto mancho Qullaawa Maxaafa xiinxallisanni heeꞌreenna mannu insa insanaawa olama hanafino. Ani mase jalli yuummo; Qullaawu Maxaafi rosaanchi kayinni mittoreno bashshi assikki gufo nabbawa diagurino. Nabbawe guditi kayinni maaro xaꞌmiꞌre gobbara fulino. Shiima yanna gedensaanni lame qaaqquulle adhe daye, “Maarie ballo qaaqquulleꞌyalla abbirammora haꞌroommona” yii.

Wole yannara qole masisannori tuncu yiinonke. Mitte yannara minunni mine soqqammanni heeꞌneenna minaamaꞌya masse jajjartinoti mite doddanni anewa higge daggino. Ise mittu manchi tokkose shee hooginoseta kultinoe. Hakkiinni mase quubbi yuummo. Ikkirono manchu ise shaara hasiꞌre tokkosinokkita gedensoonni huwantoommo; kuni manchi tokkosinohu ise muleenni saꞌꞌanni noo manchiraati.

Gedensoonni ninkeno finqilu manni assannore waajja agurre biso assiꞌnummo. Togoohunna wolu buutote qarri iillinonsari hakko heedhannori Yihowa Farciꞌraasine woꞌnaalshi jawaante ikkinonke. Hakkiinni, Yihowa insa kaaꞌlanni noonsaha ikkiro ninkeno kaaꞌlannonke yine hendummo. Woꞌmanka woyite songote cimeeyye uyitannonke biddishshira hajajammoommo, dano abbannore qorophinoommo hattono Yihowa addaxxinoommo.

Hige mitu coyi ninke hendummo geya gawajjannoha diꞌꞌikkino. Mitte yannara mitto mine mancho  hasaawisanni heeꞌreenna gobbaanni lame meenti insa insanaawa xonamanni noota labbanno huuro macciishshummo. Gibbo laꞌꞌa hasiꞌroommokkiha ikkirono qaete ama gobbara fuleemmo gede kultue. Gedensoonni afeemmo woyite, ada yinita yitannoti lame ceicho olluu giddo nyerri yaannori lame meenti yaannore woroo agarte yitanni no..

Hakkiinni 1997nni Soqqamaanote Qajeelshi Rosi Mine rosiiseemmo gede shoommie. b Tiokiraasete rosi mine rosa woꞌmanka woyite lowo geeshsha baxeemmo; kayinni dhagge ikkitannota rosiisaancho ikkate qoosso afiꞌreemmo yee horo hede diegennoommo.

Gedensoonni awuraajju aliidi laꞌꞌaancho ikke soqqama hanafummo. Tini qixxaawo gattuta galagale woradu looso loosa hanafummo. Hakko daafira 30 saꞌꞌanno diro rosiisaanchonna woradu aliidi laꞌꞌaancho ikke soqqamoommo. Konne looso loosaꞌyanni lowo atoote afiꞌroommo. Ikkirono baalunku coyi qiniinoe yaa diꞌꞌikkino. Hanni xa hatto yoommohu mayiraatiro kuleemmoꞌne.

Ani worbahonna mittoreno bashshi asseemmokki manchooti. Tini qolte qarra ikkanno coye dandee saeemmo gede kaaꞌlitinoe. Ikkirono songote giddo mite hajo biddi assate diinaggaawe looseemmo woyiti no. Mito woyite mitu roduuwi baxillu noonsarenna quwa saꞌannokkire ikkitanno gede seekke amaaleemmonsa. Kayinni hakka woyite ani umiꞌya tini akatta nooeta dileellishoommo.—Rom. 7:21-23.

Soꞌro looseemmo daafira mito woyite hexxo mudheemmo. (Rom. 7:24) Mitte hige misiyoonete soqqansho agure Finilaande higa woyyitannoe yee Yihowara huuccattotenni kulummo. Hatte hawarro songote gambooshshe haꞌrummo. Gambooshshunniwa afiꞌroommo jawaante misiyoone ikke soqqamanni heeꞌranna laanfeꞌya dandee heeꞌra hasiissannoeta ammaneemmo gede assitinoe. Yihowa huuccattoꞌyara dawaro qolino gara xaa geeshsha dhagge assiꞌreemmo. Qoleno isi laanfeꞌya dandee saeemmo gede shaqqillunni kaaꞌlinoe daafira lowo geeshsha galaxxeemmosi.

Siriikanna ani roore heeshshonkenni, woꞌma yanna soqqansho soqqamate qoosso afiꞌnoommo daafira lowo geeshsha tashshi yiinonke. Qoleno konni baalunku diri giddo Yihowa baxillaanchonna ammanantino minaama uyinoe daafira lowo geeshsha galaxxeemmosi.

Muli yannara 70 diro ikkannoe daafira rosiisaanchonna woradu aliidi laꞌꞌaancho ikke soqqama agureemmo. Ikkirono tini hexxo mudheemmo gede diassitannoe. Mayira? Korkaatuno Yihowa roore hagiirsiissannoti dhukanke anfe isira soqqamanna baxillunna galatu noonketa leellishanno garinni iso guwisiꞌra ikkitinota seekke ammaneemmo. (Mik. 6:8; Maq. 12:32-34) Yihowa hagiirsiisate maccare ikka hasiissannonke yaa diꞌꞌikkino.

Yihowara soqqamoommo soqqansho qaageemmo woyite, tenne soqqanshote qoosso uyinoonniehu woloota rooroommo daafira ikkinokkita huwateemmo; qoleno tenne qoosso uyinoonniehu baxxitino dandoo nooe daafira diꞌꞌikkino. Hatteentenni Yihowa tenne qoosso uyinoehu eltosinniiti. Laanfe nooeha ikkirono isi tenne qoosso uyinoe. Konne looso umo fushsha dandeemmohu Yihowa kaaꞌlonni calla ikkinota afoommo. Konni garinni laanfeꞌya Maganu jawaante xabbe leeltanno gede assitino.—2 Qor. 12:9.