DOONI yinannihu Kanaadaho heeꞌrannohu Yihowa Farciꞌraasinchi, mine afiꞌrinokkihu gobba galanno mannira farciꞌrate woꞌnaalanno. Togoo manni giddo mittu Piteriiti; Dooni isi daafira togo yiino: “Doogote galannohu mine afiꞌrinokkihu Piteri yinanni manchi geeshsha sona baino manna afe diegennoommo. Isi bushu akati noosiho; qoleno manna shiqqo diaannoho. Mannu iso kaaꞌlate assinore lowore giwino.” Dooni kayinni 14 diro saꞌanno yanna giddo babbaxxitino yannara konne doogote galanno mancho ceeꞌmikkinni kaaꞌlate woꞌnaalino.

Mitto barra Piteri Dooni togo yee xaꞌmino: “Mayira daafuratto? Wolu manni anewa dishiqanno. Ati anera mayira shetatto?” Dooni Piteri kaaꞌlate sase qummeeshsha hayyotenni horoonsiꞌrino. Umo, isi Piteri Maganoho suꞌmu noosita afinoronna teꞌee xaꞌme, Faarso 83:18 nabbawanno gede assi. Hakkiinni aanche isi Piterira hedannohu mayiraatiro leellishate, “Kaaliiqi [‘Yihowa’, NW] suꞌma woshshannohu baalu gatanno” yitannota Roomu Sokka 10:13, 14 nabbawanno gede assi. Jeefote, Dooni Maatewoosi 9:36 nabbawe kae, Piteri umisi nabbawanno gede assi. Qummeeshshu togo yaanno: “[Yesuusi] allaalaanchu nookki geꞌreewi gede ikke qarramenna gara hawe noo manna afe marari.” Tenne nabbawe kaiti Piteri illete hindiiddo abbe togo yee xaꞌmi: “Ani hakko geꞌreewi wido ikkeemmo?”

Piteri mito coye biddi assiꞌra hanafi. Isi biso hayishshiꞌrenna ereeda meexxe, Dooni uyinosi uduunne uddiꞌri. Piteri hakkuyi gedensa albisi gede doofaara agurino.

Piteri barru barrunkunni tuncu yiinosire borreesse amadanno. Isi alba borreessannori hexxo mudhinota leellishannoreeti; muli barra borreessannori kayinni baxxinoho. Borreessino coyi giddo togo yaannohu no: “Maganoho suꞌmu noosita afoommohu techooti. Xaate huuccatto assiꞌreemmo wote, Yihowawa huucciꞌra dandeemmo. Suꞌmasi afa lowo geeshsha hagiirsiissannote. Dooni, Yihowa huucciꞌreemmo yannanna huucciꞌreemmo coyi baxiha ikkirono,  ayewoteno macciishshannoeha jaalaꞌya ikka dandaannota kulinoe.”

Piteri jeefote borreessinori roduuwisira borreessinoho. Isi togo yiino:

“Techo diseyinoe. Geedhimma amaddinoeha lawinoe. Techo barri anera goofimarchu barra ikkiro nafa, Gannatete jaaliꞌya [Dooni] ledo xaadeemmota afoommo. Tenne borro nabbabbinanni heedhinoonniha ikkiro, ani lubbote dinoommo. Madaarshiꞌyawa wolu manniwiinni baxxino mancho laꞌiniro, isi ledo hasaabbe; konne shiima gordu dani kuuli maxaafa nabbabbe ballo. a Kuni maxaafi jaaliꞌya ledo Gannatete galagale xaadeemmota kulanno. Tenne woꞌmunni woꞌma ammaneemmo. Rodiiꞌne, Piteri.”

Piteri reyi yannara rodoosi Uumi madaarshisi gedensaanni togo yitino: “Lamu diri albaanni Piterinni xaadoomma. Lowo diri giddo isi alba xaweenna laoommahu hakko barraati. Isi muushshi nafa yiino.” Ise Doonira togo yitino: “Kuni maxaafi rodiiꞌya wodanira coinohu baxxino maxaafa ikkinohuraati; hakko daafira anino nabbaweemma.” Qoleno, Uumi muli diro qixxeessinoonniha Qullaawu Maxaafi Addinta Mayyee Rosiisanno? yaanno maxaafa Yihowa Farciꞌraasincho ledo xiinxallate sumuu yitino.

Ninkeno manna aana agurre giddoyidi ayimma laꞌꞌa dandiineemmo; insara baxille leellishanna ceeꞌminummokkinni kaaꞌla dandiineemmo. (1 Xim. 2:3, 4) Hatto assineemmoha ikkiro, Piteri gede mannu illera busha lawannoha ikkirono dancha wodana afiꞌrino manna kaaꞌla dandiineemmo. ‘Wodana laꞌꞌanno’ Magani, dancha wodana afiꞌrino manni giddo halaalu gumi lophanno gede assanno.—1 Sam. 16:7; Yoh. 6:44.