TOGO yee coyiꞌrinohu biꞌre Israeelete moohinohu Daawiti mitte manchonni doogote xaadi yannaraati. Manchote suꞌmi Abigiyati. Daawiti ise galatanno gede assinori maati? Ninke ise lawishshinni maa ronseemmo?

Daawiti tenne galte afidhino manchonni xaadinohu Moote Saaooli shaannosikki gede xooqanni noo yannaraati. Abigiya Yihudaho aliyyeenni ilaalaamu qooxeessiꞌra heeꞌrannohu saada afiꞌrinohu dureessu manchi Naabaalira assidhino. Daawitinna mannisi, Naabaali hoshshanna allaalaasinesi ‘huxximma gaangeessite agartinonsa.’ Yannate gedensaanni Daawiti sagale hoogi yannara, Naabaali dandaannore asse kaaꞌlannosi gede mannasi isiwa soyino. (1 Sam. 25:8, 15, 16) Daawitinna mannisi Naabaalira assitinore hendiro, Daawiti xaꞌmiꞌrinori assate qarrisannore diꞌꞌikkino.

“Gowwa” yitanno tiro afiꞌrino suꞌmi noosihu Naabaali kayinni gowwimmate looso loosino. Isi kaajjishenna saalfachishannore coyiꞌre Daawiti xaꞌmiꞌrinore hoꞌlino. Konnira Daawiti, Naabaali bushare coyiꞌrinoteranna afiꞌre heeꞌrenni hoꞌlinositera iso qorichishate kai. Naabaali gowwimmatenni assinori isiranna minisi manni baalaho goofo abbannoho.—1 Sam. 25:2-13, 21, 22.

Abigiya tenne huwattinohura rakke mitore assate kaꞌu. Ise Daawiti Yihowa ledo noosi jaalooma hunannore assannokki gede kulte ayirrinyunni huuccitino. Hattono, aane moote ikkannohura Daawitiranna mannisira lowo sagale massitino. Daawiti cubbo ikkinore assannokki gede Yihowa ise widoonni kaaꞌlinosita coyiꞌrino. Daawiti Abigiyara togo yiino: “Mannu mundee duneemmokki gede . . . assattaera tenne hayyo uyinohe Magani galatamo; aterano Maganu ikkohe.”—1 Sam. 25:18, 19, 23-35.

Ninke baalunku assinoonninkehu danchu coyiꞌra galatiweelo ikkine Naabaali gedeere ikka horo dihasiꞌneemmo. Qoleno, bushu coyi ikkara noota anfummoro, hakko coye hayyotenni tira hasiissannonke. Togoo yannara faarsaasinchu gede, Yihowa “ogimmanna [woy wodanchanna] hayyo uyie” yine huucciꞌra dandiineemmo.—Far. 119:66.

Mannu assineemmo coye lae hayyo woy wodancha noonketa afa dandaanno. Daawiti gede insa afuunni coyiꞌre woy wodaninsanni, ‘Hayyokkira Maganu maassiꞌrohe!’ yaannoha ikkara dandaanno.