1, 2. (a) Yihowa uyinonketi sase ayyaanaamittete jiro hiittenneeti? (b) Konni birxichira mayinnire ronseemmo?

 YIHOWA Kalqete alame aana baalunkunni roore dureessaati. (1 Dud. 29:11, 12) Isi shaqqado Anna ikkino daafira, ayyaanaame jiro naaddannorira baalaho mararikkinni aanno. Yihowa lowota ayyaanaamittete jiro uyinonkehura galanteemmosi; tenne ayyaanaamittete jiro giddo gama: (1) Maganu Mangiste, (2) heeshsho gatissanno soqqanshonna (3) Qullaawu Maxaafiho muxxe halaaleeti. Qoropha hoogummoro kayinni tenne muxxe jiro hunne agurreemmoha yaano naada hoongeemmoha ikkara dandaanno. Tenne muxxe jiro seekkine cuꞌmiꞌrate, garunni horoonsiꞌranna isera noonke baxilli yannate kiiro haarooꞌmanno gede assiꞌra hasiissannonke. Yesuusi togo yiino: “Woxiꞌne [jiroꞌne] noowa wodaniꞌneno hakko heeꞌranno.”—Luq. 12:34.

² Hanni Maganu Mangiste, soqqanshonna Qullaawu Maxaafi halaale albinni roore baxa dandiineemmo gara ronso. Kuri coyibba ronseemmo wote, ati tenne ayyaanaamittete jirora noohe baxilli lexxanno gede assiꞌra dandaatto gara hedi.

3. Yesuusi coyiꞌrino lawishshira kulli manchi lowo waaga afidhino inqu hidhate maa assino? (Hanafote noo misile lai.)

³ Maatewoosi 13:45, 46 nabbawi. Yesuusi ayirrado uduunnicho woy inqu hasiꞌranno daddalaanchire kulanno lawishsha coyiꞌrino. Kuni daddalaanchi batinye inqu hadhanninna hiranni keeshshinoti dihuluullissannote. Xa kuni daddalaanchi mitte roore waaga afidhino inqu afiꞌrino; tenne inqu illete laꞌꞌasi calla wodanisi hagiidhanno gede assitino. Ikkollana tenne inqu hidhate noosire baala hira hasiissinosi. Tini inqu isira mageeshshi geeshsha lowore ikkitinoro hanni hedi!

4. Daddalaanchu inqu baxinte gede ninkeno Maganu Mangiste banxummoro maa assineemmo?

⁴ Ninke kawiinni mayi roso afiꞌneemmo? Maganu Mangiste halaali lowo waaga afidhino inqu gedeeti. Maganu Mangiste daddalaanchu inqu baxi gede banxeemmoha ikkiro, tenne Mangiste qansoota ikkine heeꞌrate assa hasiissannonkere baala assineemmo. (Maarqoosi 10:28-30 nabbawi.) Hanni hatto assinohu lamu mannire laꞌno.

5. Zakkiwoosi Maganu Mangistera yee maa assino?

⁵ Zakkiwoosi qaraxaasinete roorrichaati; isi manni woxe hanaaqe adhanni dureessa ikkino. (Luq. 19:1-9) Ikkollana, kuni cubbaataamu manchi Yesuusi Maganu Mangiste daafira sabbakanna macciishshi; isi macciishshinori lowo waaga afiꞌrinoha ikkinota huwatinohura hakka wontenni mittore assate kaino. Zakkiwoosi togo yiino: “Mootichaꞌya, afiꞌroommo jiro baalantenni taaloote buxanete eemmo. Mannuwiinni hanaaqe adhoommo woxi heeꞌrirono, shoole anga asse qoleemmo.” Isi hanaaqe adhino jiro baala hagiirrunni uyino; hattono maalaamittete coyira hafuura agurino.

6. Mitte mancho Maganu Mangiste daafira yite maa biddi assidhino? Ise hatto assitinohu mayiraati?

⁶ Boodu diri albaanni mitte mancho Maganu Mangiste sokka macciishshitu yannara, meyate ledo foortannote. Qoleno ise hakka waro togoo manni qoossora gaarantanno dirijjite sooreetteeti. Ikkollana, tini mancho Qullaawa Maxaafa xiinxallituti, Maganu Mangiste halaali lowo waaga afiꞌrinoha ikkinota wodanchitu. Ikkirono ise lowo coye biddi assiꞌra hasiissannoseta huwattu. (1 Qor. 6:9, 10) Yihowara noose baxilli silxaanesenna foorrete heeshsho agurtanno gede assinose. Ise 2009nni cuuantino; hakkiinnino aanino diro woꞌma yanna suwisaancho ikkite soqqama hanaffino. Ise Yihowanna Mangistesi lowo geeshsha baxxinohura maalu yortose baala agurtino.—Maq. 12:29, 30.

7. Maganu Mangiste woꞌmu wodaninkenni baxa agurreemmokki gede kaaꞌlannonkeri maati?

⁷ Ninke giddo batinyu Maganu Mangistera yine heeshshonke giddo lowo coye biddi assiꞌnoommoti egennantinote. (Rom. 12:2) Ikkirono xaano biddi assara hasiisannonkeri heeꞌrara dandaanno. Maganu Mangistera noonke baxilli baꞌꞌanno gede assannore lawishshaho maalaamittete coye banxeemmokkinna gara ikkitinokkiti siimu xaadooshshi hasatto heedhannonkekki gede qoropha hasiissannonke. (Law. 4:23; Mat. 5:27-29) Yihowa Mangistesi woꞌmu wodaninkenni baxate kaaꞌlitannonketa wole lowo waaga afidhino jiro uyinonke.

8. (a) Phaawuloosi soqqanshonke ‘doru uduunnichi giddo noo miinji’ gede asse xawisinohu mayiraati? (b) Phaawuloosi soqqanshosi naadannota leellishinohu hiittoonniiti?

⁸ Yesuusi, Maganu Mangisteha dancha duduwo duduwatenna rosiisate looso uyinonke. (Mat. 28:19, 20) Soqqamaasinchu Phaawuloosi soqqansho lowo waaga afidhinota  huwatino. Isi soqqanshonke ‘doru uduunnichi giddo noo miinji’ gede asse xawisino. (2 Qor. 4:7; 1 Xim. 1:12) Guuntete xeꞌne noonke daafira ninke doru uduunnichi gedeeti; ikkollana sabbankeemmo sokka ninkeranna macciishshanno mannira hegere heeshsho uyitannote. Phaawuloosi tenne afino daafira togo yiino: “Konne baala assoommohu . . . Danchu Duduwi daafira yeeti.” (1 Qor. 9:23) Ee, Phaawuloosi soqqansho baxasi manna rosaano assate diinaggaawe soqqamanno gede assitinosi. (Roomu Sokka 1:14, 15; 2 Ximootewoosi 4:2 nabbawi.) Tini lowo manni giwisirono kaajje saꞌꞌanno gede kaaꞌlitinosi. (1 Tes. 2:2) Ninkeno soqqanshote togoo baxilli noonketa leellisha dandiineemmohu hiittoonniiti?

9. Soqqansho naandeemmota leellisha dandiineemmo doogga giddo mite hiittenneeti?

⁹ Phaawuloosi soqqanshosi naadannota leellishino doogga giddo mitte, afiꞌri faro baalantenni mannaho sabbakate. Ninkeno, soqqamaasinenna umi xibbi diri Kiristaaninte gede sabbakate fulloommokki wote, gudumaalehonna minunni mine haꞌne soqqammeemmo. (Soq. 5:42; 20:20) Heeꞌnoommo gari injaannoha ikkiro kaaꞌlaano suwisaano woy woꞌma yanna suwisaano ikkine albinni roore soqqama dandiineemmo. Qoleno wole afoo ronse, heeꞌnoommo gobba giddo wole qooxeessa haꞌne woy wole gobba haꞌne soqqama dandiineemmoha ikkara dandaanno.—Soq. 16:9, 10.

10. Ayiriini dancha duduwo duduwate murcidhinotera Yihowa maassiꞌrinosehu hiittoonniiti?

¹⁰ Hanni Ameerikaho heedhannote Ayiriini yinannite mine assidhinokki rodoo lawishsha laꞌno. Ise gobbasera daye heeꞌrannohu Ruusiyu Afoo coyiꞌranno mannira sabbaka lowo geeshsha hasidhino. Ise 1993nni Ruusiyu Afoo coyiꞌranno mannira farciꞌra hanaffu yannara Niyu Yorki Sitiira Ruusiyu Afoo coyidhanno gaamo giddo 20 halashshaano calla no. Ayiriini mitu 20 diri geeshsha Ruusiyu Afoo coyiꞌranno mannira diinaggaabbe sabbakkino. Ise “Ruusiyu Afoo xaa geeshsha seekke coyiꞌra didandeemma” yitino. Ikkollana Yihowa isenna wolootu diinaggaabbe assitinorira maassiꞌrinonsa. Xa Niyu Yorki Sitii giddo Ruusiyu Afoo coyidhannoti lee songo no. Ayiriini xiinxallissino manni giddo 15 cuuamino. Kuri roduuwi giddo mitu Beeteelawoota, suwisaanonna songote cimeeyye ikkite soqqantanno. Ayiriini togo yitino: “Wole mixo fushshiꞌroommaha ikkoommero xa afiꞌroomma hagiirri geeshsha hagiirsiisannoeri heeꞌrannoha horo dilawannoe.” Ee, ise soqqansho baasa naaddanno!

11. Dartu iillannonke yannara sabbaka agura hoongummoro mayi guma afiꞌneemmo?

¹¹ Ninkeno Soqqanshonke naandeemmoha ikkiro, soqqamaasinchu Phaawuloosinte gede baxi darti iillinkerono sabbaka diagurreemmo. (Soq. 14:19-22) Ameerikaho heeꞌranno roduuwinkera 1930 kayise 1944  geeshsha lowo qarri iillinonsa. Ikkollana, insano Phaawuloosinte gede diinaggaabbe sabbakansa diagurtino. Roduuwinke sabbakate qoossonkera higgete albaanni shiqqe baasa gaarantino. Roduu Naataani Noori 1943nni Ameerikaho Xaphoomu Yoo Mine afiꞌnoommo qeelle daafira coyiꞌrino. Isi togo yiino: “Kuri qeelle afiꞌnoommohu kiꞌne sharrantinoonnihuraati. Halashshaano diinaggaabbe soqqama hooggoommero Xaphoomu Yoo Mini albira shiqa dihasiissannonke; kayinni kiꞌne halashshaano yaano alame woꞌmate heedhinanni roduuwi baalu, darte waajjitinikkinni sharrantinoonni daafira qeelle afiꞌnoommo. [Yoote Mini] tenne yoo yaanno gede assitinoti Mootichu manni kaajje uurransaati.” Wole gobbara noo roduuwi hattonni kaajjite heeꞌransa qeelle afiꞌneemmo gede assitino. Ee, soqqanshote noonke baxilli darte qeelle saꞌneemmo gede assannonke.

12. Soqqanshokki daafira maa assate murciꞌrootto?

¹² Soqqanshonke Yihowawiinni afiꞌnoommote muxxe jiro gede assine laꞌneemmoha ikkiro, mulla “saate qolate calla” yine disoqqammeemmo. Hatteentenni “Dancha Duduwo kulate” dandiinummore baala assineemmo. (Soq. 20:24; 2 Xim. 4:5) Ikkina mannaho rosiinseemmori maati? Hanni Maganu uyinonkete wole muxxe jirore ronso.

13, 14. Yesuusi Maatewoosi 13:52 aana yiihu “miinju mini” heeꞌrannonkehu hiittoonniiti? Konni ‘miinju minira’ halaale duuꞌna dandiineemmohu ma garinniiti?

¹³ Sayikkiti ayyaanaamittete jironke Maganu xawisinonke halaaleeti. Yihowa halaalu Maganooti. (2 Sam. 7:28; Far. 31:5) Isi shaqqado Anna ikkino daafira, waajjitannosirira Qullaawu Maxaafi halaale kulannonsa. Halaale mite yine macciishshinummo yannanni kayise, Qullaawu Maxaafi halaale borronke giddonni, hattono qoqqowu, woradunna lamalate giddo assiꞌneemmo gambooshshiwa ronsanni keeshshinoommo. Galle honsanni batinye halaale ronsoommo daafira Yesuusi yiihu, haarunna akkalu halaali noohu “miinju mini” noonke. (Maatewoosi 13:52 nabbawi.) Halaale maaxantino jiro gede assine hasiꞌneemmoha ikkiro, Yihowa haaro halaale ‘miinju mininkera’ duuꞌnineemmo gede kaaꞌlannonke. (Lawishsha 2:4-7 nabbawi.) Hatto assa dandiineemmohu hiittoonniiti?

¹⁴ Qullaawa Maxaafanna borruwanke seekkine xiinxalla roso assiꞌra hasiissannonke. Tini “haaro” halaale yaano alba anfoommokki roso anfeemmo gede kaaꞌlitannonke. (Iya. 1:8, 9; Far. 1:2, 3) Maaja 1879nni umo attammoonniti Agarooshshu Shae, halaale dubbino ishini giddo itamate shiimuri gate noohu shiimu awawi ledo hewisiissino. Togo yitino: “Konne awawa afiꞌrate seekkitine hasiꞌra hasiissannoꞌne. . . . Hasidhine afidhiniro hakko awawa adhate heeshshi yaa hasiissannoꞌne. Mitto awawa calla afidhine kassi yitinoonte. . . . Roore gamba assiꞌrate hasiꞌra agurtinoonte.” Ee, ‘miinju mininke’ giddo Qullaawu Maxaafi halaale duuꞌnate quqquxamme hasiꞌra hasiissannonke.

15. Mitu halaali ‘akkala’ ikkinohu gede assine coyiꞌneemmohu mayiraati? Ati lowo geeshsha naadattohu mitu halaali hiikkonneeti?

¹⁵ Mito muxxe ikkino halaale ronsoommohu Maganu manni ledo mite yine gamba yaa hananfummo yannaraati. Konne halaale anfoommohunna naada hananfoommohu, Kiristaanu heeꞌranno heeshsho heeꞌra hananfummo waro ikkino daafira ‘akkala’ jirooti yaa dandiineemmo. Hattee muxxe jiro giddo mite hiitteeti? Yihowa Kalaqaanchonkenna heeshsho uyinonkeha ikkinota hattono mannu oosora hedinori noota ronsoommo. Qoleno Maganu baxillisinni kae Beettosi wodote kakkalo asse shiqishe cubbunninna  reyotenni keere fulleemmo gede assinonketa ronsoommo. Hattono, albillittete Maganu Mangiste qarra baala huntannotanna Maganu Mangiste hunda salaametenni hagiidhinanni hegerera heeꞌrate hexxo afiꞌnoommota ronsoommo.—Yoh. 3:16; Aju. 4:11; 21:3, 4.

16. Mitto halaale huwantoommo gara taashshinanni wote maa assa hasiissannonke?

¹⁶ Yannate kiiro Qullaawu Maxaafi masaalo woy Qullaawa Borro huwantoommo gara biddi assinanniha ikkara dandaanno. Biddi assinoonni coye kullanninke wote yanna gaaꞌmine taje xiinxallanna hiinca hasiissannonke. (Soq. 17:11; 1 Xim. 4:15) Hattoo yannara biddi assinoonniha qara coye calla ikkikkinni, albanna xa noonke hedo mereero noo badooshshe xinqisiinse huwata hasiissannonke. Konni garinni haaro halaale miinju mininke giddo duuꞌna dandiineemmo. Togo assa kiissannote yineemmohu mayiraati?

17, 18. Qullaawu Ayyaani kaaꞌlannonkehu hiittoonniiti?

¹⁷ Yesuusi, Maganu ayyaani albaanni ronsoommo coye qaangeemmo gede assannonketa rosiisino. (Yoh. 14:25, 26) Tini mannaho dancha duduwo kulleemmo wote kaaꞌlitannonkehu hiittoonniiti? Hanni Piteri yinanni rodiira tuncu yiinosire laꞌno. Isi 1970nni 19 dirihu heeꞌre mulella Biritaaniyu Beeteelera soqqama hanafe no. Mitto barra isi minunni mine haꞌre soqqamanni heeꞌre mito 50 diro ikkannosihu ereedaamu manchinni xaadi. Piteri konne mancho Qullaawa Maxaafa rosa hasiꞌrannoro xaꞌmi. Hakku manchi Yihudu ammaꞌno rosiisaancho ikkinohura Piteri coyishiishinositera dhagge assiꞌrino. Isi Piteri fonqole laꞌꞌara togo yee xaꞌmi: “Afummona, Daanieeli maxaafa borreessinoonnihu hiikko afiinniiti?” Piteri togo yee dawari: “Mito gafa borreessinoonnihu Aramayiketenniiti.” Yannate gedensaanni Piteri hakkawarita qaage togo yiino: “Rosiisaanchu dawaro qoloommotera dhaggeeffatino; ani isinni iso roore dhaggeeffatoommo! Dawaro afoommohu hiittoonniiti? Minira haꞌre saꞌu agannara fultinota Agarooshshu Sheenna Baqqi Yiiyye! yinanni metseetta giddo, Daanieeli Maxaafa Aramayiketenni borreessinoonnita xawisanno birxicho afummo.” (Dan. 2:4) Ee, Qullaawu ayyaani alba nabbamboommo coye duuꞌninoommo miinji giddonni qaangeemmo gede assannonke.—Luq. 12:11, 12; 21:13-15.

¹⁸ Yihowawiinni afiꞌnoommo hayyo naandeemmoha ikkiro, wodaninke haaronna akkala halaale ‘miinju mininke’ giddo duuꞌnineemmo gede kakkayisannonke. Yihowa hayyo albinni roore banxanninna naandanni haꞌnummo kiiro, Maganu Qaale danchu garinni rosiisa dandiineemmo.

19. Ayyaanaamittete jironke seekkine agadha hasiissannonkehu mayiraati?

¹⁹ Sheexaanunna alamesi, konni birxichira ronsummota ayyaanaamittete jiro naada agurreemmo gede assate sharrantanno. Ninkera togoori diꞌꞌiillannonke yaa didandiineemmo. Lowo damooza afiꞌnanni loosira, qawaaxxote heeshshora, woy maalaamittete jiro leellishate hasattonni doogammammora dandiineemmo. Soqqamaasinchu Yohaannisi tini alamenna halchose saꞌannota coyiꞌrino. (1 Yoh. 2:15-17) Konni daafira ayyaanaamittete jironke baxate, naadatenna agadhate sharrama hasiissannonke.

20. Ayyaanaamittete jirokki seekkite agadhatto gede kaaꞌlannoheri maati?

²⁰ Maganu Mangiste woꞌmu wodanikkinni baxattokki gede assannohe coye baala hooꞌlate sharrami. Diinaggaabbe sabbaki; qoleno heeshsho gatissannota soqqanshonke naada agurtooti. Qullaawu Maxaafi halaale seekkite xiinxalli. Tenne assittoro, jirokki ‘mooraanchu iillannokkiwanna daanillu qasannokkiwa gordoho wodhatto.’ Korkaatuno, ‘woxikki noowa, wodanikkino hakko galanno.’—Luq. 12:33, 34.