1, 2. (a) Mannu baalu dea hasiissannokki hajo hiitteeti? (b) Tenne hajo lowori gede assine laꞌꞌa hasiissannohu mayiraati?

 YANNANKERA batinyu manni lowori gede asse laꞌꞌannohu woxeho. Insa lowo jiro gamba assiꞌrate woy noonsa jiro baꞌannonsakki gede assiꞌrate hedanno. Wolu manni kayinni lowori gede asse laꞌꞌanno coyi maatensa, fayyimmansa woy hedinore wonshiꞌrate.

² Ikkollana, mannu baalu dea hasiissannokkiti tenne coyibba baala roortanno hajo no; tini hajo Yihowa aliidimma gara ikkinoti xabbe leellate. Qoropha hoongummoro tenne hajo deꞌneemmoha ikkara dandaanno. Hiittoonni? Uminke dilgore calla hendeemmoha ikkiro, Maganu aliidimma gara ikkitinoti xabbe leellase lowo geeshsha hasiissanno hajo ikkitinota deꞌnammora dandiineemmo. Woy iillannonke qarri tenne hajore hendeemmokki gede assankera wodhineemmoha ikkara dandaanno. Yihowa aliidimma gara ikkase albinni roore naandummoro kayinni, barru baala iillannonke fonqolo qeelate albinni roore qixxaambeemmo. Tini Yihowawa albinni roore shinqeemmo gede assitannonke.

3. Sheexaanu Maganu gashshooti daafira mayyiino?

³ Sheexaanu Daawuloosi Yihowa aliidimmasi horoonsiꞌranno gari gara ikkasi huluullamino. Isi Maganu gashshooti busha ikkinohunna Yihowa kalaqamaho danchare hoꞌlannohu gede asse heewisamino.  Daawuloosi yiino gara ikkiro, mannu ooso umonsa uminsa gashshituro roore hagiirraammanna woyyaabbino heeshsho heedhanno yaate. (Kal. 3:1-5) Qoleno, Sheexaanu Yihowara addinta ammaname heeꞌrannohu dino; buutote qarri iillannonsa wote baalunku iso kaadanno yiinohu gedeeti. (Iyo. 2:4, 5) Konnira Yihowa taashsho noo gashshootisi nookkiha heeshsho seekkannokkiti leeltanno gede assate mannu umonsa gashshara fajjino.

4. Yihowa aliidimma daafira kaꞌino hajo tidhama hasiissannote yineemmohu mayiraati?

⁴ Hige Yihowa Sheexaanu coyiꞌrinori kapho ikkinota afino. Ikkina, isi tini hajo mulenni gooffanno gede assa agure, Sheexaanu yiinori gara ikkinotanna teꞌee leellishara yanna uyinohu mayiraati? Yihowa tenne hajora dawaro hedate dandoo noonsa kalaqami huluullamannokki garinni qola hasiꞌrino. (Faarso 83:18 nabbawi.) Qoleno, umi minaannanna minaama Yihowa gashshooti hunda heeꞌra giwino; hakkuyi kawa lowo manni insa faale haꞌra hanafino. Tini Daawuloosi yiinori gara ikkinohu gede assine hendanni gede assitara dandiitanno. Mannuno sokkaanono hatto yite huluullantannoha ikkiro, dagate, addi addi dana afiꞌrino manni, gaꞌrete, maatetenna mannu mereero mittimma diheedhanno. Yihowa aliidimma gara ikkase xabbe leeltuhu gedensaanni kayinni, kalaqamu baalu Yihowahu xalalu gashshootira hegerera maahoyye yee galanno. Hattee yannara kalqe woꞌmate salaame heedhanno.—Efe. 1:9, 10.

5. Yihowa aliidimma irkinseemmota leellishate maa assa dandiineemmo?

⁵ Maganu aliidimma gara ikkase leeltanno; Sheexaanunna mannu gashshooti raaphe baꞌꞌanno. Hattee yannara Maganu Kiristoosi Gashshino Mangiste widoonni hedinore wonshanno; Maganoho ammanante heedhannoti mannu ooso Maganu gashshoote irkissannota leellishshanno. (Isa. 45:23, 24) Ati ammanante Yihowa aliidimma irkissannori wido ikka hasiꞌratto? Hasiꞌrattoti dihuluullissannote. Maganoho ammanamme heeꞌrate, hattee rooriidi hajo hedanna tini hajo mageeshshi geeshsha hasiissannotero huwata hasiissannonke.

6. Yihowa aliidimma gara ikkase leella mageeshshi geeshsha hasiissannote?

⁶ Anfummonte gede Yihowa aliidimma gara ikkase xabbe leella baalunku coyinni roortanno hajooti. Tini hajo hagiirsiissannonke coyi baalunni roore hasiissannote. Ikkina togo yaa ninke gato hakkeeshshi geeshsha dihasiissannote yaateni? Woy Yihowa ninkera addinta dihedanno yaateni? Hatto yaa diꞌꞌikkitino. Togo yineemmohu mayiraati?

7, 8. Yihowa aliidimmasi gara ikkitinota leellishate eino qaale wonsha hasiissannosihu mayiraati?

⁷ Yihowa mannu ooso lubbora baxanno, hattono lowo geeshsha naadanno. Isi ninke hegere heeshsho heeꞌrate faro afiꞌneemmo gede Beettisi mundee duꞌnantanno gede assino. (Yoh. 3:16; 1 Yoh. 4:9) Yihowa yiinore wonshikki gatannoha ikkoommero, Daawuloosi yiinori gara lawanno; isi Yihowa mannu oosora danchare hoꞌlannohu, hattono gashshootisi taashsho nookkihunna kaphaanchu gede asse coyiꞌrino. Qoleno, Yihowa yiinore wonshannokkiha ikkoommero iso gibbannori qacifatte coyidhannori gara lawanno; insa togo yitanno: “Daanno yini hexxo hiikkituyya? Akaakkanke reyitu warinni kayise baalunku coyi kalaqamunni xaa geeshsha noo garinnilla no.” (2 Phe. 3:3, 4) Konni daafira, aliidimmasi gara ikkase leeltanno gede hajajamanno manni gatanno gede assanno. (Isayaasi 55:10, 11 nabbawi.) Qoleno Yihowa gashshooti isi baxillaancho ikkinota leellishannoho. Hakko daafira  isi ammante soqqantannosire ayewoteno baxannonsa, hattono naadannonsa.—Ful. 34:6.

⁸ Hakko daafira Yihowa aliidimma baalunkurinni roorsine laꞌꞌanke, ninke gato hasiissannokkihu woy isi ninke waagaho kiirannonkekkihu gede assine laꞌꞌa diꞌꞌikkitino. Konni garinni hedanke, Yihowa aliidimmaranna gatonkera gara ikkitino lao noonketa leellishshanno. Ayewoteno tenne rooriidi hajore hedatenna xalala Yihowa gashshoote irkisate, hakko garinni heda hasiissannonke.

9. Sheexaanu Iyyoobi daafira mayyiino? (Hanafote noo misile lai.)

⁹ Hunda borreessinoonnite Qullaawu Maxaafi maxaaffa giddo mittu yaano Iyyoobi maxaafi, gara ikkitino lao heedhanno gede assiꞌra hasiissannota leellishanno. Konni maxaafi giddo, Sheexaanu Iyyoobi buutote qarri iillisiro Maganoho ammaname diheeꞌranno yee heewisaminota kulloonni. Sheexaanu Maganu umisi Iyyoobira qarru iillanno gede assara hedo shiqishino. Yihowa Iyyoobira qarru iillanno gede assinokkiha ikkirono, Sheexaanu Iyyoobi fonqolara fajjino; togo yiino: “Noosire baala hasiꞌrittota assi.” (Iyyoobi 1:7-12 nabbawi.) Shiima yanna giddo, Iyyoobi soqqamaano gooffu, hattono jajjisi bai, qoleno lowo geeshsha baxannoti tonne oososi reyitu. Sheexaanu Iyyoobira kuni qarri iillannosi gede assinohu Maganu umisi assanni nooha lawiseeti. (Iyo. 1:13-19) Sheexaanu hakkiinni aanche Iyyoobi biso lowo geeshsha madiꞌranno gede assino. (Iyo. 2:7) Tennera aanaho galtesinna suꞌmira jaallate yiniri sasu mannooti coyidhinohu hexxo mursiisanno qaali roore dadillanno gede assinosi.—Iyo. 2:9; 3:11; 16:2.

10. (a) Iyyoobi Maganoho ammaname heeꞌrinota leellishinohu hiittoonniiti? (b) Isi maa soꞌrino?

¹⁰ Coyi Sheexaanu yii gede ikkiyya? Sheexaanu coyiꞌrinori kapho ikke gatino. Iyyoobi Magano dikaadino. (Iyo. 27:5) Ikkirono Iyyoobi umi qara rooriidi hajo deino. Isi keeraancho ikkinota leellishate sharramino; hattono qarru iillanni noosihu mayiraatiro Maganu kula hasiissannosihu gede asse hedino. (Iyo. 7:20; 13:24) Iillinosi qarra baala hendummoro isi dibaxe ikkino yineemmoha ikkara dandaanno. Ikkirono, Maganu Iyyoobi hedosi biddi assiꞌra hasiissannosita coyiꞌrino. Yihowa isira kulinori maati?

11, 12. Yihowa Iyyoobi maa huwatanno gede assino? Tennera Iyyoobi maa assinoyya?

¹¹ Iyyoobi maxaafi giddo fooliishsho 38 kayise 41 geeshsha noote shoole fooliishsho giddo, Yihowa Iyyoobira coyiꞌrinore kulloonni. Ikkirono Maganu Iyyoobira qarru iillinosihu mayiraatiro bade kulino base dino. Yihowa isonooto keereensa hasiꞌrinoha lawise, Iyyoobira qarru iillannosihu mayiraatiro kula  dihasiꞌrino. Hatteentenni Yihowa bayirreenyasi hendiro, Iyyoobi lowo geeshsha shiima ikkinota hedanno gede assino. Konni garinni Yihowa Iyyoobi roore dea hasiissannokki hajo noota huwatanno gede kaaꞌlinosi. (Iyyoobi 38:18-21 nabbawi.) Tini, Iyyoobi gara ikkitino lao heedhanno gede assiꞌrate kaaꞌlitinosi.

¹² Yihowa, buutote qarra dandee sainoha Iyyoobi dhaawate seejjinohura isi kaajjadoho yaateni? Maganu kaajjado diꞌꞌikkino; Iyyoobino hatto asse dihedino. Iyyoobi qarru iillisirono Maganu seejjinosi seejjo adhinota coyiꞌrino. Isi togo yiino: “Coyiꞌroommo coyi baalu ane umoꞌya saalfachishinoe. Kunni daafira, buluulunna bukote aana ofolle aagintaaweemmo.” Yihowa xawise amaalinoti dancha amaale hedinore wonshitino. (Iyo. 42:1-6) Hakkuyira albaanni Eelihuno Iyyoobi hedosi biddi assiꞌranno gede kaaꞌlannore coyiꞌre seejjinosi. (Iyo. 32:5-10) Iyyoobi Yihowa seejjinosi seejjo adhe hedosi biddi assiꞌrino; hakkuyi gedensaanni Yihowa Iyyoobi qarru yannara ammaname heeꞌrinota mannaho kulino.—Iyo. 42:7, 8.

13. Iyyoobi Yihowa seejjinosi seejjo qarru iillisihunni gedensaanni nafa kaaꞌlitannosihu hiittoonniiti?

¹³ Yihowa Iyyoobi amaalino amaale isi qarra dandee saihu gedensaanni nafa kaaꞌlitannosiha ikkara dandaanno. Hiittoonni? Yihowa “Iyyoobita goofimarchu heeshsho albitenni roorse” maassiꞌrinosiha ikkirono, Iyyoobi iillinosi qarrinni beya afiꞌrate yanna hasiissinoti egennantinote. Gedensaanni isi ‘lamalu labballinna sasu seenni anna ikkino.’ (Iyo. 42:12-14) Iyyoobi Sheexaanu shii oososi qalli yaannoti dihuluullissannote. Iso mite yanna geeshsha iillinosi qarri qulli yaanni waadisikki digatino. Isi qarru iillinosihu mayiraatiro jeefote afinoha ikkirono, Yihowa buutote qarri iillannoe gede fajjinohu mayiraati yee hedino woti heeꞌrara dandaanno. Isi hedinori baxiha ikkirono, Maganu seejjinosi seejjo hiinca dandaanno. Hatto assasi gara ikkitino lao heedhannosi gede, hattono shesho afiꞌranno gede kaaꞌlitannosi.—Far. 94:19.

14. Iyyoobi xaggenni maa ronseemmo?

¹⁴ Iyyoobi xagge, ninkeno garu lao heedhannonkenna shesho afiꞌneemmo gede kaaꞌlitannonke. Qoleno Yihowa tenne xagge borreessinanni gede assinohu cincatenninna ‘Qullaawa Borro widoonni afiꞌneemmo jawaantenni hexxo heedhannonke gede rosiisankera’ yeeti. (Rom. 15:4) Iyyoobi xaggenni maa ronseemmo? Uminke dilgo calla hendanni lowo geeshsha hasiissanno hajo, yaano Yihowa aliidimma deꞌneemmokki gede qoropha hasiissannonke. Qoleno, Yihowa aliidimma irkisate Iyyoobi gede qarru yannara nafa ammanamme heeꞌra hasiissannonke.

15. Qarru yannara ammanamme heeꞌra maaho kaaꞌlitannonke?

 ¹⁵ Ammanama afidhino horo heda sheshifachishshannonkehu hiittoonniiti? Qarru yannara ammanamanke waaga afidhino. Qarru iillannonkehu Yihowa dadillinsoommohura diꞌꞌikkino; qarru Yihowa aliidimma irkinseemmo faro fanannonke. (Law. 27:11) Cincanke Magano hagiirsiisate kaaꞌlitannonke, hattono kaajjado hexxo heedhannonke gede assitanno. (Roomu Sokka 5:3-5 nabbawi.) Iyyoobire kultanno xagge Yihowa “sao agurannohanna mararannoha ikkinota” leellishshanno. (Yai. 5:11) Konni daafira Yihowa aliidimmasi irkissannore baala kiisannota buuxa dandiineemmo. Tenne afanke qarra ‘cincine hagiirunni’ saꞌneemmo gede kaaꞌlitannonke.—Qol. 1:11.

16. Qarru yannara Yihowa aliidimmare heda hasiissannonkehu mayiraati?

¹⁶ Hige Yihowa aliidimmare deꞌnikki heeꞌra shota diꞌꞌikkitino. Mito wote iillannonke qarri wolqankera aleenni ikkinoha lawara dandaanno. Iillinonke qarrire calla hendeemmoha ikkiro, hakkeeshshi geeshsha batiꞌrinokki qarri nafa lowoha lawankera dandaanno. Konni daafira, qarru iillannonke yannara, rooriidi hajo Yihowa aliidimma xabbe leella ikkitinota ganyine heda hasiissannonke.

17. Yihowa uyinonke looso ganyine loosa rooriidi hajo deꞌneemmokki gede kaaꞌlitannonkehu hiittoonniiti?

¹⁷ Yihowa uyinonke looso diinaggaambe loosa, tenne rooriidi hajo deꞌneemmokki gede kaaꞌlitannonke. Hanni Reenii yinannite Yihowa Farciꞌraasincho lawishsha laꞌno; ise bisu giddo mundee duꞌnanteennase lowo geeshsha dhiwantino qoleno kaansere amaddinose. Ise hospitaalete heedhe hakko loossanno akimootira, dhiwame marino manniranna dhiwamino manna laꞌꞌara daanno mannira farcidhino. Ise mitte hospitaalera lame lamalanna bocu giddo 80 saate soqqantino. Reenii reyote gambisse noo yannara nafa, Yihowa aliidimma dideꞌino. Togo assase mito qarrase qaaggannokki gede kaaꞌlitinose.

18. Jeniferi lawishshinni Yihowa aliidimma irkisate daafira maa ronseemmo?

¹⁸ Barru baala shiimaaddu coyi tuncu yaannonke woteno Yihowa aliidimmare heda hasiissannonke. Jeniferi yinanni rodoo ayiddira haꞌrate horophilla agadhite horophillu dirrannowa sase barra keeshshitino. Horophillu haꞌranno yinoonni yanna duucha hinge soorrinoonni daafira Jeniferi callattino, hattono tootayyaabbino. Ikkirono ise dicaaccaabbino. Ise isente gede tootayyaawino mannira dancha duduwo kula dandiitanno gede Yihowa kaaꞌlasera huuccatto assidhu. Hakkuyi gedensaanni ise lowo mannira sabbakkino hattono lowo borro eltino. Jeniferi togo yitino: “Qarru iillierono Yihowa suꞌmasi danchu garinni kayiseemma gede jawaante oye maassiꞌrinoe.” Ee, ise Yihowa fajjo assa dideꞌino.

19. Addu ammaꞌno baxxite leeltanno gede assannori maati?

¹⁹ Yihowa aliidimma afa addu ammaꞌno kaphu ammaꞌnonni baxxite leeltanno gede assitino. Maganu manni tenne hajo lowo diri albaanni afino. Addu ammaꞌno miilla ikkinoommohura, mittu mittunku Yihowa aliidimma irkisate sharrama hasiissannonke.

20. Yihowa aliidimmasi irkisate assineemmore ma garinni laꞌꞌanno?

²⁰ Yihowa, ammanantine soqqantinenna qarru yannara cincitine aliidimmasi irkisate assitinannire naadanno. (Far. 18:25) Aananno birxichira Yihowa aliidimma woꞌmu wodaninkenni irkisa hasiissanno yineemmohu mayiraatironna tenne assa dandiineemmohu hiittoonniitiro ronseemmo.