“KEEREHO? Xummaho? Baˈraaˈraho?”

Mannu ledo xaandeemmo woyite konni garinni keere haaˈneemmoti egennantinote. Isinni manna anga amande keere haaˈneemmoha woy hanqanfe daae yineemmoha ikkara dandaanno. Keere haaˈnanni gari budu budunni babbaxxinoha ikkirono, baalunku manni keere haaˈra hasiissannota afino. Isinni keere haaˈra hooga woy keere haˈnanni woyite cuqqo giwa ayirrinye ikkitinokkihunna bushu amanyooti gede assine kiirrara dandiinanni.

Ikkollana keere haaˈra baxannohu baala manna diˈˈikkino. Mitootu manna ille qasse laˈˈa dandiitannokkire ikkitinohura woy insaneeto mannu woriidire assite laˈanno daafira keere haaˈra waajjitanno. Wolootu qolte insawiinni baxxino sircho, budenna akata afiˈrino manna keere haaˈra qarra ikkitannonsa. Ikkollana, haransine keere haaˈra nafa lowo horo afidhino.

Ateneeto togo yite xaˈmi: ‘Keere haaˈra mayi horo afidhino? Maganu Qaali keere haaˈrate daafira maa rosiisannoe?’

Soqqamaasinchu Pheexiroosi Yihudu wido ikkinokkihu Qornelewoosi yinanni manchi Kiristaancho ikki woyite “Maganu manna mallaadannokkita” coyiˈrino. (Soq. 10:34) Yannate gedensaanni Pheexiroosi Maganu “baalunku aagintaawe higara” hasiˈrannota borreessino. (2 Phe. 3:9) Konne qummeeshsha nabbambeemmo woyite umo hendeemmohu Qullaawu Maxaafi halaale rosanni noo manna ikkara dandaanno. Ikkollana Pheexiroosi Kiristaana, “Manna baala ayirrisse; roduuwa baxxe” yee amaalino. (1 Phe. 2:17) Ikkina, sirchinsa, budinsa, woy akatinsa baxiha ikkirono, baalanka manna keere haaˈra dihasiissannonke? Hatto assanke, ayirrinseemmonsatanna banxeemmonsata leellishshanno.

Soqqamaasinchu Phaawuloosi songote miilla, “Kiristoosi kiˈne . . . haaˈriˈnente gede, kiˈneno mimmitoˈne haadhe” yee amaalino. (Rom. 15:7) Phaawuloosi ‘jawaachishshinosi’ roduuwa qummi asse coyiˈrino. Heeˈnoommo yanna Sheexaanu Maganu manna gawajjate qodhe kainota ikkitino daafira, roduuwanke albinni roore jawaachisha hasiissannonke.—Qol. 4:11; Aju. 12:12, 17.

Qullaawu Maxaafi giddo kulloonni lawishshuwa, keere haaˈra mannu hagiidhanno gede assatenni saˈino horo afidhinota leellishshanno.

Maganu Beetti uullara daye ilamanno yanna iillituta, tenne sokka Maariyaamira kulara Maganu sokkaasinchosi soyino. Sokkaasinchu Maganu soyino sokka Maariyaamira kulara albaanni “Ati elto woˈmitinoheti, keeru ledokki heeˈro! Maganu ate ledo no” yiinose. Maariyaami sokkaasinchu hasaawisanni noosehu mayiraatiro leellinosekki daafira ‘massino.’ Sokkaasinchu massinota afe “Maariyaami, Maganu albaanni ayirrinye afiˈroottana waajjitooti!” yiinose. Hakkiinni sokkaasinchu Maganu Mesihicha iltara doorinoseta kulinose. Maariyaami masa agurte “Kuneeti! ani Mootichu borojjichootina, ati yootto gede ikkoe” yite hajajantannota ikkitinota leellishshino.—Luq. 1:26-38.

Sokkaasinchu Yihowa sokkaancho ikke soqqamate qoossosi naadannoti egennantinote; ikkollana guuta ikkitinokki mancho hasaawisa ayirrinyesi ajishshannohu gede asse dihedino. Isi Maganu soyinose sokka kulasera albaanni keere haaˈrinose. Isi lawishshinni maa ronseemmo? Woloota keere haaˈranna jawaachisha hasiissannonke. Shiimare calla coyiˈne woloota jawaachishanna Maganu manni wido ikkitinota huwattanno gede kaaˈla dandiineemmo.

Phaawuloosi Shiimiidi Iisiyiranna Awuroppaho noo songuwara heedhanno roduuwi giddo batinye egennino. Isi borreessino sokka giddo batinye roduuwa qummi asse keere haaˈrino.

Roomu Sokka fooliishsho 16 tenne leellishshanno. Phaawuloosi batinyu ayyaanaamittete roduuwisira keere  soyino. Lawishshaho isi Febeni yinanni rodoo suˈma qummi asse ise daafira coyiˈrino, hattono roduuwisi ‘Maganu manni garinni Mootichu suˈminni wosinchimma haadhe hasiisannosere baala kaaˈlitannose’ gede kulinonsa. Phaawuloosi Phirisqillaranna Aqiilara keere soyino; isi insa daafira coyiˈranni “Ane calla ikkummokkinni Dagate giddonni higge ammaˈnitino beetekiristaanna [woy, songuwa] baala galattannonsa.” Isi “baxeemmo manchira Aphenetusiranna” “Mootichu soqqanshora daafurtinorira Tirufaanaranna Tirufoosara keere iillishsheˈˈe” yiino; xa kuri roduuwi daafira garire anfoommokkiha ikkirono Phaawuloosi insara keere soyinonsa. Ee, Phaawuloosi ayyaanaamittete roduuwasi keere haaˈra baxanno.—Rom. 16:1-16.

Keere sonkoonninsa roduuwi Phaawuloosi insa qaagannonsata afansanni lowo geeshsha hagiidhitinoti egennantinote. Qoleno Phaawuloosiranna mereeronsa noo baxilli kaajjinoti dihuluullissannote! Wolu Kiristaanino Phaawuloosi baxillunni kae soyinota keeru sokka macciishshansa jawaatannonna ammanansanni kaajje heeˈranno gede kaaˈlitinonsaha ikkara dandaanno. Ee, baxillunni kaˈne keere haaˈra jaaloomu kaajjannonna Maganu manni mereero noo mittimma kaajjitanno gede assitanno.

Phaawuloosi Putiyoluusi yinanniwa baaru qacce iille Rooma haˈrate qixxaawanni heeˈreenna qooxeessaho heeˈranno Kiristaani isinni xaadate dayino. Phaawuloosi insa xeertote heeˈre laiti, ‘Magano galatino’ hattono ‘wodanisi hagiidhino.’ (Soq. 28:13-15) Mito woyite keere haaˈra dandiineemmohu muushshi yine woy xeertote heeˈne anga kayinse calla ikkara dandaanno. Ikkollana hatto assanke yaadino woy dadillino mancho sheshifachishshara dandiitanno.

Rosaanchu Yaiqoobi ayyaanaamittete roduuwisira kaajjado amaale uyino yanna no. Mitu Kiristaani alamete ledo jaalooˈme Maganu ledo noonsa jaalooma huˈnino. (Yai. 4:4) Ikkollana Yaiqoobi sokkate hanafora mayyiinoro wodanchi:

“Gobba baalate billaallite noorira tonaa lamente Israeelete gaˈrera, Maganunna Mootichu Yesuusi Kiristoosi soqqamaancho ikkoommohu ani Yaiqoobi soommo sokka. Keeru kiˈne ledo heeˈro.” (Yai. 1:1) Yaiqoobi sokkasi hanafino gari, sokka borreessinonsa manni Maganu baalanka mitte illenni laˈˈannota huwattanno gede assinsakki digatino; tini qolte Yaiqoobi amaalinonsa amaale adha shota ikkitannonsa gede assitanno. Ee, baxillunni keere haaˈra, shota ikkitinokki hajo nafa kayinse hasaawate kaaˈlitanno.

Woloota keere haaˈneemmohu haransine ikkiro nafa, baxillunninna suwashshu wodaninni kaˈne keere haaˈra hasiissannonke. Mannu keere haaˈnoommonsata afa hoogiro nafa togo assa hasiissannonke. (Mat. 22:39) Mitte Ayerilaandete heedhanno rodoo songote gambooshshe hananfara kaˈne heeˈneenna iillitino. Ise muddantanni eˈanni heedheenna mittu rodii faasiiqe “Hawalle keere dayitta” yiinose. Hatti rodoo mittoreno yitukki ofoltino.

Boode lamala gedensaanni ise hakko rodiiwa marte mini giddo kalaqamino qarri yaachishinoseta kultinosi. Ise togo yitino: “Hakko barra lowo geeshsha dadille noomma. Gambooshshe haˈroommahuno hinko gaˈmireeti. Ati keere haaˈrittoeta agurranna gambooshshunniwa shiqino roso diqaageemma. Hatto assakki lowo geeshsha jawaachishshinoe. Konnira galaxxeemmahe.”

Hakku rodii keere haaˈrasi kageeshshi wolqa afidhino yee dihedino. Isi togo yiino: “Keere haaˈraˈya jawachishshinoseta kultue yannara, hatto assaˈyanni tashshi yiinoe. Tini ane umoˈya hagiirsiissinoe.”

Selemooni togo yee borreessino: “Sagalekki wayi aana tugi; lowo barri gedensaanni, galagalchite afiˈrattona.” (Ros. 11:1) Roorenkanni ayyaanaamittete roduuwanke keere haaˈranke ninkeno ikko insa hagiirsiissanno. Konnira keere haaˈra afidhino wolqa ajinshe laˈnoonke.