Roobiaami anni Israeele 40 diro gashshinoho Selemooniiti. (1 Mot. 11:42) Selemooni 997 K.A. reyino. Hakkiinni Roobiaami silxaane adhate Yerusaalametenni Sekeemi haˈrino. (2 Dud. 10:1) Roobiaami maalaˈlinanni hayyo noosiha Selemooni riqiwe moohanno daafira waajjinoha dilawannohe? Roobiaamira qarra tira dandaanno hayyo noosironna teˈee anfanni yanna mule no.

Roobiaami Israeelete manni lowo geeshsha yaadinota afino. Shiima yanna gedensaanni, daga sokkino manni Roobiaamiwa mare yaachishinonsa coye togo yee kulinosi: “Annikki Selemooni lowo duha duhisiise gadadisinonke. Xa ati kayinni konne duha aaninni shaashshittonkero atera soqqammeemmohe.”—2 Dud. 10:3, 4.

Roobiaamira assannori bainosiha ikkara dandaanno. Daga xaˈmidhinore macciishshe duhansa shaashshiro isinna maatesi, hattono isi ledo gashshootu mine heeˈranno manni afiˈranno qawaaxxo gatte baˈanno. Daga xaˈmidhinore giwiro kayinni mannu finqilara dandaanno. Isi maa assiyya? Isi umo annisi Selemooni amaaˈlannore jajjabba manna amaaˈlino. Ikkollana, gedensaanni Roobiaami isi darawo ikkitino wedella amaaˈlino. Isi darawosi yitinosire harunse togo yiino: “Ani kayinni hakkiinni saino duha duhisiiseemmoˈne. Anniˈya halangetenni ganinoˈne. Ani kayinni haffarraame lichenni ganeemmoˈne.”—2 Dud. 10:6-14.

Tenne xaggenni maa ronseemmo? Ee ayyaanaamittetenni jawaata ikkitino roduuwi kultannonkere macciishsha dancha doorsha doodhineemmo gede kaaˈlitannonke. Insara lowo woˈnaalshi noonsa daafira doodhineemmo doorshi abbanno guma hedde dancha amaale amaaltankera dandiitanno.—Iyo. 12:12.

Roobiaami mannu finqilinotera hanqe olantosi gamba assiˈre insa qasara kaino. Ikkollana Yihowa masaalaanchu Shemaiya widoonni togo yiino: “Roduuwiˈne Israeelete aana bala tugginoonte; baalunku mini miniˈnera higge; konne coye assoommohu aneeti.”—1 Mot. 12:21-24. *

Roobiaami olama aguraraati yaate? Kuni coyi Roobiaami mageeshshi geeshsha yaachishinosiro heda dandaatto. “Haffarraame lichenni ganeemmoˈne” yee waajjishiishino moote xa kayinni tenne finqille uurrisate mittoreno assa aguranno woyite mannu mayyaanno? (2 Duduwo 13:7 te ledo heewisiisi.) Ikkollana mootenna olantosi Yihowa ‘yiino coye macciishshite mini mininsara higgino.’

Tenne xaggenni maa ronseemmo? Maganoho hajajama mannu mishannonke gede assitannoha ikkiro nafa, isi yaannore assa hayyoota ikkinoommota leellishshanno. Maganoho hajajama iso hagiirsiinseemmo gedenna atootesi afiˈneemmo gede assitannonke.—Mar. 28:2.

Roobiaami Yihowara hajajamino daafira maa afiˈrino? Isi Maganoho hajajame haaro xintamino gashshoote qasate hedino hedo agurino, hattono isi gashshooti giddo noohu Yihudunna Biiniyaami qooxeessira katamma mina hanafino. Qoleno katamma kaajjishino. (2 Dud. 11:5-12) Baalunkunni roore yannate geeshsha Yihowa seerira hajajamino. Tonne gaˈre amadinohu Iyorbiaami moohinohu Israeelete gashshooti giddo noo manni kaphu maganna magansiˈrita halaalu magansiˈra irkisanno manni Yerusaalame haˈre ‘Roobiaami kaaˈlino.’ (2 Dud. 11:16, 17) Roobiaami Yihowara hajajamasi, gashshootisi kaajjanno gede assitino.

Roobiaami, gashshootisi kaajjita mitto hendoonnikki coye assino. Yihowa seera agure kaphu maganna magansiˈra hanafino! Togo assinohu mayiraati? Amoonitte amasi togoore assanno gede xixxiibbinosi ikka? (1 Mot. 14:21) Korkaatu ikkihano ikkiro, daga isi lawishsha harunsitino. Konni daafira, Roobiaami Yihudu katamma kaajjishinoha ikkirono Yihowa Gibitsete Moote Shishaaqi haammata Yihudu katamma adhanno gede assino.—1 Mot. 14:22-24; 2 Dud. 12:1-4.

Shishaaqi Roobiaami gashshooti noowa Yerusaalame gamba yee dayita coyi lowo geeshsha qarra ikkino. Hatte yannara, masaalaanchu Shemaiya Yihowa sokka Roobiaamiranna olantosi roorrootira kulinosa. Togo yiino: “Ane agurtinoonni daafira anino Shishaaqi angara sayise oommoˈne.” Roobiaami kulloonnisi sokka macciishshino? Ee macciishshino! Qullaawu Maxaafi togo yaanno: “Roobiaaminna Yihudu roorrooti umonsa shollishshe, ‘Kaaliiqi assino coyi garaho’ yitino.” Konni daafira Yihowa Roobiaaminna Yerusaalame baotenni gatisino.—2 Dud. 12:5-7, 12.

Hakkuyi gedensaanni Roobiaami Yihuda gashshanni keeshshino. Isi reyara albaanni oososira duuchare uyinonsa; hatto assinohu oososi rodiinsa Abiya isi gedensaanni moote ikkannota hooltannosikki gede hede ikkara dandaanno. (2 Dud. 11:21-23) Roobiaami togo assatenni, wedellichu heeˈre loosinokkiha hayyicha ikkinota leellishanno looso loosino.

Roobiaami mito dancha looso loosinoha ikkirono Magano hagiirsiisikki gatino. Qullaawu Maxaafi tenne kulanni togo yaanno: “Roobiaami Kaaliiqa woˈmu wodaninni hasiˈrinokki daafira busha coye assino.”—2 Dud. 12:14.

Ninke Roobiaami xaggenni ronseemmo rosi maati? Isi mite yanna geeshsha Maganoho hajajamino, hattono Yihowa dagara mito dancha coye assino. Ikkollana Yihowa ledo muli jaaloomi woy Iso hagiirsiisate hasatto dinosi. Konni daafira gara ikkinokkire assino, hattono kaphu maganna magansiˈrino. ‘Roobiaami Maganu seejjinosi seejjo adhinohu Yihowa hagiirsiisa  hasiˈreetinso mannu kakkayisinosi daafiraati?’ yite hedattora dandaatto. (2 Dud. 11:3, 4; 12:6) Isi hakkuyi gedensaannino busha coye assino. Roobiaami, ahaahisi Moote Daawitiwiinni lowo geeshsha baxxinoho. Daawiti cubbo loosinoha ikkirono giddosinni maaro xaˈmirino, hattono Yihowanna halaalu magansiˈra baxanno.—1 Mot. 14:8; Far. 51:1, 17; 63: 1.

Roobiaami xaggenni lowore rosa dandiineemmo. Maatenkera hasiisannonsare assanna Yihowara soqqamate sharrama danchate. Ikkollana Magano hagiirsiisanno garinni heeˈrate, halaalu magansiˈra irkisanna Yihowa ledo muli jaalooma kalaqiˈra hasiissannonke.

Yihowara noonke baxilli lexxanno gede assiˈrate sharrama hasiissannonke. Giira xoˈannokki gede haqqe wora hasiissannonkete gede, Maganoho noonke baxilli baˈˈannokki gedeno Qaalesi ganyine xiinxalla, hiincanna jawaante huuccatto assiˈra hasiissannonke. (Far. 1:2; Rom. 12:12) Yihowara noonke baxilli lexxiro, assineemmori baalu iso hagiirsiisannoha ikkanno. Isira noonke baxilli cubbo loonseemmo woyite giddonkenni maaro xaˈmineemmo gede kakkayisannonke. Hatto ikkiro Roobiaami gede ikkikkinni ammanamme halaalu magansiˈra giddo heeˈra dandiineemmo.—Yih. 20, 21.