1. Mannu ooso saadatenni roortannota leellishannohu maati?

 MANNU saadatenni roorannohu tiiu noonsare ikkino daafiraati. Addaamiranna Heewanira tiiu noonsata mayinni anfeemmo? Insa Yihowa higge diiggu yannara maaxantino. Tini tiiꞌꞌinsa uurra ofolla hoꞌlinonsata leellishshanno.

2. Tiiꞌꞌinke kompaasete gedeeti yineemmohu mayiraati? (Hanafote noo misile lai.)

² Tiiansa qajeelsiꞌrinokki manni garunni loossannokki kompaase noose markaawe gedeeti. Loossannokki kompaase noose markaawenni haꞌra qarra kalaqqara dandiitanno. Bubbenna dambalu markaawe wole raga higge hadhanno gede assara dandaanno. Dancha gede loossanno kompaase kayinni markaawe oofanno manchi haꞌra hasiissannosi raga hige haꞌranno gede kaaꞌlitannosi. Tiiꞌꞌinkeno kompaasete gedeeti. Tiiu garanna gara ikkinokki coye badatenna gara ikkino raga hinge haꞌneemmo gede kaaꞌlitannonke dandooti. Ikkollana, tiiꞌꞌinke danchu garinni massagannonke gede qajeelsiꞌra hasiissannonke.

3. Tiiu danchu garinni qajeela hoogiro mayi qarri kalaqamara dandaanno?

³ Mittu manchi tiiasi danchu garinni qajeelsiꞌra hoogiro, gara ikkinokkire assanno woyite tiiꞌꞌisi diqorowisiisannosi. (1 Xim. 4: 1, 2) Togoo tiiꞌꞌi “busha danchaho” yine hendeemmo gede assankera dandaanno. (Isa. 5:20) Yesuusi harunsaanosi togo yee qorowisiisino: “Shaannoꞌnehu baalu Maganoho soqqamannoha lawannositi yanna dagganno.” (Yoh. 16:2) Rosaancho Isxifaanoosi shituri togoo hedo noonsa mannaati; wolootuno togoo hedo noonsari no. (Soq. 6:8, 12; 7:54-60) Batinyu ammaꞌno noonsari manna shitanno, hattono wole togoo jaddo loossanno; insa togoo jaddo loossanno woyite Magano magansidhanni nooha lawannonsa; kayinni insa Isi higge diigganni no. (Ful. 20:13) Ee, insa tiiꞌꞌinsa soꞌrisiisanni noonsa!

4. Tiiꞌꞌinke danchu garinni loosanno gede mayi kaaꞌlannonke?

⁴ Tiiꞌꞌinke danchu garinni loosanno gede mayi kaaꞌlannonke? Maganu qaali giddo noo higgenna xintu seeri, “halaale rosiisate, sodhinore seejjate, soꞌro hoolatenna halaalaancho heeshshora ikkanno biddishsha aate” kaaꞌlanno. (2 Xim. 3:16) Konni daafira, Qullaawa Maxaafa seekkine xiinxalla, hiincanna loosunni leellisha hasiissannonke; tini Maganu hedo huwanteemmo gedenna tiiꞌꞌinke danchu garinni massagannonke gede assitanno. Hanni Yihowa higgenna xintu seerisi tiianke qajeelsiꞌneemmo gede kaaꞌlannonke gara laꞌno.

5, 6. Maganu higgera hajajammummoro horo afiꞌneemmohu hiittoonniiti?

⁵ Maganu higgenni tiianke qajeelsiꞌrate, Maganu qaale nabbawatenni woy tenne higge afatenni sainore assa hasiissannonke. Maganu higge lowo geeshsha baxanna ayirrisa hasiissannonke. Maganu Qaali togo yaanno: “Busha coye hunne [woy, gibbe], dancha coye baxxe.” (Amo. 5:15) Ikkollana togo assa dandiineemmohu hiittoonniiti? Qaru coyi Yihowa mitto coye laꞌꞌanno gara rosate. Hanni goxichu giweennahe akimete minira haꞌroottohu gede assite hedi. Akimichu dancha sagale itatto gede, ispoorte loosatto gedenna heeshshokki giddo mito coye biddi assiꞌratto gede kulihe. Isi yiinohere assite goxicho afiꞌritto. Akimichu kaaꞌlinohe daafira lowo geeshsha galatattositi egennantinote.

⁶ Hatteente gede, Kalaqaanchinke uyinonke higge cubbo loonse qarru giddo umbeemmokki gedenna heeshshonke woyyaabbanno gede assitanno. Qullaawu Maxaafi giddo noo higge kaphu, hanaaqu, mooru, foora, finqillenna agaanintete loosi daafira kultannore harunsa kaaꞌlitanno gara hedi. (Lawishsha 6:16-19 nabbawi; Aju. 21:8) Yihowa higgera hajajammummoro afiꞌneemmo atoote laꞌneemmo woyite, Yihowaranna higgesira noonke baxilli lexxanno.

7. Qullaawu Maxaafi giddo noo xagge nabbawanna hiinca maa assineemmo gede kaaꞌlitannonke?

⁷ Maganu higge diingummoro iillannonke qarra afate uminke qarramme rosa dihasiissannonke. Maganu Qaali giddo kulloonni manni loosino cubbinni rosa dandiineemmo. Lawishsha 1:5 “Egennaamu egenno lexxanno” yitanno. Baalunkunni rooranno biddishsha afiꞌneemmohu Maganuwiinniiti; konni daafira Qullaawu Maxaafi giddo noo manni xagge nabbawanna hiinca hasiissannonke. Lawishshaho, Moote Daawiti Bersaabehi ledo foore Maganu higge diigi woyite iillinosi qarra hedi. (2 Sam. 12:7-14) Tenne xagge nabbambeemmonna hiincineemmo woyite ninkeneeto togo yine xaꞌma dandiineemmo: ‘Moote Daawiti togoo qarri giddo uwannokki gede maa assannohu baino? Anerano togoo fonqoli iillannoe woyite maa asseemmo? Togoo fonqoli iillannoe woyite Yooseefi gede xooqeemmonso Daawiti gede fonqolu giddo uweemmo? (Kal. 39:11-15)  Cubbo loonsummoro daanno qarra hiincanke ‘busha coye giwate’ murciꞌneemmo gede kaaꞌlitannonke.

8, 9. (a) Tiiꞌꞌinke maa assineemmo gede kaaꞌlannonke? (b) Yihowahu xintu seeri tiianke qajeelsiꞌrate kaaꞌlannonkehu hiittoonniiti?

⁸ Maganu giwannore assineemmokki gede qorophineemmoti egennantinote. Ikkollana Qullaawu Maxaafi giddo konne assi konne assitooti yine kulloonnikki coyi tuncu yaankera dandaanno. Togoo woyite, Magano hagiirsiisannohu maatiro afa dandiineemmohu hiittoonniiti? Qullaawu Maxaafinni tiianke qajeelsiꞌnummoro dancha doorsha doodha dandiineemmo.

⁹ Yihowa baxannonke daafira, tiianke qajeelsiꞌneemmo gede xintu seera uyinonke. Isi togo yiino: “Woyyannoꞌnere rosiiseemmoꞌnehunna, hadhinanni doogo kuleemmoꞌnehu Maganiꞌne Kaaliiqi aneeti.” (Isa. 48:17, 18) Qullaawu Maxaafi giddo nooha xintu seera seekkine hiincineemmoha ikkiro, tiianke qajeelsiꞌranna biddi assiꞌra dandiineemmo. Tini qolte dancha doorsha doodhineemmo gede kaaꞌlitannonke.

10. Xintu seeri maati? Yesuusi rosiisate xintu seera horoonsiꞌrinohu hiittoonniiti?

¹⁰ Xintu seeri gara ikkinore hendeemmo gedenna dancha doorsha doodhineemmo gede kaaꞌlannonke halaaleeti. Xintu seera huwata Yihowa hedo anfeemmo gedenna higge uyinonkehu mayiraatiro huwanteemmo gede kaaꞌlitannonke. Yesuusi rosaanosira mittu assooti abbanno qarra huwattanno gede rosiisate xintu seera kulinonsa. Lawishshaho, koma amada finqillanni gedenna busha yorto foorranni gede assitara dandiitannota kulino. (Mat. 5:21, 22, 27, 28) Dancha gede qajeelino tiiꞌꞌi, Yihowahu xintu seerinni massagammeemmo gedenna Iso hagiirsiisannore assineemmo gede kaaꞌlannonke.—1 Qor. 10:31.

11. Mittu manchi tiiꞌꞌi wolu manchi tiiꞌꞌiwiinni baxxannohu hiittoonniiti?

¹¹ Qullaawu Maxaafinni qajeelino tiiꞌꞌi noonsari lamu Kiristaanira mittu coyi daafira babbaxxitino lao heedhansara dandiitanno. Hanni agu daafira laꞌno. Qullaawu Maxaafi deerrunni aga dihoolanno. Ikkollana quwa sayisiꞌne angeemmokkinna dimbineemmokki gede qorowisiisannonke. (Law. 20:1; 1 Xim. 3:8) Togo yaa mittu Kiristaanchi heda hasiissannosihu deerra sayise agate daafira callaati yaatenni? Hatto yaa diꞌꞌikkino. Mittu Kiristaanchi tiiꞌꞌisi agannota hoola hoogisirono wolootu tiiꞌꞌi daafira heda hasiissannosi.

12. Roomu Sokka 14:21 te noo hedo wolootu tiiꞌꞌira qorophineemmo gede kaaꞌlitannonkehu hiittoonniiti?

¹² Phaawuloosi Kiristaanu wolootu tiiꞌꞌira qoropha hasiissannonsata xawisanni togo yiino: “Ledo ammanaasine gufisannoha ikkiro, maala ita woy woyinete xajje aga, woy wole coye assano agura woyyate.” (Rom. 14:21) Atewiinni baxxino tiiꞌꞌi noosi rodii gufiꞌrannokki gede assa dandaattore ikkiro nafa assa agurate maahoyye yaatto? Togo assattoti egennantinote. Mitu roduuwi halaale rossara albaanni ago deerrimale aggannoha ikkirono, xa kayinni horo aga hoogate murcidhino. Ninke baalunku roduuwinke bashsho assitannoha gara ikkinokki coye assate higganno gede guficho ikka dihasiꞌneemmo. (1 Qor. 6:9, 10) Konni daafira mittu rodii diageemmo yaanna agi yine giddeessa dihasiissannonke.

13. Ximootewoosi Maganu Mangiste loosi halaꞌlanno gede assate dancha lawishsha ikkinohu hiittoonniiti?

¹³ Ximootewoosi 20 diro ikkannosi balla heeꞌre farciꞌrannonsahu Yihudu manni gufiꞌrannokki gede shota ikka hoogisirono barcimate sumuu yiino. Isi togo assinohu  soqqamaasinchu Phaawuloosira noosi gedee lao noosi daafiraati. (Soq. 16:3; 1 Qor. 9:19-23) Atino Ximootewoosi gede wolootaho yite umikki horo aguratto?

14, 15. (a) Ayyaanaamittetenni gikki yaa mayyaate? (b) Ayyaanaamittetenni gikki yiino Kiristaani wolootaho baxille leellishannohu hiittoonniiti?

¹⁴ Baalunku Kiristaani ‘Kiristoosi daafira uyinoonnihu umi rosiwiinni woꞌma ikkino rosiwa saꞌꞌa’ yaano ayyaanaamittetenni gikki yaa hasiissannonsa. (Ibi. 6:1) Kayinni ayyaanaamittetenni gikki yinannihu mulla diꞌꞌikkino. ‘Woꞌma ikkino rosiwa saꞌꞌate’ sharrama hasiissannonke. Ayyaanaamittetenni gikki yinoommore ikkate egennonkenna wodanchanke lexxitanno gede assiꞌra hasiissanno. Qullaawa Maxaafa barru baala nabbambeemmo gede duucha woyite jawaachinshanninkehu iseraati. (Far. 1:1-3) Togo assate mixo fushshiꞌrootto? Barru baala Qullaawa Maxaafa nabbawa Yihowa higgenna xintu seera huwatatto gede, hattono Maganu Qaale seekkite wodanchatto gede assitannohe.

¹⁵ Kiristaanaho baalunkunni roore hasiissannonsa higge baxillu higgeeti. Yesuusi rosaanosira togo yiino: “Mereeroꞌne baxillu heeꞌriro rosaanoꞌya ikkitinoonnita mannu baalunku konninni afanno.” (Yoh. 13:35) Yesuusi rodii Yaaiqoobi baxille ‘gashshootu seeraati’ yiino. (Yai. 2:8) Phaawuloosi kayinni “baxillu Seeraho gawalote” yiino. (Rom. 13:10) Baxille togo yine xawisa garankolla, korkaatuno Qullaawu Maxaafi “Maganu baxilleho” yaanno. (1 Yoh. 4:8) Maganu baxillesi loosunni leellishino. Yohaannisi togo yee borreessino: “Ninkera Maganu baxilli xawinonkehu kunninniiti; isi widoonni heeshsho afiꞌneemmo gede, Maganu afiꞌrinoha mitto Beettosi tenne gobba soyino.” (1 Yoh. 4:9) Ninkeno Yihowa, Beettosi, Kiristaanu roduuwanke, hattono manna baala banxeemmoha ikkiro ayyaanaamittetenni gikki yinoommore ikkinoommota leellinsheemmo.—Mat. 22:37-39.

16. Ayyaanaamittetenni gikki yineemmo woyite xintu seeri horo afiꞌrinota bashshonni roore huwanteemmohu mayiraati?

¹⁶ Ayyaanaamittetenni gikki yinummoro, xintu seeri horo afiꞌrinoha ikkinota bashshonni roore huwanteemmo.  Korkaatuno higge kaaꞌlitannohu mitu coyira callaati, xintu seeri kayinni babbaxxino coyira kaaꞌlannonke. Lawishshaho mittu qaaqqi bushu jaaloomi gawajjannota huwata dandaannokki daafira annisinna amasi iso bushu coyinni agarate higge fushshitanno. (1 Qor. 15:33) Ikkollana, qaaqqu gikki yaanni haꞌranno woyite xiinxalla ikkanno daafira, Qullaawu Maxaafiha xintu seera horoonsiꞌre umisinni woyyinore assanna dancha jaalla doodha dandaanno. (1 Qorontoosi 13:11; 14:20 nabbawi.) Maganunniha xintu seera seekkine hiincineemmo woyite tiiꞌꞌinke Maganu hedo garinni massagannonke.

17. Dancha doorsha doodhate kaaꞌlannori woꞌme noonke yineemmohu mayiraati?

¹⁷ Assineemmori baalu Yihowa hagiirsiisanno gede hayyote doorsha doodhate kaaꞌlannori woꞌme noonke. Maganu Qaali giddo noo higgenna xintu seera danchu garinni horoonsiꞌnummoro, ‘dancha coye assate qixxaamboommore’ ikkineemmo. (2 Xim. 3:16, 17) Konni daafira, Yihowa ‘hedo maatiro wodanchate’ Qullaawa Borro giddo nooha xintu seera seekkine xiinxalla hasiissannonke. (Efe. 5:17) Kiristaanu songo widoonni ninke kaaꞌlate qixxeessinoonni qixxaawo danchu garinni horoonsiꞌra hasiissannonke; kuri giddo mite Agarooshshu Shae Borro Indekse, Yihowa Farciꞌraasine Borro Xiinxallate Kaaꞌlitanno Biroshere, Wochitawori Layibirerii, Agarooshshu Shaeta INTERNEETETE LAYIBIRERENNA nna JW Layibirerii yinanni appilikeeshiineeti. Konne uduunne qixxeessinoonnihu hojju xiinxallonninna maatete xiinxallonni horo afiꞌnammoraati.

18. Yihowa higgenna xintu seeri ledo sumuu yaannore assinummoro mayi atoote afiꞌneemmo?

¹⁸ Yihowa higgeranna xintu seerira hajajammummoro afiꞌneemmo atoote Faarso 119:97-100 aana kulloonni: “Seerakki lowo geeshsha baxeemmo; barra woꞌma iso hedeemmo. Hajajokki woꞌmanka woyite ledoꞌya no; baarigaarraꞌyanni roore wodancheemmoha assitannoe. Hajajokki marro hige hedatenni, rosiisaannoꞌya baalantenni roore wodancha afiꞌroommo. Wogakki baala wonsheemmo daafira, jajjabbunni roore hayyicha ikkeemmo.” Maganu higgenna xintu seera ganyine hiincineemmoha ikkiro, assineemmore hayyotenni assineemmo, hattono wodancha afiꞌneemmo. Maganu higgenninna xintu seerinni tiianke qajeelsiꞌrate sharrammummoro, ‘Kiristoosi guutanna woꞌma ikkinonte gede, ninke baalunku woꞌma manna ikka’ dandiineemmo.—Efe. 4:13.