HUNDITI Israeelete daga Yordaanoosi Laga tayisse Hexxote Gobba eˈara rakke heedheenna wole gobba manni insawa dayino. Kuni Yihowa magansidhannokki daga wido ikkino meentooti; insa Israeelete labballo jilaho koyisara dayino. Kuni dancha jila lawara dandaanno. Haaro jaalla kalaqiˈra, sirbanna dancha sagale ita Israeele halchishshansara dandiitanno. Hakku meenti harunsanno budinna amanyooti Maganu Israeelete uyino Seeri ledo sumuu diyaannoho; ikkirono mitu Israeelete labballi ‘Bushanna dancha bande anfoommoreeti. Qoleno qorophineemmo’ yite heddinoha ikkara dandaanno.

 Hakkiinni mayi ikkiyya? Qullaawu Maxaafi “Manninsa Moaabi meenti ledo foori” yaanno. Meentu mixo, Israeelete labballi kaphu maganna magansiˈranno gede assate. Qoleno qiniinonsa! Konni daafira, Yihowa “lowo geeshsha hanqi.”—Kir. 25:1-3.

Israeele Yihowa Seera diigginohu lame doogonniiti: Umihunni, kaphu magannara kumbuultino, layinkihunni, foortino. Maganoho finqilansanni, lowo kume ikkano manni goofino. (Ful. 20:4, 5, 14; Mar. 13:6-9) Kuni assooti gaabbote hunannoho yineemmohu mayiraati? Korkaatuno hatte yannara, Israeele Maganu Seera diiga hooggoommero lowo kume ikkanno manni shiima yanna gedensaanni Yordaanoosi Laga tayise sae Hexxote Gobba eannohu baino!—Kir. 25:5, 9.

Soqqamaasinchu Phaawuloosi hatte yanna daafira coyiˈranni togo yiino: “Kuni coyi insa aana ikkinohu, ninke jiilleemmo gedeeti. Borreessinoonnihuno diru goofimarchira heeˈnoommorira ninkera seejjo ikkankeraati.” (1 Qor. 10:7-11) Mitu Israeelete manni shota ikkinokki cubbo loose Hexxote Gobba eikki gatino daafira, Sheexaanu lowo geeshsha hagiidhinoti egennantinote. Ninke konne qorowishsha wodanchanke hayyote! Korkaatuno xaa yannarano Sheexaanu Maganu qixxeessinota haaro alame eˈnammora dihasiˈranno.

Sheexaanu Kiristaana woshshaadate, konni albaanni lowo manna soˈrisiisino hayyo horoonsiˈranno. Aleenni laˈnummonte gede, Sheexaanu Israeele woshshaadate foorre horoonsiˈrino. Xaa yannarano Sheexaanu woshshaado giddo mitte foorrete. Sheexaanu tini woshshaado amaddannonke gede assate horoonsiˈranno coyi giddo mittu teeda baˈino misillaati.

Xaa yannara, mittu manchi teeda baˈino misilla wolu afisikkinni laˈˈara dandaanno. Bashsho mittu manchi teeda baˈino misilla laˈˈa hasiˈriro, maaeelare leellishshanno filme laˈˈate tiyatirete minira woy togoo borro hirranni suuqqa haˈranno. Togoore leellinshanniwa qooxo hige nafa mara saalsiissannota ikkitino daafira, batinyu manni qorophanno. Xa kayinni mittu manchi minesi heeˈre woy makeenu giddo interneetete widoonni teeda baˈino misilla laˈˈara dandaanno. Batinye gobbara labballuno meentuno hasiˈriro minensa heeˈre teeda baˈino misilla afiˈrara dandaanno.

Qoleno mobayile woy taabileete teeda baˈino misilla afiˈra shota ikkitanno gede assitino. Mannu lekkatenni haˈranno woyite, otobisete woy baaburu giddo heeˈre angansa noo uduunnichinni teeda baˈino misilla laˈˈara dandaanno.

Teeda baˈino misilla mannu afikkinni laˈˈa shota ikkitino daafira, tini woshshaado albinni roore lowo manna gawajjitino. Teeda baˈino misilla laˈˈannohu batinyu mannira adhamansa gawajjantino, insaneetira noonsa ayirrinyi baino, hattono tiiˈˈinsa xurino. Bushate busha, konni mannira Maganu ledo noonsa jaaloomi baˈˈara dandaanno. Teeda baˈino misilla laˈˈanno manchi umosi gawajjannoti egennantinote. Togoo assooti wodana madiissanno. Tini mada galte hosse hurtara dandiitannoha ikkirono, bassu kayinni dibaˈˈanno.

Ikkollana, Yihowa tenne Sheexaanu woshshaadonni agareemmoˈne yiinonke. Yihowa agarankera hasiˈnummoro, isira ‘hajajama’ hasiissannonke; hundi Israeele woshshaadotenni amadantinohu hatto assa hooggino daafiraati. (Ful. 19:5) Maganu teeda baino misilla effire giwannota huwata hasiissannonke. Hatto yineemmohu mayiraati?

Yihowa Israeelete uyino seeri iso magansidhannokki daga harunsitanno seeriwiinni baxxinoha ikkinota qaaga hasiissannonke. Golu gede, kuni seeri Israeele qooxeessinsara noo manninna mancau assootinsawiinni agarannonsa. (Mar. 4:6-8) Kuni seeri, Yihowa foorre giwannota leellishanno.

Yihowa, Israeele qooxeessinsara heedhanno  daga assitannohu bushu assooti daafira coyiˈranni togo yiino: “Haare masseemmoˈne gobbahu Kanaˈˈaani manni assannore assitinoonte; . . . Baatto nafa gattukkinni battaabbino; anino cubbisera yee qorichishoommose.” Qullaawa ikkinohu Israeelete Magani, Kanaani manni heeˈranno heeshsho battaabbinota ikkasenni kainohunni, baattonsa nafa battaabbinota coyiˈrino.—Lew. 18:3, 25.

Yihowa Kanaani manna qorichishinoha ikkirono, wolu manni foora diagurino. Phaawuloosi 1,500 saˈˈanno diri gedensaanni Kiristaanu waro heedhino daga ‘saala hoogginore’ ikkitinota coyiˈrino. Isinni tini daga, “addi addi batte assate umonsa sarmitannokki hamaandera [woy macca ceeˈmitanno assootira] sayisse uyitino. Yortonsarano gawalo dino.” (Efe. 4:17-19) Yannankerano saalimale coye assitannori woˈmitino. Maganunniti ammanantino soqqamaano tenne alamera noo manni assannoha mancaˈˈa coye laˈˈa hoogate dandaaminsare baala assa hasiissannonsa.

Teeda baˈino misilla Maganu ayirrannokki gede assitanno. Maganu manna danisinni kalaqino; hattono kawajjo afiˈrino coye badate dandoo uyinonke. Maganu siimu xaadooshshe lainohunni quwa sainokki biddishsha uyino. Yihowa siimu xaadooshshe kalaqinohu, adhantinori amanyoote afiˈrino garinni hagiidhitanno gedeeti. (Kal. 1:26-28; Law. 5:18, 19) Ikkina teeda baˈino misilla qixxeessitannorinna boohaarshu gede assite shiqishshannori maa assitanni no? Insa Yihowaha amanyootu seera mishshanni no. Addanko, togoo manni Yihowa ayirrannokki gede assanno. Yihowa, seerasi diige teeda baino coye qixxeessannonna tuqisanno mannira yoo yaanno.—Rom. 1:24-27.

Afanni heeˈre teeda baino coye laˈˈanno woy nabbawanno mannina? Mitu manni teeda bainore laˈˈa gawajjannokki boohaarshaati yee hedannoha ikkara dandaanno. Ikkollana, togo assanno manni Yihowa seera mishshannorira kaaˈlamanni no. Insa teeda baˈino misilla laˈˈa hanaffinohu tenne hedde ikka hoogara dandaanno. Ikkihano ikkiro, halaalaanchu Magani soqqamaasine teeda baˈino misilla effidhe giwa hasiissannonsa. Qullaawu Maxaafi Yihowa “Bunshe gibbannore baala baxanno” yaanno.—Far. 97:10.

Teeda baˈino misilla laˈˈa agura hasidhannorira nafa, hatto assa qarra ikkitansara dandiitanno.  Guuntete xeˈne noonkere ikkinoommo daafira, busha yorto qeeˈlate sharrama hasiissannonke. Qoleno guuta ikkinokki wodaninke Maganu seera diigate faro hasiˈneemmo gede assankera dandaanno. (Erm. 17:9) Ikkollana Kiristaana ikkinohu batinyu manni, tenne yorto sharrame qeeˈla dandiino. Aterano tini fonqolo ikkitinoheha ikkiro, qeeˈlino manni noota afakki jawaachishshahera dandiitanno. Maganu Qaali, tenne Sheexaanu woshshaadonni amadamattokki gede kaaˈlannohe gara hanni laˈno.

Aleenni laˈnummonte gede, busha yorto batinye Israeelete manna balete huntino. Xaa yannarano hattooti. Yesuusi rodii Yaiqoobi tenne daafira xawisanni togo yiino: “Mittu mittunku manchi jifamannohu umisi yortonni goshooshamanninna dogamanniiti. Hakkunni gedensaanni yorto gadobbe cubbo iltanno; cubbu lophiro reyo qalanno.” (Yai. 1:14, 15) Mittu manchi giddosi busha yorto lophitanni hadhara wodhe aguriro, gale hose cubbo loosasi digattanno. Hakko daafira busha yorto hiinca agurre, wodaninke giddonni buqqinse huna hasiissannonke.

Busha yorto dagganni qarrissuhero, Yesuusi amaalino amaale harunsi; isi togo yiino: “Angakki woy lekkakki cubboho massitannoheha ikkiro murte huni! . . . Illekki cubboho eessitannoheha ikkiro fushshite huni!” (Mat. 18:8, 9) Yesuusi angankenna lekkanke murre hunneemmo gede, woy illenke fushshine hunneemmo gede kulanni noonkeha diˈˈikkino. Hatteentenni fonqolo ikkannonkere hobbi ruxxi yinummokki ranke huna hasiissannonketa lawishshunni kulanni no. Ikkina teeda baˈino misilla lainohunni tenne amaale harunsa dandiineemmohu hiittoonniiti?

Teeda baˈino misilla hedeweelcho dagguhero ‘Ane digawajjitannoe’ yite heddooti. Bayichonko shawwu yii. Televizhiine rakke cufi. Kompiyutere woy mobayile bayichonko cufi. Hakkiinni wole dancha coye hedi. Hatto assakki, hedokki eemadhatto gedenna busha yorto qeeltannohekki gede kaaˈlitannohe.

Teeda baˈino misilla laˈˈa aguroottoha ikkirono, bashsho laoottoti qulli yitanni qarrissuhero maa assa dandaatto? Teeda baˈino misilla woy hedo  surretenni baˈukki lowo yanna keeshshitara dandiitanno. Qoleno hedeweelcho qulli yitanni qarrissara dandiitanno. Hatto ikkiro, batte ikkinore assate lawishshaho maasterbeeshiine assa rakkahera dandiitanno. Hakko daafira, togoo hedo hedeweelcho daggahera dandiitannota hedde gargadhate balaxxe qixxaawi.

Hedokkinna assootikki Maganu fajjo ledo sumuu yaanno gede assiˈrate murciˈri. Soqqamaasinchu Phaawuloosi gede, ‘manninatekki gadadisse miirannohe (woy borojjichokki ikkanno) gede assiˈri.’ (1 Qor. 9:27) Busha yortora borojjicho ikkattokki gede qorophi! “Maganu hedo dancha, hagiirsiissannotanna guuta ikkitinota affinanni gede, wodaniˈne haarooˈmo ikkinnina tenne gobba mannita busha doogo hadhinoonte” yitanno amaale harunsi. (Rom. 12:2) Harshammo afiˈnanni gede assitannoti Maganu fajjo ledo sumuu yitanno hedootinna assooteeti ikkinnina, cubbu yortora hajajama ikkitinokkita deˈooti.

Mite Qullaawu Maxaafi qummeeshshuwa qaagate woˈnaali. Hakkiinni busha hedo daggannohe woyite, kuri qummeeshshuwa hiinci. Faarso 119:37, Isayaasi 52:11, Maatewoosi 5:28, Efesooni Sokka 5:3 Qolasiyaasi Sokka 3:5 nna 1 Teselonqe 4:4-8 teeda baˈino misilla daafira Yihowate gedee lao heedhannohenna isi maa assattora hasiˈrannoro huwatatto gede kaaˈlitannohe.

Teeda bainore laˈˈa woy heda agura wolqakkira aleenni ikkitinoheha lawannohe woyite maa assa dandaatto? Yesuusi lawishsha seekkite harunsi. (1 Phe. 2:21) Isi cuuami gedensaanni Sheexaanu jifanni waadinosi. Yesuusi maa assiyya? Sheexaane gargadha diagurino. Isi duucha qummeeshsha horoonsiˈre, Sheexaanu abbinosi fonqolo qeelino. Yesuusi “Ati Sheexaanu anewiinni fafi!” yiino; Sheexaanuno agure haˈrino. Yesuusi Sheexaaneho anga diuyino; atino hexxo mudha dihasiissannohe. (Mat. 4:1-11) Sheexaanunna alamesi surrekkira maaeela hedo woˈmitanno gede assate woˈnaala diagurtanno; ikkirono hexxo mudhite sharrama agurtooti. Sharramittoro teeda baˈino misilla laˈˈate hasatto qeela dandaatto. Yihowa diinakki qeelatto gede kaaˈlannohe!

Yihowa kaaˈlannohe gede ganyite huucciˈri. Phaawuloosi togo yiino: “Hasidhinoonni coye Maganoho kuˈle. . . . Mannu hedora aleenni ikkinohu Maganu keeri, Kiristoosi Yesuusinni wodanaˈnenna hedoˈne agaranno.” (Fil. 4:6, 7) Maganu cubbu ledo sharrante qeelatto gede giddiidi keere aannohe. Yihowawa shiqqi yiittoro “isino [atewa] shiqqi yaanno.”—Yai. 4:8.

Baalante Sheexaanu woshshaadonni agarooshshe ikkannonkehu qaru coyi Woˈmanka Dandaanno Magani ledo kalaqiˈnoommo jaaloomaati. Yesuusi “Tenne gobba gashshaanchi Sheexaanu daanni” noota coyiˈri gedensaanni, “Isi ane aana wolqa diafiˈrino” yiino. (Yoh. 14:30) Yesuusi hatto yee mitte giddonni coyiˈrinohu mayiraati? Isi mitte yannara togo yiino: “Soyinoehu ane ledo no. Woˈmanka woyite iso hagiirsiisannore asseemmo daafira callaˈya diagurannoe.” (Yoh. 8:29) Atino Yihowa hagiirsiisannore assittoro, isi horonta ditugannohe. Konni daafira, teeda baˈino misilla woshshaado ikkitannohekki gede qorophi; hatto assittoro Sheexaanu woshshaado diamaddannohe.