XIINXALLOTE BIRXICHO 25
Yaaddo Amaddannoꞌne Woyite Yihowa Addaxxe
“Wodanu yaaddo dadille abbitanno.”—LAW. 12:25.
FAARSO 30 Annaꞌya, Maganoꞌyanna Jaalaꞌya
GUULCHO a
1. Yesuusi amaale macciishsha hasiissannonkehu mayiraati?
YESUUSI goofimarchu barruwa daafira masaali woyite togo yiino: “Tenne gobba heeshshora yaaddinanna wodanu daafurannoꞌnekki gede qorophe!” (Luq. 21:34) Tenne amaale macciishsha hasiissannonke. Mayira? Korkaatuno, xaa yannara ninke baalunkura wolu mannira iillannohu gedeehu yaachishanno coyi tuncu yaannonke.
2. Roduuwinkera hiikku yaachishanno qarri iillanni noonsa?
2 Gamete aana gami-tokke yinannihu gede, mito woyite qarru aana aanaho iillankera dandaanno. Hanni aante noo lawishshuwa laꞌno. Jooni b yinanni rodoo buutote dhibbi (meltipili iskileroosisi yinannihu nervete dhibbi) amade heeꞌreennasi, 19 diro gashshiꞌrino minaamasi hunte hadhinosi; hatte yannara isi lowo geeshsha xissiisiꞌrino. Hakkiinni lame seennisi Yihowara soqqama agurino. Boobinna Linda yinanni minaanninna minaamara wolu gari qarri iillinonsa. Lamunku loosonsa hooggino; hattono heedhanno mininni fultanno gede assinoonni. Konne baala qarrano agurranna, akime Linda shaannohu wodanu dhibbi amadinoseta kultinose; hattono wolu mikita quruuxanno dhibbi amadinose.
3. Filiphisiyusi Sokka 4:6, 7 yitanno garinni Yihowa daafira maa addaxxa dandiineemmo?
3 Kalaqaanchinkenna baxannonke Anninke Yihowa, yaaddo mageeshshi geeshsha gawajjitannonkero afinota addaxxa dandiineemmo. Qoleno isi iillannonke qarra dandiineemmo gede kaaꞌlankera hasiꞌranno. (Filiphisiyusi Sokka 4:6, 7 nabbawi.) Maganu Qaali, Yihowa soqqamaasine dandiite saꞌinoha batinye qarra kulanno. Yihowa insa konne qarra dandiite saꞌanno gede kaaꞌlinonsa garano xawisanno. Hanni mito lawishsha laꞌno.
“EELIYAASI NINKE GEDEE MANCHOOTI”
4. Eeliyaasira hiikku qarri iillinosi? Isi Yihowa maa assannosita addaxxino?
4 Eeliyaasi Yihowara soqqaminohu busha yannaraati; hattono isira buutote qarri iillinosi. Israeelete gobbara mookkinote ammanantinokki mootoolla giddo mittu Moote Akiaabiiti; isi Elzaabeeli yinannita Baꞌꞌaali magansidhannota busha mancho adhino. Lamunku Baꞌꞌaali magansiꞌra halaꞌlitanno gede assitino, hattono batinye Yihowa masaalaano shitino. Eeliyaasi kayinni xooqe gatino. Qoleno isi Yihowa addaxxino daafira, hudete yanna gate saino. (1 Mot. 17:2-4, 14-16) Qoleno, Eeliyaasi Baꞌꞌaali masaalaanonna iso magansidhannori ledo yekkeerami woyite Yihowa addaxxino. Isi Israeele Yihowara soqqantanno gede jawaachishino. (1 Mot. 18:21-24, 36-38) Eeliyaasira, hattenne qarru yannara Yihowa irkisanni noosita leellishshannoti batinye taje noosi.
Yihowa sokkaasinchisi widoonni Eeliyaasi jawaachishino
(Gufo 5-6 lai) c
5-6. Umi Mootoolla 19:1-4 kultanno garinni Eeliyaasi mayyee hedino? Yihowa Eeliyaasi baxannota leellishinohu hiittoonniiti?
5 Umi Mootoolla 19:1-4 nabbawi. Mootitte Elzaabeeli sheemmahe yitusi yannara kayinni Eeliyaasi waajjino. Hakko daafira, Bersaabehi yinanniwa xooqino. Isi hexxo mudhino daafira, ‘reyo hasiꞌrino.’ Eeliyaasi hexxo mudhinohu mayiraati? Korkaatuno isi guuntete xeꞌne noosiho ‘ninke gedee manchooti.’ (Yai. 5:17) Isi lowo geeshsha yaadinonna daafurino daafira, qarru wolqaꞌyara aleenni higino yee hedinoha ikkara dandaanno. Eeliyaasi, ‘Mannu Yihowa magansiꞌranno gede jawaachishate assoommori kaaꞌlinori dino; qoleno Israeelete gobbara woyyinori dino; hattono Yihowa magansiꞌranni noommohu ane callaati’ yee hedinoha ikkara dandaanno. (1 Mot. 18:3, 4, 13; 19:10, 14) Kuni ammanamino masaalaanchi hatto yee hedasi dhagge ikkitankera dandiitanno. Yihowa kayinni Eeliyaasi qarra afino.
6 Eeliyaasi giddosita fushshe coyiꞌrino daafira Yihowa dihanqinosi. Hatteentenni wirro jawaante afiꞌranno gede kaaꞌlinosi. (1 Mot. 19:5-7) Yannate gedensaanni Yihowa bayira wolqasi leellishe, Eeliyaasi hedosi biddi assiꞌranno gede shaqqillunni kaaꞌlinosi. Hakkiinni Israeelete giddo Baꞌꞌaali magansiꞌra giwinohu 7,000 manni noota kulinosi. (1 Mot. 19:11-18) Konni garinni, Yihowa Eeliyaasi baxannosita leellishino.
YIHOWA KAAꞌLANNONKEHU HIITTOONNIITI?
7. Yihowa Eeliyaasi kaaꞌlino gari jawaachishannonkehu hiittoonniiti?
7 Atera yaachishannori iillinohe? Yihowara Eeliyaasi qarri leellinosita afanke sheshifachishshannonke. Tenne afanke Yihowara ninke qarrino leellannosita addaxxineemmo gede assitannonke. Isi dhukanke, wole agurina hedonkenna hasattonke nafa afino. (Far. 103:14; 139:3, 4) Eeliyaasi gede ninkeno Yihowa addaxxinummoro, yaachishannonke qarra dandiine heeꞌneemmo gede kaaꞌlannonke.—Far. 55:22.
8. Yihowa yaaddo dandiine heeꞌneemmo gede kaaꞌlannonkehu hiittoonniiti?
8 Yaachishanno coyi iillannonke woyite hexxo mudhineemmoha ikkara dandaanno. Hatto ikkiro, Yihowa yaaddonke dandiine heeꞌneemmo gede kaaꞌlannonketa deꞌnoonke. Isi kaaꞌlannonkehu hiittoonniiti? Yihowa qarranke isira hasaaphineemmo gede koyisinonke. Isi kaaꞌlo afiꞌrate raarreemmo raare macciishshanno. (Far. 5:3; 1 Phe. 5:7) Konni daafira, qarranke huuccattotenni ganyine Yihowara kuꞌla dandiineemmo. Isi Eeliyaasi hasaawisi garinni hasaawisannonkekkiha ikkirono, Qaalisi Qullaawu Maxaafinna dirijjitesi widoonni huuccattonkera dawaro qolanno. Qullaawu Maxaafi giddo noo xagge jawaantenna hexxo uyitannonke. Qoleno ammanate roduuwinke jawaachishannonke.—Rom. 15:4; Ibi. 10:24, 25.
9. Addaxxineemmo jaali kaaꞌlankera dandaannohu hiittoonniiti?
9 Yihowa, Eeliyaasi mito loosu qeechasi Elsaira aanno gede kulinosi; konni garinni Yihowa Eeliyaasira duhasi shaashshanno jaala oye kaaꞌlinosi. Ninkeno iillinonke qarra addaxxineemmo jaalinkera hasaaphinummoro qarranke beeqqara dandaanno. (2 Mot. 2:2; Law. 17:17) Giddonketa hasaaphineemmo jaali dinonke yine hendeemmoha ikkiro, Yihowa Kiristaanu songo giddonni jawaachishannonkeha gikki yiino jaala aannonke gede huucciꞌra dandiineemmo.
10. Eeliyaasi xagge hexxo uyitannonkehu hiittoonniiti? Isayaasi 40:28, 29 giddo noo qaali kaaꞌlannonkehu ma garinniiti?
10 Yihowa, Eeliyaasi iillinosiha yaachishanno qarra dandee heeꞌrannonna lowo diro ammaname soqqamanno gede kaaꞌlinosi. Eeliyaasi xagge hexxo uyitannonke. Ninkeno hexxo mudhine dhuka baꞌneemmo woyiti heeꞌrara dandaanno. Yihowa addaxxineemmoha ikkiro kayinni, isi ammanamme soqqammeemmosi gede kaaꞌlitannonke wolqa aannonke.—Isayaasi 40:28, 29 nabbawi.
HAANNA, DAAWITINNA “ASAAFI” YIHOWA ADDAXXITINO
11-13. Hunda heedhinote sase Maganu soqqamaanora hiikku yaachishanno coyi iillinonsa?
11 Yaachishanno coyi iillinonsahu Qullaawu Maxaafi giddo kulloonnihu wolu mannino no. Lawishshaho, Haanna ilaweelo ikkasenni saaltino daafiranna ginase qacifattanni waaddinose daafira baasa yaaddino. (1 Sam. 1:2, 6) Haanna buutote yaaddo amaddinose daafira, wiꞌlitanni sagale nafa ita hooggino.—1 Sam. 1:7, 10.
12 Moote Daawitino baasa yaadino woyiti no. Hanni isira iillinosi qarra hedi. Isi loosino soꞌronni kainohunni isonooto quwa sae bushiishino. (Far. 40:12) Baxanno beettisi Abeseloomi isira finqilino; gedensoonni Abeseloomi konninni kaihunni heeshshosi hoogino. (2 Sam. 15:13, 14; 18:33) Qoleno lubbote jaallasi giddo mittu kaadinosi. (2 Sam. 16:23–17:2; Far. 55:12-14) Daawiti borreessinoti batinye faarso, isi hexxo mudhino woyiti nootanna Yihowa addaxxinota leellishshanno.—Far. 38:5-10; 94:17-19.
Faarsaasinchu wirro Yihowara hagiirrunni soqqamanno gede kaaꞌlinosiri maati? (Gufo 13-15 lai) d
13 Yannate gedensaanni faarsaanote giddo mittu bushu manni heeꞌranno heeshsho hinaasa hanafino. Kuni faarsaasinchi Leewi sircho ikkara dandaanno; isi Maganunnihu ‘qullaawu mini giddo’ soqqamino. Isi lowo geeshsha yaadino daafira, hagiirrenna harshammo hoogino. Kuni faarsaasinchi Maganoho soqqama atoote afiꞌnanni gede assitannota huluullama nafa hanafino.—Far. 73:2-5, 7, 12-14, 16, 17, 21.
14-15. Hunda heedhinote sase Maganu soqqamaasine lawishshinni Yihowa addaxxate daafira maa ronseemmo?
14 Aleenni kulliti sasenti Yihowa soqqamaano kaaꞌlo afiꞌrate iso addaxxitino. Insa yaachishinonsare huuccattotenni Yihowara hasaaphitino. Hattono yaaddinohu mayiraatiro xawisse kuꞌlitino. Qoleno Yihowa magansiꞌnanni bayicho haꞌra diagurtino.—1 Sam. 1:9, 10; Far. 55:22; 73:17; 122:1.
15 Yihowa shaqqillunni mittu mittunkura huuccattonsara dawaro qolino. Haanna giddiidi keere afidhino. (1 Sam. 1:18) Daawiti togo yee borreessino: “Keeraanchu manchi qarri batinyeho; Kaaliiqi [“Yihowa,” NW] kayinni kunni baalunkunni gatisannosi.” (Far. 34:19) Asaafi sircho ikkino faarsaasinchino Yihowa ‘qiniiticho angasi amadinotanna’ ‘amaalesinni massagannosita’ yannate gedensaanni huwatino. Isi togo yee faarsino: “Anera kayinni Maganunniwa gamba yaa woyyitannoe; . . . Mooticha Magano goloꞌya assiꞌroommo.” (Far. 73:23, 24, 28) Insa xaggenni maa ronseemmo? Mite yannara iillannonke qarri baasa yaachishankera dandaanno. Ikkollana Yihowa wole soqqamaasinesi kaaꞌlino gara hiincanke, iso ganyine huucciꞌrankenna isi asse yaannonkere assanke yaaddonke dandee heeꞌrate kaaꞌlitannonke.—Far. 143:1, 4-8.
YAADDO QEELATE YIHOWA ADDAXXINO
Mitte rodoo umi qara wolootunniwa gambo gibbino; manna kaaꞌla hanaffuti kayinni hedose biddi assidhino (Gufo 16-17 lai)
16-17. (a) Wolootunniwa gambo giwa hasiissannonkekkihu mayiraati? (b) Wolqanke haaroonsiꞌra dandiineemmohu hiittoonniiti?
16 Aleenni laꞌnummote sase Maganu soqqamaasine lawishshinni ronseemmohu wolu rosino no: Yihowawanna mannisiwa gambo giwa dihasiissannonke. (Law. 18:1) Nansii yinanni rodoo minaannise hune haꞌriseta baasa yaaddino; ise togo yitino: “Mitto manchono laꞌꞌa woy hasaawisa giwisinoe. Ikkollana wolootunniwa gambo giwaꞌya, dadille leddinoe ikkinnina kaaꞌlitinoeri dino.” Ise qarru iillinonsaha wole manna kaaꞌla hanaffuti kayinni yaaddosenni beya afidhino. Nansii togo yitino: “Wolootu qarransa hasaaphitanna seekke macciishshumma. Insara iillinonsa qarra hedaꞌya, ane qarra illachisheemmakki gede kaaꞌlitinoe.”
17 Songote gambooshshe haꞌranke wolqanke haarooꞌmitanno gede assitanno. Gambooshshe haꞌneemmo woyite, Yihowa ninke ‘kaaꞌlatenna jawaachishate’ faro afiꞌranno. (Far. 86:17) Isi gambooshshunniwa qullaawa ayyaanasi, Qaalesinna soqqamaasinesi horoonsiꞌre jawaachishannonke. Gambooshshu “mimmitonke jawaachinsheemmo” faro fanannonke. (Rom. 1:11, 12) Soofiya yinanni rodoo togo yitino: “Yihowanna roduuwu maamari kaajje uurreemma gede kaaꞌlinoe. Baalunkunni roore kaaꞌlinoehu songote gambooshsheeti. Diinaggaawe soqqamaꞌya hattono gambooshshe ganye haꞌraꞌya yaachishanno coye dandee heeꞌreemma gede kaaꞌlitinoe.”
18. Hexxo mudhineemmo gede assannori iillannonke woyite Yihowa maa aankera dandaanno?
18 Hexxo mudhineemmo gede assannori iillannonke woyite, Yihowa albillitte fooliishshiishannonketa calla ikkikkinni xa nafa yaaddonke dandiine heeꞌneemmo gede kaaꞌlannonketa qaaga hasiissannonke. Isi yaachishanno coye qeelleemmo gede “wolqa” aannonke.—2 Qor. 4:7.
19. Roomu Sokka 8:37-39 mayi hexxo uyitannonke?
19 Roomu Sokka 8:37-39 nabbawi. Soqqamaasinchu Phaawuloosi Maganu baxilliwiinni badankera dandaannori nookkita buuxisinonke. Ikkina yaachishanno coyi iillinonsa roduuwanke kaaꞌla dandiineemmohu hiittoonniiti? Aananno birxichira, yaachishanno coyi iillinonsa roduuwanke Yihowa gede mararanna kaaꞌla dandiineemmo gara ronseemmo.
FAARSO 44 Qarramino Manchi Huuccatto
a Quwa saꞌinoti woy bayicho assidhino yaaddo hedonkenna manninatenke gawajjitara dandiitanno. Hattoo yannara Yihowa kaaꞌlannonkehu hiittoonniiti? Konni birxichira, Yihowa Eeliyaasi yaachishanno coye dandee heeꞌranno gede kaaꞌlinosihu hiittoonniitiro ronseemmo. Qoleno yaachishanno coyi iillannonke woyite, Yihowa kaaꞌlo afiꞌrate maa assa hasiissannonkero leellishshannota wole Qullaawu Maxaafi lawishshuwa xiinxallineemmo.
b Konni birxichi giddo kulloonni suꞌmuwa soorrinoonni.
