1. Yihowa ballehino soqqamaanchisi isiwa higanno woyite hiitto ikkanno?

 SAI birxichira, Yihowa mitte mittenta geꞌrechosi towaaxxannohu danchu allaalaanchi gedeeha ikkinota ronsoommo. Qoleno isi ballekkinore baala hasanno. Yihowa iso agurtino Israeele “Anewa higge; anino kiꞌnewa higeemmona” yiinonsa. Yihowa xaano ‘soorraminokki’ daafira, isiwiinni xeertidhinore hatto yaanni no. (Mil. 3:6, 7) Yesuusi mittu ballehino soqqamaanchi songonniwa higanno woyite, Yihowanna sokkaasine lowo geeshsha hagiidhitannota coyiꞌrino.—Luq. 15:10, 32.

2. Konni birxichira maa ronseemmo?

² Konni birxichira, Yihowawiinni xeertidhinore kaaꞌla dandiineemmo gara leellishshannota Yesuusi coyiꞌrinota sase lawishshuwa laꞌneemmo. Qoleno, ballehino geꞌreewi Yihowawa higanno gede kaaꞌlate hiikkuri akatta hasiissannonkero ronseemmo. Hakkiinni ayyaanaamittetenni qiiddinore kaaꞌla gaabbissannota ikkitinokkihu mayiraatiro laꞌneemmo.

3-4. Luqaasi 15:8-10 kulloonni mancho, baꞌinose saante buxuqqante hasidhinohu mayiraati?

³ Yihowawa higa hasidhannore hase afate sharrama hasiissannonke. Yesuusi Luqaasi Wongeeli giddo coyiꞌrino lawishshira, mitte mancho lowo waaga afiꞌrinore yaano diraakima yinanni saante hasidhino gara xawisino. Konni lawishshira, hatti mancho baꞌinose saante hasidhino gara luphi assine xawinsoonni.—Luqaasi 15:8-10 nabbawi.

⁴ Yesuusi, tini mancho baꞌinose saante afidhuti hagiidhite ikkitaata hoogginota coyiꞌrino. Hakkawaro mitte mancho beettose mine assidhanno barra isera tonne diraakima yinanni saante uyitannoha ikkikki digatino. Yesuusi kuli manchono baꞌinose saante buxuqqante hasidhinohu, isera ikkara dandaanno.  Hatti mancho saanteꞌya baꞌinohu mine ikkikki digatino yite heddino. Konnira ise caabbicho qasse hasidhinoha ikkirono diafidhino. Qasidhino caabbichi shiimicco saante leellishanno geeshshiha ikka hoogara dandaanno. Hakkiinni ise, mine qorophite fiitu. Ise gamba assitino ishini giddo muxxe ikkitinoti saantese bilicci yitanna laꞌu! Hakkiinni wodanu hirikki yiise! Ise jaallasenna olliichose woshshite amme hagiidheꞌꞌe yitino.

5. Songotewiinni xeertidhinore hase afa shota ikkitinokkihu mayiraati?

⁵ Yesuusi coyiꞌrino lawishshi leellishanno garinni, bainore hase afa dishaaꞌꞌa loosooti. Hatteente gede, ayyaanaamittetenni qiiddinore hase afate sharrama hasiissannonkeha ikkara dandaanno. Insa Yihowa Farciꞌraasine ledo gamba yaa agurtunku lowo diri sainoha ikkara dandaanno. Qoleno insa hadhino qooxeessira heedhanno roduuwi affinonsakkiha ikkara dandaanno. Kuri giddo mitu, xaa yannara Yihowawa higate quqquxante nooti dihuluullissannote. Insa Yihowa manni ledo isira soqqama hasidhannoha ikkirono, ninke kaaꞌlo hasiissannonsa.

6. Songote noo roduuwi baalu ayyaanaamittetenni qiiddinore hasa dandiitannohu hiittoonniiti?

⁶ Ayyaanaamittetenni qiiddinore hasa dandiitannori ayeooti? Baalunku yaano, cimeeyye, suwisaano, maatete miillanna songote halashshaano togoo roduuwa hasa dandiitanno. Ayyaanaamittetenni qiidino fiixi woy jaali noohe? Minunni mine hadhe woy gudumaaleho soqqantanni heedhe ayyaanaamittetenni qiidinohunni xaadde egennootto? Hakku rodii cimeeyye hasaawissasira hasiꞌrannoha ikkiro, heeꞌrannowa woy silkesi kiiro qooxeessisira heedhanno cimeeyyera aa dandaattota kulisi.

7. Toomaasi yinanni cimeessi coyiꞌrinorinni maa rosootto?

⁷ Roorenkanni songote cimeeyye Yihowawa higa hasidhannore hasate maa assa dandiitanno? Hanni Ispeenete heeꞌrannohu Toomaasi b yinanni cimeessi coyiꞌrinore laꞌno. Isi 40 saꞌanno roduuwi songonniwa higganno gede kaaꞌlino. Toomaasi togo yiino: “Balaxe, addi addi roduuwa ayyaanaamittetenni qiiddinori noowa affinoronna teꞌee xaꞌmeemmo. Woy gambooshshe daa agurinohu affinohu nooro xaꞌmeemmo. Rooru roduuwi ballekkinore hasate insano kaaꞌlitanni noota affino daafira hagiirrunni kultannoe. Ayyaanaamittetenni qiiddinore towaatammora mareemmo woyite oosonsanna fiixinsa keere xaꞌmeemmo. Togoo roduuwi giddo mitu bashsho oosonsa gambooshshe adhite dagganno; qoleno alba oosonsano halashshaano ikkitinore ikkitara dandiitanno. Insano Yihowawa higganno gede kaaꞌlo hasiissannonsa.”

8. Luqaasi 15:17-24 kulloonni garinni, annu gaabbe higino beettosi ma garinni adhino?

⁸ Yihowawa higa hasidhannore kaaꞌlate hiitti akatta hasiissannonke? Hanni Yesuusi annisi mininni fule ballehino beetti daafira coyiꞌrino lawishshinni maa ronseemmoro laꞌno. (Luqaasi 15:17-24 nabbawi.) Yesuusi, jeefote beettu galfatiti, qaera higate murciꞌrinota coyiꞌrino. Annu dodanni mare beettosi rimmi asse hanqafe baxannosita leellishino. Isi kayinni ‘Beetto ikka dimaltinoeho’ yee isonooto bushiishino. Annu beettisi qarrasi hasaaphi woyite lowo geeshsha mararinosi. Hakkiinni beettosi soqqamaanchu gede ikkikkinni qaaqqisi gede asse laꞌꞌannosita leellishannore assino. Tenne leellishate annu jila  jile, gaabbe qaera higino beettisira seesallitte uddano uddisiinsanni gede assino.

9. Ayyaanaamittetenni qiiddinori Yihowawa higganno gede kaaꞌlate hiikkuri akatta hasiissannonke? (“ Yihowawa Higa Hasidhannore Kaaꞌla Dandiineemmo Gara” yitanno saaxine lai.)

⁹ Yihowa lawishshu giddo kulli anni gedeeho. Isi ayyaanaamittetenni qiiddino roduuwanke baxannonsa; hattono isiwa higgara hasiꞌranno. Ninkeno Yihowa lawishsha harunsine isiwa higganno gede kaaꞌla dandiineemmo. Hatto assate cincineemmore, mararreemmorenna banxeemmore ikka hasiissannonke. Kuri akatta leellisha hasiissannonkehu mayiraati? Hatto assa dandiineemmohu hiittoonniiti?

10. Mittu manchi ayyaanaamittetenni jawaatanno gede kaaꞌlate cincineemmore ikka hasiissannonkehu mayiraati?

¹⁰ Mittu manchi ayyaanaamittetenni hurate yanna hasiissanno daafira cincineemmore ikka hasiissannonke. Alba ayyaanaamittetenni qiiddinori giddo mitu songonniwa higginohu cimeeyyenna wolu roduuwi agurtukkinni kaaꞌlitinonsa daafira ikkinota coyidhino. Iisiyaho heedhannoti Naansi yinanni rodoo togo yitino: “Songote giddo nooti mitte lubbote jaalaꞌya baasa kaaꞌlitinoe. Ise maaꞌne rodooꞌya gede assite baxxannoe. Ise alba mitteenni sayinsoommota dancha yanna qaagiissitinoe. Giddoꞌyata hasaapheemma woyite cincite macciishshitannoe; hattono ane amaalate hobbi ruxxi diyitanno. Ise anera lubbote jaala ikkitinoe; hattono woꞌmanka woyite dodde iillitannoe.”

11. Hiiqqamino wodana sissate mararreemmore ikka hasiissannonkehu mayiraati?

¹¹ Miicantino lekka buurunni cuukkiniro hurtannonte gede, mararrono hiiqqamino  wodana sissitara dandiitanno. Mitu ayyaanaamittetenni qiiddino roduuwi, songote giddo mittu rodii assinorinni lowo diro xissiisidhe keeshshitino. Tini xisso, Yihowawa higgannokki gede ataawe ikkitinonsa. Insa giddo mitu, miincoonninke yite heddara dandiitanno. Konnira, insa hasaaphitanna macciishshannonsahanna mararannonsaha hasidhara dandiitanno. (Yai. 1:19) Maariya yinanniti alba ayyaanaamittetenni badhera higgino rodoo togo yitino: “Hasaaphanna macciishshannoeha, sheshifachishannoeha, kaaꞌlannoehanna amalaannoeha hasiꞌroomma.”

12. Yihowa baxilli ayyaanaamittetenni qiiddinori isiwa higganno gede assannohu hiittoonniitiro lawishshunni kuli.

¹² Qullaawu Maxaafi Yihowa baxillisinni isiwa gamba assannonketa kulanno. Isi hatto assannohu hiittoonniiti? Hanni qile balera uwootto yine hendo. Bale qile ikkitino daafira, umikkinni fula didandaatto. Tenne waajjishshanno balenni fula dandaattohu, mittu manchi siiwo tuge sununni asse goshooshe fushshihero callaati. Yihowa isiwiinni ballekkino Israeele, “Lowo baxillinni, anewa gamba assoommonsa” yiino. (Hos. 11:4) Yannankerano Yihowa isira soqqama agurtinorenna qarrunna yaaddo jajjarsitinonsare hatto yaanni no. Isi, baxannonsatanna isiwa higgara halchannota affara hasiꞌranno. Yihowa ate kaxxe insa baxannonsata leellishara dandaanno.

13. Pabilo woꞌnaalshi baxillinke wolootu Yihowawa higganno gede kaaꞌlannota leellishannohu hiittoonniiti?

¹³ Ayyaanaamittetenni qiiddinore Yihowano ninkeno banxeemmonsata affanno gede assa hasiissannonke. Sai birxichira kulloonnihu 30 diro woꞌma ayyaanaamittetenni qiide  kae higinohu Pabilo yinanni rodii togo yiino: “Mitte soodo, mininni fulanni heeꞌre, mitte shaqqado jawa rodoonni xaadummo; ise shaqqillunni hasaawissinoe. Hakkiinni qaaqqu gede wiꞌlummo. Ise anewa soyinohu Yihowa ikkinota kulummose. Yihowawa higate murciꞌroommohu hattee saateraati.”

14. Luqaasi 15:4, 5 noo lawishshi garinni allaalaanchu geꞌrechosi afiꞌrihu gedensaanni maa assino?

¹⁴ Ayyaanaamittetenni qiiddinore ceeꞌminummokki kaaꞌla hasiissannonke. Yesuusi lawishshunni kulinohu ballehino beetti gede, insarano boosaallu boono ikkinonsaha ikkara dandaanno. Qoleno Sheexaanu alame assidhinonsa farritto, ayyaanaamittensa albinni roore gawajjitinoha ikkara dandaanno. Konnira, Yihowara noonsa ammana wirro kaajjishidhanno gede kaaꞌla hasiissannonke. Baꞌino geꞌrecho daafira kulanno lawishshira, Yesuusi allaalaanchu baꞌino geꞌrecho qotisira duqqe hoshshanniwa qolino gara xawisino. Allaalaanchu baꞌino geꞌrecho hase afate lowo yannanna wolqa gudino. Ikkollana, geꞌrecho lekkatenni hoshshanniwa higate wolqa hoogginota huwatino daafira qoteho duqqe massino.—Luqaasi 15:4, 5 nabbawi.

15. Yihowawa higa hasidhannore irkisa dandiineemmohu hiittoonniiti? (“ Kaajja Uduunnicho” yitanno saaxine lai.)

¹⁵ Ayyaanaamittetenni qiiddinori Yihowawa higgannokki gede ataawe ikkinonsare qeeltanno gede kaaꞌlate, lowo yannanna wolqa hasiissannonkeha ikkara dandaanno. Ikkollana Yihowa ayyaani kaaꞌlonni, hattono Qaalesinna dirijjitesi qixxeessitino borro horoonsiꞌne, ayyaanaamittetenni qiiddinori wirro jawaattanno gede kaaꞌla dandiineemmo. (Rom. 15:1) Ikkina tenne assa dandiineemmohu hiittoonniiti?  Mittu worbu cimeessi togo yiino: “Batinyu ayyaanaamittetenni qiiddinori, Yihowawa higate murcidhuro, Qullaawa Maxaafa xiinxalla hasiissannonsa. Qullaawa Maxaafa xiinxallisannosi halashshaanchi, ayyaanaamittetenni qiidinohu jaalu gede giddosita ruxxi yiikkinni hasaaphannoha ikka hasiissannosi.” c Konnira ayyaanaamittetenni qiidino rodoo Qullaawa Maxaafa xiinxallisi yinihero, hagiirrunni xiinxallisi ballo.

16. Ayyaanaamittetenni qiiddinore hanseemmo woyite sokkaasine kaaꞌlitannonketa mayinni anfeemmo?

¹⁶ Sokkaasine Yihowawa higa hasidhannore afate hanseemmo woyite kaaꞌlitannonketa addi addi woꞌnaalshi leellishanno. (Aju. 14:6) Ikuwadoorete gobbara heeꞌrannohu Silviyo yinanni rodii, Yihowawa higate wodaninni huucciꞌrino. Mitto barra isi huuccatto assiꞌranni heeꞌreenna, lame cimeeyye kaꞌe daggu. Hatte yannara, insa iso hagiirrunni kaaꞌla hanaffino.

17. Ayyaanaamittetenni shoshshoggitinore kaaꞌlinummoro mayi atoote afiꞌneemmo?

¹⁷ Ayyaanaamittetenni qiiddinori Yihowawa higganno gede kaaꞌlineemmo woyite hagiirrinke baete. Togoo roduuwa kaaꞌlate laalaatannohu Salvaadoori yinanni suwisaanchi togo yiino: “Hagiirrunni kainohunni hindiiddo qalxitannoe woyiti no. Yihowa muxxe geꞌrechosi Sheexaanu alamenni gatisinotanna anino tennera kaaꞌlamoommota hedeemmo woyite tashshi yaannoe.”—Soq. 20:35.

18. Yihowa manni ledo gamba yaa aguroottoha ikkiro, maa addaxxa dandaatto?

¹⁸ Yihowa manni ledo gamba yaa aguroottoha ikkiro, xaano Yihowa baxannoheta huluullantooti. Maganu isiwa higattora hasiꞌranno. Atino isiwa higate, sharrama hasiissannohe. Yesuusi lawishshu giddo kuli anni gede, Yihowano higatto yee raga laꞌꞌannilla no; qoleno higittoro hagiidhanni anga fane adhannohe.