1. Magano waajjate yaa mayyaate? Magano baxxannori iso waajja hasiissannonsahu mayiraati?

KIRISTAANU Magano baxanno, hattono iso waajjanno. Mitu manni Magano waajjinanni heeˈne iso baxa hiitto ikkine dandiinanni yee hedara dandaanno. Ikkollana konni birxichira hasaambeemmo waajja, waanke waajjinannita diˈˈikkitino. Hatteentenni baxxitino waajjare ronseemmo. Magano baxillunni waajjanno manni iso lubbora ayirrisanno. Insa Maganu ledo noonsa jaaloomi baˈˈara hasidhannokki daafira, iso dadillissannokki gede qorophitanno.—Far. 111:10; Law. 8:13.

2. Moote Daawiti Faarso 86:11 coyiˈrino garinni, hiikkonne lame coye xiinxallineemmo?

² Faarso 86:11 (NW) nabbawi. * Konni qummeeshshira Moote Daawiti coyiˈrinore hendeemmo woyite, isi Magano waajja lowo geeshsha hasiissannota ikkitinota huwatinota wodanchineemmo. Hanni Daawiti qullaawu ayyaaninni coyiˈrinore loosu aana hosiisa dandiineemmo gara laˈno. Umihunni, Maganu suˈma lubbora ayirrinseemmo gede assannonkeri maatiro ronseemmo. Layinkihunni, barru baala Maganu suˈma ayirrinseemmota leellisha dandiineemmo gara xiinxallineemmo.

3. Muse Maganu suˈma lubbora ayirrisanno gede hiitti ikkito kaaˈlitinosiha ikkara dandaanno?

³ Hanni Muse Korebi Ilaalira heeˈreenna Yihowa ayirrinyi albasiinni saˈˈanna lai woyite hiitto ikkinoro hendo. Qullaawa  Borro Seekke Huwata yaanno maxaafi tenne daafira kulanni, “Tini Yesuusi Kiristoosi uullara daara albaanni mannu ooso laˈino coyi baalunkunni roore maalaˈlissannota ikkitukkinni digattino” yaanno. Hakkiinni Muse togo yitanno huuro macciishshino: “Ani Kaaliiqi [“Yihowa,” NW] maareemmohonna hanqoho muddameemmokkiho; mararaancho Maganooti; ammanamaˈyanna bagamannokkihu baxilliˈya batiˈraho. Bagamannokkihu baxilliˈya kumunni kiirranni ilamara iillanno; sao, sarxonna cubbo agureemmo.” Hattee yannara Muse hasaawisinohu sokkaasincho ikkikki digatino. (Ful. 33:17-23; 34:5-7) Muse Yihowa suˈma gananno woyite hatti qulli yitannosiha ikkara dandaanno. Gedensoonni Muse Maganu manna Israeele, “dhaggennihanna waajjishannoha Maganiˈne Kaaliiqi suˈma [ayirrisse]” yee qorowisiisasi garankolla.—Mar. 28:58.

4. Albinni roore Yihowa ayirrisate hiikkuri akattasi hiinca kaaˈlitankera dandiitanno?

⁴ Yihowa suˈma ganneemmo woyite isi hiittoo Maganootirono heda hasiissannonke. Qoleno, akattasi lawishshaho wolqasi, hayyosi, taashshosinna baxillesi qaagate sharrammeemmo. Kurinna wole akattasi hiincanke iso lubbora ayirrinseemmo gede assitankera dandiitanno.—Far. 77:11-15.

5-6. (a) Maganu suˈmi mayi tiro afiˈrino? (b) Fulo 3:13, 14​nna Isayaasi 64:8 kultanno garinni, Yihowa hedinori woˈmanno gede assannohu hiittoonniiti?

⁵ Maganu suˈmi mayi tiro afiˈrino? Lowo egennaammi Yihowa suˈmi “Ikkanno Gede Assanno” yitanno tiro afiˈrinoha ikkikki digatino yite ammantanno. Tini Yihowa assate hedinore wonshannota hoolannosiri nookkita qaangeemmo gede assitannonke. Hatto yineemmohu mayiraati?

⁶ Yihowa hedinore wonshate ikka hasiissannosire baala ikkanno. (Fulo 3:13, 14 nabbawi.) Borronkera duucha hinge tenne dhagge ikkitannota Maganu ayimma hiincineemmo gede jawaachinshoonninke. Yihowa guuntete xeˈne noonsa soqqamaanosino isira soqqamatenna hedinore wonshate ikka hasiissannonsare ikkitanno gede assannonsa. (Isayaasi 64:8  nabbawi.) Konni garinni Yihowa fajjosi woˈmitanno gede assanno. Isi mitturino hoolisikkinni hedinori woˈmanno gede assa dandaanno.—Isa. 46:10, 11.

7. Iimi Annanke albinni roore ayirrisate mayi kaaˈlankera dandaanno?

⁷ Iimi Anninke assinorenna ninkeno assineemmo gede kaaˈlinonkere hiincineemmoha ikkiro, isira noonke ayirrinyi lexxanno. Lawishshaho, dhagge ikkannoha Yihowa kalaqo hiincineemmo woyite, isi assinorinna kalaqinori lowo geeshsha maalale ikkannonke. (Far. 8:3, 4) Qoleno Maganu fajjosi wonshineemmo gede kaaˈlinonke gara hendeemmo woyite, iso albinni roore ayirrinseemmo. Addanko, Yihowa suˈmi maalalete! Kuni suˈmi, Anninke ayimma, isi konni albaanni assino coyenna konni kaˈa assannore baala xaphi asse amadinoho.—Far. 89:7, 8.

8. Marro 32:2, 3 kultanno garinni, Yihowa soqqamaasinesi suˈmasi maa assitara hasiˈranno?

⁸ Israeele Hexxote Gobba eˈara kaˈe heedheenna, Yihowa Musera faarso rosiisinosi. (Mar. 31:19) Museno tenne faarso dagate rosiisino. Marro 32:2, 3 noo hedo hiincineemmo woyite, mitu manni yaannohu gede, Yihowa suˈmisi qullaawaho yine ballinshara hasiˈrannokkita huwanteemmo. (Qummeeshsha nabbawi.) Isi, hedate dandoo noonsa kalaqami baalu suˈmasi afara hasiˈranno. Muse Yihowarenna ayirradu suˈmisire rosiisanna macciishsha Israeelete dagara lowo ayirrinyeeti! Muˈro latisanno shori gede, Muse rosiisinonsari wolqanna jawaante ikkinonsa. Ninkeno rosiinseemmo woyite Muse lawishsha harunsa dandiineemmohu hiittoonniiti?

9. Yihowa suˈmi qullaawanno gede kaaˈla dandiineemmohu hiittoonniiti?

⁹ Minunni mine haˈne woy gudumaaleho sabbankeemmo woyite, mannaho Yihowa suˈma kulate Qullaawa Maxaafa horoonsiˈra dandiineemmo. Qoleno Yihowa ayirranno gede assitanno borro, viidiyo woy webisayitenkera fulinore horoonsiˈra dandiineemmo. Loonseemmowa, rosu mine woy doogo haˈneemmo woyite, baxillaanchu Maganinkere mannaho kulleemmo faro hasiˈneemmo. Yihowa mannahonna uullate assannoha dhagge ikkanno coye kulleemmonsa woyite, insa mite yite Yihowa mannu ooso mageeshshi geeshsha baxannoro huwattara dandiitanno. Wolootaho baxillaanchu Anninke daafira halaale rosiinseemmo woyite, Maganu suˈmi qullaawanno gede kaaˈlinanni heeˈnoommo. Qoleno Yihowa daafira rossinoha kaphu roso agurtanno gede kaaˈlinammonsara dandiineemmo. Mannaho Qullaawu Maxaafinni rosiinseemmori, baalunkunni roore kiannonsareeti.—Isa. 65:13, 14.

10. Qullaawa Maxaafa xiinxallinseemmo woyite, Maganu seeranna biddishsha calla rosiinse agura hasiissannonkekkihu mayiraati?

¹⁰ Qullaawa Maxaafa xiinxallinseemmo woyite, rosaanonke Yihowa suˈma affannonna horoonsidhanno gede kaaˈla hasiˈneemmo. Qoleno iso seekkite affanno gede kaaˈlineemmonsa. Ikkina Maganu seeranna biddishsha calla rosiinse iso seekkite affanno gede assine anfeemmo? Worbu rosaanchi Maganu seera afara, wole agurina ayirrisara nafa dandaanno. Ikkollana isi hatto assino daafira calla Yihowa xawe leelleennasi isira baxillunni hajajamanno? Heewani Maganu seera affinoha ikkirono, konne seera uyino Magano godowinta dibaxxanno; Addaamino ise gedeenkolla. (Kal. 3:1-6) Konnira wolootaho Maganunniha keeraancho seeranna biddishsha rosiinse calla agura dihasiissannonke.

11. Qullaawa Maxaafa xiinxallinseemmo woyite rosaanonke Maganu seera calla ikkikkinni isono baxxanno gede kaaˈla dandiineemmohu hiittoonniiti?

¹¹ Yihowa biddishshinna seeri baxisannohonna kaaˈlannonkeho. (Far. 119:97, 111, 112)  Qullaawu Maxaafi rosaanonke, Yihowa konne seera uyinonkehu baxannonkehura ikkinota huwata hoogguro, tini leella hooggansara dandiitanno. Konnira rosaanonke togo yine xaˈma hasiissannonke: “Maganu soqqamaanosi konne asse konne assitinoonte yaannohu mayira lawannohe? Tini isi daafira maa huwanteemmo gede kaaˈlitannonke?” Qullaawu Maxaafi rosaanonke Yihoware hiincitannonna ayirrado suˈmasi baxxanno gede kaaˈlineemmonsaha ikkiro, isi xawe leellannonsa. Hatto assineemmoha ikkiro, insa Maganu seera calla ikkikkinni isono baxxanno. (Far. 119:68) Tini ammanansa kaajjitanno gedenna buutote qarri iillannonsa woyite dandiite saˈanno gede kaaˈlitannonsa.—1 Qor. 3:12-15.

12. Mitte yannara Daawiti wodani beehaminohu hiittoonniiti? Tini mayi qarra abbitino?

¹² Faarso 86:11te, “wodanaˈya mitto assie” yitannoti kaajja yaatto no. Tenne yaatto qullaawu ayyaaninni borreessinohu Moote Daawitiiti. Isi qoropha hoongiro wodanu shiimurinni beehamara dandaannota iillinosirinni huwatino. Mitto barra Daawiti sagannatete heeˈre wolu manchi galte biso hayishshidhanna laino. Hakka woyite Daawiti wodani beehaminonso dibeehamino? Isi ‘Wolu manchi galte yortooti’ yaannoha Yihowa seera afino. (Ful. 20:17) Daawiti hatte mancho lae agura giwinoha ikkara dandaanno. Isi Bersaabehi ledo foore yortosi wonshiˈratenna Yihowa hagiirsiisate giddo mitte doodha hasiissinosi. Daawiti lowo diro Yihowa baxanninna waajjanni heeˈrinoha ikkirono, busha yortonni qeelamino. Konninni kainohunni isi lowo bunshe assino. Daawiti Yihowa suˈma mishiishino. Qoleno isi beebbaataamu mannira wole agurina maatesira nafa buutote qarra abbino.—2 Sam. 11:1-5, 14-17; 12:7-12.

13. Daawiti wodani wirro mitto ikkinota mayinni anfeemmo?

¹³ Yihowa Daawiti qorichishino; Daawitino Yihowa ledo noosi jaalooma haaroonsiˈrino. (2 Sam. 12:13; Far. 51:2-4, 17) Daawiti wodanisi beehamara wodhe agurasi abbitinoha buutote qarranna shetto qaagino. Isi Faarso 86:11te borreessinore, “Beehaminokki wodana uyie” yineno tira dandiinanni. Yihowa Daawiti wodanasi mitto assiˈranno gede kaaˈlinosi? Ee kaaˈlinosi. Korkaatuno gedensoonni Maganu Qaali giddo Daawiti Yihowara “coˈo yiino wodaninni” soqqaminota kulloonni.—1 Mot. 11:4; 15:3.

14. Ninkeneeto mayine xaˈma hasiissannonke? Mayira?

¹⁴ Daawiti lawishshi jawaantenna seejjo ikkannonke. Daawiti shota ikkinokki cubbo loosasi, xaa yannara noote Maganu  soqqamaanora qorowishshaho. Yihowara soqqammoommo diri ikki geeshshihano ikkiro, ‘Sheexaanu wodanaˈya beehannokki gede gargadhanni noommo?’ yine umonke xaˈma hasiissannonke.

15. Gara ikkitinokki misile tuncu yitannonke woyite Magano waajja agarooshshe ikkitannonkehu hiittoonniiti?

¹⁵ Lawishshaho, televizhiinete woy interneetete aana gariweelo misile dagguro maa assatto? Tini teeda baˈino misile woy mancaˈˈare leellishshanno filme diˈˈikkitino yite hedattoha ikkara dandaanno. Kayinni kuni Sheexaanu wodanakki beehate horoonsiˈranni noorella ikka? (2 Qor. 2:11) Tini misile mittu manchi xarra dadhate horoonsiˈrannohu shiimu bili gedeeti. Isi balaxe bila afooho woranno. Hakkiinni meenchunni gananno woyite bilu giddo hige eˈˈe daranno. Televizhiinete woy interneetete leellinshanniti gariweelo misile, hakkonni shiimu bili gede ikkitara dandiitanno. Umi qara hakkeeshsha gawajjannoha lawannokkiri, gedensoonni Yihowa baddallanni gede assara dandaanno. Konnira bushu coyi wodanikki giddora eannokki gede feexidhe giwi! Yihowa suˈma waajjate woˈmanka woyite wodanakki mitto assiˈri!

16. Fonqolu tuncu yaannonke woyite ninkeneeto hiikkuri xaˈmuwa xaˈma hasiissannonke?

¹⁶ Sheexaanu ninke busha coye assineemmo gede fonqolate gara ikkitinokki misilla calla ikkikkinni wole batinyere horoonsiˈranno. Ikkina togoo woyite maa assineemmo? Hakkeeshsha bushare diˈˈikkinoreeti yine hendeemmoha ikkara dandaanno. Lawishshaho, ‘Kuni songotenni bohameemmo gede assannore ikkinokki daafira, lowo cubbo diˈˈikkino’ yine hedeemmoha ikkara dandaanno. Hatto yee heda, lowo soˈrooti. Umonke togo yine xaˈma hasiisannonke: ‘Sheexaanu konne fonqolo horoonsiˈre wodanaˈya beehate woˈnaalanni noo ikka? Busha yortora qeelamummoro Yihowa suˈma dimishiisheemmo? Kuni assooti  Maganiˈyawa shiqeemmo gede assannoenso isiwiinni xeertiˈreemmo gede assannoeho?’ Kuri xaˈmuwa hiinci. Kuri xaˈmuwara ateneeto dogittokki dawaro qola dandaatto gede hayyo afiˈrate huucciˈri. (Yai. 1:5) Hatto assakki agarooshshe afiˈratto gede kaaˈlitannohe. Qoleno Yesuusi gede iillannonke fonqolo qeele saˈˈate kaaˈlitannonke; isi ‘Sheexaane anewiinni fafi!’ yiino.—Mat. 4:10.

17. Beehamino wodani dancha diˈˈikkino yineemmohu mayiraati? Lawishsha kuli.

¹⁷ Beehamino wodani dancha diˈˈikkino. Hanni mimmitu ledo sumuu yitannokkita mitte kaasete gaamo hendo. Mitootu uminsara calla maccare ikka hasidhannoreeti; mitu kayinni seeru garinni godoˈla dihasidhannoreeti; wolootu qajeelsannonsaha diayirrissannoreeti. Togoo gaamo duucha woyite qeela hooggara dandiitanno. Mittimma noonsa gaamo kayinni duucha woyite qeeltara dandiitanno. Wodanikki qeeltanno gaamo gede mitto ikkara dandaannohu hedokki, halchokkinna hasattokki mitte assidhe Yihowara soqqamattoha ikkirooti. Sheexaanu wodanikki beehamiro hagiidhannota deˈooti. Isi hedokki, yortokkinna hasattokki Maganu seeri ledo sumuu yitannokkita ikkitara hasiˈranno. Ati kayinni Yihowara soqqamate wodanakki mitto assiˈra hasiissannohe. (Mat. 22:36-38) Sheexaanu wodanakki beehara horo wodhitooti!

18. Mikiyaasi 4:5 kultanno garinni maa assate murciˈrootto?

¹⁸ Atino Daawiti gede “suˈmakki waajjeemmo gede wodanaˈya mitto assie” yite Yihowa huucciˈri. Huuccattokki ledo sumuu yaannore assate sharrami. Barru baala assattorinni shiimurinnino ikko loworinni Yihowaha qullaawa suˈma ayirrisattota leellishate murciˈri. Yihowa Farciˈraasincho ikkootto daafira hatto assittoro Yihowa suˈma ayirrisattota leellishatto. (Law. 27:11) Ninke baalunku Mikiyaasi gede “hegere geeshsha Kaaliiqa Maganonke magansiˈneemmo” yineemmo.—Mik. 4:5.