NINKE baalunku, heeˈnoommohu konni “goofimarchu barra” Yihowa mannasi massaganninna ayyaanaamittetenni towaatanni noota ammanneemmo. (2 Xim. 3:1) Ikkollana, ninke mittu mittunku Yihowara hajajammeemmoronna teˈee doodha dandiineemmo. Ninke heeshsho, hunda halalla heedhino Israeele gedeeti. Insa xurumbu huuro macciishshitanno woyite fula hasiissannonsa.

Yihowa, Muse birra daashshine seekkinoonniha lame xurumba qixxeessanno gede kulinosi; kuni xurumbi ‘manna woshshe gamba assatenna kakkayisate’ kaaˈlannoho. (Kir. 10:2) Kakkalaasine mannu maa assa hasiissannonsaro kulate, xurumba babbaxxino garinni ufuuffanno. (Kir. 10:3-8) Xaa yannarano Maganu manni addi addi doogganni biddishsha afiˈranno. Hanni kuri giddo, hunda Israeelete waro ufuunfanni xurumba qaagiissitannonketa sase doogga laˈno. Xaa yannara Maganu manna jajjabbu gambooshshira koyinsanni; cimeeyyete qajeelsha uyinanni, hattono baalante songuwara uyinanni biddishsha haaroonsinanni woy biddi assinanni.

Yihowa “mannu baalunku” xaadooshshu dunkaanira soojjaatoonni noo xullicho daanno gede hasiˈriro, kakkalaasine lamenka xurumba ufuuffanno. (Kir. 10:3) Shoole gaamo ikkite xaadooshshu dunkaani qooxeessira dukkaˈnitino gaˈre baalanti, hattenne xurumbu huuro macciishshitanno. Xullichu mule dukkaˈnitinori, bayichonko daggannoha ikkara dandaanno. Fafowa noori kayinni, hakkira dagge iillate lowo yannanna wolqa hasiissannonsaha ikkara dandaanno. Yihowa, muleno ikko fafowa heeˈrannohu baalunku gamba yaaranna biddishshasi macciishshara hasiˈranno.

Xaa yannara xaadooshshu dunkaaniwa gamba yineemmokkiha ikkirono, Maganu manni ledo gamba yinammora koyinsanninke. Lawishshaho, qoqqowunna wolu baxxino gambooshshira koyinsanni woyite kaaˈlanno rosonna biddishsha afiˈneemmo. Alamete doyichora heeˈrannohu Yihowa mannira mittu gari pirogiraame shiqqanno. Konnira, koyishsha adhite daggannori baalu, Maganu manni ledo mitteenni hagiidhitanno. Insa giddo mitu xeertotenni dagganno. Ikkirono, koyishsha adhite daggannori, daansanni horo digaabbitanno.

Jajjabba gambooshshe assiˈnanni qooxeessinni xeertidhe heedhannori konni gambooshshinni horo afiˈra dandiitanno? Yannate daggino tekinooloje widoonni, xeertote heeˈrannohu batinyu manni togoo pirogiraamenni horo afiˈra dandaanno; wole agurina insa roduuwu ledo mitteenni gamba yitinoha lawannonsa. Lawishshaho, mitte yannara qara  biiro riqiwaanchi Beniini gobbata sinu biiro towaatanni heeˈreenna, tenne pirogiraame Nijeri gobbara noohu Erleeti katamira viidiyotenni sayinsoonni; kuni Sahaara Barahira nooho shiilo ummanni katamaati. Hakkiicho 21 roduuwinna hasatto noonsa manni gamba yitino. Insa heedhannohu fafowa ikkirono, konni gambooshshira gamba yiinohu 44,131 manni ledo gamba yitinoha lawinonsa. Mittu rodii togo yee borreessino: “Tenne pirogiraame sayissinoonninke daafira, lowo geeshsha galaxxineemmoˈne. Xaano ninke mageeshshi geeshsha baxxinanninkero leellishshinoonni.”

Israeelete kakkalaasine mitto xurumba calla ufuuffanno woyite, “Israeelete roorrooti callu” xaadooshshu dunkaaniwa gamba yitanno. (Kir. 10:4) Hakkiicho insara Muse biddishshanna qajeelsha aannonsa. Tini gaˈre gaˈrensa giddo, uyinoonninsa looso danchu garinni loossanno gede kaaˈlitannonsa. Ati hakkuri roorrooti wido ikkoottoro, hatte woshshatto marte biddishshanna qajeelsha afiˈrate dandaamihere baala diassatto?

Xaa yannara nooti songote cimeeyye ‘roorroota’ diˈˈikkitino; woy insa Maganu hoshshara annattannore diˈˈikkitino. (1 Phe. 5:1-3) Hatteentenni hoshsha allaalate wolqansa assitu geeshsha sharrantanno. Konnira, qajeelshaho koyinsanninsa woyite lawishshaho, Mangistete Soqqansho Rosi Minira woshshinanninsa woyite hagiirrunni maahoyye yitanno. Tenne yannara, cimeeyye songote haja danchu garinni tira dandiitanno gara qajeeltanno. Togoo qajeelshi songo woˈma ayyaanaamittetenni baasa kaaˈlanno. Ati konni rosi minira eˈe qajeeloottokkiha ikkirono, konne qajeelsha adhitino roduuwiwiinni horo afiˈra dandaatto.

Israeelete kakkalaasine mito woyite xurumba babbaxxino garinni ufuuffanno. Tini, Yihowa mannu baalu dukkaˈninowiinni kae haˈrara hasiˈrannota leellishshanno. (Kir. 10:5, 6) Mannu dukkaˈninowiinni kae haˈrannohu qinaawino garinni ikkirono, tini lowo looso afidhino. Togoo woyite mitu manni isinni lame wodana ikkara dandaanno. Mayira?

Mitootu lame wodana ikkitannohu, ‘Hedeweelcho kaˈne xaa xaa hadhe yinanninkehu mayiraati?’ yite ikkara dandaanno. “Mito mito woyite gomichu hawarronni soodo geeshsha calla keeshshanno.” Wole woyite kayinni “mitto barra woy mitto agana woy mitto diro” keeshshara dandaanno. (Kir. 9:21, 22) Israeelete daga dukkaˈnitinowiinni meˈˈe higge kaˈino? Kiiro fooliishsho 33, Israeelete dagga dukkaˈnitinoha 40 meddi yaanno bayicho kultanno.

Insa giddo mitu caalu noowa dukkaˈnitanno woyiti nooha ikkara dandaanno. ‘Waajjishshannote halallite gobbara’ hattoo bayicho afiˈra loworeeti. (Mar. 1:19) Konnira, wolewa kaˈne haˈnummoro injonke hoongeemmo yite heddara dandiitanno.

Insa kaˈe haˈra hanaffanno woyite, mitootaho taransa agadha qarra ikkitansara dandiitanno. Baalunku addi addi garinni ufuunfannita xurumbu huuro macciishshitannoha ikkirono, woˈmanti gaˈre mitte yannara kaˈe dihadhanno. Addi addi garinni xurumba ufuunfanni woyite, umo soojjaatoonni dukkaˈnitinori yaano, Yihudu, Yisakoorinna Zaabilooni gaˈre kaˈe hadhanno. (Kir. 2:3-7; 10:5, 6) Insa kaˈe hadhuhu gedensaanni, kakkalaasine layinkimeeshsho addi addi garinni xurumba ufuuffanno woyite, wodiidoonni dukkaˈnitinori sase gaˈre mitteenni kaˈe hadhanno. Baalanti gaˈre hadhe kaˈa geeshsha kakkalaasine xurumba konni garinni ufuuffanno.

Dirijjitete giddo mito coye biddi assinanni woyite, tenne adha qarrissahera dandiitanno. Mayira? Hedeweelcho biddi assinanniri batiˈrino yite hedattoha ikkara dandaanno. Woy mitu coyi injiinohe daafira, mayi tenne gedeennilla heeˈra yite hedattoha ikkara dandaanno. Togoo yannara cincanna haarote biddi assinoonnire rosa qarra ikkitinoheha ikkara dandaanno. Ikkollana, maahoyye yaa hasiissannonketa huwante hajajamate sharrammummoro, Maganu maassiˈrannonke gara laˈnammora dandiineemmo.

Muse waro, Yihowa miliyoonetenni kiirranni labballo, meentonna qaaqquulle halalla massagino. Yihowa massaganna towaata hoogoommensaro insa digattanno. Ninkeno xaa yannara Yihowa biddishsha harunsinummoro ayyaanaamittete gawajjonni ganteemmo. Hattono ayyaanaamittetenni lante heeˈneemmo! Konnira hunda ammanantino Israeele xurumba addi addi garinni ufuunffanni woyite macciishshite fultannonte gede, ninkeno Yihowara hajajamate murciˈno!