HUNDINNI kayise Israeelete daga halaalu magansiˈrara kaaˈlate fushsho fushshitanno. Yesuusi yannara kayi addi addi giwiri lexxe Yihudu mannira duha ikkinonsa.

Maganu mini giddo loonsanni looso kaaˈlinanni doogga giddo mitte, diraakima yinannita lame saante fushshineeti; lemoo dironna hakkuyi ale ikkannonsahu Yihudu manni baalu tenne saante fushshanno. Umi xibbi diro konne giwire Heeroodisi mininohu qullaawu mini giddo loonsanni loosiranna shiqinshanni kakkalora horoonsiˈnoonni. Mitu Yihudu mannooti Yesuusi konne giwire baatate daafira mayyaannoro afate Pheexiroosi xaˈmitino; Yesuusi konne giwire baata dihasiissanno diyiino. Isinni konne giwire baatate Pheexiroosi saante afiˈranno gara kulinosi.—Mat. 17:24-27.

Hunda Maganu manni asaraateno aanno; asaraateho yaa laalchinsa woy loosiˈre afiˈranno woxi giddonni tonnunni mittoho. (Lew. 27:30-32; Kir. 18:26-28) Ammaˈnote murrooti mannu afiˈrino coyi baalunkunni asaraate aanno gede giddeessitanno; wole agurina, “afuduudunniha, sunkurtunnihanna qimamenniha tonnunni mitto” aanno gede giddeessitanno. Yesuusi asaraate fushsha soˈrote yiinokkiha ikkirono, borreessaanonna Farisootu asaraate fushshate daafira kulanno seera wirte manna waaddino daafira insa boroorino.—Mat. 23:23.

Qoleno hatte yannara gashshe noohu Roomu gashshooti mannu addi addi giwire baatanno gede assino. Konni giwiri giddo mittu uullate giwireeti; mannu konne giwire baatate woxe woy laalcho aara dandaanno. Baattonsa laashshitinori giddonni 20 kayise 25 anga geeshsha ikkannoha aanno yine hendanni. Qoleno mittu mittunku Yihudu manchi baatanno giwiri no. Farisootu Yesuusa xaˈmitinohu konni giwiri daafiraati. Isi giwire baatate daafira hiittoo lao heedhannonke gede assiˈra hasiissannonkero coyiˈranni “Qeesaariha Qeesaarira, Maganunniha Maganoho uuyye!” yiino.—Mat. 22:15-22.

Qoleno gobbayidinni eessinanni uduunniranna wolewa haaˈne haaˈnanni uduunnira qaranxanni qaraxi no. Konne qaraxo qaranxannihu, malkate, buusu noowa, doogga xaaddannowa, woy katammanna dikko eˈnanniwaati.

Roomu gashshooti giddo heeˈranno mannira baatanno giwiri lowo duha ikkinonsa. Roomunnihu xaggete borreessaanchi Taasitesi coyiˈrino garinni, Yesuusi uullate aana noo yannara Gashshaanchu Xiberiyoosi waro “Sooriyunna Yihudu manni duhu batiˈrinonsa daafira, giwire ajinshanninsa gede huucciˈrino.”

Konne giwire gamba assinanni garino, giwire baata roore duha ikkitanno gede assino. Giwire gamba assanno manna doorrannihu caratunniiti. Carata qeeltinori giwire gamba assanno manna qaxadhitanno; insano qaxadhitu mannino lowo woxe afiˈra hasiˈranno daafira, mannaho giwire ledde baatisiissanno. Zakkiwoosino qaraxo gamba assitannore qaxadhinoha ikkikki digatino. (Luq. 19:1, 2) Mannu tennera lowo geya giiramanno; hattono qaraxo gamba assitannore dibaxanno.