1. Umi xibbi diro Yerusaalamete gamba yiino manni maa assanno gede kulloonninsa?

BATINYE gobbanni dayinohu addi addi afoo coyiˈrannohu lowo manni, Yerusaalamete katamira gamba yee no. Hakko barra hambannikki coyi ikkino. Mitu Yihudu manni hedeweelcho hakko manni coyiˈrannoha addi addi afoo coyiˈra hanafi! Gamba yiino manni tenne lae dhagge assiˈri; Yihudu manni yiinonsarinna soqqamaasinchu Pheexiroosi baalunkura kulinonsari kayi roore dhagge ikkinonsa. Hakko gamba yiino mannira Yesuusi Kiristoosa ammaniro gatara dandaannotano kulloonninsa. Mannu macciishshino sokka wodanaho coˈinonsa. Kuni manni lowo geya dhagge assiˈrino daafira, “Xa ma assino?” yee xaˈmino. Hakkiinni Pheexiroosi, “Mitti mittiˈne . . . cuuamme” yee qolinonsa.—Soq. 2:37, 38.

2. Konni birxichira maa xiinxallineemmo? (Aaniidi qoolira noo misile lai.)

² Hakkiinni mittu maalaˈlisanno coyi ikkino. Hakko barra 3,000 meddi yaanno manni cuuame Kiristoosi rosaano ikkino. Yesuusi, harunsaanosi manna rosaano assitanno gede uyinonsahu lowo loosi konni garinni hanafino. Konne looso yannanke geeshsha loonsanni heeˈnoonni. Xaa yannara kayinni mittu manchi boode saate giddo cuuamanno gede kaaˈla didandiineemmo. Mittu Qullaawu Maxaafi rosaanchi cuuamate lowo agani woy mittu diri woy hakkuyi ale ikkitanno yanna hasiissannosiha ikkara dandaanno. Xa Qullaawa Maxaafa xiinxallisatto manchi nooha ikkiro, manna rosaano assa lowo looso ikkitinota huwatittokki digatootto. Konni birxichira, Qullaawu Maxaafi rosaanchikki cuuamanno gede kaaˈlate maa assa dandaattoro xiinxallineemmo.

3. Maatewoosi 28:19, 20 kultanno garinni, Qullaawu Maxaafi rosaanchi cuuamate maa assa hasiissannosi?

³ Mittu Qullaawu Maxaafi rosaanchi cuuamara albaanni Qullaawu Maxaafi roso loosu aana hosiisa hasiissannosi. (Maatewoosi 28:19, 20 nabbawi.) Isi rosinore loosu aana hosiisannoha ikkiro, Yesuusi coyiˈrino lawishshira kulloonniha seekke ume minesi kinchu aana miˈninoha “egennaamo mancho” lawanno. (Mat. 7:24, 25; Luq. 6:47, 48) Qullaawu Maxaafi rosaanchi rosinore loosu aana hosiisanno gede kaaˈla dandiineemmohu hiittoonniiti? Hanni tennera kaaˈlitannonketa sase hedo laˈno.

4. Qullaawu Maxaafi rosaanchinke cuuamate deerra iillate sharramanno gede kaaˈla dandiineemmohu hiittoonniiti? (“ Rosaanchiˈne Mixo Fushshiˈrannonna Mixosi Wonshiˈranno Gede Kaaˈlesi” yitanno saaxineno lai.)

⁴ Rosaanchikki mixo fushshiˈranno gede kaaˈlisi. Hatto assa hasiissannohehu mayiraati? Hanni mitto lawishsha laˈno: Seeda doogo hadhanni heedhe doogote laˈˈate baxisannore lawishshaho ilaalanna fooncho afittoro taxxi yite daaˈˈatattoha ikkara dandaanno. Hatto assittoro hadhanni noottowa hedittokki iillatto. Hatteente gede Qullaawu Maxaafi rosaanchi shiima yanna giddo wonshiˈra dandaanno mixo fushshiˈrasi, cuuamate fushshiˈrino mixono wonshiˈra dandaannota huwatanno gede kaaˈlitannosi. Rosaanchikki mixo fushshiˈranno gede kaaˈlate, Hegerera Hagiidhitanni Heeˈra Dandaatto! yaanno maxaafira nooha “Mixokki” yaanno gafa horoonsiˈri. Mitto mittonka roso xiinxallitine guddini kiiro, “Mixokki” yaanno gafi hunda noo hedo, rosaanchu rosinore loosu aana hosiisate kaaˈlitannosi gara hasaabbe. Rosaanchikki wonshiˈrara hedoottoti wole mixo nooha ikkiro, “Wolere” yaannohu hunda borreessi. Rosaanchikki harancho yanna giddono ikko seeda yanna giddo wonshiˈra dandaanno mixo daafira isi ledo hasaawate konne gafa ganyite horoonsiˈri.

5. Maarqoosi 10:17-22 kultanno garinni, Yesuusi dureessu manchi maa assanno gede kulinosi? Mayira?

 ⁵ Qullaawu Maxaafi rosaanchikki heeshshosi gara biddi assiˈranno gede kaaˈlisi. (Maarqoosi 10:17-22 nabbawi.) Yesuusi, dureessu manchira afiˈrinore baala hira shota ikkitannosikkita afino. (Maq. 10:23) Ikkirono Yesuusi kuni manchi afiˈrinore baala hiranno gede kulinosi. Isi hatto yiinosihu baxinosi daafiraati. Mito woyite Qullaawu Maxaafi rosaanchinke konne coye biddi assiˈrate diqixxaawino yine hendeemmo daafira, rosanni noore loosu aana hosiisanno gede jawaachishate hobbi ruxxi yineemmoha ikkara dandaanno. Mannaho akkala mannimma fushshe hooˈle haaro mannimma uddiˈrate lowo yanna hasiissansara dandiitanno. (Qol. 3:9, 10) Kayinni Qullaawu Maxaafi rosaanchiˈne biddi assiˈra hasiissannosire bayichonko fantine hasaabbinanniha ikkiro, isino mulenni biddi assiˈrara dandaanno. Konni garinni hasaabbinanniha ikkiro, baxxinannisita leellishshinanni.—Far. 141:5; Law. 27:17.

6. Rosaanchu giddosita fushshe coyiˈranno gede assitanno xaˈmo xaˈma hasiissannonkehu mayiraati?

⁶ Rosaanchoho mitte hajo daafira mayi macciishshamannosiro afate, giddosita fushshe coyiˈranno gede assitanno xaˈmo xaˈma dandiineemmo. Togoo xaˈmo rosaanchikki rosinore huwatinoronna mayyee ammanannoro afate kaaˈlitannohe. Ganyitine konni garinni hasaabbinanniha ikkiro, albillitte shota ikkitinokki hajo kayissine hasaawa diqarrissannoˈne. Hegerera Hagiidhitanni Heeˈra Dandaatto! yaanno maxaafira togooti duucha xaˈmo no. Lawishshaho roso 4te, “Suˈmasi woshshatto woyite Yihowara mayi macciishshamannosiha lawannohe?” yitanno xaˈmo no. Roso 9te qole “Mayi mayi daafira huucciˈra hasiˈratto?” yitanno xaˈmo no. Umi qara rosaanchikkira togoo xaˈmuwara dawaro qola qarra ikkitasira dandiitanno. Rosaanchu maxaafu giddo kulloonni qummeeshshuwanna misilla horoonsiˈre heeshshi gotti asse hedanno gede qajeelsite kaaˈlattosira dandaatto.

7. Woˈnaalshuwa danchu garinni horoonsiˈra dandiineemmohu hiittoonniiti?

⁷ Rosaanchikki maa assa hasiissannosiro huwatihu gedensaanni, hakkoye coye assanno gede jawaachishate woˈnaalsha horoonsiˈri. Lawishshaho, rosaanchikkira gambooshshe haˈra qarra ikkitinosiha ikkiro, roso 4te “Egenno Lexxi” yaannohu hunda noota Yihowa Towaatinoe yitanno viidiyo leellishattosira dandaatto. Hegerera Hagiidhitanni Heeˈra Dandaatto! yaanno maxaafi giddo “Ledde Xiinxalli” woy “Egenno Lexxi” yaanno gafi hunda togoo woˈnaalshuwa afiˈra dandaatto. * “Isi hatto assa dandiiro atino assa dandaatto” yitanni rosaanchokki wolu ledo heewisiisattokki gede qorophi. Hatto yee heda hasiissannosihu rosaancho umosiiti. Hatteentenni viidiyote giddo kulloonni manchi Qullaawu Maxaafi roso loosu aana hosiisanno gede kaaˈlinosire luphi assite xawisi. Viidiyote giddo qummi assinoonniha qara qummeeshsha woy viidiyote giddo noo manchi assinore luphi assite kula dandaatto. Hakko mancho Yihowa kaaˈlinosi gara xawisi.

8. Rosaanchinke Yihowa baxanno gede kaaˈla dandiineemmohu hiittoonniiti?

⁸ Rosaanchikki Yihowa baxanno gede kaaˈlisi. Hatto assa dandaattohu hiittoonniiti? Rosaanchikki Yihowa akatta daafira roore huwatanno gede kaaˈlatto faro hasiˈri. Yihowa baxxannosire kaaˈlannohanna hagiirraamo Magano ikkinota rosaanchikki huwatanno gede kaaˈlisi. (1 Xim. 1:11, NW; Ibi. 11:6) Rosaanchikki rosinore loosu aana hosiisasi kaaˈlitannositanna tini qolte Yihowa baxannosita leellishshaata ikkitinota xawisse kulisi. (Isa. 48:17, 18) Isi Yihowa albinni roore baxanni haˈri kiiro, biddi assiˈra hasiissannosire baala biddi assiˈrate kaˈˈanno.—1 Yoh. 5:3.

9. Maarqoosi 10:29, 30 kultanno garinni, mittu manchi cuuame rosaancho ikkate umisi horo aguranno gede mayi kaaˈlasira dandaanno?

⁹ Qullaawu Maxaafi rosaanchi cuuamate deerra iillate, umisi horo agura hasiissannosi. Aleenni qummi assinihu dureessu manchi gede, mite rosaano maalaamittete coye agura hasiissannonsaha ikkara dandaanno. Loossanno loosi Qullaawu Maxaafihu xintu seeri ledo sumuu yaannokkiha ikkiro, wole looso hasiˈra hasiissannonsaha ikkara dandaanno. Batinye rosaano, Yihowa baxxannokki jaallansa agura hasiissannonsaha ikkara dandaanno. Woloota qole Yihowa Farciˈraasine baxannokkihu mininsa manni giwansara dandaanno. Yesuusi mitootaho togoo coyibba facci asse agura qarra ikkitansara dandiitannota coyiˈrino. Ikkollana iso harunsitannori irraabbannokkita kule qaale eino. Yihowa baxillu woˈminota ayyaanaamittete maate oye insa maassiˈrannonsa. (Maarqoosi 10:29, 30 nabbawi.) Qullaawu Maxaafi rosaanchikki tenne elto afiˈranno gede kaaˈla dandaattohu hiittoonniiti?

10. Manueeli woˈnaalshinni maa rosootto?

¹⁰ Rosaanchikkira jaala ikkisi. Rosaanchikkira hedattosita leellisha lowo geya hasiissannote. Mayira? Hanni Meksikote heeˈrannohu Manueeli coyiˈrinore laˈno. Isi Qullaawa Maxaafa xiinxallanno yanna qaage togo yiino: “Rosiisaanchiˈya xiinxallisa hanafaera albaanni woˈmanka woyite hiitto noommoro xaˈmannoe. Isi baalankare fane hasaaweemmo gede assannoe. Isi ane daafira addinta hedannota wodanchoommo.”

11. Rosaanonke ninke ledo yanna sayisansa kaaˈlitannonsahu hiittoonniiti?

¹¹ Yesuusi harunsaanosi ledo yanna sayisinonte gede atino rosaanokki ledo yanna sayisi. (Yoh. 3:22) Hasiisannoha ikkiro, ayyaanaamittetenni lophanni nooha Qullaawu Maxaafi rosaanchokki minikkira bunaho woy sagalete woy JW Biroodikaaste laˈˈanno gede koyisisi. Rosaanchikki ayyaannate woggara callatara dandaanno daafira, tenne yannara koyisittosiro roore hagiidhara dandaanno. Kazibiiwe  yinannihu Ugaandaho heeˈranno rodii togo yiino: “Rosiisaanchiˈya xiinxallisannoe woyite Yihowa daafira rosoommonte gede, isi ledo yanna sayiseemmo woyiteno Yihowa daafira lowore rosoommo. Yihowa mannasi mageeshshi geeshsha towaatannoronna mannisino lowo geya hagiirraamma ikkinota laoommo. Anino hattoo heeshsho heeˈra hasiˈroommo.”

12. Xiinxallinseemmo woyite addi addi roduuwa koyisa hasiissannonkehu mayiraati?

¹² Xiinxallisatto woyite addi addi roduuwa koyisi. Mito woyite callootinke woy mittu rodii ledo calla xiinxallisa hasiˈneemmoha ikkara dandaanno. Hatto assa ninkera injiitannonkeha ikkara dandaanno; ikkirono yannate kiiro addi addi roduuwi ledo xiinxallisanke rosaanchonke kaaˈlitasira dandiitanno. Moldoovaho heeˈrannohu Dimitiri yinanni rodii togo yiino: “Xiinxallisaera daannohu mittu mittunku halashshaanchi mitto coye xawisannoehu baxxino garinniiti. Tini rosoommo roso duuchu garinni hedeemmo gede kaaˈlitinoe. Balaxe lowo roduuwi ledo egennamoommo daafira, mite yee gambooshshe haˈrummo woyiteno hakkeya diborsoommo.”

13. Rosaanchinke gambooshshe daanno gede kaaˈla hasiissannonkehu mayiraati?

¹³ Rosaanchikki songote gambooshshe daanno gede kaaˈlisi. Mayira? Korkaatuno Yihowa mannisi mitteenni gamba yaanno gede hajajino; Yihowa magansiˈneemmo doogga giddo mitte gambooshshe haˈrate. (Ibi. 10:24, 25) Qoleno ammanate roduuwinke ayyaanaamittete maatenkeeti. Roduuwinke ledo gambooshshe assiˈra, maatenke ledo coommitanno sagale mitteenni itate gedeeti. Rosaanchikki gambooshshe daanno gede kaaˈlattosiha ikkiro, cuuamate lowo geeshsha hasiisanno coyi giddo mitto assanno gede kaaˈlitayi noottosi. Ikkirono hatto assa isira shota ikka hooggasira dandiitanno. Hegerera Hagiidhitanni Heeˈra Dandaatto! yaanno maxaafi rosaanchikki gambooshshe daannokki gede guficho ikkasira dandaannore qeeˈlate kaaˈlannosihu hiittoonniiti?

14. Rosaanchinke gambooshshe daanno gede jawaachisha dandiineemmohu hiittoonniiti?

¹⁴ Rosaanchikki gambooshshe daanno gede jawaachishate Hegerera Hagiidhitanni Heeˈra Dandaatto! yaanno maxaafa roso 10 horoonsiˈri. Kuni maxaafi fulara albaanni woˈnaalshu noonsa roduuwi 10^ki roso woˈnaalte laˈanno gede assinoonni; insa konne gafa horoonsidhe rosaanonsa gambooshshe dagganno gede kaaˈla dandiitino. Ikkirono, rosaanchokki gambooshsheho koyisate roso 10 iilla geeshsha agara hasiissannohe yaa diˈˈikkino. Dandaamannoha ikkiro xiinxallo hanafanni heeˈreenna koyisisi; hattono woˈmanka woyite koyisa agurtooti. Guficho ikkannonsa coyi rosaanchu rosaanchu garinni babbaxxara dandaanno. Hakko daafira mittu mittunku rosaanchikkira hasiisannori maatiro seekkite wodanchi; hattono iso kaaˈla dandaatto gara hedi. Rosaanchikki mite yanna geya gambooshshe daa hoogiro hexxo mudhitooti. Daa geeshsha cincilla, kayi koyisa agurtooti.

15. Rosaanchinke maa waajjara dandaanno?

¹⁵ Umi qara Yihowa Farciˈraasincho ikka waajjootto? Waajjoottohu ‘Mannu albaanni sabbaka horo didandeemmo’ yite hedde ikkara dandaanno. Woy qole ‘Maateˈya woy jaallaˈya gibbannoe’ yite waajjoottoha ikkara dandaanno. Hatto ikkiro rosaanchikki qarri leellannohe. Yesuusi mitu manni waajjara dandaannota coyiˈrino. Ikkirono isi harunsaanosi waajjite Yihowara soqqama agurtannokki gede jawaachishinonsa. (Mat. 10:16, 17, 27, 28) Yesuusi harunsaanosi waajjitannokki gede kaaˈlinonsahu hiittoonniiti? Ati isi lawishsha harunsa dandaattohu ma garinniiti?

16. Rosaanchinke ammanannore wolootaho farciˈranno gede qajeelsa dandiineemmohu hiittoonniiti?

¹⁶ Rosaanchikki sunu sununni ammanannore woleho kulanno gede qajeelsisi. Yesuusi sabbakkanno gede soyinsa woyite rosaanosi waajjitinoha ikkara dandaanno. Kayinni Yesuusi mama  sabbakkannoronna mayite sabbakkannoro rosiise kaaˈlinonsa. (Mat. 10:5-7) Ati Yesuusi lawishsha harunsa dandaattohu hiittoonniiti? Rosaanchikki ayeoora farciˈra dandaannoro afanno gede kaaˈlisi. Lawishshaho, ‘Konne Qullaawu Maxaafi roso macciishshoommero kaaˈlannosi yite hedatto manchi no?’ yite xaˈmi. Hakkiinni konne halaale dancha gede asse kula dandaannohu hiittoonniitiro leellishshe kaaˈlisi. Hegerera Hagiidhitanni Heeˈra Dandaatto! yaanno maxaafira nooha “Mitu Manni Togo Yaanno” hattono “Mitu Manni Togo Yee Xaˈmara Dandaanno” yaanno gafa horoonsidhine isi ledo rosiisiˈra dandiitinanni. Hatto assatto woyite, rosaanchikki Qullaawa Maxaafa horoonsiˈre dawaro leellanno garinninna hayyotenni qolanno gede qajeelsisi.

17. Rosaanchinke Yihowa addaxxanno gede kaaˈlineemmo woyite Maatewoosi 10:19, 20, 29-31te noo hedo horoonsiˈra dandiineemmohu hiittoonniiti?

¹⁷ Rosaanchikki Yihowa addaxxanno gede kaaˈlisi. Yesuusi rosaanosira Yihowa baxannonsa daafira kaaˈlannonsata kulinonsa. (Maatewoosi 10:19, 20, 29-31 nabbawi.) Rosaanchikkira Yihowa isono kaaˈlannosita kulisi. Mixosi wonshiˈranno gede Yihowa kaaˈlasira isi ledo huuccatto assidhe, Yihowa addaxxanno gede kaaˈla dandaatto. Poolaandete heeˈrannohu Firaansiziiki togo yiino: “Rosiisaanchiˈya huuccatto assanno yannara duucha woyite mixoˈya daafirano qummi assanno. Yihowa rosiisaanchiˈya huuccattora dawaro qolinota laummoti, anino bayichonko huuccatto assiˈra hanafummo. Songotenna qoqqowu gambooshshe haˈreemmo gede loosu basera fajjinannie gede xaˈmiˈrummo yannara Yihowa kaaˈlinoeta huwatoommo.”

18. Yihowa, manna rosiisate diinaggaambe assineemmore ma garinni laˈˈanno?

¹⁸ Yihowa Qullaawu Maxaafi rosaanonkera lowo geya hedanno. Isi, ninke mannu isiwa shiqanno gede kaaˈlate diinaggaambe assineemmore naadanno; qoleno tennera baxannonke. (Isa. 52:7) Xa Qullaawa Maxaafa xiinxallisatto manchi noohekkiha ikkiro, wolootu xiinxallissanno woyite ledonsa xiinxallisse rosaano cuuamate deerra iillitanno gede kaaˈla dandaatto.