LIISA * yinanni rodoo “ammanate roduuwi leellishshino shaqqilli lowo geeshsha kaaˈlinoe” yitino. Ise togo yitinohu umo halaale macciishshitanno gede kaaˈlinoseri maatiro kultanniiti. Aane yinanni rodoono togo yitino: “Rosoomma rosinni roore baxisinoehu Yihowa Farciˈraasine leellishinoe shaqqilleeti.” Kuri lamenti roduuwi xa Qullaawa Maxaafa nabbawanna hiinca baxanno; kayinni roore kaaˈlinonsahu roduuwu leellishshino shaqqilleeti.

Manna loosoho kakkayisanno garinni shaqqille leellisha dandiineemmohu hiittoonniiti? Hanni coyiˈneemmorinninna assineemmorinni tenne assa dandiineemmo gara laˈno. Hakkiinni shaqqille leellisha hasiissannonkehu ayeooraatiro laˈneemmo.

Lawishsha fooliishsho 31 kulloonniti maanaame minaama shaqqillunni coyidhannota kulloonni. (Law. 31:26) Shaqqillu ise maa coyidhannoronna ma garinni coyidhannoro balaxxe heddanno gede assannose. Annuwuno shaqqillunni coyiˈra hasiissannonsa. Batinyu annuwinna amuuwi kaajjishenna hanqe coyiˈra oosonsa gawajjitannotanna hajajantannokki gede assitannota wodanchino. Hakko daafira oosonsa macciishshite hajajantanno gede annuwunna amuuwu shaqqillunni coyiˈrate sharrama hasiissannonsa.

Annanna ama ikkinummorono ikka hoongummorono shaqqillunni coyiˈra dandiineemmohu hiittoonniiti? Lawishsha 31:26 nooti umi hedo tenne afate kaaˈlitannonke. Qummeeshshu, “Afiisenni egenno [“hayyo”, NW] fultanno” yaanno. Togo assate coyiˈneemmo qaallanna coyiˈneemmo gara hayyotenni doora hasiissannonke. Ninkeneeto togo yine xaˈmanke kaaˈlitannonke: ‘Coyiˈreemmori hanqo kakkayisannoreetinso hanqo qiissaareeti?’ (Law. 15:1) Addaho coyiˈnammora albaanni seekkine heda hayyote.

Lawishshu maxaafi wole basera “Dayi gede coyiˈnanni coyi manna urdete gede qasanno” yaanno. (Law. 12:18) Coyiˈneemmorinna coyiˈneemmo gari wolootaho mayi macciishamannonsa gede assannoro hendummoro qorophine coyiˈneemmo. Ee, shaqqillunni coyiˈneemmoha ikkiro gawajjannore dicoyiˈneemmo woy kaajjinshe dicoyiˈneemmo. (Efe. 4:31, 32) Gara ikkinokkire hedanna coyiˈra agurre kiannore baxisanno garinni coyiˈneemmo. Yihowa, waajjino soqqamaanchosi Eeliyaasi jawaachishi woyite tennera dancha lawishsha ikkinonke. Yihowa riqiwe dayino sokkaasinchi ‘shiima huuronni’ coyiˈrino. (1 Mot. 19:12) Ikkirono shaqqado ikkate shaqqillunni coyiˈratenni sainore assa hasiissannonke. Shaqqadda ikkinoommota leellishannore assa hasiissannonke. Hiittoonni?

Yihowa lawishsha harunsineemmoha ikkiro coyiˈneemmo coyinninna assineemmorinni shaqqille leellinsheemmo. (Efe. 4:32; 5:1, 2) Aleenni qummi assiniti Liisa Yihowa Farciˈraasine leellishshinose shaqqille kultino. Togo yitino: “Maatenke ledo hedeweelcho heeˈnoommo mininni agurre fula hasiissunke yannara, Yihowa Farciˈraasine ikkitinori lamu minaanninna minaama loosoho haˈra agurte fooliishsho wonshite uduunne hogophinanna dagge kaaˈlitinonke. Hatte yannara Qullaawa Maxaafa xiinxalla nafa dihanafoomma!” Roduuwu shaqqillunni  assitinori Liisa Qullaawa Maxaafa seekkite xiinxallitanno gede kakkayisinose.

Hanafote kulliti Aanino Yihowa Farciˈraasine leellishshinose shaqqille naaddino. Ise togo yitino: “Alamete aana noohu Yihowara soqqamannokki manni ikkito manna ammaˈneemmakki gede assitinoe. Yihowa Farciˈraasinenni xaadummati insano diammaˈnoomma. ‘Insara aneri togo dhiwinonsahu mayiraati?’ yee hedoomma. Kayinni Qullaawu Maxaafi rosiisaanchoˈya anera addinta heddannota leellishshino daafira ise ammanoomma.” Tini mayi guma abbituyya? Aane, “gedensaanni rosanni noommare seekke illachisha hanafoomma” yitino.

Roduuwu Liisaranna Aanera shaqqille leellishansa loosoho kaˈanno gede assitinonsatanna halaale rosanno gede kaaˈlitinonsata qaango. Roduuwu leellishshinonsa shaqqilli insa Yihowanna mannasi addaxxitanno gede kaaˈlinonsa.

Mitu manni budinsanni kainohunni shaqqillunni coyiˈranno hattono faasiiqaho. Mannu budinsanni woy akatinsanni kainohunni shaqqille  leellishansa danchate. Shaqqille leellinsheemmohu konni garinni calla ikkiro shaqqille leellishate Maganu lawishsha diharunsinoommo.—Soqqamaasinete Looso 28:2 ledo heewisiisi.

Maganu lawishsha harunsine leellinshannihu addu shaqqilli woy shooshanqe qullaawu ayyaani laalo widooti. (Gal. 5:22, 23) Hakko daafira togoo shaqqille leellishate Maganu ayyaani kaaˈlo hasiissannonke. Togoo shaqqille leellinsheemmoha ikkiro Yihowanna Yesuusi lawishsha harunsineemmo. Qoleno Kiristaana ikkinoommo daafira wolootaho lowo geeshsha hendeemmo. Tenne assineemmo gede kakkayisannonkehu Yihowaranna mannaho noonke baxilleeti. Togoo shaqqilli giddonkenni kaˈne leellinsheemmoho kaajja akataati; hattono Magano hagiirsiisanno.

Danchare assinonkehura woy anfoommo mannira shaqqille leellisha qarra diˈˈikkitannonke. (2 Sam. 2:6) Shaqqille leellinsheemmoti mitte doogo insa galatate. (Qol. 3:15) Ikkollana mittu manchira shaqqille leellisha hasiissannonkekkiha lawinkerona?

Hanni tenne hendo: Yihowa elto oyenke shaqqille leellishate kaajja lawishsha ikkinonke; Qaalisino konne akata leellishate daafira kaajja roso rosiisannonke. Giriikete Afiite Qullaawa Borro giddo “elto” yaanno qaali duucha basera no. Maganu shaqqille leellishinonkehu hiittoonniiti?

Hanni Yihowa baalunku mannira heeshshote hasiisannonsare oye shaqqille leellishino gara hendo. (Mat. 5:45) Isinni Yihowa shaqqille leellishinonkehu iso nafa anfummokkinniiti. (Efe. 2:4, 5, 8) Lawishshaho isi mitto Beettosi manna baalaho sayise uyino. Soqqamaasinchu Phaawuloosi Yihowa “elto woˈma ikkitinohura” Isi wodo qixxeessinota coyiˈrino. (Efe. 1:7) Qoleno Yihowa cubbo loonseemmohanna iso dadillinseemmoha ikkirono massaganna rosiisa diagurannonke. Isi rosiisannonke rosinna qaalisi ‘shoru xeeni’ gedeeti. (Mar. 32:2) Isi leellishanni noonke shaqqilli baalaho galata qola didandiineemmo. Qoleno albillitte hegere heeshsho afiˈneemmohuno Yihowa shaqqillinni ikkinota anfoommo.—1 Pheexiroosi 1:13 ledo heewisiisi.

Yihowa shaqqilli jawaachishannohanna loosoho kakkayisannoha ikkinoti dihuluullissannote. Hakko daafira mitu mannira calla ikkikkinni barru baala baalunku mannira shaqqille leellinshe Yihowa lawishsha harunsate sharrammo. (1 Tes. 5:15) Agurrummokkinni shaqqille leellinsheemmoha ikkiro qiidu yannara iibbishshanno giira gede ikka dandiineemmo. Qoleno mininke mannira, ammanate roduuwinkera, ledonke loossannorira, ledonke rossannoriranna qachinke mannira shesho ikkineemmo.

Hanni maateˈne woy songote giddo shaqqillunni coyidhine woy mitore assitine jawaachishshinanni manni nooro hedde. Songoˈne giddo roorenkanni mini giddo looso loonse, gate loosa kaaˈline hattono dikkotenni haˈne mitore hira kaaˈlinanni rodii heeˈrara dandaanno. Qoleno soqqantinanni heedhine kaaˈlo hasiissannosi mancho xaaddiniro mitore assitine kaaˈla dandiitinanni?

Yihowa lawishsha harunsine coyiˈneemmorinninna assineemmorinni woˈmanka woyite shaqqille leellinsho.