HEXXOTE Gobbara heedhanno Ibiraawootira haaru loosu diri hanafannohu baatto loosiˈnanninna gide wixiˈnanni woggaraati; hatti wogga xaa yannara Wocawaaru woy Birru agani yannaati.

Insa diru seedannokki gede woy haraˈmannokki gede assitannohu wogga laˈeeti. Insa mito woyite aganu giddo barruwa leddanno hattono diru giddo agana leddanno. Insa togo assitannohu aananno diri hanafara albaanni ikkara dandaanno. Konni garinni kalaandere woy diru kiiro, gide wixiˈnanni woy mixxinanni wogga ledo mitte ikkitanno gede assa dandiitanno.

Ikkirono Muse yannara Maganu Israeelete mannira diru giddo umi agani Abiibi woy Niisaani ikkanno gede kulino. (Ful. 12:2; 13:4) Hatti wogga xaa yannara Badheessunna Dotteessu yannaati. Niisaani Israeele ayyaana ayirrissanno aganaati; konni ayyaanira insa hayixunniha umi laalcho Yihowara abbitanno.—Ful. 23:15, 16.

Eemili Shureri yinanni fullahaanchi Yesuusi Kiristoosi Yannata Yihudu Manni Xagge (175 K.A.–135 M.D.) yinanni maxaafisira (kuni maxaafi Sidaamu Afiinni dino) togo yiino: “Diru giddo agana lendannironna teˈee doora hakkeya diqarrissanno; Niisaani aganira (Niisaani 14) woˈmu agani leellanno yannara ayirrinsanniha Faasiku ayyaana ayirrinsannihu barrunna hashshu seendilli taalo ikkanno (woy badheessu woggara) yanna saˈuhu gedensaanniiti. Hakko daafira Faasiku Ayyaana ayirrinsannihu barrunna hashshu seendilli taalo ikkino barrira albaanni ikkinota diru jeefora buunxiro, Niisaani aganira albaanni mitto agana (13^ki agana) lendannita kullanni.”

Yihowa Farciˈraasine Mootichu Hurbaate ayirrinsanni barra murtannohu tenne hayyo kaima assidheeti; konne ayyaana ayirrinsannihu badheessu woggara Ibiraawootunnite diru kiiro garinni Niisaani 14nniiti. Alamete doyichora noo songuwara konne ayyaana ayirrinsanni barra balanxe kullanni.

Ikkina Ibiraawootu mittu agani goofanno yannanna haaru agani hanafanno yanna afa dandiitannohu hiittoonniiti? Xaa yannara attammoonnita woy elektirooniksete uduunnichinkera noota diru kiiro woy kalaandere laˈne qarrammummokki afa dandiineemmo. Hundi waro kayinni tenne afa shota diˈˈikkitino.

Nohi warihu Baote Wayi yannara mittu mittunku agani 30 barra afiˈrino yine hendanni. (Kal. 7:11, 24; 8:3, 4) Gedensoonni kayinni Ibiraawootunnite diru kiiro garinni 30 barra afiˈrinohu baalanka agana diˈˈikkino. Ibiraawootunnite diru kiiro garinni kuˈu agani goofeenna wole agana mite yine kiira hananfannihu, gordoho aganu umo abbinota laˈneeti. Layinki agana kiira hananfannihu sai agani hanafihunni 29 woy 30 barri gedensaanniiti.

Mitte yannara Daawitinna Yoonaataani haaru agani hanafanno yanna daafira coyidhanni, “gaˈa aganu leellanno” barraati yitino. (1 Sam. 20:5, 18) Hakko daafira tini 11^ki sanira K.A aganu hanafanno barra balanxe shallangannita leellishshannota ikkitara dandiitanno. Ikkina Israeelete noohu baalunku manni haaru agani hanafinota afa dandaannohu hiittoonniiti? Mishina yinannihu Ayihudennita afuu xaggenna bude amadino maxaafi tenne daafira mite mashalaqqe kulanno. Kuni maxaafi Israeele qafadotenni higgu gedensaanni noo dirra giddo tenne hajo laˈannori Sanihediriini Shongo (Yihudunniha aliidi yoo mine) ikkitinota kulanno. Sanihediriini Shongo lamalu agani giddo aganu kiiro 30^ki barra gamba yitanno. Kuni manni aananno agani mamoote hanafannoro muranno. Insa tenne murtannohu maa kaima assidheeti?

Yerusaalamete qooxeessira noote jajjabba tulluwara heeˈre haaru agani umo abbannota laˈˈanno manni no. Insa aganu fulinota affuro tenne bayichonkonni Sanihediriini Shongora kultanno. Sanihediriini Shongo aganu umo abbinota leellishshannota ikkado taje afidhuro, haaru agani hanafinota egensiissanno. Ikkina gomichu woy guunjo kuni manni aganu umo abbinota laˈˈannotalla hooltunsa? Hatto ikkiro kiira hananfoonni  agani 30 barra afiˈrinohu gede assine laˈnanni; hakkiinni haaru agani hanafanno.

Mishina yinanni maxaafi kulannonte gede Sanihediriini Shongo haaru agani hanafinota egensiissinota mannaho kulate, Yerusaalamete mule noohu Ejedhete Ilaalira giira giirranni. Wolu Israeelete qooxeessirano togoo bayicho giira giirre mannu tenne afanno gede assinanni. Gedensoonni kayinni tenne egensiisate mito manna soya hananfoonni. Hakko daafira Yerusaalamete, Israeelete gobba baalate heeˈrannohunna addi addi gobbara billaalle heeˈrannohu Yihudu manni haaru agani hanafinota afanno. Konnira baalunku manni ayyaanna mitte woggara ayirrisa dandaanno.

Ibiraawootunnite diru kiirora noo aganna, ayyaannanna wogga daafira ledde afate sanxarazhe lai.