1-2. Looxi gede xaa yannara noo Kiristaanira mayi qarri iillannonsa?

 XAA YANNARA noohu amanyoote baino manni ikkito laˈneemmo woyite, keeraanchu manchi Looxira macciishshaminosi gedeeri macciishshamannonke. Isi iimi Anninke amanyoote bainore giwannota afino daafira hatte yannara heeˈrino mannite “saalimale ikkitonsanni kainohunni ikkannori baeennasi heeˈrino.” (2 Phe. 2:7, 8) Looxi Magano lowo geeshsha waajjannonna baxanno daafira qooxeessisira noo manni assannoha amanyoote baino coye giwino. Xaa yannarano ninke heeˈnoommohu Yihowa fushshinoha amanyootu seera gari geeshsha woy horo ayirrisannokki manni noo alameraati. Ikkirono, Maganoho noonke baxilli lexxanno gede assiˈnummoronna iso waajjineemmoha ikkiro amanyootunni xuru nookkire ikkine heeˈra dandiineemmo.—Law. 14:2.

² Yihowa Lawishshu maxaafi widoonni baxillunni jawaachishshanno amaale oye tenne assineemmo gede kaaˈlannonke. Ninke baalunku, labballuno meentuno hattono ajuno akkaluno Lawishshu maxaafi giddo kulloonni amaale xiinxallanke lowo geeshsha kaaˈlitannonke.

3. Lawishsha 17:3 kultanno garinni wodananke agadhineemmo gede assannonkehu mittu korkaati maati? (Misileno lai.)

³ Wodananke agadha hasiissannonkehu qaru korkaati Yihowa wodananke laˈˈanno daafiraati. Hatto yaa, isi mannu gede iima ikkikkinni giddonke lae ayemmanke afanno yaate. (Lawishsha 17:3 nabbawi.) Heeshsho uyitannoti isi aanno amaale surrenke giddo woˈmitanno gede assiˈneemmoha ikkiro isi baxannonke. (Yoh. 4:14) Hatto ikkiro, amanyootenna ayyaanaamittenke daafannohu Sheexaanunna isi alamewiinni daanno coyi digawajjannonke.  (1 Yoh. 5:18, 19) Yihowawa albinni roore shinqummo kiiro isira noonke ayirrinyinna baxilli lexxanno. Iimi Annanke dadillisa hasiˈneemmokki daafira cubbu widira massitanno hedo nafa gimbeemmo. Gara ikkinokkire assate fonqolammeemmo woyite ninkeneeto togo yine xaˈma hasiissannonke: ‘Lowo geeshsha baxannoeta leellishinoe Magano afanni heeˈrenni hiitto ikke dadilliseemmo?’—1 Yoh. 4:9, 10.

4. Mitte rodoo Yihowa waajjase gara ikkinokkire assitannokki gede agartinosehu hiittoonniiti?

⁴ Kiroeshiyaho heedhannoti Maarta yinanni rodoo amanyoote bainore assate fonqolantinota coyidhino; ise togo yitino: “Garunni hedanna cubbo loonse shiima yanna hagiirre afiˈrate hasatto gargadha qarra ikkitinoe. Yihowa waajja kayinni agarooshshe ikkitinoe.” b Yihowa waajja agarooshshe ikkitannohu hiittoonniiti? Maarta busha coye doodha abbitanno gawajjo hiincitinota coyidhino. Ninkeno hatto assa dandiineemmo. Baalunkunni roore gawajjitannoti kayinni Yihowa dadillisatenna hegerera iso magansiˈra hoogate.—Kal. 6:5, 6.

5. Liyo woˈnaalshinni maa rosootto?

⁵ Yihowa waajjineemmoha ikkiro bushare assitannori ledo dijaalooˈmineemmo. Liyo yinannihu Kongote heeˈranno rodii tenne wodanchino. Isi cuuamihunni shoolu diri gedensaanni bushare assitannori ledo jaalooma kalaqiˈrino. Isi ‘Anilla busha coye assa hoogummo geeshsha tini soˈro diˈˈikkitino’ yee hedino. Ikkirono mulenni jaallasi quwa sae aganno gedenna amanyoote bainore assanno gede assitinosi. Hakkiinni isi Yihowa Farciˈraasine ikkino annisinna amasi rosiisinosirenna hoogino hagiirresi hiincino. Tini mayi guma abbituyya? Isi galagale gara ikkinore assa hanafino. Songote cimeeyye kaaˈlitinosi daafira isi Yihowawa higino. Xaa yannara Liyo songote cimeessanna baxxino suwisaancho ikke hagiirrunni soqqamanni no.

6. Lawishshunniri hiikkuri lame mancho daafira hasaambeemmo?

 ⁶ Hanni Lawishsha fooliishsho 9 xiinxallino; tenne fooliishshora hayyonna hambe lame mancho gede assine heewisiinsanni xawinsoonni. (Roomu Sokka 5:14te nna Galatiyu Sokka 4:24 ledo heewisiisi.) Tenne fooliishsho xiinxallineemmo woyite Sheexaanu alame foorrenna teeda baˈino misilla calla hendanni gede assitannota deˈnoonke. (Efe. 4:19) Hakko daafira albinni roore Magano waajjanna bunshetewiinni xeertiˈra lowo geeshsha hasiissannote. (Law. 16:6) Ninke baalunku labbaahuno ikko meyaati tenne fooliishshonni horo afiˈra dandiineemmo. Tenne fooliishshora kulloonniri lamenti mancho egenno xeˈinonsare yaano ‘wodana afidhinokkire’ koyisanni noohu gede assine kulloonni. Lamenti ‘amo miniˈyara dagge qixxeessoomma sagale iti’ yee koyisanni noohu gede assine kulloonni. (Law. 9:1, 5, 6, 13, 16, 17) Kayinni insa koyishsha maahoyye yee adha abbitanno gumi lowo geeshsha babbaxxinoho.

7. Lawishsha 9:13-18 kultanno garinni hawanya mancho koyishsha adhanno manchi hiikkanno? (Misileno lai.)

⁷ Hanni ‘hawanya’ mancho koyishsha laˈno. (Lawishsha 9:13-18 nabbawi.) Ise egenno xeˈinoha “anewa amo” yite cancite woshshitanni ledose itanno gede koyissanno. Tini mayi guma abbitannoyya? “Minisera marannohu baalu reyanno.” Lawishshu maxaafi giddo wole fooliishshora kulloonnita lawishshu yaatto qaagattoha ikkara dandaanno. ‘Arrawunni doggannotanna foora mancho’ qorophineemmo gede kulloonninke. “Minisera haˈra reyote doogo amadate.” (Law. 2:11-19) Lawishsha 5:3-10 wole ‘foora mancho’ daafira kulloonni; “ise hadhanno doogo reyonnite.”

8. Hiittoo coyi tuncu yaankera dandaanno?

⁸ Hawanya mancho huuro macciishshitannori mitte doodha hasiissannonsa; insa ise koyishsha adhitannonso gibbanno? Ninkerano togoo coyi tuncu yaankera dandaanno. Mittu manchi amanyoote bainore assineemmo gede xixxiiwinkero woy hedeweelcho teeda baˈino misile laˈnummoro maa assineemmo?

9-10. Foorre gimbeemmo gede assannonkehu mitu korkaati maati?

⁹ Foorretewiinni xeertiˈneemmo gede assannohu ikkadu korkaati no. Hawanya mancho, ‘moorre anganni wayi coommanno’ yitanni noohu gede assine kulloonni. “Moorre anganni wayi” maati? Qullaawu Maxaafi minaanninna minaama siimu xaadooshshe asse afiˈranno hagiirre gooˈro qolanno wayi gede asse kulanno. (Law. 5:15-18) Konni garinni hagiirre afiˈra dandaannori seerunni adhamino minaannanna minaama callaho. ‘Moorroonni wayi’  kayinni kawiinni lowo geeshsha baxxanno. Kuni wayi foorre leellishannoho. Mooranno manchi maaxame moorannonte gede fooranno manchino foorannota wolootu affannokki gede assate woˈnaalanno. Foortannori assootensa wolu manni diafino yite heddanno daafira, kuni ‘moorte aggino wayi’ coommannoha lawansara dandaanno. Tini insaneeto dogate! Yihowa baalankare laˈˈanno. Yihowa dadillisate geeshsha qaraarannori dino; hakko daafira togoore assine afiˈnanniri ‘coommannore’ diˈˈikkino. (1 Qor. 6:9, 10) Qoleno wole gawajjono no.

¹⁰ Foorre saallanni gedenna meessaneeto gimbanni gede assitara, hasiˈnikkinni godowu gatanno gede assitaranna maate diiggara dandiitanno. Hakko daafira hawanya mancho ‘minira’ haˈranna ise sagale ita giwa hayyote. Batinyu fooranno manni Yihowa ledo noonsa jaalooma huˈnannotano agurranna foorretenni saˈˈanno dhibbinni yannimale reyanno. (Law. 7:23, 26) Lawishsha fooliishsho 9 kiiro 18 “minisera marannohu baalu reyannotanna jeennaate dirrannota” kultanno. Ikkina batinyu manni togoo qarra abbannoha ise koyishsha adhannohu mayiraati?—Law. 9:13-18.

11. Teeda baˈino misilla laˈˈa lowo geeshsha gawajjitanno yineemmohu mayiraati?

¹¹ Qoropha hasiissannonketi mitte rosantino woshshaado teeda baˈino misillaati. Mitu manni teeda baˈino misilla laˈˈa gawajjitannokkihu gede asse hedanno. Kayinni gawajjitanno, uminkerano ikko wolu mannira ayirrinyu heeˈrannonkekki gede assitanno hattono togoo misilla laˈˈa araado ikkitanno. Teeda baˈino misilla mitte hinge laˈnihu gedensaanni surrete giddonni rakke dibaˈanno. Isinni togoo misilla laˈˈa gara ikkitinokki hasatto kakkayissanno ikkinnina tenne hasatto qeeˈlinanni gede dikaaˈlitanno. (Qol. 3:5; Yai. 1:14, 15) Teeda baˈino misilla laˈˈannohu batinyu manni foorrete widira haˈrino.

12. Gara ikkinokkire hendeemmo gede assitankera dandiitanno misilla gimbeemmota leellisha dandiineemmohu hiittoonniiti?

¹² Elektirooniksete uduunnicho horoonsiˈnanna teeda baˈino misilla hedeweelcho dagguro ninke Kiristaanu ma assa hasiissannonke? Bayichonkonni tenne misile laˈˈa agura hasiissannonke. Noonketi muxxe jiro Yihowa ledo noonke jaalooma ikkitinota qaaganke tenne assate kaaˈlitankera dandiitanno. Teeda baˈinokkiti mite misilla nafa gara ikkinokkire hendeemmo gede assitankera dandiitanno. Togoo misilla laˈˈa hasiissannonkekkihu mayiraati? Korkaatuno foorrete daafira hendeemmo gede assannonkeha shiima coye nafa assa dihasiˈneemmo. (Mat. 5:28, 29) Tayilaandete heeˈrannohu Deevidi yinannihu songote cimeessi togo yiino: “Aneneeto togo yee xaˈmeemmo: ‘Laeemmo misilla teeda baˈinota ikka hoogguro nafa togoo misilla duucha hige laˈˈaˈya Yihowa hagiirsiissanno?’ Konni garinni hedaˈya gara ikkinore asseemmo gede kaaˈlitinoe.”

13. Gara ikkinore assineemmo gede kaaˈlannonkeri maati?

¹³ Yihowa dadillisannoha aye coyeno assineemmokki gede waajja, gara ikkinore assineemmo gede kaaˈlitannonke. “Kaaliiqa waajja egennote umoho.” (Law. 9:10) Tenne yaatto Lawishshu maxaafira fooliishsho 9te hanafora wole lawishshu mancho yaano ‘egenno’ woy addu hayyo kulate horoonsiˈnoonni.

14. Lawishsha 9:1-6 hiikkonne wole koyishsha kulloonni?

¹⁴ Lawishsha 9:1-6 nabbawi. Konni qummeeshshira addu hayyo Buicho ikkinohunna ninke baalanka Kalaqinohu Yihowa koyisino koyishsha kulloonni. (Law. 2:6; Rom. 16:27) Kowiicho lamala heelliicho afiˈrinoha mitto jawa mine lawishshunni kulloonni. Kuni lawishshi Yihowa shaqqado ikkinotanna isi  amaale harunsite hayyoota ikka hasidhannore baala anga fane haaˈrannonsata leellishannoho.

15. Maganu ma assineemmo gede koyisinonke?

¹⁵ Yihowa shaqqadohonna woˈmanka coye batise aannoho. Lawishshu maxaafa fooliishsho 9te kulloonni mancho yaano “egenno” woy addu hayyo tenne akattasi leellishshanno. Tenne xaggera kulloonniti lawishshu mancho minese hardino booto gorrite woyinete xajjeno worte jila qixxeessitinota kulloonni. (Law. 9:2) Qoleno kiiro 4 nna 5te ise wodana afiˈrinokkiha, “Amo qixxeessoomma sagale iti” yitannota kulloonni. Tenne mancho minira haˈranna sagalese ita hasiissannonkehu mayiraati? Yihowa oososi hayyoota ikkitaranna agarooshshe afidhara hasiˈranno. Isi soˈro loonse loonsoommo soˈronni xissiisiˈne roso afiˈnammora dihasiˈranno. Yihowa suwaddaho hayyo woy “egenno aannohu” iseraati. (Law. 2:6, 7) Yihowa gara ikkitino doogonni waajjineemmoha ikkiro iso hagiirsiisa hasiˈneemmo. Isita hayyo uyitanno amaale macciishshineemmo; hattono tenne amaale loosu aana hosiisa hagiirsiissannonke.—Yai. 1:25.

16. Aleeni Magano waajjasi gara ikkinore doodhanno gede kaaˈlitinosihu hiittoonniiti? Tini mayi guma abbituyya?

¹⁶ Hanni Aleeni yinanni rodoo Magano waajja gara ikkinore doodhanno gede kaaˈlitinosi gara laˈno. Aleeni songote cimeessaatinna rosiisaanchoho; isi togo yiino: “Batinye ledoˈya rosiissanno rosiisaano teeda baˈino misilla leellishshanno filme siimu xaadooshshi daafira rosiinsanni rosi gede assite laˈanno.” Aleeni kayinni didogamino. Isi togo yiino: “Ani Yihowa waajjeemmo daafira tenne filme tiyyiˈre giwoommo. Qoleno togoo filme laeemmokkihu mayiraatiro ledoˈya rosiissannorira xawise kuloommonsa.” Isi, “wodanchate doogo higge haˈri” yitannota addu hayyo amaale harunsino. (Law. 9:6) Aleeni ledo rosiissannori mite rosiisaano tenne dhagge assidhino daafira Qullaawa Maxaafa xiinxallanna songote gambooshshe daa hanaffino.

17-18. Addu hayyo koyissanno koyishsha adhanno manni xaa yannara afiˈranno atooti maati? Albillitte mayi atoote afiˈrannoyya? (Misileno lai.)

¹⁷ Yihowa lawishshunnita lame mancho horoonsiˈre albillitte afiˈneemmo atootira kaima ikkannore kulinonke. ‘Hawanya’ mancho koyishsha macciishshite adhitannori foorre afiˈnanni hagiirre afiˈrate woˈnaaltanno. Ikkirono insa loossanno loosi albillitte mayi qarra abbannonsaro diwodanchitanno. Assootinsa insa ‘reyote’ widira massannonsa.—Law. 9:13, 17, 18.

¹⁸ Manchote gede assine kulloonni ‘egenno [addu hayyo]’ koyishsha adhitannori afidhanno coyi kayinni baxxinoho! Insa ayyaanaamittensara hasiisannonsa coye baala afidhanno daafira hagiirraammaho. (Isa. 65:13) Yihowa masaalaanchu Isayaasi widoonni, “Ani yeemmota  macciishshitinoommero, woyyitino sagale afidhine hagiidhitinanni” yiino. (Isa. 55:1, 2) Ninke Yihowa baxannore baxanna isi giwannore giwa ronsanni heeˈnoommo. (Far. 97:10) Qoleno wolootu addu hayyonni hagiirre afidhanno gede koyinseemmo daafira hagiirraammaho. Katamu tullichira uurrine, “Egenno xeˈinohu baalu anewa amo!” yine woshshinanni heeˈnoommohu gedeeti. Ninkeno ikko koyishsha macciishshite adhitannori afidhanno horo xaata calla diˈˈikkitino; afiˈneemmo atooti hegereho. Kuni atooti ‘wodanchate doogora haˈnanni’ hegerera heeˈneemmo gede assannonkeho.—Law. 9:3, 4, 6.

19. Rosiisaancho 12:13, 14 kultanno garinni maa assate murciˈra hasiissannonke? (“ Magano Waajja Kaaˈlitannonke” yitanno saaxineno lai.)

¹⁹ Rosiisaancho 12:13, 14 nabbawi. Tenne goofimarchu yannara Magano waajja wodananke agartannonke; hattono amanyootunninna ayyaanaamittetenni xuru nookkire ikkine heeˈneemmo gede kaaˈlitannonke. Magano gara ikkitino doogonni waajja, dandaami deerrinni lowo manni addu hayyo hasiˈranno gedenna tini hayyo uyitanno horo afiˈranno gede koyisate kakkayissannonke.