1-2. Looxi gede xaa yannara noo Kiristaanira mayi qarri iillannonsa?

 XAA YANNARA noohu amanyoote baino manni ikkito laꞌneemmo woyite, keeraanchu manchi Looxira macciishshaminosi gedeeri macciishshamannonke. Isi iimi Anninke amanyoote bainore giwannota afino daafira hatte yannara heeꞌrino mannite “saalimale ikkitonsanni kainohunni ikkannori baeennasi heeꞌrino.” (2 Phe. 2:7, 8) Looxi Magano lowo geeshsha waajjannonna baxanno daafira qooxeessisira noo manni assannoha amanyoote baino coye giwino. Xaa yannarano ninke heeꞌnoommohu Yihowa fushshinoha amanyootu seera gari geeshsha woy horo ayirrisannokki manni noo alameraati. Ikkirono, Maganoho noonke baxilli lexxanno gede assiꞌnummoronna iso waajjineemmoha ikkiro amanyootunni xuru nookkire ikkine heeꞌra dandiineemmo.—Law. 14:2.

² Yihowa Lawishshu maxaafi widoonni baxillunni jawaachishshanno amaale oye tenne assineemmo gede kaaꞌlannonke. Ninke baalunku, labballuno meentuno hattono ajuno akkaluno Lawishshu maxaafi giddo kulloonni amaale xiinxallanke lowo geeshsha kaaꞌlitannonke.

3. Lawishsha 17:3 kultanno garinni wodananke agadhineemmo gede assannonkehu mittu korkaati maati? (Misileno lai.)

³ Wodananke agadha hasiissannonkehu qaru korkaati Yihowa wodananke laꞌꞌanno daafiraati. Hatto yaa, isi mannu gede iima ikkikkinni giddonke lae ayemmanke afanno yaate. (Lawishsha 17:3 nabbawi.) Heeshsho uyitannoti isi aanno amaale surrenke giddo woꞌmitanno gede assiꞌneemmoha ikkiro isi baxannonke. (Yoh. 4:14) Hatto ikkiro, amanyootenna ayyaanaamittenke daafannohu Sheexaanunna isi alamewiinni daanno coyi digawajjannonke.  (1 Yoh. 5:18, 19) Yihowawa albinni roore shinqummo kiiro isira noonke ayirrinyinna baxilli lexxanno. Iimi Annanke dadillisa hasiꞌneemmokki daafira cubbu widira massitanno hedo nafa gimbeemmo. Gara ikkinokkire assate fonqolammeemmo woyite ninkeneeto togo yine xaꞌma hasiissannonke: ‘Lowo geeshsha baxannoeta leellishinoe Magano afanni heeꞌrenni hiitto ikke dadilliseemmo?’—1 Yoh. 4:9, 10.

4. Mitte rodoo Yihowa waajjase gara ikkinokkire assitannokki gede agartinosehu hiittoonniiti?

⁴ Kiroeshiyaho heedhannoti Maarta yinanni rodoo amanyoote bainore assate fonqolantinota coyidhino; ise togo yitino: “Garunni hedanna cubbo loonse shiima yanna hagiirre afiꞌrate hasatto gargadha qarra ikkitinoe. Yihowa waajja kayinni agarooshshe ikkitinoe.” b Yihowa waajja agarooshshe ikkitannohu hiittoonniiti? Maarta busha coye doodha abbitanno gawajjo hiincitinota coyidhino. Ninkeno hatto assa dandiineemmo. Baalunkunni roore gawajjitannoti kayinni Yihowa dadillisatenna hegerera iso magansiꞌra hoogate.—Kal. 6:5, 6.

5. Liyo woꞌnaalshinni maa rosootto?

⁵ Yihowa waajjineemmoha ikkiro bushare assitannori ledo dijaalooꞌmineemmo. Liyo yinannihu Kongote heeꞌranno rodii tenne wodanchino. Isi cuuamihunni shoolu diri gedensaanni bushare assitannori ledo jaalooma kalaqiꞌrino. Isi ‘Anilla busha coye assa hoogummo geeshsha tini soꞌro diꞌꞌikkitino’ yee hedino. Ikkirono mulenni jaallasi quwa sae aganno gedenna amanyoote bainore assanno gede assitinosi. Hakkiinni isi Yihowa Farciꞌraasine ikkino annisinna amasi rosiisinosirenna hoogino hagiirresi hiincino. Tini mayi guma abbituyya? Isi galagale gara ikkinore assa hanafino. Songote cimeeyye kaaꞌlitinosi daafira isi Yihowawa higino. Xaa yannara Liyo songote cimeessanna baxxino suwisaancho ikke hagiirrunni soqqamanni no.

6. Lawishshunniri hiikkuri lame mancho daafira hasaambeemmo?

 ⁶ Hanni Lawishsha fooliishsho 9 xiinxallino; tenne fooliishshora hayyonna hambe lame mancho gede assine heewisiinsanni xawinsoonni. (Roomu Sokka 5:14te nna Galatiyu Sokka 4:24 ledo heewisiisi.) Tenne fooliishsho xiinxallineemmo woyite Sheexaanu alame foorrenna teeda baꞌino misilla calla hendanni gede assitannota deꞌnoonke. (Efe. 4:19) Hakko daafira albinni roore Magano waajjanna bunshetewiinni xeertiꞌra lowo geeshsha hasiissannote. (Law. 16:6) Ninke baalunku labbaahuno ikko meyaati tenne fooliishshonni horo afiꞌra dandiineemmo. Tenne fooliishshora kulloonniri lamenti mancho egenno xeꞌinonsare yaano ‘wodana afidhinokkire’ koyisanni noohu gede assine kulloonni. Lamenti ‘amo miniꞌyara dagge qixxeessoomma sagale iti’ yee koyisanni noohu gede assine kulloonni. (Law. 9:1, 5, 6, 13, 16, 17) Kayinni insa koyishsha maahoyye yee adha abbitanno gumi lowo geeshsha babbaxxinoho.

7. Lawishsha 9:13-18 kultanno garinni hawanya mancho koyishsha adhanno manchi hiikkanno? (Misileno lai.)

⁷ Hanni ‘hawanya’ mancho koyishsha laꞌno. (Lawishsha 9:13-18 nabbawi.) Ise egenno xeꞌinoha “anewa amo” yite cancite woshshitanni ledose itanno gede koyissanno. Tini mayi guma abbitannoyya? “Minisera marannohu baalu reyanno.” Lawishshu maxaafi giddo wole fooliishshora kulloonnita lawishshu yaatto qaagattoha ikkara dandaanno. ‘Arrawunni doggannotanna foora mancho’ qorophineemmo gede kulloonninke. “Minisera haꞌra reyote doogo amadate.” (Law. 2:11-19) Lawishsha 5:3-10 wole ‘foora mancho’ daafira kulloonni; “ise hadhanno doogo reyonnite.”

8. Hiittoo coyi tuncu yaankera dandaanno?

⁸ Hawanya mancho huuro macciishshitannori mitte doodha hasiissannonsa; insa ise koyishsha adhitannonso gibbanno? Ninkerano togoo coyi tuncu yaankera dandaanno. Mittu manchi amanyoote bainore assineemmo gede xixxiiwinkero woy hedeweelcho teeda baꞌino misile laꞌnummoro maa assineemmo?

9-10. Foorre gimbeemmo gede assannonkehu mitu korkaati maati?

⁹ Foorretewiinni xeertiꞌneemmo gede assannohu ikkadu korkaati no. Hawanya mancho, ‘moorre anganni wayi coommanno’ yitanni noohu gede assine kulloonni. “Moorre anganni wayi” maati? Qullaawu Maxaafi minaanninna minaama siimu xaadooshshe asse afiꞌranno hagiirre gooꞌro qolanno wayi gede asse kulanno. (Law. 5:15-18) Konni garinni hagiirre afiꞌra dandaannori seerunni adhamino minaannanna minaama callaho. ‘Moorroonni wayi’  kayinni kawiinni lowo geeshsha baxxanno. Kuni wayi foorre leellishannoho. Mooranno manchi maaxame moorannonte gede fooranno manchino foorannota wolootu affannokki gede assate woꞌnaalanno. Foortannori assootensa wolu manni diafino yite heddanno daafira, kuni ‘moorte aggino wayi’ coommannoha lawansara dandaanno. Tini insaneeto dogate! Yihowa baalankare laꞌꞌanno. Yihowa dadillisate geeshsha qaraarannori dino; hakko daafira togoore assine afiꞌnanniri ‘coommannore’ diꞌꞌikkino. (1 Qor. 6:9, 10) Qoleno wole gawajjono no.

¹⁰ Foorre saallanni gedenna meessaneeto gimbanni gede assitara, hasiꞌnikkinni godowu gatanno gede assitaranna maate diiggara dandiitanno. Hakko daafira hawanya mancho ‘minira’ haꞌranna ise sagale ita giwa hayyote. Batinyu fooranno manni Yihowa ledo noonsa jaalooma huꞌnannotano agurranna foorretenni saꞌꞌanno dhibbinni yannimale reyanno. (Law. 7:23, 26) Lawishsha fooliishsho 9 kiiro 18 “minisera marannohu baalu reyannotanna jeennaate dirrannota” kultanno. Ikkina batinyu manni togoo qarra abbannoha ise koyishsha adhannohu mayiraati?—Law. 9:13-18.

11. Teeda baꞌino misilla laꞌꞌa lowo geeshsha gawajjitanno yineemmohu mayiraati?

¹¹ Qoropha hasiissannonketi mitte rosantino woshshaado teeda baꞌino misillaati. Mitu manni teeda baꞌino misilla laꞌꞌa gawajjitannokkihu gede asse hedanno. Kayinni gawajjitanno, uminkerano ikko wolu mannira ayirrinyu heeꞌrannonkekki gede assitanno hattono togoo misilla laꞌꞌa araado ikkitanno. Teeda baꞌino misilla mitte hinge laꞌnihu gedensaanni surrete giddonni rakke dibaꞌanno. Isinni togoo misilla laꞌꞌa gara ikkitinokki hasatto kakkayissanno ikkinnina tenne hasatto qeeꞌlinanni gede dikaaꞌlitanno. (Qol. 3:5; Yai. 1:14, 15) Teeda baꞌino misilla laꞌꞌannohu batinyu manni foorrete widira haꞌrino.

12. Gara ikkinokkire hendeemmo gede assitankera dandiitanno misilla gimbeemmota leellisha dandiineemmohu hiittoonniiti?

¹² Elektirooniksete uduunnicho horoonsiꞌnanna teeda baꞌino misilla hedeweelcho dagguro ninke Kiristaanu ma assa hasiissannonke? Bayichonkonni tenne misile laꞌꞌa agura hasiissannonke. Noonketi muxxe jiro Yihowa ledo noonke jaalooma ikkitinota qaaganke tenne assate kaaꞌlitankera dandiitanno. Teeda baꞌinokkiti mite misilla nafa gara ikkinokkire hendeemmo gede assitankera dandiitanno. Togoo misilla laꞌꞌa hasiissannonkekkihu mayiraati? Korkaatuno foorrete daafira hendeemmo gede assannonkeha shiima coye nafa assa dihasiꞌneemmo. (Mat. 5:28, 29) Tayilaandete heeꞌrannohu Deevidi yinannihu songote cimeessi togo yiino: “Aneneeto togo yee xaꞌmeemmo: ‘Laeemmo misilla teeda baꞌinota ikka hoogguro nafa togoo misilla duucha hige laꞌꞌaꞌya Yihowa hagiirsiissanno?’ Konni garinni hedaꞌya gara ikkinore asseemmo gede kaaꞌlitinoe.”

13. Gara ikkinore assineemmo gede kaaꞌlannonkeri maati?

¹³ Yihowa dadillisannoha aye coyeno assineemmokki gede waajja, gara ikkinore assineemmo gede kaaꞌlitannonke. “Kaaliiqa waajja egennote umoho.” (Law. 9:10) Tenne yaatto Lawishshu maxaafira fooliishsho 9te hanafora wole lawishshu mancho yaano ‘egenno’ woy addu hayyo kulate horoonsiꞌnoonni.

14. Lawishsha 9:1-6 hiikkonne wole koyishsha kulloonni?

¹⁴ Lawishsha 9:1-6 nabbawi. Konni qummeeshshira addu hayyo Buicho ikkinohunna ninke baalanka Kalaqinohu Yihowa koyisino koyishsha kulloonni. (Law. 2:6; Rom. 16:27) Kowiicho lamala heelliicho afiꞌrinoha mitto jawa mine lawishshunni kulloonni. Kuni lawishshi Yihowa shaqqado ikkinotanna isi  amaale harunsite hayyoota ikka hasidhannore baala anga fane haaꞌrannonsata leellishannoho.

15. Maganu ma assineemmo gede koyisinonke?

¹⁵ Yihowa shaqqadohonna woꞌmanka coye batise aannoho. Lawishshu maxaafa fooliishsho 9te kulloonni mancho yaano “egenno” woy addu hayyo tenne akattasi leellishshanno. Tenne xaggera kulloonniti lawishshu mancho minese hardino booto gorrite woyinete xajjeno worte jila qixxeessitinota kulloonni. (Law. 9:2) Qoleno kiiro 4 nna 5te ise wodana afiꞌrinokkiha, “Amo qixxeessoomma sagale iti” yitannota kulloonni. Tenne mancho minira haꞌranna sagalese ita hasiissannonkehu mayiraati? Yihowa oososi hayyoota ikkitaranna agarooshshe afidhara hasiꞌranno. Isi soꞌro loonse loonsoommo soꞌronni xissiisiꞌne roso afiꞌnammora dihasiꞌranno. Yihowa suwaddaho hayyo woy “egenno aannohu” iseraati. (Law. 2:6, 7) Yihowa gara ikkitino doogonni waajjineemmoha ikkiro iso hagiirsiisa hasiꞌneemmo. Isita hayyo uyitanno amaale macciishshineemmo; hattono tenne amaale loosu aana hosiisa hagiirsiissannonke.—Yai. 1:25.

16. Aleeni Magano waajjasi gara ikkinore doodhanno gede kaaꞌlitinosihu hiittoonniiti? Tini mayi guma abbituyya?

¹⁶ Hanni Aleeni yinanni rodoo Magano waajja gara ikkinore doodhanno gede kaaꞌlitinosi gara laꞌno. Aleeni songote cimeessaatinna rosiisaanchoho; isi togo yiino: “Batinye ledoꞌya rosiissanno rosiisaano teeda baꞌino misilla leellishshanno filme siimu xaadooshshi daafira rosiinsanni rosi gede assite laꞌanno.” Aleeni kayinni didogamino. Isi togo yiino: “Ani Yihowa waajjeemmo daafira tenne filme tiyyiꞌre giwoommo. Qoleno togoo filme laeemmokkihu mayiraatiro ledoꞌya rosiissannorira xawise kuloommonsa.” Isi, “wodanchate doogo higge haꞌri” yitannota addu hayyo amaale harunsino. (Law. 9:6) Aleeni ledo rosiissannori mite rosiisaano tenne dhagge assidhino daafira Qullaawa Maxaafa xiinxallanna songote gambooshshe daa hanaffino.

17-18. Addu hayyo koyissanno koyishsha adhanno manni xaa yannara afiꞌranno atooti maati? Albillitte mayi atoote afiꞌrannoyya? (Misileno lai.)

¹⁷ Yihowa lawishshunnita lame mancho horoonsiꞌre albillitte afiꞌneemmo atootira kaima ikkannore kulinonke. ‘Hawanya’ mancho koyishsha macciishshite adhitannori foorre afiꞌnanni hagiirre afiꞌrate woꞌnaaltanno. Ikkirono insa loossanno loosi albillitte mayi qarra abbannonsaro diwodanchitanno. Assootinsa insa ‘reyote’ widira massannonsa.—Law. 9:13, 17, 18.

¹⁸ Manchote gede assine kulloonni ‘egenno [addu hayyo]’ koyishsha adhitannori afidhanno coyi kayinni baxxinoho! Insa ayyaanaamittensara hasiisannonsa coye baala afidhanno daafira hagiirraammaho. (Isa. 65:13) Yihowa masaalaanchu Isayaasi widoonni, “Ani yeemmota  macciishshitinoommero, woyyitino sagale afidhine hagiidhitinanni” yiino. (Isa. 55:1, 2) Ninke Yihowa baxannore baxanna isi giwannore giwa ronsanni heeꞌnoommo. (Far. 97:10) Qoleno wolootu addu hayyonni hagiirre afidhanno gede koyinseemmo daafira hagiirraammaho. Katamu tullichira uurrine, “Egenno xeꞌinohu baalu anewa amo!” yine woshshinanni heeꞌnoommohu gedeeti. Ninkeno ikko koyishsha macciishshite adhitannori afidhanno horo xaata calla diꞌꞌikkitino; afiꞌneemmo atooti hegereho. Kuni atooti ‘wodanchate doogora haꞌnanni’ hegerera heeꞌneemmo gede assannonkeho.—Law. 9:3, 4, 6.

19. Rosiisaancho 12:13, 14 kultanno garinni maa assate murciꞌra hasiissannonke? (“ Magano Waajja Kaaꞌlitannonke” yitanno saaxineno lai.)

¹⁹ Rosiisaancho 12:13, 14 nabbawi. Tenne goofimarchu yannara Magano waajja wodananke agartannonke; hattono amanyootunninna ayyaanaamittetenni xuru nookkire ikkine heeꞌneemmo gede kaaꞌlitannonke. Magano gara ikkitino doogonni waajja, dandaami deerrinni lowo manni addu hayyo hasiꞌranno gedenna tini hayyo uyitanno horo afiꞌranno gede koyisate kakkayissannonke.