1. Yihowa barra gante saˈˈate maa assa hasiissannonke?

 QULLAAWU MAXAAFI ‘Yihowa barra’ yaannohu, Yihowa diinnasi hunannonna mannasi gatisanno yanna kulateeti. Yihowa konni albaanni mite daga qorichishino yanna no. (Isa. 13:1, 6; Hiz. 13:5; Sof. 1:8) Yannankera, ‘Yihowa barri’ Bayira Baabiloone baonni hanafe Armagedooni olinni gumulamanno. Hakko “barra” gante saˈˈate xaanni qixxaawa hasiissannonke. Yesuusi “lowo qarri” woy bayiru qarrira qixxaambeemmo gede calla ikkikkinni ‘qixxaambe agadhineemmo’ gede rosiisinonke.—Mat. 24:21; Luq. 12:40.

2. Umi Teselonqera noo amaale kaaˈlitannonke yineemmohu mayiraati?

² Soqqamaasinchu Phaawuloosi qullaawu ayyaani massageennasi Teselonqe heeˈranno Kiristaanira borreessinote umi sokkara, Kiristaanu Yihowaha bayira yoote barra qixxaawe agadhanno gede kaaˈlate duucha lawishsha horoonsiˈrino. Phaawuloosi Yihowa barri hakkawoyintenni daannokkita afino. (2 Tes. 2:1-3) Ikkirono isi ammanate roduuwisi hakku barri gaˈa daannohu gede assite hedde qixxaabbanno gede amaalinonsa; ninkeno tenne amaale loosu aana hosiisa dandiineemmo. Hanni Phaawuloosi, (1) Yihowa barri daannohu hiittoonniitiro, (2) konne barra gatte saˈannokkiri ayeootironna (3) konni barrira qixxaawa dandiineemmohu hiittoonniitiro xawisino gara laˈno.

3. Yihowa barri hashshi mooraanchi gede ikke daannohu hiittoonniiti? (Misileno lai.)

³ “Hashshi mooraanchi gede ikke.” (1 Tes. 5:2) Kuni, Yihowa barri daanno gara kulate horoonsiˈnoonnihu sasu lawishshi giddo  umiho. Duucha woyite mooraano daggannohu hashsha tunso goˈlite mannu hedinokki yannaraati. Yihowa barri daannohuno hedeweelcho rooru manni hedinokki yannaraati. Coyi rahe soorramanno gari addu Kiristaanira nafa dhagge ikkansara dandaanno. Ikkirono ninkera bushuullu gede bao diˈˈiillitannonke.

4. Yihowa barri godowinni noo mancho amaddanno game gede ikkinohu hiittoonniiti?

⁴ ‘Godowinni noo mancho amaddanno game gede ikke.’ (1 Tes. 5:3) Godowinni noo mancho game hanaffannose yanna diaffanno. Ikkirono ise game amaddannoseta dihuluullantanno. Game amaddannose woyite hedeweelcho amaddannose, lowo geeshsha dhiwannose hattono game diuurritanno. Hatteente gede Yihowa barri hanafanno yannanna barra dianfoommo. Ikkirono, Maganu barri dayikki gatannokkita, bushuulleho kuni yoote barri hedeweelcho daannotanna insa gatte saˈannokkita anfoommo.

5. Bayiru qarri soodimaroho saaqqanno duuˈmo gede ikkinohu ma garinniiti?

⁵ Duuˈmo saaqqannohu gede ikke. Phaawuloosi sayikki lawishshira mooraano moortannohu hashsha ikkinota lede xawisino. Kayinni Phaawuloosi konni lawishshira Yihowa barra soodo saaqqanno duuˈmo ledo heewisiisino. (1 Tes. 5:4) Hashsha dagganno mooraano moortanno coye illachishshanno daafira yanna gooffanni noonsata huwata hooggara dandiitanno. Hashshu hedeweelcho soodeenna insa mannu amadara dandaanno. Hatteente gede Magano dadillisannore assitanni mooraanote gede tunsote keeshshitinore bayiru qarri xawo fushshannonsa. Insa gede ikkikkinni ninke Yihowa dadillisannore gimbe, “addi addi danchumma, keeraanchimmanna halaale” ikkino coye assine konni barrira qixxaawa dandiineemmo. (Efe. 5:8-12) Phaawuloosi hakkiinni aane konne barra gatte saˈannokkire kulate, xaadooshshe afiˈrinoha lame lawishsha horoonsiˈrino.

6. Rooru manni goxinohu ma garinniiti? (1 Teselonqe 5:6, 7)

⁶ ‘Goxxannoreeti.’ (1 Teselonqe 5:6, 7 nabbawi.) Phaawuloosi Yihowa barra gatte saˈannokkire goxino manni ledo heewisiisino. Goxino manni qooxeessinsara ikkannorenna yanna gooffannota diafanno. Hakko daafira insa ikkanni nooha lowo geeshsha hasiisanno coye diaffanno; hattono assite affannori dino. Xaa yannara noohu rooru manni ayyaanaamittetenni goxe no. (Rom. 11:8) Kuni manni heeˈnoommohu “goofimarchu yannara” ikkinotanna bayiru qarri mulenni hanafannota leellishshanno malaatta diammananno. Alamete aana ikkannohu jajjabbu coyi mitu manni sabbankeemmota Maganu Mangiste sokka macciishshanno gede assara dandaanno. Ikkirono lowo manni baqqi yee heeˈra agure galagale goxanno. Yihowa barri daannota ammanannohu mitu manni nafa kuni barri keeshshannohu gede asse hedanno. (2 Phe. 3:3, 4) Ikkirono ninke, baqqi yine heeˈneemmo gede kulloonninke amaale hashshe soodi kiiro roore hasiissannota ikkitinota wodanchineemmo.

7. Maganu hanqi iillannonsare dimbino manni ledo heewisiinsoonnihu mayiraati?

⁷ ‘Dimbitannoreeti.’ Phaawuloosi Maganu hanqi iillannonsare dimbanno manni ledo heewisiisino. Dimbino manni qooxeessinsara ikkannore rahe afa didandaanno; hattono gara ikkinokkire assanno. Hatteente gede bushuullu Maganu qorowishsha macciishshite diadhitanno. Insa baote widira massannonsare assa doodhitanno. Kayinni Kiristaanu jilbunni heeˈranno gede kulloonninsa. (1 Tes. 5:6) Mittu Qullaawu Maxaafi fullahaanchi togo yiino: “Jilbunni heeˈranno manchi wodanaaˈmanno hattono dimasanno; togoo manchi seekke hedanno daafira gara ikkinore doodha dandaanno.” Wodanaaˈmineemmorenna manseemmokkire ikka hasiissannonkehu mayiraati? Xaa yannara noohu poletikunna dagoomittete coyira anga wodhineemmokki gedeeti. Yihowa barri gambise dayi kiiro kuri coyibbara anga wodhineemmo gede xixxiiwannonkeri lexxanni haˈranno. Ikkirono, togoo coyi tuncu yiinkero ma assineemmo yine yaada dihasiissannonke. Maganu ayyaani wodanaaˈmineemmonna manseemmokki gede hattono gara ikkinore doodhineemmo gede kaaˈlannonke.—Luq. 12:11, 12.

8. Umi Teselonqe 5:8te baqqi yinenna jilbunni heeˈneemmo gede kaaˈlitannonke akatta lawishshunni kulloonnihu hiittoonniiti? (Misileno lai.)

⁸ “Siwiilu uddano uddiˈno. . . . Siwiilu gullee . . . umoho wodhino.” Phaawuloosi ninke, baqqi yee agadhinohunna olu uduunne uddiˈrino olamaanchi ledo heewisiisino. (1 Teselonqe 5:8 nabbawi.) Olamaanchu woˈmanka woyite olaho qixxaawe agadha hasiissannosi. Ninkeno woˈmanka woyite qixxaambe agadha hasiissannonke. Ammanannitanna baxillunnita siwiilu uddano uddiˈne hattono hexxonke siwiilu gullee gede umoho wodhine Yihowa barrira qixxaambe heeˈra dandiineemmo. Kuri akatta lowo geeshsha kaaˈlitannonke.

9. Ammana agarooshshe ikkitannonkehu hiittoonniiti?

⁹ Siwiilu uddano olamaanchu wodana agartanno. Hatteente gede baxillunna ammana lawishshu wodananke agartanno. Kuri akatta Maganoho soqqamanninna Yesuusa harunsinanni heeˈneemmo gede kaaˈlitannonke. Ammana woˈmu wodaninkenni Yihowa hasiˈnummoro isi baˈraasannonketa buuxissannonke. (Ibi. 11:6) Qoleno qarru amadinkero nafa Massagaanchinke Yesuusira ammanamme heeˈneemmo gede assitannonke. Dartu iillinsarono woy angate anje amaddunsarono, minshe noonsakkire ikkite heedhinori yannankera noo roduuwi lawishshi iillannonke qarra dandiine saˈˈate hasiissanno ammana heedhannonke gede kaaˈlannonke.  Maganu Mangiste balaxisiisate yite heeshshonsa bikkunnita assidhino roduuwi lawishsha harunsanke woxu baxilli woshshaado qorophineemmo gede kaaˈlitannonke. b

10. Maganohonna mannaho noonke baxilli cincineemmo gede kaaˈlannonkehu hiittoonniiti?

¹⁰ Baxillu baqqi yinenna jilbunni heeˈrateno kaaˈlannonke. (Mat. 22:37-39) Sabbaka qarru iillannonke gede assitannonkeha ikkiro nafa, Maganoho noonke baxilli agurrummokkinni sabbankeemmo gede kaaˈlannonke. (2 Xim. 1:7, 8) Yihowa Farciˈraasine ikkinokki mannano banxeemmo daafira qoqqowinkera noo mannira sabbankeemmo; silke dowwollenna borrote sokka borreessine nafa farciˈra diagurreemmo. Qoqqowinkera noo manni barrunni mitto barra soorrame gara ikkinore assa hanafanno yine hexxa diagurreemmo.—Hiz. 18:27, 28.

11. Ammanate roduuwinkera noonke baxilli kaaˈlannonkehu hiittoonniiti? (1 Teselonqe 5:11)

¹¹ Ammanate roduuwankeno banxeemmo. ‘Mimmito jawaachinshenna dhaambe’ insa banxeemmota leellinsheemmo. (1 Teselonqe 5:11 nabbawi) Mitte garo ikkite olantanno olamaano gede ninkeno mimmito jawaachinsheemmo. Hige mittu olamaanchi garosi ikkino olamaancho gawajjara dandaanno; kayinni isi afanni heeˈrenni horonta digawajjanno. Hatteente gede ninkeno anfanni heeˈnenni ammanate roduuwanke horonta digawajjineemmo; woy dirabbisiˈneemmo. (1 Tes. 5:13, 15) Qoleno songote giddo albisa ikkite soqqantanno roduuwa ayirrinse baxillenke leellinsheemmo. (1 Tes. 5:12) Phaawuloosi tenne sokka Teselonqe noo songora borreessi yannara songo xintantunkunni mitto diro diˈˈikkino. Tenne songora noori shoomantino labballi woˈnaalshu noonsakkire ikkitara dandiitanno; hattono soˈro loossinoha ikkara dandaanno. Ikkirono roduuwu insa ayirrisa hasiissannonsa. Bayiru qarri roore gambise daanno woyite, xaa yannanni roore biddishsha afiˈneemmohu songote cimeeyyewiinni calla ikkara dandaanno. Hatte yannara qara biironni woy sinu biironni biddishsha afiˈra hoongammora dandiineemmo; hakko daafira xaanni songote cimeeyye baxanna ayirrisa rosa hasiissannonke. Ikkirino ikkiro, insata guuntete xeˈnensa  illachisha agurre Yihowa Kiristoosi widoonni kuri ammanantino labballo massaganni noota leellishshanno taje illachinshe jilbunni heeˈno.

12. Hexxonke hedonke agartannohu hiittoonniiti?

¹² Gullee olamaanchu wodana agartannonte gede gatote hexxonkeno hedonke agartanno. Hexxonke kaajjado ikkituro tini alame shiqishshannori kaaˈlannori nookkita huwanteemmo. (Fil. 3:8) Hexxonke wodanaaˈmineemmonna manseemmokki gede kaaˈlitannonke. Afirikaho soqqamannori Waalesinna Laworinda woˈnaalshi tenne leellishanno. Insa sase lamala giddo calla amansanna annansa shiiˈrino. Koroonu fayya ubbe noo daafira insa maatensa jawaachishate qaera haˈra didandiino. Waalesi togo yee borreessino: “Kaote hexxo insa tenne alamera heedhinota jeefote heeshshonsa ikkikkinni haaro alamera heedhannota hanafote heeshshonsa hedeemmo gede assitinoe. Tini hexxo dadilleemmo woy manchiteemmo woyite wodanaaˈmeemmo gede kaaˈlitinoe.”

13. Qullaawa ayyaana afiˈrate maa assa dandiineemmo?

¹³ “Qullaawu ayyaani giira xoyissitinoonte.” (1 Tes. 5:19) Phaawuloosi qullaawa ayyaana giddonke noo giira gede asse xawisino. Qullaawu ayyaani heeˈrinkero gara ikkinore assate diinaggaambeemmo; hattono quqquxammeemmo. Qoleno Yihowara soqqamate wolqa afiˈneemmo. (Rom. 12:11) Qullaawa ayyaana afiˈrate maa assa dandiineemmo? Huuccatto assiˈra, qullaawu ayyaaninni borreessinoonniha Maganu Qaale xiinxallanna ayyaanisinni massagantannote Yihowa dirijjite wido ikka dandiineemmo. Togo assa ‘qullaawu ayyaani laalo’ wido ikkitino akatta heedhannonke gede kaaˈlitannonke.—Gal. 5:22, 23.

14. Woˈmanka woyite Maganu ayyaana afiˈrate maa assineemmokki gede qoropha hasiissannonke? (Misileno lai.)

¹⁴ Maganu ayyaana afiˈnummohu gedensaanni ‘qullaawu ayyaani giira xoyissineemmokki gede’ qoropha hasiissannonke. Maganu qullaawa ayyaanasi aannohu gara ikkinore heddannoriranna danchu amanyooti noonsarira callaati. Isi gara ikkinokkire hendeemmonna assineemmoha ikkiro qullaawa ayyaanasi diaannonke. (1 Tes. 4:7, 8) Woˈmanka woyite qullaawa ayyaana afiˈrate ‘himanano minsheemmokki gede’ qoropha hasiissannonke. (1 Tes. 5:20) Konni  qummeeshshira ‘himana’ yinoonnihu Maganu ayyaanisi widoonni kulannonke sokkaati; tenne sokka giddo gama Yihowa barri daafiranna heeˈnoommohu gooffe daggino yanna giddo ikkinota kultannote. Yihowa barri woy Armagedooni ninke yannara didaanno yine heda dihasiissannonke. Hatteentenni barru baala danchu amanyooti heeˈrannonke gede assiˈnenna ‘Magano lawatenni heeˈneemmota’ leellishannore assine Yihowa barri gambisinohu gede assine heda dandiineemmo.—2 Phe. 3:11, 12.

15. Kaphu mashalaqqenni woy agaanintete totainni dogammeemmokki gede maa assa dandiineemmo? (1 Teselonqe 5:21)

¹⁵ Muli yannara Magano gibbannori “Keereho qarru dino” yaanno duduwo dudubbanno. (1 Tes. 5:3) Hatte yannara agaanintete totai uulla woˈmanno hattono lowo manna soˈrisiisanno. (Aju. 16:13, 14) Ninkena? ‘Baalanka coye fonqolle laˈnummoro’ konni totainni didogammeemmo. (1 Teselonqe 5:21 nabbawi.) “Fonqole laˈˈa” yine tirroonniti Giriikete afii yaatto mittu siwiili addunnihoronna teˈee fonqolle laˈˈate horoonsiˈnannite. Hatteente gede ninkeno macciishshineemmo woy nabbambeemmo coyi garahoronna teˈee buuxate fonqolle laˈˈa hasiissannonke. Teselonqe Kiristaani hatto assa hasiissinonsa; ninkeno bayiru qarri gambise dayi kiiro albinni roore hatto assa hasiissannonke. Wolootu yitannore sammi yine ammanantenni hedate dandoonke horoonsiˈne macciishshinoommorenna nabbamboommore Qullaawu Maxaafinna Yihowa dirijjite yitannori ledo heewisiinse laˈˈa hasiissannonke. Hatto assineemmoha ikkiro agaanintete totainni didogammeemmo.—Law. 14:15; 1 Xim. 4:1.

16. Huluullissannokkiti hiitti hexxo noonke? Maa assate murciˈrootto?

¹⁶ Maganu soqqamaano gaamote deerrinni bayira qarra gatte saˈanno. Ikkirono annu annu deerrinni gaˈa mayi iillannonkero dianfoommo. (Yai. 4:14) Kayinni lubbotenni heeˈne bayira qarra gante saˈnummoro woy bayiru qarri daara albaanni reyinummorono ammanamme heeˈnummoro hegere heeshsho baˈraaˈra afiˈneemmo. Buurantinori Kiristoosi ledo iima heedhanno. Wolootu geˈreewi kayinni gannate ikkitino uullara heedhanno. Ninke baalunku dhagge ikkitanno hexxonke illachinsho hattono Yihowa barrira qixxaambe heeˈno!