XIINXALLOTE BIRXICHO 23
FAARSO 28 Yihowa Jaala Ikka
Yihowa Wosinasi Ikkinammora Koyisinonke
“Anino hakkiicho insa ledo heeꞌreemmo. Ani Maganonsa ikkeemmo.”—HIZ. 37:27.
GUULCHO HEDO
Yihowahu lawishshu dunkaani giddo isi wosina ikkate yaa mayyaateronna hakkiicho isi towaatannonkehu hiittoonniitiro albinni roore huwanteemmo.
1-2. Yihowa ammanantino soqqamaanosi maaho koyisino?
YIHOWA atera maakkiiti yine xaꞌminihero mayyaatto? ‘Isi Annaꞌyaati, Maganoꞌyaati hattono Jaalaꞌyaati’ yite qolattoha ikkara dandaanno. Qoleno Yihowa wolu garinni xawisattoha ikkara dandaanno. Ikkirono Yihowa wosinsiꞌrannohehu gede assite hedde egennoottoyya?
2 Moote Daawiti Yihowanna ammanantino soqqamaanosi mereero noo jaalooma wosinsiꞌranno manchinna wosinisi mereero noo jaaloomi ledo heewisiisino. Isi “Kaaliiqa, minekki galannohu ayeti? Qullaawu Ilaalikki iima heeꞌrannohu ayeti?” yiino. (Far. 15:1) Tenne qullaawu ayyaaninni borreessinoonni hedonni Yihowa wosina yaano jaallasi ikka dandiineemmota ronseemmo. Tini ninkera lowo ayirrinyeeti!
YIHOWA WOSINASI IKKINAMMORA HASIꞌRANNO
3. Yihowa umo wosinsiꞌrinohu ayeti? Hakkawoyite isinna wosinchisi hiitto ikkitino?
3 Yihowa baalanka coye kalaqara albaanni callisi heeꞌranno. Hakkiinni umo Beettosi kalaqino; Yihowa mite yee dunkaanisi giddo iso wosinsiꞌrino. Isi tenne assasinni lowo geeshsha hagiidhino. Qullaawu Maxaafi Yihowa Beettisinni ‘hagiidhinota’ kulanno. Umi wosinchisino Yihowa albaanni ‘tashshi yaannasi heeꞌrino.’—Law. 8:30.
4. Yihowa sunu sununni dunkaanisira woloota koyisinohu hiittoonniiti?
4 Yihowa gedensoonni wole ayyaanu kalaqo kalaqino; insano wosinasi ikkitanno gede koyisino. Qullaawu Maxaafi sokkaasine “Maganu ooso” ikkitinota kulanno; hattono insa Yihowa ledo heeꞌransanni hagiidhitino. (Iyo. 38:7, NW; Dan. 7:10) Mite yanna geeshsha, Maganu jaalla ikkite heedhinori iima isi heeꞌrannowa heedhannore callaati. Gedensoonni isi uullate aana mannu ooso kalaqino; insano wosinasi ikka dandiitino. Kuri wosini giddo gamu Heenookiiti, Nohiiti, Abirihaamiitinna Iyyoobiiti. Kuri Magano halaalunni magansidhinoreeti Maganu jaallaati woy “halaalaanchu Magani ledo” qaaffinoreeti yinoonninsa.—Kal. 5:24; 6:9; Iyo. 29:4; Isa. 41:8.
5. Hiziqeeli 37:26, 27te noo masaalonni maa ronseemmo?
5 Yihowa lowo xibbe diro wosinasi ikkitanno gede jaallasi koyisanni keeshshino. (Hiziqeeli 37:26, 27 nabbawi.) Lawishshaho, Hiziqeeli masaalonni Maganu ammanantino soqqamaanosi Isi ledo kaajja jaalooma kalaqidhara hasiꞌrannota ronseemmo. Isi “keere heedhanno gede hegere gondooro eꞌꞌeemmonsa” yee qaale eino. Tini masaalo, iimira haꞌrate hexxo noonsarinna uullate aana heeꞌrate hexxo noonsari lawishshu dunkaanisi giddo “mitte hoshsha” ikkitanno yanna leellishshanno. (Yoh. 10:16) Hatti yanna xaati!
HEEꞌNEEMMOWI IKKIWANO IKKIRO MAGANU TOWAATANNONKE
6. Mittu manchi Yihowa dunkaani giddo wosincho ikkannohu hiittoonniiti? Yihowa dunkaani noohu hiikkooti?
6 Hundi waro mittu manchi dunkaana qasiꞌrannohu fooliishshiꞌranno basenna agarooshshe afiꞌrateeti. Hakko dunkaanira eara koyinsoonnisi manchi dancha gede towaantannisita hexxanno. Heeshshonke Yihowara sayinse uyineemmo woyite, isihu lawishshu dunkaani giddo wosinasi ikkineemmo. (Far. 61:4) Falakkinota ayyaanaamittete sagale afiꞌneemmo; hattono Yihowa wosina ikkitinori wolootu ledo jaalooma kalaqiꞌneemmo. Yihowahu lawishshu dunkaani mitte basera calla nooha diꞌꞌikkino. Baxxino gambooshshira wole gobba haꞌroottohanna Yihowa dunkaani giddo heeꞌransanni hagiirraamma ikkitinori wolootu ammanate roduuwikkinni xaadoottoha ikkara dandaanno. Hajajantanno soqqamaanosi noowa baalankawa Yihowa dunkaani no.—Aju. 21:3.
7. Ammanante reyitinori Yihowa soqqamaano xaa geeshsha Yihowa dunkaani giddo wosina ikkite no yineemmohu mayiraati? (Misileno lai.)
7 Ammanante reyitinori Yihowa soqqamaano hiikkitannoyya? Insa xaa geeshsha Yihowa dunkaani giddo wosina ikkite no yine heda dandiineemmo? Ee! Hatto yineemmohu mayiraati? Korkaatuno insa Yihowa albaanni lubbotenni nooreeti. Yesuusi togo yiino: “Ikkollana Muse nafa citu daafira kultanno xaggera Yihowa, ‘Abirihaami Magano, Yisaaqi Maganonna Yaaqoobi Magano’ yii woyite, reyitinori kaꞌannota egensiisino. Isi lubbote noori Maganooti ikkinnina reyitinori Magano diꞌꞌikkino; korkaatuno baalunku isi illera lubbote nooreeti.”—Luq. 20:37, 38.
Ammanante reyitinori nafa Maganu dunkaani giddo wosina ikka dandiitanno (Gufo 7 lai)
AFIꞌNEEMMO ATOOTENNA ASSA HASIISSANNONKERE
8. Yihowa dunkaani giddo heeꞌrankenni afiꞌneemmo horo maati?
8 Hundi yannara mannu dunkaana qasiꞌrannohu heeꞌratenna agarooshshe afiꞌrate ikkinonte gede, Yihowa dunkaani giddo heeꞌranno mannino ayyaanaamittensa gawajjanno coyinni gatanno, hattono hexxo heedhannonsa. Yihowawa gamba yine heeꞌneemmoha ikkiro Sheexaanu hegerera gawajjannonkere assa didandaanno. (Far. 31:23; 1 Yoh. 3:8) Yihowa haaro alamerano ammanantino jaallasi ayyaanaamittensa gawajjanno coyinni agarannonsa; hattono hatte yannara reyo hoolanno.—Aju. 21:4.
9. Yihowa, wosinisi maa assara hasiꞌranno?
9 Yihowa dunkaani giddo wosina ikka, yaano isi ledo geedote jaalooma kalaqiꞌra ninkera lowo ayirrinyeeti! Wosinasi ikkine heeꞌra hasiꞌneemmoha ikkiro maa assa hasiissannonke? Mittu manchi minisira koyisihero isi maa assattora hasiꞌrannoro afa hasiꞌratto. Lawishshaho, isi minira eatto woyite caamma fushshiꞌrattora hasiꞌrannoha ikkara dandaanno; atino umikki fajjonni hatto assatto. Hatteente gede ninkeno Yihowa dunkaanisi giddo wosina ikke heeꞌranno manni maa assara hasiꞌrannoro afa hasiꞌneemmoti egennantinote. Yihowara noonke baxilli woꞌmante doogonni ‘iso hagiirsiisate’ dandiinummore baala assineemmo gede kakkayisannonke. (Qol. 1:10) Yihowa Jaalinke gede assine laꞌneemmoha ikkirono, isi ayirrinyu hasiisannosiha Maganonkenna Annanke ikkinotano dideꞌneemmo. (Far. 25:14) Tenne wodanaho wodhine woꞌmanka woyite iso ayirrisa hasiissannonke. Yihowa konni garinni ayirrisanke iso dadillisannore qorophineemmo gede kaaꞌlitannonke. Woꞌmanka woyite Maganinke ledo ‘dhukanke anfe’ heeꞌra hasiꞌneemmo.—Mik. 6:8, NW.
YIHOWA HALALLA MALLAADANNOKKIHA IKKASI LEELLISHINO GARA
10-11. Yihowa Siina halallira Israeelete assinori mallaadannokkiha ikkasi leellishinohu hiittoonniiti?
10 Yihowa wosinasi dimallaadanno. (Rom. 2:11) Yihowa Siina halallira Israeelete assinorinni isi mallaadannokkiha ikkinota huwanteemmo.
11 Yihowa mannasi Gibitsete borojjimmanni fushshihu gedensaanni, xaadooshshu dunkaaniwa kakkalaano ikkite soqqantannore shoomino. Qullaawu dunkaani ledo xaadooshshe afiꞌrinoha wole looso loossanno gede Leewaawoota gaammoonni. Xaadooshshu dunkaanira soqqantannore woy dunkaanansa xaadooshshu dunkaani mule qasidhinore Yihowa wolootunni roorse towaatinoni? Ditowaatino! Isi dimallaadannoho.
12. Yihowa haarote xintantino dagasira mallaadannokkiha ikkasi leellishinohu hiittoonniiti? (Fulo 40:38) (Misileno lai.)
12 Soqqamannohu xaadooshshu dunkaani giddo ikkirono ikka hoogirono woy dunkaana qasiꞌrinohu xaadooshshu dunkaani mule woy xeertote ikkirono, kaampete giddo heeꞌrannohu mittu mittunku Israeelichi Yihowa ledo muli jaalooma kalaqiꞌra dandaanno. Lawishshaho, Yihowa xaadooshshu dunkaanira umoonni nooti gomichu heelliichonna giirate heellicho baalunku Israeelete mannira leeltanno gede assino. (Fulo 40:38 nabbawi.) Gomichu haꞌra hanafanno woyite dunkaanansa xaadooshshu dunkaaniwiinni xeertiꞌre qasiꞌrino mannino laꞌꞌa dandaanno; hakkiinni insa uduunnensa gamba assiꞌra, dunkaanansa diiganna wolu Israeelete manni ledo taalo haꞌra dandiitanno. (Kir. 9:15-23) Mannu noowiinni haꞌra hanafanno gede, birra daashshine seekkinoonniha lame xurumba ufuunfanni woyite baalunku macciishsha dandaanno. (Kir. 10:2) Hakko daafira xaadooshshu dunkaaniwa heeꞌra calla Yihowa ledo muli jaalooma kalaqiꞌnanni gede diassitanno. Hatteentenni haarote xintantinote Yihowa daga giddo noohu mittu mittunku Yihowa wosincho ikka hattono biddishshanna agarooshshe afiꞌra dandaanno. Hatteente gede, ninkeno xaa yannara heeꞌneemmo bayichi ikkihano ikkiro, Yihowa baxannonke, towaatannonke hattono agarannonke.
Maganu xaadooshshu dunkaani kaampete mereero heeꞌranno gede assasi isi mallaadannokkiha ikkinota leellishshanno (Gufo 12 lai)
YIHOWA MALLAADANNOKKIHA IKKASI LEELLISHANNOHA YANNANKERA NOO LAWISHSHA
13. Yihowa xaa yannara mallaadannokkiha ikkasi leellishinoti mitte doogo hiittenneeti?
13 Xaa yannara Maganu manni giddo mitu heeꞌrannohu Yihowa Farciꞌraasinete qara biiro woy sinu biiro qooxeessiraati. Mitu roduuwi isinni soqqantannohu hakkooti. Hakko daafira insa hakko loonsanniha batinye looso loossanno hattono albisa ikkite soqqantannori ledo muli jaalooma kalaqidhara dandiitanno. Wolootu woradu aliidi laꞌꞌaano ikkite woy wolu garita baxxitinota woꞌma yanna soqqansho soqqantanno. Atino xaa yannara kuri qoosso afiꞌrinokkihu rooru manni wido ikkoottoha ikkiro wosinsiꞌrannonkehu Yihowa iso hagiirsiissannore baalanka baxannota deꞌooti. Isi mitto mittonka egenninonke hattono towaatannonke. (1 Phe. 5:7) Baalunku Maganu manni ayyaanaamittete sagale, biddishshanna hasiisannonsa agarooshshe afiꞌranno.
14. Yihowa mallaadannokkiha ikkasi leellishinoti wole doogo hiittenneeti?
14 Yihowa mallaadannokkiha ikkasi leellishinoti wole doogo, alamete aana noo manni baalunku Qullaawa Maxaafa afiꞌranno gede asseeti. Umo Qullaawa Borro borreessinoonnihu Ibiraawootu, Aremayiketenna Giriikete afiinniiti. Umo Qullaawa Maxaafa borreessinoonni afoo nabbawa dandiitannori konne afoo dandiitannokkirinni roore Yihowa ledo muli jaalooma kalaqidhannoni? Deeꞌni.—Mat. 11:25.
15. Yihowa mallaadannokkiha ikkasi leellishshanno taje maati? (Misileno lai.)
15 Yihowa jaallasi ikkineemmo gede koyisannonkehu lowo roso ronsoommo daafira woy hunda Qullaawa Maxaafa borreessinoonni qaale dandiineemmo daafira diꞌꞌikkino. Yihowa lowo roso rosino manni calla ikkikkinni, alamete aana noohu baalunku manni isi aanno hayyo afiꞌranno gede assino. Qullaawu ayyaaninni borreessinoonniha Qaalesi yaano Qullaawa Maxaafa lowo kume ikkanno afiinni tirroonni; hakko daafira alamete aana noo manni Qullaawu Maxaafi rosiisanno rosinni horo afiꞌranna Maganu jaalla ikkinanni gara rosa dandaanno.—2 Xim. 3:16, 17.
Maganu Qullaawa Maxaafa baalunku manni afiꞌranno gede assasi isi mallaadannokkiha ikkinota leellishshannohu hiittoonniiti? (Gufo 15 lai)
YIHOWA HAGIIRSIISSINANNI HEEDHE
16. Soqqamaasinete Looso 10:34, 35 yitanno garinni Yihowa hagiirsiinsanni heeꞌra dandiineemmohu hiittoonniiti?
16 Yihowahu lawishshu dunkaani giddo wosina ikka lowo ayirrinyeeti. Isi shaqqadoho, baalunkunni roore baxillaanchoho hattono wosina adhate taalle dinoosiho. Hakkiino sae isi dimallaadannoho; heeꞌneemmo bayichi, budinke, rosinke deerri, sirchinke, gaꞌrenke, dirinke ikkihano ikkiro labbaaha woy meyatano ikkinummoro isi anga fane haaꞌrannonke. Ikkirono Yihowa anga fane wosinimma haaꞌrannohu isira hajajantannore callaati.—Soqqamaasinete Looso 10:34, 35 nabbawi.
17. Yihowa dunkaani giddo wosincho ikkate daafira wole taje afiꞌra dandiineemmohu hiikkiinniiti?
17 Faarso 15:1 Daawiti, “Kaaliiqa, minekki galannohu ayeti? Qullaawu Ilaalikki iima heeꞌrannohu ayeti?” yee xaꞌmino. Faarsaanchu qullaawu ayyaani massageennasi kuri xaꞌmuwara dawaro qolino. Aananno birxichira Yihowa hagiirsiinsanni heeꞌrate assa hasiissannonkeha mito coye ronseemmo.
FAARSO 32 Yihowa Wido Ikki!
