Nabbawaano Xaꞌmitanno Xaꞌmo
Faarso 12:7 ma garinni huwata hasiissannonke?
Qooxeessaho noo hedo kuni qummeeshshi kulanni noohu mannu daafira ikkinota leellishshanno.
Faarso 12:1-4te “ammanamino mannino dino” yitanno hedo no. Hanni hakkiinni Faarso 12:5-7 geeshsha noo hedo mayitannoro laꞌno.
“Kaaliiqi kayinni, ‘Buxanete qarrira,
mitiimmaammu raarera,
xa kaeemmo;
halchitino keereno eemmonsa’ yaanno.
Kaaliiqihu hexxote qaali ammanaminoho;
qaalisino lamala hinge giiratenni daashshine fushshinoonni siwiili gedeeho.
Kaaliiqa ati agarinke;
bushu manni kunni dirihunni hegerera gatisinke.”
Kiiro 5 Maganu “buxanete” daafira coyiꞌrinore kultanno. Isi gatisannonsa yitanno.
Kiiro 6 ledde, “Kaaliiqihu hexxote qaali ammanaminoho; qaalisino lamala hinge giiratenni daashshine fushshinoonni siwiili gedeeho” yitanno. Kuni qummeeshshi Yihowa qaalira noonke lao xawisannoho.—Far. 18:30; 119:140.
Mite Qullaawu Maxaafi tiro Faarso 12:7 “ati agarattonsa” yite tirtino.
Kiiro 6te Yihowahu hexxote qaali daafira kulloonnihura mitu manni Yihowa ‘agaranno’ yinoonnihu qaalesi ikkinohu gede asse hedanno. Qoleno Maganu Qaale giwanno manni Qullaawa Maxaafa agawatenna hunate lowo geeshsha sharraminoha ikkirono Maganu Qullaawa Maxaafa agarinota anfoommo.—Isa. 40:8; 1 Phe. 1:25.
Ikkirono Yihowa kiiro 5 kulloonni mannano agarannonsa. Qoleno isi ‘buxanenna mitiimmaamma’ woꞌmanka woyite kaaꞌlannonsa qoleno gatisannonsa.—Iyo. 36:15; Far. 6:4; 31:1, 2; 54:7; 145:20.
Ikkina Yihowa agarannonsa yine kiiro 7 kulloonnihu mannahonso qaalesiiti?
Qummeeshshu qooxeessira noo hedo leellishshannonte gede, konni qummeeshshira Yihowa agaranno yinoonnihu mannaho.
Daawiti Faarso 12te hanafora bushuullu manni doggannonsari ammanantinori Yihowa soqqamaano daafira coyiꞌrino. Hakkiinni kiiro 3 Yihowa arrawonsa garimale horoonsidhannore qorichishate kaꞌꞌannota kultanno. Tini faarso Yihowahu hexxote qaali ammanaminoha ikkino daafira isi mannasi gatisate kaꞌꞌannota addaxxineemmo gede assitannonke.
Hakko daafira kiiro 7 kulloonniri Yihowa gatisannonsari mannaho. Insa bushuullu qarrissinonsa.
Ikkina mite Qullaawu Maxaafi tiro konne qummeeshsha “ati agarattonsa” yite tiritinohu mayiraati? Tini Ibiraawootu Afiiti Qullaawa Borro addaxxinannita ikkitinota leellishshannote. Kayinni Giriikete Septujentera konne qummeeshsha “isi agarannonke” hattono “isi gatisannonke” yine tirroonni. Hakko daafira tini yaatto ammanantino buxanenna mitiimmaammi daafira kultannote. Konnira insa “bushu manni konni dirihunni” gattanno. (Far 12:7, 8) Ibiraawootu Afoo Aramayikete qolle tirroonnite mitte tirora konne qummeeshsha, “MOOTICHA keeraano agarattonsa; tenne busha ilamanni gatisattonsa” yine tirroonni. Tini, Faarso 12:7 gatisattonsa yinoonnihu Maganu qaale ikkikkinni manna ikkinota leellishshannote ledote tajeeti.
Hakko daafira kuni qummeeshshi “ammanamino manni” Maganu gatisannonsata hexxanno gede assannoho.
