1, 2. (a) Yesuusi woyinete kaashsho afiˈrino manchi daafira coyiˈrino masalo kuli. (b) Tini masalo shaqqillunni elate daafira xawissannohu hiittoonniiti?

WOYINETE kaashshi noosihu mittu manchi, mitto barra soodo kaashshisi giddo loosanno manna hasiˈrara gudumaale haˈrino. Isi gudumaaleho xaadino loosaasine, baateemmoˈne yiino woxira sumuu yite loosu base hadhu. Ikkollana, kuni manchi loosanno manna lexxa hasiˈrino daafira, barra woˈma gudumaale haˈranni hosino; qoleno xaadino loosaasinera, wole agurina hawarro qaxadhino loosaasinera nafa, woxe dancha gede asse baatansara sumuu yiino. Isi hawarrita loosaasinete woxe baatansara gamba assi; hakkiinnino baalunkura yaano haammata saate loossinorirano mitte saate calla loossinorirano taashshe baatinsa. Loosu basera balaxxe dagginori tennera xiixama hanaffu. Woyinete kaashshi anni kayinni togo yee qoli: ‘Coyiˈrammoommohu dikageeshshi woxe aammoheraati? Loosaasineˈyara baxummo geeshshi woxe aa didandeemmo? Ani shooshaqa ikkoommotera dhiibbifatootto?’—Mat. 20:1-15.

² Tini Yesuusi coyiˈrino masalo, Qullaawu Maxaafi giddo qummi assinoonnita Yihowa akatta giddo mitto qaangeemmo gede  assitannonke; kuni akati Yihowa ‘elannoha’ ikkasiiti. ^[1] (2 Qorontoosi 6:1 nabbawi.) Loosu basera mitte saate calla loossu loosaasine, wolootu ledo taalo baantanninsa gede assannore loossinokkiha ikkirono, woyinete kaashshi anni wolootu ledo taalo baatinonsa woy elinonsa. Mittu fullahaanchi ‘eltote’ daafira togo yiino: “Konni qaaliti qara hedo woxe afiˈrinokkinna mittoricho afiˈra hasiissannoe yaannori noosikki manchira, mitore mulla aate woy elate yitannote.”

3, 4. Yihowa mannu ooso baalate elto uyinohu mayiraati? Isi tenne assinohu hiittoonniiti?

³ Qullaawa Borro Maganu uyinote “baxxitino elto” daafira kultanno. (Efe. 3:7) Yihowa tenne “elto” mulla uyinohu mayiraati? Isi tenne elto uyinohu hiittoonniiti? Ninke Yihowa assinammora hasiˈrannore baala assine anfeemmoha ikkoommero, isi aannonke elto afiˈra hasiissannonkete yaate. Kayinni hatto assa didandiineemmo. Hayyichu Moote Selemooni togo yee borreessino: “Mitte soˈrono assikkinni, woˈmanka woyite dancha looso calla loosannohu baattote aana mittuno dino.” (Ros. 7:20) Soqqamaasinchu Phaawuloosino togo yiino: “Mannu baalu cubbo loosino; Maganu ayirrinyeno hoogino”; isi lede, “Cubbu laalchi reyote” yee borreessino. (Rom. 3:23; 6:23a) Woleteemmero ninke reya hasiissannonkereeti.

⁴ Yihowa kayinni, guuntete xeˈne noonsate mannu oosora taalle afidhinokki elto oye baxannonsata leellishino. Isi “mitto Beettosi” uullara daye ninke daafira reyanno gede asse elto baalanta roortino elto uyinonke. (Yoh. 3:16) Konni daafira Phaawuloosi Yesuusi daafira coyiˈranni, isi “Xa . . . reyote qarra adhino daafira, ayirrinyunna galatu baˈlatto worroonnisi . . . ; isi Maganu eltonni baalunku daafira reyino” yiino. (Ibi. 2:9) Addaho, “Maganuwiinni afiˈnanni baˈraaˈri . . . , Mootichinke Kiristoosi Yesuusi widoonni hegere heeshshooti.”—Rom. 6:23b.

5, 6. (a) Cubbu moohannonke gede assiˈra gawajjitannohu hiittoonniiti? (b) Maganu elto mookkannonke gede assiˈra maaho kaaˈlitanno?

⁵ Mannu cubbo ragiˈrinohunna reyannohu mayiraati? Qullaawu Maxaafi, “mittu manchi [Addaami] cubbinni reyo” Addaami sirchi aana ‘wolqissinota’ woy mookkinota kulannonke. (Rom. 5:12, 14, 17) Ikkirono, cubbu moohannonkekki woy illaallisannonkekki gede assiˈra dandiineemmo; tini hagiirsiissannote. Kiristoosita wodote kakkalo ammanneemmota leellinsheemmoha ikkiro, Yihowa elto mookkannonke gede assiˈneemmo. Tenne assa dandiineemmohu hiittoonniiti? Qullaawu Maxaafi togo yaanno: “Cubbu batiˈrinowa . . . Maganu elto roore batidhino. Kuni ikkinohuno, reyote widoonni cubbu moohinonte gede, Mootinchinke Yesuusi Kiristoosi loosinni hegere heeshsho afiˈrate, keeraanchimmate widoonni Maganu elto mookkaraati.”—Rom. 5:20, 21.

⁶ Cubbaataamma ikkinummorono, cubbu moohannonkekki gede assiˈra dandiineemmo. Miteekkine cubbo loonsummoro, Yihowa maarannonke gede huucciˈra dandiineemmo. Phaawuloosi Kiristaana togo yee qorowisiisino: “Kiˈne eltote anga heedhinoonnita ikkinnina, seeru anga heedhinoonnikki daafira, cubbu digashshannoˈne.” (Rom. 6:14) Konni daafira, Maganu elto gashshitannonke woy mookkannonke gede assiˈra dandiineemmo. Tini maaho kaaˈlitannonke? Phaawuloosi “Maganu . . . [elto] ammana giwanna maalu yorto agurre umo qeeˈline, sumbetenninna ayyaanaame heeshshonni tenne gobbara  heeˈneemmo gede rosiissannonke” yee borreessino.—Tit. 2:11, 12.

7, 8. Yihowa ‘addi addi elto’ uyinonke yaa mayyaate? (Hanafote noo misilla lai.)

⁷ Soqqamaasinchu Pheexiroosi togo yee borreessino: “Addi addiha Maganu elto afansha ammanamatenni amaddine mitti mittiˈne uyinoonniˈne elto garinni mimmitiˈnera soqqamme.” (1 Phe. 4:10) Maganu Addi addi elto uyinonke yaa mayyaate? Heeshshonke giddo aye geeshshi qarri iillinkerono, Yihowa iillinonke qarra dandiine saˈneemmo gede kaaˈlannonke. (1 Phe. 1:6) Iillannonke qarra baala qeelate Maganu elto aye woteno kaaˈlitannonke.

⁸ Addaho, Maganu addi addi elto uyinonke. Soqqamaasinchu Yohaannisi togo yee borreessino: “Woˈma eltosi aaninni ninke baalunkura eltote aana elto uyinonke.” (Yoh. 1:16) Addi additi Yihowa elto batinye atoote afiˈneemmo gede assitinonke. Hanni konni atooti giddo mito laˈno.

9. Yihowa uyinonke eltonni horo afiˈra dandiineemmohu hiittoonniiti? Tennera galanteemmota leellisha dandiineemmohu hiittoonniiti?

⁹ Cubbinkera maaro afiˈneemmo. Yihowa elto widoonni cubbinkera maaro afiˈneemmo; ikkirono isi gatona yaannonkehu maaro eˈneemmohanna cubbo loonseemmokki gede sharrammeemmoha ikkirooti. (1 Yohaannisi 1:8, 9 nabbawi.) Qoleno, Maganu maarannonkehura iso galatanna isi ayirranno gede assannore assa hasiissannonke. Phaawuloosi buuramino Kiristaanira togo yee borreessino: “[Yihowa] tunsichu gashshooti giddonni fushshe, baxannohu Beettisi gashshooti giddora eessinonke. Isi wodeennanke cubbinke aguraminonke.” (Qol. 1:13, 14) Cubbinkera maaro afiˈranke lowo atoote afiˈneemmo faro fantinonke.

10. Maganu elto maa afiˈneemmo gede assitinonke?

¹⁰ Maganu ledo danchu jaaloomi noonke. Ninke ilammummo yannanni kayinse cubbaataamma ikkinoommo daafira, Maganoho diina ikkinoommoreeti. Phaawuloosi tenne xawisanni togo yee borreessino: “Ninke Maganu diina ikkine heeˈne, Beettisi reyonni Maganu ledo araarammummo.” (Rom. 5:10) Konni garinni Maganu ledo araaramanke Isi ledo danchu jaaloomi heeˈrannonke gede assitino. Phaawuloosi tenne Yihowa elto ledo xaadise kulanni togo yiino: “Ninke [buuraminohu Kiristoosi roduuwi] keeraanchimma ammanatenni afiˈnoommo daafira, Mootichinke Yesuusi Kiristoosi widoonni Maganu ledo keere heeˈnoommo. Xa tenne uurrine heeˈnoommo eltowa eˈnoommohuno iso ammaˈnatenniiti.” (Rom. 5:1, 2) Kuni addinta dhaggete atooteeti!

11. Buuramino Kiristaani, ‘wolu geˈreewi’ halaale afanno gede kaaˈlannohu hiittoonniiti?

¹¹ Halaalu minira dangoommo. Ninke baalunku cubbaataammaho. Ikkollana masaalaanchu Daanieeli goofimarchu barrira heeˈrannohu “egennaammu” yaano buuramino Kiristaani, ‘manna rosiise halaalu widira qolannota’ masaalino. (Daanieeli 12:3 nabbawi.) Buuramino Kiristaani sabbakenna rosiise ‘wolu geˈreewi’ yaano lowo miliyoone ikkanno manni, halaale afanno gede assino. (Yoh. 10:16) Ikkollana, tenne assa dandiinohu Yihowa elto widoonni callaati. Phaawuloosi togo yiino: “Mannu Kiristoosi Yesuusi loosino gatonni mulla Maganu elto callatenni keeraaˈmanno.”—Rom. 3:23, 24.

12. Huuccatto Maganu elto ledo xaado afidhinohu hiittoonniiti?

¹² Huuccattote widoonni Maganu barcimiwa shiqate qoosso afiˈnoommo. Yihowa eltosinni huuccattote widoonni isiwa shiqate qoosso  uyinonke. Isinni, Phaawuloosi Yihowa barcima eltote “barcima” yiino; qoleno isi hakka “ruxxi yinummokkinni” shinqeemmo gede koyisinonke. (Ibi. 4:16.) Yihowa “albisira beˈe yinummokkinni jawaante shiqa dandiineemmo” gede tenne qoosso uyinonkehu Beettisi widoonniiti. (Efe. 3:12) Huuccattote widoonni Yihowawa shiqa dandaanke addinta lowo eltooti.

13. Maganu elto kaaˈlo ‘hasiissannonke yannara kaaˈlo afiˈneemmo’ gede assitannonkehu hiittoonniiti?

¹³ Kaaˈlo hasiissannonke yannara kaaˈlo afiˈneemmo. Phaawuloosi “maaro adhatenna hasiissannonke yannara kaaˈlitannonke elto afiˈrate” Yihowa huucciˈneemmo gede jawaachishinonke. (Ibi. 4:16a) Heeshshonke giddo fonqolunna qarru iillannonke yannara Yihowa kaaˈlannonke gede huucciˈra dandiineemmo. Ninke Maganu elto afiˈra hasiissannonke yineemmo gede assannori nookkiha ikkirono isi huuccattonke macciishshe dawarannonke; roore wote tenne assannohu ayyaanaamittete roduuwinke widoonniiti; “Kunni daafira hawaqiˈne, ‘Kaaliiqi kaaˈlaanchoˈyaatina diwaajjeemmo. Mannu ma assannoe?’ yineemmo.”—Ibi. 13:6.

14. Yihowa elto shesho afiˈneemmo gede kaaˈlitannonkehu hiittoonniiti?

¹⁴ Shesho afiˈneemmo. Yihowa eltonni afiˈneemmohu wolu dhagge ikkanno coyi, dadillisannori iillannonke wote afiˈneemmo sheshooti. (Far. 51:17) Phaawuloosi dartu iillanni noonsahu Teselonqe Kiristaanira togo yee borreessino: “Mootinchinke Yesuusi Kiristoosinni, qoleno baxannonkehunna eltosinni hegere jawaantenna dancha hexxo uyinonkehu Maganu Anninke, . . . wodanaˈne jawaachishonna kaajjisho.” (2 Tes. 2:16, 17) Yihowa shaqqillunni elannoha ikkinohura towaatannonketa afanke lowo geeshsha sheshifachishshannote!

15. Maganu elto widoonni hiittee hexxo afiˈnoommo?

¹⁵ Hegere heeshsho hexxo afiˈnoommo. Cubbaataamma ikkinoommo daafira,  uminkenni hexxo dinoonkereeti. (Faarso 49:7, 8 nabbawi.) Yihowa kayinni kaajja hexxo uyinonke. Yesuusi harunsaanosira togo yee qaale eino: “Anniˈya hedo, Beettisi widira laˈˈannohunna Beettosi ammanannohu baalu hegere heeshsho afiˈranno gedeeti.” (Yoh. 6:40) Addaho, hegerera heeˈrate hexxo Maganu eltosinni uyinonkete dhagge ikkitanno eltooti. Phaawuloosi togo yiino: “Maganu manna gatisannota eltosi baalunkura leellishino.”—Tit. 2:11.

16. Hundihu mitu Kiristaani Maganu elto garimale horoonsiˈrinohu hiittoonniiti?

¹⁶ Maganu elto lowo atoote afiˈneemmo gede assitannonkeha ikkirono, banxummore assinummorono isi lashshi asse aguranno yine heda dihasiissannonke. Hundi Kiristaani giddo mitu “Maganinke elto ragimalete ikkitora [soorrino].” (Yihu. 4) Kuni ammanaminokki Kiristaani Yihowa maarannonsa daafira cubbo loosiro qarru nookkihu gede asse hedinoha ikkara dandaanno. Hakkiinni saˈino busha isinni, wolu mannino insante gede gara ikkinokki coye assanno gede xixxiiwansaati. Yannankerano konni garinni hedanno manni “eltote ayyaana xoninohu” gedeeti.—Ibi. 10:29.

17. Pheexiroosi mayyee kaajjishe amaalino?

¹⁷ Yannankera Sheexaanu, mitu Kiristaani Maganu maarannonkellana yee cubbo loosanno gede asse doganno. Yihowa, maaro eanno manni cubbo gatona yaannoha ikkirono, cubbo loonseemmokki gede sharrammammora hasiˈranno. Isi ayyaanisinni Pheexiroosi togo yee borreessanno gede assino: “Jaallaˈya! Kiˈne kayinni konne coye balaxxine affinoonni daafira, haxawarrootu soˈronni goshooshantine murteˈnewiinni baˈinannikki [“shoshshoggitinannikki”, NW] gede qorophe! Mootichinkenna Gatisaanchinke Yesuusi Kiristoosi eltonninna egennonni lophe.”—2 Phe. 3:17, 18.

18. Yihowa uyinonke elto maa assineemmo gede kakkayissannonke?

¹⁸ Yihowa uyinonke eltora galata qolate, tenne elto iso ayirrisatenna manna kaaˈlate horoonsiˈra hasiissannonke. Tenne assa dandiineemmohu hiitte doogganniiti? Phaawuloosi togo yee dawaro qolino: “Uyinoonninke elto garinni, addi addi aamami noonke. Mittu manchira uyinoonnisi aamami . . . woleho soqqama ikkituro, jaate soqqamona; rosiisa ikkituro, jaate rosiisona. Aamamisi manna jawaachisha ikkituro, jawaachishona; . . . Aamamisi manna marara ikkituro, mararrosi hagiirrunni leellisho.” (Rom. 12:6-8) Konni daafira, Yihowa uyinonke elto isira galata qolate diinaggaambe soqqammeemmo gede, mannaho Qullaawa Maxaafa rosiinseemmo gede, ayyaanaamittete roduuwanke jawaachinsheemmo gede, hattono manna mararreemmo gede woy mannu koffi assannonke wote gatona yineemmo gede assitannonke.

19. Aananno birxichira hiikkonne loosa hasiissannonke loosi daafira ronseemmo?

¹⁹ Yihowa shaqqillunni uyinonke eltora galanteemmosita leellishate, “Maganu eltoha Dancha Duduwo kulate looso” loosate dandaaminkere baala assa hasiissannonke. (Soq. 20:24) Aananno birxichira konni loosi daafira ronseemmo.