Kiristaanu mannu gawajjannonsata gargadhanno wote Qullaawu Maxaafita xintu seerubba harunsanno. Tini Qullaawu Maxaafiti xintu seerubba meessaneeto gargadhate shugguxe, qawwe, woy wole qara afiꞌrino uduunnicho horoonsiꞌra hasiissannonsakkita leellishshanno. Hanni aane noore laꞌno:

Yihowa albaanni heeshsho, hakko iso mannu heeshsho qullaawate. Faarsaasinchu Yihowa “heeshshote buicho” ikkinota afino. (Far. 36:9) Hakko daafira, mittu Kiristaanchi isonooto woy jajjasi gargadhanno wote, manna shaannokkinna mundeete asali heeꞌrannosikki gede lowo geeshsha qoropha hasiissannosi.—Mar. 22:8; Far. 51:14.

Wole uduunne horoonsiꞌne meessaneeto gargadhano mundeete asali heeꞌranno gede assitara dandiitannoha ikkirono; qawwete gedeere horoonsiꞌra isinni manna hendikki woy anfanni heeꞌne mulenni shinanni gede assitara dandiitanno. a Gawajjara kaino manchi wonanni agadhe nooha ikkara dandaanno daafira, wolu manchi anga qawwe noota afiro coyi anganni baeenna shoonna reyo kalaqantara dandiitanno.

Yesuusi uullate aana heeꞌrinohu jeetote hashsha harunsaanosi bise qodhitanno gede kulinohu, meessaneeto gargadhate yine bagado qodha hasiissanno yaate diꞌꞌikkino. (Luq. 22:36, 38) Hatteentenni, Yesuusi rosaanosi bise qodhitara kulinonsahu, insa bagado qodhino manni gawajjansara dayiro nafa  gaarama hasiissannonsakkita rosiisansara yeeti. (Luq. 22:52) Pheexiroosi kakkalaanote biili borojjicho bisetenni mure tayisi yannara, Yesuusi Pheexiroosi “bisekki kou giddora qoli” yiino. Hakkiinni aanche Yesuusi togo yiino: “Bise fushshidhannori bisetenni reyitanno.” Yannanketi Yesuusi harunsaanono konne halaale harunsitanno.—Mat. 26:51, 52.

Mikiyaasi 4:3 giddo masaalloonni garinni Maganu manni ‘bisensa . . . haantote soorriꞌrino.’ Addu Kiristaani harunsannohu kuni akati soqqamaasinchu Phaawuloosi amaalino amaale ledo sumuu yaannoho: “Busha assinohehura busha assite qoltooti. . . . Dandiitiniha ikkiro, kiꞌne widiidita mannu baalu ledo keere heedhe.” (Rom. 12:17, 18) Phaawuloosira lowo qarri iillinosiha, wole agurina ‘mulqiꞌnoonnisiha’ ikkirono, isi rosiisino rosi garinni heeꞌrino; umosi gargadhate yee Qullaawa Borroha xintu seera didiigino. (2 Qor. 11:26) Hatteentenni isi Magano addaxxino; hattono Maganu Qaali giddonni ‘olu bagadinni’ roortanno hayyo afiꞌrino.—Ros. 9:18.

Kiristaanu, heeshsho maalaamittete coyinni roorse laꞌꞌanno. “Mannu heeshsho woxu batinyinni afiꞌnannita diꞌꞌikkitino.” (Luq. 12:15) Hakko daafira, hayyichu Kiristaanchi mulqidhannore shaqqadu arrawinni huucce hoogiro, Yesuusi “bunshe assannoꞌne manchira bado qoꞌlitinoonte” yee amaalino amaale harunsa hasiissannosi. Togo assate afiꞌnoonnire baala aa hasiissannoha ikkara dandaanno. (Mat. 5:39, 40; Luq. 6:29) b Hige togoo coyi giddora eꞌnannikki gede balanxe qoropha hasiissanno. Noonkere leellishate woꞌnaala hoogankenna qooxeessinke manni, salaame banxeemmore Yihowa Farciꞌraasine ikkinoommota afanno gede assanke, mooraano ninke duggannota hooꞌlate kaaꞌlitanno.—1 Yoh. 2:16; Law. 18:10.

Kiristaanu wolu manni tiia gawajjannore assannokki gede qorophanno. (Rom. 14:21) Songote miilla mittu Kiristaanchira qawwe noosita affuro massaranna tini guficho ikkitansara dandiitanno. Baxillu meessi horonni wolu manni horo balaxisiinseemmo gede assannonke; tennera assa dandiineemmore nafa agura hasiissannonkeha ikkara dandaanno.—1 Qor. 10:32, 33; 13:4, 5.

Kiristaanu wolootaho lawishsha ikkate woꞌnaalanno. (2 Qor. 4:2; 1 Phe. 5:2, 3) Qullaawa Borronni amaallisihu gedensaanni, umosi gargadhate yee qawwe mine wodhanno Kiristaanchi wolootaho lawishsha diꞌꞌikkino yaate. Hakko Kiristaanchira songote giddo looso woy baxxitino qoosso diuyinannisi. Bagado qodhine loonsanni looso loosanno Kiristaanchino songote giddo hattoo qoosso diafiꞌranno. Togoo manchi wole looso hasiꞌra lowo geeshsha woyyitannosi! c

Mittu Kiristaanchi isonooto, maatesinna jajjasi gargadhate, hattono doodhanno looso lainohunni umisi doorsha doodha hasiissannosi. Maganu biddishsha aannonkehu baxannonkehuraati. Ayyaanaamittetenni gikki yiino Kiristaani konni biddishshi ledo sumuu yee heeꞌranno daafira, mannu gawajjannonsata gargadhate massaara diwodhanno. Insa, Qullaawu Maxaafihu xintu seeri garinni heeꞌre Magano addaxxanno manchi addunnihanna geedanno agarooshshe afiꞌrannota afino.—Far. 97:10; Law. 1:33; 2:6, 7.