1. Wedellu mixo fushshira hasiissannonsahu mayiraati? Ikkirono quwa sae yaada hasiissannonsakkihu mayiraati? (Hanafote noo misile lai.)

 WEDELLA, doogo haꞌra hanaffinara albaanni hiikka haꞌra hasidhinanniro balaxxine afa hasiissannoꞌne yiniro sumuu diyitinanni? Heeshsho doogo haꞌrate gedeeti; qoleno albillittete maa assa hasidhinanniro mixo fushshira hasiissannoꞌnehu anje heedhineeti. Hige mixo fushshira shota ikka hooggara dandiitanno. Heezeri yinanni beetto togo yitino: “Mitto coye mura waajjishshanno. Heeshshoꞌne diro woꞌma hakko garinni heeꞌra hasiissannoꞌne.” Ikkirono waajjitinoonte. Yihowa dagasira togo yiino: “Ani ledokki noommona waajjitooti; Ani Maganokkiitina hexxo mudhitooti. Ani jawaachisheemmohe, kaaꞌleemmohe.”—Isa. 41:10.

2. Yihowa albillittete hagiirsiissanno mixo fushshidhinara hasiꞌrannota mayinni affinanni?

² Yihowa dancha mixo fushshidhinara jawaachishinoꞌne. (Ros. 12:1; Mat. 6:20) Isi kiꞌne hagiirraamma ikkitinara hasiꞌranno. Isi kalaqinohu laꞌꞌate, macciishshatenna qamasate baxisannori tenne leellishanno. Qoleno isi towaatannonke, hattono dancha heeshsho heeꞌneemmo gara rosiisannonke. Yihowa amaalesi macciishsha giwino mannira togo yiino: “Bunshe doodhitinoonni. . . . Soqqamaanoꞌya hagiidhitanna kiꞌne kayinni saalfattinanni. Soqqamaanoꞌya wodanunni hagiidhite  faarsitanno.” (Isa. 65:12-14) Yihowa manni heeshshonsa giddo dancha doorsha doodhansa isira ayirrinye abbitanno.—Law. 27:11.

3. Yihowa hiittoo mixo fushshirattora hasiꞌranno?

³ Yihowa hiittoo mixo fushshiꞌrattora hasiꞌranno? Isi mannu ooso kalaqinohu iso affannonna isira ammanante soqqantanni hagiidhitanni heedhanno gedeeti. (Far. 128:1; Mat. 5:3) Tini saadatenni baxxineemmo gede assitannote; saada kalaqantinohu ittanni, agganninna sirtanni calla heedhanno gedeeti. Maganu, ati dancha mixo fushshidhe hagiidhattora hasiꞌranno; saada kayinni togo assa didandiitanno. Kalaqaanchikki ‘baxillu Maganooti’; qoleno isi ‘hagiirraamoho’; isi manna kalaqinohu ‘umisi daninniiti.’ (2 Qor. 13:11; 1 Xim. 1:11, NW; Kal. 1:27) Baxillaanchu Maganinke faale haꞌrattoha ikkiro, lowo hagiirre afiꞌratto. Ati, “adhannonkunni aannohu baꞌraaꞌrinoho” yaanno qummeeshshi adda ikkitinota heeshshokkinni laꞌe egennootto? (Soq. 20:35) Kuni coyi halaaleho. Konni daafira, Yihowa mannanna iso baxattota leellishshanno mixo fushshiꞌrattora hasiꞌranno.—Maatewoosi 22:36-39 nabbawi.

4, 5. Yesuusa hagiidhanno gede assinosiri maati?

⁴ Yesuusi Kiristoosi wedellaho dancha lawishsha ikkanno. Isi anje noo waro godoꞌlanni dancha yanna sayisinoti dihuluullissannote. Maganu qaali “hagiidhate yanna no. . . . Sirbateno yanna no” yaanno. (Ros. 3:4) Yesuusi, Qullaawa Borro seekke xiinxallasi Yihowawa shiqate kaaꞌlitinosi. Isi 12 dirihu noo waro Qullaawa Mine noo rosiisaano ledo ayyaanaamittete coye hasaawi yannara, insa “egennosinna qolanno dawaro maalale” assidhino.—Luq. 2:42, 46, 47.

⁵ Yesuusi wedellichu noo yannarano hagiirraamoho. Iso hagiidhanno gede assinosiri maati? Isi, Maganu baalunku coyinni roore, “buxanete dancha duduwo duduwate.  . . illiweelootu laꞌannota lallawate” soyinosita afino. (Luq. 4:18) Isi Maganu yiinore assasi hagiidhanno gede assitinosi. Faarso 40:8 isi hedo xawissanno; qummeeshshu togo yaanno: “Maganoꞌya hedokki wonshammora baxoommo.” Yesuusi mannaho iimi Annisi daafira rosiisa baxanno. (Luqaasi 10:21 nabbawi.) Yesuusi mitte hige mitte manchora addu magansiꞌra daafira rosiisihu gedensaanni rosaanosira togo yiino: “Ane sagale soyinoehu haja wonshatenna loososi guutate.” (Yoh. 4:31-34) Yesuusi, Maganonna manna baxannota leellishasi hagiidhanno gede assitinosi. Ateno togo assa hagiirsiissannohe.

6. Gikki yiino Kiristaani ledo mixokki daafira hasaawa kaaꞌlitannohehu hiittoonniiti?

⁶ Batinyu Kiristaani wedellimmansa yannanni suwisaano ikke soqqame hagiirre afiꞌrino. Ati mixokki daafira insa ledo mayira dihasawatto? “Malu hoogiro hendoonniri ikkikkinni gatanno; malu seyiro kayinni halchinoonniri woꞌmanno.” (Law. 15:22) Togoohu ayyaanaamittete gikki yiino Kiristaani woꞌma yanna soqqansho eꞌꞌe soqqama heeshshokki giddo kaaꞌlannohe roso rosatto gede kultannohe. Yesuusa Annisi iima rosiisinosiha ikkirono, isi uullate aana soqqami yannarano rosa diagurino. Lawishshaho, uullate noo waro danchu duduwi mannaho wodanaho coanno garinni rosiisanna fonqolu yannara ammaname heeꞌra hagiirsiissanno gara rosino. (Isayaasi 50:4 nabbawi; Ibi. 5:8; 12:2) Hanni aanchine hagiirsiissannote mite woꞌma yanna soqqanshore ronso.

7. Batinyu wedelli manna rosaano assate looso baxannohu mayiraati?

⁷ Yesuusi, ‘hadhine gosa baala rosiissine rosaanoꞌya asse’ yee hajajino. (Mat. 28:19, 20) Manna rosaano assate mixo fushshiꞌrittoro, Maganu ayirranno gede assannoha kaajja looso doodhootto yaate. Baalunku loosiꞌra dandoo woyyeessiꞌrate yanna hasiissannonte gede Maganu soqqanshorano dandookki woyyeessiꞌrate yanna hasiissannohe. Wedellichu  heeꞌre suwisaancho ikkinohu Timooti togo yiino: “Ani Yihowara woꞌma yanna soqqama hasiꞌreemmohu soqqansho iso baxeemmota leellishate kaaꞌlitannoe daafiraati. Umi qara Qullawa Maxaafa xiinxalliseemmo manna diafiꞌroommo; ikkollana wole qooxeessa haꞌrummo gedensaanni mittu agani giddo haammata manna Qullaawa Maxaafa xiinxallisa hanafummo. Mitu xiinxalliseemmohu Gambooshshu Addaraashe daa hanafino. Seenne Adhitinokki Roduuwira Qixxaawinoha Qullaawu Maxaafi Rosi Mine a eꞌꞌe lame agana rosummo gedensaanni, wolewa soqqama hanafummo; hakko shoole manna xiinxallisa hanafummo. Qullaawu ayyaani mannu heeshsho soorre biddi assanna laꞌꞌaꞌya rosiisa baxeemmo gede assitinoe.”—1 Tes. 2:19.

8. Mitu wedellu Kiristaani lowo mannira sabbakate maa assino?

⁸ Mitu wedellu Kiristaani wole afoo rosino. Aliyye Ameerikira heeꞌrannohu Jeekebi togo yee borreessino: “Lamalu dirihu noommo yannara ledoꞌya rossannoti batinye rosaano Vetinaami gobbareeti. Ani insara Yihowa daafira kula hasiꞌrummo; konnira insa coyidhanno afoo rosate mixo fushshiꞌrummo. Konne afoo roore rosoommohu Ingilizete Afiinninna Vetinaami Afiinni qixxeessinoonnita Agarooshshu Shae nabbawanniiti. Qoleno, qooxeessinkera noote Vetinaami Afoo coyidhanno songora soqqantanno roduuwi ledo jaalooma kalaqiꞌrummo. Tonaa settu dirihu heeꞌre suwisaancho ikkummo. Hakkuyi gedensaanni, Seenne Adhitinokki Roduuwira Qixxaawinoha Qullaawu Maxaafi Rosi Mine eꞌꞌe rosummo. Kuni rosu mini, xa suwisaancho ikke soqqamanni noommo soqqanshora lowo geeshsha kaaꞌlinoe; Vetinaami Afoo coyidhanno gaamora noommohu cimeessu ane callaati. Haammatu Vetinaami gobba manni insa afoo rosoommotera dhagge assiꞌranno. Roore wote insa mininsara eꞌꞌeemmo gede koyisseennae Qullaawa Maxaafa xiinxalliseemmonsa. Insa giddo mitu cuuamino.”—Soq. 2:7, 8.

9. Manna rosaano assate loosi kaaꞌlannohehu hiittoonniiti?

⁹ Manna rosaano assate loosi lowo horo afiꞌrino; lawishshaho, danchu loosu gade heedhannohe gede, mannu ledo hasaawa dandaatto gara, waajjattokkinna hayyicha ikkatto gede kaaꞌlannohe. (Law. 21:5; 2 Xim. 2:24) Kuni loosi ammanatto coyira xinta ikkitino qummeeshshuwa seekkite afatto gedeno assannohe daafira hagiirraamo ikkatto. Qoleno Yihowa ledo loosa dandiinanni gara rosatto.—1 Qor. 3:9.

10. Dancha duduwo macciishsha hasiꞌrannokki manni heeꞌranno qooxeessira hagiirrikki baikkinni soqqama dandaattohu hiittoonniiti?

¹⁰ Soqqamattohu dancha duduwo hakkeeshshi geeshsha macciishsha hasiꞌrannokki manni heeꞌranno qooxeessiꞌra ikkiro nafa, manna rosaano assate loosi hagiirsiisanno. Kuni loosi mittimmatenni loonsanniho. Songote miilla baala danchu wodani noonsa manna hassanno. Mitto mancho rosaancho ikkanno gede kaaꞌlinohu mitto rodoo woy mitte rodoo ikkitara dandiitanno; ikkollana hakko manchira addi addi roduuwi farciꞌrinoha ikkara dandaanno daafira insa hagiirri baalunkura gutoho. Lawishshaho, Biraandeni yinanni rodii halaale macciishsha baxannokki manni noo qooxeessira honse diro suwisaancho ikke soqqamino. Isi togo yiino: “Sabbakate looso lowo geeshsha baxeemmo; korkaatuno Yihowa konne looso loonsammora hasiꞌranno. Konnira roso gudanni heeꞌrenni suwisaancho ikkummo. Songonke giddo noo wedella jawaachishanna insa ayyaanaamittetenni lophitanna laꞌꞌa baxisannoe. Seenne Adhitinokki Roduuwira Qixxaawinoha Qullaawu Maxaafi Rosi Mine eꞌꞌe rosummo gedensaanni suwisaancho ikke wolewa soqqama hanafummo. Soqqameemmo qooxeessira xiinxallisoommo manni giddo cuuaminohu dino; wolootu xiinxallissinori kayinni cuuantino. Manna rosaano assate looso loosate doodhaꞌya hagiirsiissannoe.”—Ros. 11:6.

11. Batinyu wedelli hiittenne qullaawa soqqansho eꞌe soqqantanni no?

¹¹ Yihowara soqqama dandiinanniti haammata faro no. Lawishshaho, batinyu wedelli gimbaatu loosira eꞌꞌe loosanno. Haammata haaro Gambooshshu Addaraashe hasiisse no. Gambooshshu Addaraashe mina Maganu ayirranno gede assitannotenna ateno hagiirsiissannote qullawa soqqanshooti. Wolu garite qullaawa soqqanshonte gede, tenne soqqansho eꞌne ammanate roduuwinke ledo loosa hagiirsiissanno. Qoleno konne looso loonsanni wote, dano iillitannokki gede qorophinanni, danchu garinni loonsanninna loosiissannorira kaaꞌlammanni gara anfanni daafira lowore ronsanni.

12. Suwisaancho ikke soqqama wolu gari soqqansho eate faro fantannohu hiittoonniiti?

¹² Keevini yinanni rodii togo yiino: “Anje noommo yannanni kayise Yihowara woꞌma yanna soqqansho eꞌꞌe soqqamate hasatto nooe. Gedensaanni 19 dirihu heeꞌre suwisaancho ikke soqqama hanafummo. Heeshshote heeꞌrate hasiisannore afiꞌrate gimbaatu looso loosanno rodiiwa gama yanna loosa hanafummo. Mine fukkinanni gara, hattono maskootenna saanqa qansanni gara rosummo. Hakkunni gedensaanni, hambabalatte gantino qooxeessira kaaꞌlitanno gaamo ledo, Gambooshshu Addaraashenna roduuwu mine mina kaaꞌla hanafummo. Wodiidi Afirikira gimbaatu loosira mannu hasiisannota macciishshummoti, forme wonshummo gedensaanni koyisame hakkira haꞌrummo. Afiriku gobba giddo boode lamala sau kiiro basetenni base haꞌranni Gambooshshu Addaraashe minate looso kaaꞌleemmo. Gimbaatu gaamonke maatete gedeeti. Mitteenni heeꞌneemmo, Qullaawa Maxaafa mitteenni xiinxallineemmo, hattono mitteenni loonseemmo. Qoleno, hakko qooxeessira heeꞌranno roduuwi ledo lamalate kiiro soqqansho fula baxisannoe. Anje heeꞌre fushshiꞌroommo mixo, hedoommokki garinni hagiidheemmo gede assitinoe.”

13. Batinye wedella Beeteelete soqqama hagiirsiissannonsahu mayiraati?

 ¹³ Mitootu suwisaano ikkite soqqantinori xa Beeteelete soqqantanni no. Beeteelete loonsanniri baalu Yihowara loonsannire ikkino daafira baasa hagiirsiisannoho. Beeteelete maate ayyaanaamittete sagale shiqishate looso kaaꞌlitanno. Desteni yinannihu Beeteelete soqqamanno rodii togo yiino: “Honsu dirihu heeꞌre woꞌma yanna soqqansho hanafate mixo fushshiꞌrummo; roso gudummoti suwisaancho ikke soqqama hanafummo. Mittunna bocu diri gedensaanni, Beeteele koyinseennae borro attammanni gara rosummo; hakkiinnino kompiyuterete pirogiraame qixxeessinanni gara rosummo. Beeteelete, alamete doyichora manna rosaano assate loosi halaꞌlanni noo gara leellishshanno rippoorte kullanna macciishsha hagiirsiissannoe. Looseemmo loosi mannu Yihowawa shiqanno gede kaaꞌlanno daafira Beeteelete soqqama baxeemmo.”

14. Woꞌma yanna soqqansho eꞌe soqqamate maa assa dandaatto?

¹⁴ Woꞌma yanna soqqansho eꞌe soqqamate maa assa dandaatto? Tennera baalunku coyinni roore kaaꞌlitannoheti, ayyaanu gumi akatta lossiꞌrate. Konni daafira, Qullaawa Maxaafa seekkite xiinxalli, nabbawoottore hiinci, hattono gambooshshunniwa ammana nooheta leellishatto faro saꞌe baꞌoonkehe. Rosaancho ikkite nootto yannara dancha duduwo mannaho rosiisatto gara woyyeessiꞌrate sharrami. Mannu hedore afate hayyotenni xaꞌmo xaꞌmite, hattono yaannore macciishshite manna baxa rosiisiꞌri. Qoleno, songote assinannire kaaꞌla, lawishshaho Gambooshshu Addaraashe feyanna gatamara kaaꞌla dandaatto. Yihowa umonsa heeshshi assitannorenna isi looso loosate maahoyye yitannore baxanno. (Faarso 110:3 nabbawi; Soq. 6:1-3) Phaawuloosi Ximootewoosi ledosi misiyoone ikkara koyisinohu, roduuwu Ximootewoosi ‘danchummare coyidhino’ daafiraati.—Soq. 16:1-5.

15. Looso afiꞌrate maa assa dandaatto?

¹⁵ Woꞌma yanna soqqamaano heeshshote hasiissannonsare afiꞌrate looso loosa hasiissannonsa. (Soq. 18:2, 3) Qooxeessiꞌnera looso afiꞌrate kaaꞌlannoha harancho qajeelsha adhite gama yanna looso loosa dandaattoha ikkara dandaanno. Togoo mixo fushshiꞌrittoro, woradu aliidi laꞌꞌaanchonna woradiꞌne giddo noo suwisaano amaale xaꞌmiꞌra dandaatto. Suwisaancho ikkine soqqamate kaaꞌlannohu hiittoo loosootiro xaꞌmi. Qullaawu Maxaafi togo yaanno: “Hedokki qiniitannohe gede, assattore baala Kaaliiqira eeggo uyiꞌri.”—Law. 16:3; 20:18.

16. Wedellimmakki yannanni woꞌma yanna soqqansho eꞌe soqqama albillittete maaho kaaꞌlitannohe?

¹⁶ Yihowa “halaalaancho heeshsho” afidhe hagiirraamo ikkattora hasiꞌrannota huluullantooti. (1 Ximootewoosi 6:18, 19 nabbawi.) Woꞌma yanna soqqansho, wole woꞌma yanna soqqamaano ledo xaadatto gede assitannohe, tini qolte gikki yootto Kiristaancho ikkatto gede kaaꞌlitannohe. Batinyu manni wedellimmansanni woꞌma yanna soqqansho eansa galte kalaqiꞌri yannara kaaꞌlitinonsa. Adhamara albaanni suwisaano ikke soqqaminohu batinyu, roduuwi adhami gedensaannino galtensa ledo suwisaano ikke soqqama diagurino.—Rom. 16:3, 4.

17, 18. Wodanikki hasatto fushshiꞌratto mixo ledo xaado afidhinohu hiittoonniiti?

¹⁷ Wodanikki hasatto fushshiꞌratto mixo ledo xaado afidhino. Faarso 20:4 togo yitanno: “Wodanikki halcho gede oohe; hedokki baalanta wonshohe.” Konni daafira, heeshshokki giddo maa assa hasiꞌrattoro hedi. Yihowa yannankera maa assanni nooronna isira ma garinni soqqama dandaattoro hedi. Hakkuyi gedensaanni Yihowa hagiirsiissanno mixo fushshiꞌri.

¹⁸ Woꞌma yanna soqqansho eꞌe Yihowara soqqama, lowo geeshsha hagiidhatto gede assitannohe; korkaatuno togoo heeshsho Maganu ayirranno gede assitanno. Ee, Yihowanni ‘tashshi yoohe; isi wodanikki halcho’ wonshohe.—Far. 37:4.