1-3. (a) Faarso 147 borreessinoonnihu mamaro ikkara dandaanno? (b) Faarso 147nni maa ronseemmo?

 MITTU manchi uyinoonnisi looso danchu garinni loose gudiro woy dancha Kiristaanu akatta noosita laꞌnummoro, hakko mancho galanteemmo. Konni garinni manna nafa galanteemmoha ikkiro, Magano Yihowa roorsine galanteemmo gede assannonkehu batinyu korkaati nooti egennantinote! Lawishshaho, bayira wolqasi leellishannohu dhagge ikkino kalaqamisira, woy Beettosi mannu oosora oye leellishino baxillisi daafira iso guwisiꞌra dandiineemmo.

² Faarso 147 borreessi faarsaasinchi Yihowa guwisiꞌrino. Isi wolootuno ledosi Magano guwisidhanno gede jawaachishino.—Faarso 147:1, 7, 12 nabbawi. a

³ Tenne faarso borreessinohu ayetiro bande dikulloonni;  ikkollana kuni faarsaasinchi Yihowa, Israeele Baabiloonete qafadonni fushshe Yerusaalame qolinsa yannara heeꞌrinoha ikkikki digatino. (Far. 147:2) Maganu mannisi biꞌreensa gede iso addunni magansiꞌranno gobba higanno gede assasi faarsaasinchu iso guwisiꞌranno gede assitinosi. Isi Yihowa guwisiꞌranno gede assinosihu wolu korkaatino no. Kuni korkaati maati? Ati ‘Halleeluyahi’ yaatto gede woy Yihowa ‘galatatto’ gede assannohe korkaati maati?—Aju. 19:1; Far. 147:1.

4. Isiraeele Moote Qiroosi qafadote giddonni fushshinsa wote mayi macciishshaminonsa? Mayira?

⁴ Qafadame Baabiloone haꞌrinohu Israeelete manni dadillino gara heda dandiitinanni. Insa qafadduri, “Tsiyooni faarso giddonni mitte faarsenke yitanni” qacifattinonsa. Hattee yannara, Isiraeele baalunku coyinni roore hagiidhitanno gede assitannonsati Yerusaalame diigante no. (Far. 137:1-3, 6) Konnira, Israeelete manni faarsiꞌra dibaxino. Wodaninsa hiiqqamino daafira insara sheshonna jawaante hasiissinonsa. Ikkollana, Maganu masaalotenni kulino garinni, Faarisi moote Qiroosi qafadotenni fushshinonsa. Isi Baabiloone qeele togo yee lallawino: “Kaaliiqi . . . Yerusaalamete Qullawa mine minammora annimma uyinoe. Kunnira Maganu manni baalunku Yerusaalame hadhe! Maganiꞌne Kaaliiqi ledoꞌne heeꞌro!” (2 Dud. 36:23) Tini, Baabiloonete qafadame nooha Israeelete manna jawaachishshinonsati dihuluullissannote!

5. Faarsaasinchu Yihowate hursate wolqa daafira mayyee coyiꞌrino?

⁵ Yihowa Israeelete gaꞌre xaphoomunni sheshifachishinoha calla ikkikkinni, Israeelenniha mitto mittonka mancho sheshifachishino. Yannankerano isi hatto assanno. Faarsaasinchu Maganu daafira togo yee borreessino: “Wodana hiiqqantinore dhaawannonsa; madansarano gaga gananno.” (Far. 147:3) Ee, Yihowa dhiwammeemmo woy yaandeemmo wote towaatannonke. Yihowa sheshifachishannonke, hattono yaandeemmo wote jawaachishannonke. (Far. 34:18; Isa. 57:15) Isi iillannonke qarra baala dandiine saꞌneemmo gede hayyonna jawaante aannonke.—Yai. 1:5.

6. Faarsaasinchu Faarso 147:4 aana borreessinorinni maa ronseemmo? (Hanafote noo misile lai.)

⁶ Faarsaasinchu hakkiinni aanche iima noo kalaqamire kulino; Isi Yihowa ‘beeddahete kiiro egenninotanna’ ‘mitte mittenta suꞌmisenni woshshannota’ coyiꞌrino. (Far. 147:4) Isi iimi kalaqamire kulasi coyiꞌranni noori ledo xaadannokkiha lawara dandaanno; ikkina faarsaasinchu togo assinohu mayiraati? Hanni tenne hedi: Faarsaasinchu beeddahe illesinni laꞌꞌa dandaannoha ikkirono mageeshshi geeshsha lowotero gude afa didandaanno. Ikkollana, yannankera sayinse lowo beeddahe noota buuxxino. Mitootu Milki Weyi yinanni gaalaakse woy beeddahete kuuso giddo calla lowo biliyoone ikkitanno beeddahe no yite heddanno. Hattono kalqete alamera lowo tiriliyoone ikkitanno gaalaaksuwa no yine hendanni! Ee, ninke mageeshshi beeddahe nooro kiirre gunde dianfeemmo. Kalaqaanchu kayinni mitte mittente beeddakkora suꞌma fushshino. Togo yaa Yihowa mitte mittenta beeddakko bade afino yaate. (1 Qor. 15:41) Uullate aana heedhannota mannu oosona? Mitte mittenta beeddakko noo bayicho bade afino Magani, ati mama noottoro, wodanikkira noori maatironna mayi hasiissannohero seekke afino!

7, 8. (a) Yihowa mannasi kaaꞌlanno wote maa hedanno? (b) Yihowa guuntete xeꞌne noonsare shaqqillunni kaaꞌlanno gara lawishshunni kuli.

⁷ Yihowa heeshshonke giddo iillinonke qarra afannoha calla ikkikkinni, qarru giddonni fushsha dandaanno wolqa noosi; hattono mararannonke. (Faarso 147:5 nabbawi.)  Iillinohe qarri wolqakkira aleenni ikkinohunna duhikki duqqa dandaattokkiha ikkinohu gede assite hedattora dandaatto. Ikkollana, Maganu dhukikki mageeshshihoro afino; isi ‘bushsha ikkakki dihawanno.’ (Far. 103:14) Guuntete xeꞌne noonke manna ikkinoommo daafira, mitte soꞌro marro marro hinge loonseemmo. Hendummokki koffi assannore coyiꞌne, maalu yortonni amadamme woy mannire hinaanse gedensaanni gaabbinoommo woti heeꞌrara dandaanno. Yihowa togoo soꞌro loosannokkiha ikkirono, wolqasi bayira ikkitinohura ninke gari leellannosi!—Isa. 40:28.

⁸ Qarru iillinohe yannara Yihowa jawaata angasinni irkise kaaꞌlinoheha ikkara dandaanno. (Isa. 41:10, 13) Hanni Kiyooko yinanni suwisaancho lawishsha laꞌno; ise soqqanshote wole base hadhu yannara hexxo mudhitino. Kiyooko Yihowa qarra ikkinose coye afinota huwattinohu hiittoonniiti? Ise hadhe martinowa isera qarra ikkinose coyi leellannonsa roduuwi no. Kiyooko Yihowa togo yee coyishiishinosehu gede assite heddino: “Ani baxeemmohehu suwisaancho ikkoottahura calla ikkikkinni, beettoꞌya ikkoottahuranna heeshshokki anera sayisse ootta daafiraati. Farciꞌraasineꞌya giddo mitte ate ikkootta daafira hagiidhitanni heeꞌrattara hasiꞌreemmo!” Atera qarra ikkanno coyi iilleennahe, Woꞌmanka Dandaanno Magani nootto gara huwatinota leellishino yanna qulli yitannohe?

9, 10. Yihowa baalantenni roore hiitte hasattonke wonshanno? Lawishsha kuli.

⁹ Ninke baalunkura sagale, uddanonna minu hasiisannonke. Mito wote gari sagale hoonge yaandeemmoha ikkara dandaanno. Ikkollana, intanniri laalanno gede assannohu Yihowa ikkinota dea dihasiissanno; isi ittannore hoogge ciiqannohu haraqeeyyete caaccurrira nafa sagale aanno! (Faarso 147:8, 9 nabbawi.) Isi haraqeeyye itisannoha ikki geeshsha, atera heeshshote hasiisannohere aannoheta addaxxa dandaatto.—Far. 37:25.

¹⁰ Yihowa roore hasiisannonke coye yaano ayyaanaame sagale oye, “[keerisi] . . . wodanankenna hedonke agaranno” gede assanno. (Fil. 4:6, 7) Hanni Musiyo yinanni rodiiranna minaamasira 2011nni Jaappaanete sunaami dano iillitu yannara Yihowa kaaꞌlinonsa gara laꞌno. Insa sunaami danonni gatinohu mininsara iimaanni giddeeti. Ikkollana, hakko barra afiꞌrino coyi baalu bainonsa yaa dandiinanni. Insa hakkoye qorre qiidino hashsha, umo lekkicho baino mininsa giddo layinki fooqera tunsote galino. Insa, soodita ayyaanaamittensa jawaachishannore hasiꞌra hanafi. Hakka wote insa, 2006nniha Yihowa Farciꞌraasineha Diru Maxaafa calla afidhino. Hakkawontenni Musiyo, “Roore Dano Iillishshino Sunaami” yaanno birxicho lai. Hakko borreessinoonni xagge, 2004nni Sumaatira yinanniwa baatto huxidheenna akkimale hambabalatte kaꞌe lowo dano iillishshinota kultannote. Musiyonna minaamasi tenne xagge nabbawi wote wiꞌlino. Insa, Yihowa hasiisse noonsata ayyaanaamittete sagale hasiisse noonsa yannara uyinonsahura lowo geeshsha hagiidhino. Yihowa maalaamittete hasiisannonsareno uyinonsa. Ayyaanaamittete roduuwinsa hasiisannonsare uyitinonsa. Ikkollana, roore jawaante afiꞌrate kaaꞌlitinonsati roduuwu Maganu dirijjite riqibbe marte songuwa towaattanno gede assinoonni qixxaawooti. Musiyo togo yiino: “Yihowa mittu mittunkura mule heeꞌre towaatanni noonkehu gede asse hedoommo. Tini baasa sheshifachishshinonke!” Maganu roore aannonkehu ayyaanaamittete hasiisannonkere ikkirono, maalaamittete hasiisannonkereno aannonke.

11. Yihowa kaaꞌlonni horo afiꞌrate maa assa hasiissannonke?

¹¹ Yihowa “umonsa heeshshi assitinore gotti gotti” assate ayewoteno qixxaawinoho. (Far. 147:6a) Ikkina, isi kaaꞌlonni horo afiꞌrate maa assa hasiissannonke? Isi ledo dancha jaalooma kalaqiꞌra hasiissannonke. Tenne assate jooguulle ikka hasiissannonke. (Sof. 2:3) Jooguullu busha coyenna taashsho xeinore Maganu biddi assa geeshsha cincite agadhitanno. Yihowa togoo manna laꞌꞌanno wote hagiidhanno.

12, 13. (a) Maganu kaaꞌlankera hasiꞌnummoro maa assa hasiissannonke? (b) Magano hagiirsiisannohu hiittoo mannaati?

¹² Maganu bushuulle ‘kayinni shollishannonsa.’ (Far. 147:6b) Kuni waajjishanno qaaleeti! Yihowa bagamannokki baxille leellishannonke gede woy hanqannonkekki gede isi giwannore giwa hasiissannonke. (Far. 97:10) Lawishshaho, amanyootu maaeelle giwa hasiissannonke. Togo yaa bunshete widira massannonke coye baala, lawishshaho teeda baꞌino misilla giwa hasiissannonke. (Far. 119:37; Mat. 5:28) Togo assate sharrama shota ikka hooggara dandiitanno; ikkirono Yihowa aannonke atooti isi giwannore giwate assineemmore baala rooranno.

¹³ Togoo sharro sharramme qeelate umonke ikkikkinni, Yihowa addaxxa hasiissannonke. Yihowa, ninke qeelle afiꞌrate ‘jawaatu faradiwiinni’ yaano mannuwiinni kaaꞌlo hasiꞌnummoro hagiidhanno? Dihagiidhanno! Hattono, “bagadaasinete” lekka, yaano uminke qeelleemmo yine woy wolu manni gatisannonke yine addaxxa dihasiissannonke. (Far. 147:10) Hatteentenni, Yihowa kaaꞌlannonke gede isiwa shinqe iso eeggifata hasiissannonke. Yihowa, amaale aanno manni gedeeha ikkikkinni, marro marro hinge huucciꞌneemmo coye baala ceeꞌmikkinni macciishshannonke. Yihowa ‘ayirrissannosirenna bagamannokki baxillesi addaxxitannore’ laꞌꞌanno wote hagiidhanno. (Far. 147:11) Isi ammanaminoha ikkinohuranna baxannonke daafira busha yorto baala qeelleemmo gede kaaꞌlannonketa addaxxa dandiineemmo.

14. Faarsaasinchu huluullaminokki coyi maati?

¹⁴ Yihowa qarru iillannonke wote kaaꞌlannonketa dihuluullammeemmo. Faarsaasinchu Yerusaalame wirro minantannota coyiꞌranni Yihowa daafira togo yee faarsino: “Isi waalchuwakki kaajjishe agaranno; giddokki nooha mannakkino maassiꞌranno. Isi dannakki seekke agaranno.” (Far. 147:13, 14) Faarsaasinchu Maganu katamu waalcho kaajjishe magansiꞌrannosi mannira agarooshshe ikkinota afasi lowo geeshsha jawaachishshinosi.

15-17. (a) Qarru iillannonke yannara mayine hendeemmoha ikkara dandaanno? Ikkirono Yihowa Qaalisi widoonni kaaꞌlannonkehu hiittoonniiti? (b) Maganu Qaali qarrammeemmo wote “hakkawoyitenni” daye kaaꞌlannota leellishanno lawishsha kuli.

¹⁵ Aterano yaachishanno coyi iillahera dandaanno. Yihowa kayinni iillinohe qarra dandiite saꞌꞌatto gede hayyo aannohe. Faarsaasinchu Maganisi daafira togo yee coyiꞌrino: “Baattote hajajo aanno; qaalisino hakkawoyintenni woꞌmanno.” Isi aanche, Yihowa “kaade” dirrisannota, qorra abbannotanna shiimmaadda “kaade” waxaaxisannota coyiꞌrihu gedensaanni togo yiino: “Isi dirrisanno qorra ayino didaanno.” Faarsaasinchu lede togo yiino: “Hakkuyi gedensaanni hajajosi aanno; kaadeno shiiltanno.” (Far. 147:15-18) Kaadenna qorra hajajannohu hayyichunna bayira wolqa afiꞌrino Magani, iillannohe qarra baala qeelatto gede kaaꞌla didandaanno?

¹⁶ Yihowa yannankera Qullaawu Maxaafisi widoonni biddishsha aannonke. “Qaalisi hakkawoyintenni” daye hasiisannonkeha ayyaanaamittete biddishsha aannonke. Hanni Qullaawa Maxaafa nabbabbe, “ammanaminohunna wodanaamu borojjichi” qixxeessino borro xiinxallite, JW Biroodikaaste  laꞌe, jw.org webisayite daaꞌꞌate, cimeeyye hasaawissenna ammanate roduuwinkewa aante afiꞌrootto hoꞌro hedi. (Mat. 24:45, NW) Yihowa biddishshu hasiisanno yannara mulenni biddishsha aannota umikki heeshshonni laꞌe diegennootto?

¹⁷ Semooni Maganu Qaali wolqa noosiha ikkinota huwattino. Ise iseneeto ajishshe laꞌannohura assitannori Magano hagiirsiisannokkihu gede assite heddino. Ise hexxo mudhitino yannara, Yihowa kaaꞌlannose gede seekkite huuccatto assidhino. Hattono Qullaawa Maxaafa ganyite xiinxallitanno. Ise togo yitino: “Duuchanka wote Yihowa jawaantenna biddishsha aannae laoomma.” Tini, gara ikkitino hedo heedhannose gede kaaꞌlitinose.

18. Yihowa baxannoheta huluullamattokki gede assannoheri maati? ‘Yahi Guwisidhe!’ yaatto gede assannohe korkaati maati?

¹⁸ Faarsaasinchu, Yihowa hundi dagasi mageeshshi geeshsha baxannoro afino. Maganu “qaalesi” hattono ‘wogasinna seerasi’ aannohu insara callaati. (Faarso 147:19, 20 nabbawi.) Yannankera Maganu suꞌminni woshshammeemmori ninke calla ikkinoommo daafira maassammoommoreeti. Yihowa afa, Qaalisi garinni heeꞌra, hattono isi ledo dancha jaalooma kalaqira kaajja qoossooti. Faarso 147 borreessi faarsaasinchinte gede ninkeno ‘Yahi Guwisiꞌneemmohu’, hattono wolootu iso guwisidhara jawaachinsheemmo gede assannonkehu batinyu korkaati noonke.