Tenne sanxarazhera kulloonni masaalo giddo mite woꞌmitinohu mitte yannaraati. Baalanti masaalo heeꞌnoommohu ‘goofimarchu’ yannara ikkinota duucha doogganni leellishshanno.—Dan. 12:4.

• Qummeeshshuwa: Aju. 11:7; 12:13, 17; 13:1-8, 12

  Masaalo: “Moyichu” uullate aana heeꞌranno manna 3,000 saꞌꞌanno diro gashshino. Goofimarchu dirira moyichunnihu lamalki umi madiꞌranno. Gedensoonni tini mada hurtanno; hattono ‘baattote aana noohu baalu moyichu hoode haꞌranno.’ Sheexaanu konne moyicho horoonsiꞌre ‘gattinori ledo olamanno.’

  Woꞌmitino gara: Baote Wayi gedensaanni Yihowa hettisannohu mannu gashshooti kaino. Kuni ikkihunni 3,000 saꞌꞌanno diri gedensaanni, Umihu Alamete Oli yannara Biritaaniyu gashshooti wolqiweelino. Ameeriku ledo buusamihu gedensaanni kayinni jawaatino. Sheexaanu roorenkanni goofimarchu dirira, uullate gashshoote baala horoonsiꞌre Maganu manna ugganno.

• Qummeeshshuwa: Dan. 11:25-45

  Masaalo: Goofimarchu diro aliyye mootenna wodiidi moote qasantanno.

  Woꞌmitino gara: Jarmanenna Angilo-Ameeriku heewisama hanafi. Sooviyeti Yuniyeenenna miillase 1945 aliyye moote ikkitu. Sooviyeti Yuniyeene 1991 ubbu; yannate gedensaanni Ruusiyunna miillasi Sooviyeti Yuniyeenete bayicho aliyye moote ikkitu.

• Qummeeshshuwa: Isa. 61:1; Mil. 3:1; Luq. 4:18

  Masaalo: Mesihichu Mangiste xintantara albaanni Yihowa, “doogo biddi assanno soqqamaancho” soyanno. Konni soqqamaanchi wido ikkitanno gaamo, shaqqadu mannira ‘dancha duduwo dudubbanno.’

  Woꞌmitino gara: Chaarliisi Teezi Raasilinna miillasi, 1870nni kayisse Qullaawu Maxaafi halaale huwatate Qullaawa Maxaafa diinaggaabbe xiinxallitino. Insa 1881nni Maganu soqqamaasine sabbaka hasiissannonsata luphi assite xawisa hanaffu. Insa fushshitino birxichuwa giddo mite, “1,000 Sawaakooti Hasiissanno” hattono “Sabbakate Buurama” yitannote.

• Qummeeshshuwa: Mat. 13:24-30, 36-43

  Masaalo: Baarigaaru qamadete wixi giddo santaata woy boddoono wixanno; boddoonu qamade egemmanno; gide mindanni yanna iillita geeshsha boddoonu qamadete ledo mitteenni lophanno gede agurranni; hakkiinni boddoono qamadetewiinni bandanni.

  Woꞌmitino gara: Addu Kiristaaninna kaphu Kiristaani mereero noo badooshshi, 1870 kayise roore xawe leella hanafino. Goofimarchu dirira addu Kiristaani gamba yiino; hattono kaphu Kiristaaniwiinni baxxino.

• Qummeeshshuwa: Dan. 2:31-33, 41-43

  Masaalo: Siwiilunninna dorunni seekkinoonni lekka; tini lekka, addi addi gari siwiilinni seekkinoonni misile widooti.

  Woꞌmitino gara: Doru, Angilo-Ameerikunnite Wolqaataame Mangiste gashshooti giddo mannu finqilannota leellishanno. Mannu finqilansa, tini alamenniti wolqaataame mangiste siwiilu gede kaajjitino wolqase woꞌmunni woꞌma horoonsidhannokki gede assitanno.

• Qummeeshshuwa: Mat. 13:30; 24:14, 45; 28:19, 20

  Masaalo: “Qamade” gamba assine ‘qaldaho’ worranni; hattono Yesuusi minisi manni aana, ammanaminohanna wodanaamo borojjicho shoomanno. ‘Maganu Gashshootiha Dancha Duduwo gobba baalate’ sabbaka hananfanni.

  Woꞌmitino gara: Ammanaminohunna wodanaamu borojjichi 1919nni Maganu manni aana shoomamino. Hatte yannanni kayise Qullaawu Maxaafi rosaano sabbakate looso laalaatte loossanni no. Xaa yannara Yihowa Farciꞌraasine 200 saꞌanno gobbuwara sabbakkanni no; hattono Qullaawu Maxaafi aana xintantino borro 1,000 saꞌꞌanno afiinni qixxeessitanni no.

• Qummeeshshuwa: Dan. 12:11; Aju. 13:11, 14, 15

  Masaalo: Lame buuda afiꞌrino moyichi, ‘moyichoho misile seekkinanni gede hajajanno’ hattono ‘misilete foole woranno.’

  Woꞌmitino gara: Angilo-Ameeriku Alamenniti Wolqaataame Mangiste, Qaalu Gondoori Maamara xintinanni gede assitino. Wole gobbuwano tenne dirijjite miilla ikkitino. Yannate gedensaanni aliyye mooteno hatte dirijjite wido ikkino; ikkollana miila ikke keeshshinohu 1926 kayise 1933 geeshsha callaati. Mannu, Qaalu Gondoori Maamari alame woꞌmate keere abbanno yee hedino; yannate gedensaanni xintantinoti Buusantino Mangistubbano hatto assitanno yinoonni; ikkollana alame woꞌmate keere abbitannoti Maganu Mangiste callate.

• Qummeeshshuwa: Dan. 8:23, 24

  Masaalo: Kakkachu moote “lowo geeshsha jawaata ikkanno.”

  Woꞌmitino gara: Alamenniti Wolqaataame Mangiste Angilo-Ameeriku lowo coye gawajjino. Lawishshaho, Layinkihu Alamete Oli yannara Ameeriku, Angilo-Ameerikaho diina ikkitino gobbara lame atomete bomba tugino; kuni bombi lowo geeshsha gawajjino.

• Qummeeshshuwa: Dan. 11:31; Aju. 17:3, 7-11

  Masaalo: Tonne buuda afiꞌrinohu, “duumu moyichi” diimete giddonni fulanno; hattono settikki moote ikkanno. Daanieeli maxaafi kuni moote ‘baote batte’ ikkinota kulanno.

  Woꞌmitino gara: Layinkihu Alamete Oli yannara, Qaalu Gondoori Maamari diigamino. Olu uurrihu gedensaanni, Buusantino Mangistubba dirijjite xintantino. Qaalu Gondoori Maamari gede, tenne dirijjitera Maganu Mangistera aa hasiissanno ayirrinye uyinoonni. Buusantino Mangistubba dirijjite kaphu ammaꞌno huntanno.

• Qummeeshshuwa: 1 Tes. 5:3; Aju. 17:16

  Masaalo: Daga “salaamenna teense heeꞌnanni yanna daggino” yite lallabbanno; hattono “tonne buuddanna moyichu foortanno mancho” siꞌanno, hattono huntanno. Hakkiinni daga baala baꞌanno.

  Woꞌmitanno gara: Mangistubba salaamenna harshammo abbinoommo yite coyidhanno. Hakkiinni Buusantino Mangistubba Dirijjite wido ikkitino gobbuwa, kaphu ammaꞌno dirijjitta huntanno. Kuni bayiru qarri hanafinota leellishanno malaateeti. Bayira qarri gumulamannohu, Sheexaanu alame woꞌma Armagedooni olinni baꞌanno woyiteeti.

• Qummeeshshuwa: Hiz. 38:11, 14-17; Mat. 24:31

  Masaalo: Googi Maganu manni gobba horranno. Hakkiinni sokkaasine “Maganu doodhinore gamba assitanno.”

  Woꞌmitanno gara: Aliyye moote wole alamete mangistubba ledo buusame Maganu manna sianno. Kuni siꞌꞌi hanafihunni shiima yanna gedensaanni uullate gattino buuramaasine iimira hadhanno.

• Qummeeshshuwa: Hiz. 38:18-23; Dan. 2:34, 35, 44, 45; Aju. 6:2; 16:14, 16; 17:14; 19:20

  Masaalo: ‘Waajjo farashsho gulufe noohu,’ Googinna olantosi hune ‘qeelle adhanno.’ “Moyicho” “ruqanunnihura giirate baarira” tunganni; hattono jawa misile cancanantanno.

  Woꞌmitanno gara: Maganu Mangiste Moote ikke noohu Yesuusi Kiristoosi Maganu manna gatisanno. Yesuusi ledosi gashshitannori 144,000nna sokkaasinete ledo buusantino mangistubba hunanno; konni garinni Sheexaanu alame woꞌma baꞌanno.