1. Yesuusi iimi jiro daafira mayino?

 ILLETE leeltannoti baalanta jiro diꞌꞌikkitino. Isinni, baalantenni roore muxxe jiro illete leeltannokkite. Yesuusi ilaalaho sabbaki yannara, maalaamittete jiro lowo geeshsha roortannota ayyaanaamittete jiro qummi assino. Hakkiinni isi lede, “Jiroꞌne noowa wodaniꞌneno hakkiicho heeꞌranno” yiino. (Mat. 6:19-21) Mitto coye lowo geeshsha banxeemmoha ikkiro, hakko coye afiꞌrate baasa laalaanteemmo. Maganu albaanni danchu suꞌmi heeꞌrannonke gede sharrammeemmoha ikkiro, iima ‘jiro duuꞌninanni’ heeꞌnoommo. Yesuusi hattoo jiro mooraanchu moorannokkita woy baꞌara dandiitannokkita coyiꞌrino.

2. (a) Layinki Qorontoosi 4:17, 18 kultanno garinni Phaawuloosi maa illachinsheemmo gede amaalinonke? (b) Konni birxichira maa ronseemmo?

² Soqqamaasinchu Phaawuloosi, “illetenni . . . leellannokkiha illachinsheemmo” gede amaalinonke. (2 Qorontoosi 4:17, 18 nabbawi.) Illete leellannokkire yiniri giddo mitu, Maganu abbannote haaro alamera afiꞌneemmo atooteeti. Konni birxichira, xaanni afiꞌra dandiineemmota shoole illete leeltannokki jiro daafira ronseemmo; insano: Maganu ledo noonke jaalooma, huuccattote qoosso, Maganu ayyaani kaaꞌlonna sabbankeemmo woyite iiminni afiꞌneemmo kaaꞌlooti. Qoleno kuri illete leeltannokki jiro naandeemmota leellisha dandiineemmohu hiittoonniitiro ronseemmo.

3. Baalanta roortannoti illetenni leeltannokki jiro hiittenneeti? Tenne jiro afiꞌneemmo gede kaaꞌlannonkeri maati?

³ Illete leeltannokki jiro giddo baalantenni roortinoti, Maganu Yihowa ledo noonke jaaloomaati. (Far. 25:14) Maganu qullaawa ikke heeꞌre, cubbaataammu mannira jaala ikka dandaannohu hiittoonniiti? Yesuusiti wodote kakkalo ‘alamete cubbo haadhe  hooltanno’ daafira, mannu ooso Maganoho jaala ikka dandiitanno. (Yoh. 1:29) Yihowa mannu ooso gatisate eino qaali woꞌmikki gatannokkita balaxe afino. Yesuusi reyara albaanni heeꞌrino manni nafa Maganu jaala ikka dandiinohu iseraati.—Rom. 3:25.

4. Hundi waro Maganu jaala ikkitinori giddo mitu ayeooti?

⁴ Hanni hundi waro Maganu jaala ikkinoha mito manna qaango. Abirahaami kaajja ammana noosi manchooti. Abirahaami reyihunni 1,000 saꞌꞌanno diri gedensaanni, Yihowa iso “jaaliꞌya” yiinosi. (Isa. 41:8) Hakko daafira reyo nafa, Maganu jaalla isiwiinni baddansara didandiitanno. Maganu albaanni Abirahaami direyino. (Luq. 20:37, 38) Wolu Maganu jaali Iyyoobiiti. Sokkaasine iima gamba yitinowa, Yihowa Iyyoobi ammanannota coyiꞌrino. Yihowa Iyyoobi, ‘suwashshohonna bushu coyiwiinni fafe ane ayirrisannoho’ yiino. (Iyo. 1:6-8) Daanieeli 80 meddi yaanno diro Magano magansiꞌrannokki manni gobbara heeꞌre ammaname soqqaminohura, Yihowara mayi macciishshaminosi? Sokkaasine sase higge Maganu Daanieeli lowo geeshsha ‘baxannosita’ kultinosi. (Dan. 9:23; 10:11, 19) Yihowa muxxe jaallasi reyotenni kayisanno yanna quqquxame agadhannota dihuluullammeemmo!—Iyo. 14:15.

5. Yihowa jaala ikkate maa assa hasiissannonke?

⁵ Xaa yannara guuntete xeꞌne noonsaha ikkirono, Yihowa jaalla ikkinohu mageeshshi mannaati? Miliyoonetenni kiirranni manni isi jaalla ikkino. Korkaatuno, alamete doyichora batinyu labballinna meenti hattono qaaqquullu assootinsanni Maganu jaalla ikkinota leellishanni no. Yihowa jaala ikkannohu “suwashshu wodani” noonsa manniraati. (Law. 3:32) Insa isi ledo jaalooma dandiitannohu, Yesuusita wodote kakkalo ammantannoha ikkirooti. Yihowa tenne wodo widoonni heeshshonke isira sayinse uyine cuuammeemmo gede fajjinonke. Hatto assineemmoha ikkiro, heeshshonsa Yihowara sayise oye cuuaminohu lowo miliyoone ikkanno Kiristaani widira kiirammeemmo; insa kalqete alame giddo baalunkunni roorino Maganira jaalla ikkitino.

6. Maganu ledo noonke jaalooma naandeemmota leellisha dandiineemmohu hiittoonniiti?

⁶ Maganu ledo noonke jaalooma naandeemmota leellisha dandiineemmohu hiittoonniiti? Abirahaaminna Iyyoobi Maganoho lowo diro ammanante heedhunte gede, ninkeno tenne goofimarchu yannara Yihowara soqqammoommo diri ikki geeshshihano ikkiro woꞌmante yannara isira ammanama hasiissannonke. Daanieeli gede ninkeno Maganu ledo noonke jaalooma heeshshonkenni nafa roorsine laꞌꞌa hasiissannonke. (Dan. 6:7, 10, 16, 22) Yihowa kaaꞌlonni ayi geeshshi qarrano dandiine saꞌne isi ledo noonke jaaloomi baikkinni heeꞌra dandiineemmo.—2 Qor. 4:7.

7. (a) Lawishsha 15:8 kultanno garinni, huuccattonke daafira Yihowara mayi macciishshamannosi? (b) Yihowa huuccattonkera dawaro qolannohu hiittoonniiti?

⁷ Illete leeltannokkiti wole jiro huuccattote. Baxantanno jaalla mimmitoho giddonsata hasaapha baxxanno. Yihowa ledo noonke jaaloomino hattooti. Yihowa Qaalisi widoonni hasaawisannonke, qoleno Qaalisi hedosinna macciishshamannosire anfeemmo gede kaaꞌlannonke. Ninkeno huuccattotenni Yihowa hasaawisanna giddonketa isira kuꞌla dandiineemmo. Yihowa huuccattonke macciishsha hagiirsiissannosi. (Lawishsha 15:8 nabbawi.) Yihowa baxannonke Jaala ikkino daafira, huuccattonke macciishshe agurannoha calla ikkikkinni dawaro qolannonke. Mito woyite isi huuccattonkera dawaro rahe qolara dandaanno. Mite hajo daafira kayinni marro marro hinge huucciꞌra hasiissannonke woyiti heeꞌrara dandaanno. Ikkirono Yihowa gara ikkitino  yannara, ninkera maltino dawaro qolannota dihuluullammeemmo. Mito woyite Yihowa huuccattonkera dawaro ninke hendoommokki doogonni qolara dandaanno. Lawishshaho isi iillinonke qarra hoolikkinni, hakko qarra ‘cincine saꞌꞌa dandiineemmo gede’ hayyonna jawaante aankera dandaanno.—1 Qor. 10:13.

8. Yihowa uyinonketa huuccattote qoosso naandeemmota leellisha dandiineemmohu hiittoonniiti?

⁸ Ikkina muxxe ikkitinota huuccattote qoosso naandeemmota leellisha dandiineemmohu hiittoonniiti? Hatto assa dandiineemmo doogga giddo mitte, Yihowa “Agurtinikkinni huuccidhe!” yee amaalinonke amaale macciishshate. (1 Tes. 5:17) Yihowa huuccatto assiꞌneemmo gede digiddeessannonke. Hatteentenni doodhate qoossonke ayirrisanno; hattono ‘jaante huucciꞌneemmo’ gede jawaachishinonke. (Rom. 12:12) Konni daafira barru baala duucha hinge huucciꞌneemmoha ikkiro, huuccattote qoossonke naandeemmota leellinsheemmo. Huuccatto assiꞌneemmo woyite, Yihowa galatanna guwisa hasiissannonketi egennantinote.—Far. 145:2, 3.

9. Mittu rodii huuccattote daafira mayino? Huuccattote qoosso daafira mayi macciishshannohe?

⁹ Yihowara lowo diro soqqammummoro, isi huuccattonkera dawaro qolino gara laꞌneemmo daafira, huuccattote qoossonke albinni roore naandeemmo. Lawishshaho, hanni 47 diro woꞌma yanna soqqaminohu Kiriisi yinanni rodii lawishsha laꞌno. Isi togo yiino: “Soodo gute kae Yihowa huucciꞌra lowo geeshsha baxisannoe. Duuꞌmo saaqqanno woyite arrishsho lekka abbitanna laꞌnanni Yihowa hasaawisa lowo geeshsha hagiirsiissanno! Tini, huuccattote qoossorano ikko isi uyinoete wole elto baalantera galaxxeemmosi gede assitannoe. Hakkiinni hawarro huuccatto assiꞌrummo gedensaanni, tashshi yaannae goxe galeemmo.”

10. Qullaawu ayyaani muxxe jirooti yineemmohu mayiraati?

¹⁰ Illete leeltannokkiti wole muxxe jiro, Maganunniho qullaawa ayyaanaati. Yesuusi, qullaawa ayyaana afiꞌrate huucciꞌneemmo gede amaalinonke. (Luq. 11:9, 13) Yihowa qullaawu  ayyaanisi widoonni “wolqa” aannonke; wole agurina isi mannu wolqara aleenni ikkitino wolqa aankera dandaanno. (2 Qor. 4:7; Soq. 1:8) Maganu ayyaani kaaꞌlonni, iillannonkeha aye geeshshi qarra cincine saꞌꞌa dandiineemmo.

11. Qullaawu ayyaani kaaꞌlannonkehu hiittee doogganniiti?

¹¹ Qullaawu ayyaani Maganoho soqqammeemmo gede kaaꞌlannonke. Qoleno Maganu ayyaani dandoonke lexxitanno gede assara dandaanno. Soqqanshonkenni dancha guma afiꞌra dandiineemmohu, uminke wolqanni ikkikkinni Maganu ayyaani kaaꞌlonni callaati.

12. Faarso 139:23, 24 kultanno garinni, qullaawu ayyaani ma assate kaaꞌlannonke gede huucciꞌra dandiineemmo?

¹² Qullaawa ayyaana naandeemmota leellisha dandiineemmoti wole doogo, kuni ayyaani wodaninkera noota gara ikkitinokki hedonna yorto afiꞌneemmo gede kaaꞌlankera huucciꞌrate. (Faarso 139:23, 24 nabbawi.) Hatto assinummoro, Yihowa ayyaanisi widoonni wodaninkera noota gara ikkitinokki hedonna yorto afiꞌneemmo gede kaaꞌlannonke. Qoleno wodaninkera gara ikkitinokki hedonna yorto noota afiꞌnummoro, qullaawu ayyaani hattoo hedo fushshine hooꞌlineemmo gede kaaꞌlankera Magano huucciꞌra hasiissannonke. Hatto assanke, Yihowa qullaawu ayyaanisinni kaaꞌlannonkekki gede assara dandaannoha aye coyeno gargadhate murciꞌnoommota leellishshanno.—Efe. 4:30.

13. Qullaawa ayyaana albinni roore naadate maa assa dandiineemmo?

¹³ Qullaawa ayyaana albinni roore naadate, kuni ayyaani xaa yannara maa assanni nooro hiinca dandiineemmo. Yesuusi iimira haꞌrara albaanni rosaanosi togo yiino: “Qullaawu ayyaani kiꞌne aana dirranno wote wolqa adhitinanni; hakkiinni . . . uullate qacce geeshsha farciꞌraasineꞌya ikkitinanni.” (Soq. 1:8) Yesuusi coyiꞌrinori yannankera dhagge ikkanno garinni woꞌmanni no. Qullaawu ayyaani kaaꞌlonni, settenna darate miliyoone meddi yaanno manni uullate doyichonni gamba yee Yihowa magansiꞌrannoha ikkino. Qoleno Maganu ayyaani, baxillu, hagiirru, keeru, cinca, shooshanqe, danchumma, ammana, joongillunna meessanaa qeeꞌlate akati heeꞌrannonke gede  kaaꞌlinonke daafira, ayyaanaamittete gannatera hagiidhinanni heeꞌnoommo. Kuri akatta ‘ayyaanu laalooti.’ (Gal. 5:22, 23) Qullaawu ayyaani muxxe jirooti!

14. Soqqammeemmo woyite kaaꞌlitannonkeri illetenni leeltannokkiri ayeooti?

¹⁴ Yihowa, Yesuusinna sokkaasinete ‘ledo mitteenni loosate’ qoossono illete leeltannokki jirooti. (2 Qor. 6:1) Manna rosaano assate looso loonseemmo yanna baalantera ledonsa loonsanni heeꞌnoommo. Phaawuloosi isonootonna konne looso loossannore “Ninke Maganu ledo loonseemmoreeti” yiino. (1 Qor. 3:9) Maganoho soqqammeemmo woyite, Yesuusi ledono loonsanni heeꞌnoommo. Yesuusi harunsaanosi ‘gosa baala rosaanoꞌya asse’ yee hajajinsahu gedensaanni, “goofimarchi geeshsha ani kiꞌne ledo noommo” yiinota qaango. (Mat. 28:19, 20) Sokkaasine kaaꞌlitannonkehu hiittoonniiti? ‘Baattote aana noo mannira hegereta danchu duduwi sokka’ dudumbeemmo woyite sokkaasine massaggannonketa afanke hagiirsiissannonke!—Aju. 14:6.

15. Soqqammeemmo woyite Yihowa kaaꞌlannonketa leellishshannota Qullaawu Maxaafi xagge kuli.

¹⁵ Iiminni afiꞌneemmo irko, maa assineemmo gede kaaꞌlitanni noonke? Maganu Mangiste sokka winxeemmo woyite, mitu wixi shaqqadu wodanira uwe lophanno. (Mat. 13:18, 23) Kuni halaalu wixi lophe guma laalanno gede assannohu ayeti? Yesuusi, “Anniꞌya daanno gede assikkinni anewa daa dandaannohu dino” yiino. (Yoh. 6:44) Qullaawu Maxaafi giddo tini halaale ikkitinota leellishshanno xagge no. Hanni Phaawuloosi Filiphisiyusi katamira gobbaanni gamba yee noo meentira farciꞌri yannara mayi ikkinoro qaango. Qullaawu Maxaafi hakko meenti giddonni Liidiya yinanniti, “Maganu wodanase faneenna Phaawuloosi coyiꞌranno coye macciishshitu” yaanno. (Soq. 16:13-15) Yihowa Liidiya gedeeha lowo miliyoone ikkanno manna minisira abbino.

16. Soqqanshonkenni dancha guma afiꞌneemmo woyite ayirrinyu hasiisannohu ayeraati?

¹⁶ Soqqanshonkenni dancha guma afiꞌneemmo woyite ayirrinyu hasiisannohu ayeraati? Phaawuloosi Qorontoosi songora sokka borreessi woyite tenne xaꞌmora dawaro qolino; isi togo yiino: “Ani kaasummo; Aphiloosi waa hayikkisi. Lossinohu kayinni Maganoho. Kunnira, loosoho umo ikkinohu, kaansoonnire lossi Maganooti.” (1 Qor. 3:6, 7) Ninkeno Phaawuloosi gede, soqqanshonkenni dancha guma afiꞌneemmo yanna baalantera Yihowa galata hasiissannonke.

17. Yihowa, Yesuusinna sokkaasinete ‘ledo mitteenni loosate’ qoosso naandeemmota leellisha dandiineemmohu hiittoonniiti?

¹⁷ Yihowa, Yesuusinna sokkaasinete ‘ledo mitteenni loosate’ qoosso naandeemmota leellisha dandiineemmohu hiittoonniiti? Mannaho dancha duduwo kulleemmo faro diinaggaambe hasiꞌratenniiti. Hatto assa dandiineemmoti duucha doogga no; lawishshaho, “Gudumaalehono mine mine” haꞌneno farciꞌra dandiineemmo. (Soq. 20:20) Lowo roduuwi sabbakate fultinokki woyiteno farciꞌra baxxanno. Insa egentinokki manchinni xaaddanno woyite, faasiiqqe keere haadhe hasaawa hanafate woꞌnaaltanno. Hakku manchi hasaawa haaꞌriro, hayyotenni Maganu Mangiste sokka kultanno.

18-19. (a) Halaalu wixira waa hayikkisa dandiineemmohu hiittoonniiti? (b) Yihowa mitto Qullaawu Maxaafi rosaancho kaaꞌlino gara leellishanno woꞌnaalsha kuli.

¹⁸ “Maganu ledo loonseemmore” ikkinoommo daafira, halaalu wixa wixe agura calla ikkikkinni, waa hayikkisa hasiissannonke. Mittu manchira hasatto noosita anfummoro, faana ganne hasaawisa woy wolu rodii isiwa mare Qullaawa Maxaafi xiinxallisanno gede assa hasiissannonke.  Hakku manchi hedosinna laosi biddi assiꞌranno gede Yihowa kaaꞌlannasi laꞌneemmo woyite tashshi yaannonke!

¹⁹ Hanni mittu Wodiidi Afirikira heeꞌranno rodii woꞌnaalsha laꞌno; isi bashsho kiilaanchoho. Gedensoonni, Qullaawa Maxaafa xiinxalle rosinore lowo geeshsha baxino. Ikkollana, reyitinore albi annuwa hasaawisate daafira Maganu Qaali mayyaannoro nabbawiti lamete giddo mitte doodha hasiissinosi. (Mar. 18:10-12) Gedensoonni isi Maganu hedosi biddi assannosi gede maahoyye yiino. Hattono heeshshosira hasiisannore afiꞌrannohu kiilunni ikkirono, konne looso agurino. Xa 60 diro ikkinosihu kuni rodii togo yiino: “Yihowa Farciꞌraasine babbaxxino garinni kaaꞌlitinoe daafira lowo geeshsha galateemmonsa; lawishshaho insa wole looso afiꞌreemmo gede kaaꞌlitinoe. Baalunkunni roore heeshshoꞌya biddi yitanno gede kaaꞌlinoehura Yihowa galaxxeemmosi; xa ani cuuame Yihowa Farciꞌraasincho ikke soqqamanni noommo.”

20. Maa assate murciꞌrootto?

²⁰ Konni birxichira, illetenni leeltannokkite shoole jirore ronsoommo. Baalantenni roortanno jiro Yihowa ledo noonke jaaloomaati. Isi ledo jaaloomanke, wole illete leeltannokki jiro yaano huuccattote qoosso, qullaawu ayyaani kaaꞌlonna iiminni irko afiꞌneemmo gede kaaꞌlitannonke. Konnira illete leeltannokki jiro albinni roore naadate murciꞌno. Qoleno baxillaancho Jaala ikkinonkehura Yihowa galaxxa agurroonke!