1. Yihowa assinoheri maati?

YIHOWA FARCIˈRAASINCHO ikkoottohu hiittoonniiti? Umo ‘dancha duduwo’ macciishshootto; macciishshoottohu annikkinna amakkiwiinni, ledokki loossannori woy rossannoriwiinni woy roduuwu minunni mine hadhe sabbakkanni dagge kulteennahe ikkara dandaanno. (Maq. 13:10) Hakkiinni, mittu rodii lowo yanna Qullaawa Maxaafa xiinxallisinohe hattono ate kaaˈlate lowore assino. Xiinxallokki Yihowa baxatto gedenna isino baxannoheta afatto gede kaaˈlitinohe. Yihowa halaalu minira abbinohe; hakko daafira xa Yesuusi Kiristoosi rosaancho ikkoottohura hegerera heeˈrate hexxo noohe. (Yoh. 6:44) Yihowa mittu rodii rosiisannohe gede kakkayisinoteranna soqqamaanchosi assiˈrinohe daafira galatattositi dihuluullissannote.

2. Konni birxichira maa ronseemmo?

² Ninke halaale anfoommo daafira, wolootuno ledonke hegere heeshshowa massitanno doogo hadhanno gede kaaˈlate qoosso afiˈnoommo. Minunni mine haˈne sabbaka qarrisa hooggankera dandiitanno; ikkirono mannu Qullaawa Maxaafa xiinxallanno gede koyisanna Qullaawa Maxaafa xiinxallisa qarra ikkitankera dandiitanno. Aterano tini qarra ikkitinohe? Hatto ikkiro konni birxichira kulloonni hedo kaaˈlitahera dandiitanno. Manna rosaano assate looso kaaˈlineemmo gede kakkayisannonkeri maatiro laˈneemmo. Hattono Qullaawa Maxaafa xiinxallinseemmokki gede guficho ikkankera dandaannore qeela dandiineemmo gara ronseemmo. Hanni balanxe dancha duduwo sabbaka calla ikkikkinni rosiisa hasiissannonkehu mayiraatiro laˈno.

3. Sabbankeemmohu mayiraati?

³ Yesuusi uullate aana noo yannara harunsaanosira lame gafa afiˈrino looso uyinonsa. Umihunni Maganu Mangisteha dancha  duduwo sabbakkanno gede kulinonsa hattono tenne assa dandiitanno gara leellishinonsa. (Mat. 10:7; Luq. 8:1) Lawishshaho Yesuusi rosaanosi, mannu Maganu Mangiste sokka macciishshe adhanno woyite maa assa hasiissannonsaro hattono macciishsha giwanno woyite maa assitannoro kulinonsa. (Luq. 9:2-5) Qoleno Yesuusi harunsaanosi “gobbate qacce geeshsha” sabbakkannota kule, kuni loosi mageeshshi geeshsha halaˈlannoro masaalino. (Mat. 24:14; Soq. 1:8) Mannu macciishshirono macciishsha giwirono, Yesuusi rosaano baalunku mannira Maganu Mangisterenna tini Mangiste abbitannore duduwa hasiissannonsa.

4. Maatewoosi 28:18-20 yitanno garinni, Maganu Mangiste sabbakano agurranna maa assa hasiissannonke?

⁴ Yesuusi rosaanosi hajajinonsahu layinki coyi maati? Harunsaanosi mannu isi hajajinore baala agadhanno gede rosiissara kulinonsa. Kayi mitu manni yaannohu gede, konne sabbakatenna rosiisate looso loosa hasiissannonsahu umi xibbi diro heeˈrino Kiristaana callahoni? Deeˈni; Yesuusi konne looso “gobbate goofimarchi geeshsha” yaano, yannanke geeshshano loonsannita coyiˈrino. (Maatewoosi 28:18-20 nabbawi.) Yesuusi hatto yee hajajinohu 500 saˈanno rosaanosira leelli woyite ikkikki digatino. (1 Qor. 15:6) Qoleno isi ajuujatenni Yohaannisi hasaawisi woyite, baalanti rosaanosi mannu Yihowa daafira rosanno gede kaaˈla hasiissannonsata coyiˈrino.—Aju. 22:17.

5. Umi Qorontoosi 3:6-9 yitanno garinni, Phaawuloosi sabbakanna rosiisa xaadooshshe afidhinota lawishshunni kulinohu hiittoonniiti?

⁵ Soqqamaasinchu Phaawuloosi manna rosaano assate loosi kaashsho towaaxxate gede ikkinota xawisino; tini kaase calla agura hasiissannokkita leellishshanno. Isi Qorontoosi Kiristaanira, “Ani kaasummo; Aphiloosi waa hayikkisi. . . . Kiˈneno Maganu hoˈrichooti” yiino. (1 Qorontoosi 3:6-9 nabbawi.) Ninke ‘Maganu hoˈrichira’ loonseemmore ikkinoommo daafira, kaanse calla agurreemmoha ikkikkinni waa hayikkinseemmo hattono lophanni nooronna teˈee ganyine towaanteemmo. (Yoh. 4:35) Ikkollana lossannohu Magano ikkinota dideˈneemmo.

6. Manna rosiinseemmo woyite maa assa hasiissannonke?

⁶ “Hegere heeshsho afiˈrate gara ikkitinoti wodanu dooˈˈo noonsare” hansanni heeˈnoommo. (Soq. 13:48, NW) Insa Yesuusi rosaano ikkitanno gede kaaˈlate, Qullaawu Maxaafinni rossannore (1) huwattanno gede, (2) ammante adhitanno gede hattono (3) loosu aana hosiissanno gede kaaˈla hasiissannonke. (Yoh. 17:3; Qol. 2:6, 7; 1 Tes. 2:13) Songote giddo noo halashshaano baala Qullaawu Maxaafi rosaano kaaˈla dandiitanno; insa tenne assate kuri haaruuddeho baxille leellishshannonsa hattono gambooshshe dagganno woyite anga fante haadhannonsa. (Yoh. 13:35) Qullaawa Maxaafa rosiisanno rodiino, rosaanchu gara ikkinokki rosonna bude aguranno gede lowo yanna diinaggaawe kaaˈla hasiissannosiha ikkara dandaanno; ‘qiishote’ gede ikkinoha konne rosonna bude rosaanchu lowo diro cuˈmiˈre keeshshinoha ikkara dandaanno. (2 Qor. 10:4, 5) Isi konne coye biddi assiˈre cuuamate deerra iillanno gede kaaˈlate lowo aganna hasiissannoha ikkara dandaanno. Hatto assanno gede kaaˈlate sharrama kayi gaabbissannota diˈˈikkitino.

7. Sabbankeemmo gedenna manna rosaano assineemmo gede kakkayisannonkeri maati?

⁷ Sabbakatenna manna rosaano assate looso loonseemmohu mayiraati? Umihunni, Yihowa banxeemmo daafiraati. Yesuusi sabbankeemmo gedenna manna rosaano assineemmo gede hajajinonke hajajo wonshate dandaaminkere baala assineemmoha ikkiro, Yihowa banxeemmota leellinshanni heeˈnoommo. (1 Yoh. 5:3) Hanni tenne hedi: Yihowara noohe baxilli minunni mine hadhe sabbakatto gede assinohe. Ikkollana hatto assa shota ikkitinoheni?  Hatto ikka hoogara dandaanno. Mite yite sabbakate fulitto woyite waajjootto? Waajjoottoti dihuluullissannote! Ikkirono kuni Yesuusi loosi yiinohe looso ikkinota afootto daafira hajajante loosootto. Sunu sununni sabbakate loosi waajjisha agurinoheha ikkara dandaanno. Qullaawa Maxaafa xiinxallisana? Tenne hedatto woyite waajjishannohe? Waajjishannoheha ikkara dandaanno. Ikkollana, waajja qeeˈlite mannu Qullaawa Maxaafa xiinxallanno gede koyisa dandaatto gede kaaˈlahera Yihowa huucciˈrittoro, isi manna rosaano assate hasattokki lexxitanno gede asse kaaˈlannohe.

8. Maarqoosi 6:34 kultanno garinni manna rosiinseemmo gede kakkayisannonkehu wolu coyi maati?

⁸ Layinkihunni, manna banxeemmo daafira tini halaale rosiinseemmonsa gede assitannonke. Mitte yannara Yesuusinna rosaanosi sabbakkanni hossinowiinni higganni lowo geya daafurte no. Insa fooliishshiˈra hasidhinoha ikkirono lowo manni hoodensa dayi. Yesuusi konne manna mararino daafira “lowo coye rosiisinsa.” (Maarqoosi 6:34 nabbawi.) Isi daafurinoha ikkirono isonooto diqooffatino. Mayira? Yesuusi mannu qarra umisihu gede asse laino. Isi insa lowo geeshsha qarrantinotanna hexxo hasiissannonsata afino daafira insa kaaˈla hasiˈrino. Xaa yannarano mannu hatto ikke no. Insa laˈnanni woyite hagiirraamma labbara dandiitanno. Kayinni insa baxxite baˈinote allaalaanchu nookki geˈrecho gede ikkitino. Phaawuloosi togoo manna, Magano affukkinni hexxo noonsakkiha heedhannori gede asse coyiˈrino. (Efe. 2:12) Insa ‘baote widira massitanno’ doogo hadhanni no. (Mat. 7:13) Qoqqowinkera noo manni ayyaanaamittetenni gattaawe noota laˈneemmo woyite, baxillunna mararro insa kaaˈlineemmo gede assitannonke. Insa kaaˈla dandiineemmoti baalantenni roortino doogo Qullaawa Maxaafa xiinxallitanno gede koyisate.

9. Filiphisiyusi Sokka 2:13 kultanno garinni Yihowa kaaˈlannohehu hiittoonniiti?

⁹ Qullaawa Maxaafa xiinxallisate lowo yanna hasiissannota afootto daafira mannu Qullaawa Maxaafa xiinxallanno gede koyisate hobbi ruxxi yaattoha ikkara dandaanno. Hatto ikkiro giddokkita Yihowara hasaaphi. Isi Qullaawa Maxaafa xiinxallisatto mancho hasiˈratenna xiinxallisate hasatto heedhannohe gede kaaˈlahera huucciˈri. (Filiphisiyusi Sokka 2:13, [NW] nabbawi. *) Soqqamaasinchu Yohaannisi Maganu fajjosi ledo sumuu yitanno huuccatto macciishshannota buuxisinonke. (1 Yoh. 5:14, 15) Hakko daafira Yihowa manna rosaano assate hasattokki lexxitannohe gede kaaˈlannoheta huluullantooti.

10-11. Qullaawa Maxaafa xiinxallisate hobbi ruxxi yineemmo gede assankera dandaannori maati?

¹⁰ Manna rosaano assate looso hasiˈnoommo geeshsha loonseemmokki gede guficho ikkannonkeri tuncu yiinkerono konne looso mulluri gede assine dilaˈneemmo. Hanni fonqolo ikkannonkehu mitu coyi maatironna qeela dandiineemmohu hiittoonniitiro laˈno.

¹¹ Hasiˈnoommo geeshsha soqqama dandiineemmokkiha ikkara dandaanno. Lawishshaho mito roduuwa geedhimma woy dhibbu waadannonsa. Ateno togoori waadannohe? Hatto ikkiro, hanni Koroonu vayiresenni kainohunni ronsoommori giddonni mitto coye laˈno. Elektirooniksete uduunnicho horoonsiˈne Qullaawa Maxaafa danchu garinni xiinxallisa dandiineemmota ronsoommo! Hakko daafira minekki heedhenni Qullaawu Maxaafi xiinxallo hanafiisiisanna xiinxallisa dandaatto; hatto assa roore shota ikkitahera dandiitanno. Xiinxallisa dandiineemmoti wole farono noonke. Mitootu Qullaawa Maxaafa xiinxalla hasidhannoha ikkirono roduuwu sabbakkanno yannara insara diˈˈinjaannonsa. Insara soodo guto woy hashsha  injaansara dandaanno. Togoo manna insara injiitannonsa yannara xiinxallisate mitore biddi assiˈra dandaatto? Yesuusi Niqoodimoosi rosiisinohu hashshaati; isi rosa hasiˈrinohu hatte yannaraati.—Yoh. 3:1, 2.

12. Qullaawa Maxaafa dancha gede rosiinseemmo gede kaaˈlannonkeri maati?

¹² Qullaawa Maxaafa xiinxallisate dandoo dinoe yine hendeemmoha ikkara dandaanno. Manna Qullaawa Maxaafa xiinxallisate lowo egenno woy dandoo hasiissannonke yine hendeemmoha ikkara dandaanno. Ati hatto yite hedattoha ikkiro, hanni waajjattokki gede kaaˈlannoheha sase coye laˈno. Umihunni, Yihowa ati manna rosiisate ikkadoho yiinohe. (2 Qor. 3:5) Layinkihunni, ‘gordohonna baattote roorre uyinoonnisihu’ Yesuusi rosiisatto gede hajajinohe. (Mat. 28:18) Sayikkihunni, Yihowanna ammanate roduuwikki kaaˈlitannohe. Yihowa, Yesuusi mayyee rosiisannoro afanno gede kaaˈlisinte gede ateno kaaˈlannohe. (Yoh. 8:28; 12:49) Qoleno, soqqanshote gaamokkihu aliidi laˈˈaanchi, dandoo noosi suwisaanchi woy woˈnaalshu noosi halashshaanchi Qullaawu Maxaafi xiinxallo hanafisiisanna xiinxallisa dandaatto gede kaaˈlahera xaˈmiˈra dandaatto. Qullaawa Maxaafa xiinxallisa waajjattokki gede kaaˈlannohe coyi giddo mittu, togoo halashshaano xiinxallissanno woyite ledonsa xiinxallisate.

13. Haaro hayyo rosa hasiissannonkehu mayiraati?

¹³ Haaro rosiisate hayyonna rosiisate horoonsiˈneemmoha haaro uduunnicho rosa qarra ikkitankera dandiitanno. Xa Qullaawa Maxaafa xiinxallinseemmo gari soorramino. Manna xiinxallisate horoonsiˈneemmoti qara borro, Hegerera Hagiidhitanni Heeˈra Dandaatto! yitanno borrooti; xiinxallinsammora albaanni tenne borro qixxaambeemmo garinna xiinxallinseemmo gari albiwiinni baxxinoho. Tenne borro xiinxallinsanni woyite boode gufo nabbambanni hattono roore yanna hasaambannihu rosaanchu ledooti. Konne maxaafa horoonsiˈne xiinxallinseemmo woyite albinni roore lowo viidiyonna elektirooniksete uduunnichinni qixxeessinoonnire lawishshaho JW Layibirere horoonsiˈneemmo. Konne uduunne horoonsiˈnanni gari wosiˈnihero roduuwu kaaˈlitannohe gede xaˈmiˈra dandaatto. Duucha woyite ronsoommore calla assa rakkannonke. Mitto haaro coye rosa shota diˈˈikkitannonke. Ikkirono Yihowanna roduuwu kaaˈlonni tenne haaro hayyo rosa dandaatto hattono tenne hayyo horoonsidhe manna xiinxallisa albinni roore nafa hagiirsiissahera dandiitanno. Mittu suwisaanchi tini hayyo, “rosaanchono rosiisaanchono hagiirsiissannota” ikkitinota coyiˈrino.

14. Mannu sokkanke macciishsha hasiˈrannokki qoqqowira sabbankeemmo woyite maa qaaga hasiissannonke? Umi Qorontoosi 3:6, 7 jawaachishshannonkehu hiittoonniiti?

¹⁴ Sabbankeemmo qoqqowira manna Qullaawu Maxaafi xiinxallo hanafisiisa shota ikka hooggankera dandiitanno. Mannu sabbankeemmo sokka hasiˈra hoogara woy giwankera nafa dandaanno. Togoo qoqqowira hexxo mudhinummokkinni sabbankeemmo gede kaaˈlannonkeri maati? Tenne qarru batiˈrino alamera mannu noo gari mule mulenni soorramara dandaannotanna kulleemmo sokka hasiˈrannokki manni Maganu aanno biddishshi hasiisannonsata wodanchara dandaannota qaagi. (Mat. 5:3) Alba borronke adha giwannohu mitu manni gedensoonni Qullaawa Maxaafa xiinxallate sumuu yiino. Qoleno loosu Mootichi Yihowa ikkinota anfoommo. (Mat. 9:38) Yihowa agurrummokkinni kaansammoranna waa hayikkinsammora hasiˈrannoha ikkirono lossannohu kayi isooti. (1 Qor. 3:6, 7) Xa Qullaawu Maxaafi xiinxallo noonkekkiha ikkiro nafa, Yihowa maassiˈrannonkehu afiˈnoommo gumi deerrinni ikkikkinni manna kaaˈlate sharrammoommo deerrinni ikkinota afanke jawaachishshannonke! *

15. Mittu manchi Qullaawa Maxaafa xiinxalle rosinore loosu aana hosiisanno woyite Yihowara mayi macciishshamannosi?

¹⁵ Yihowa mittu manchi Qullaawu Maxaafi halaale ammane adhe wolootaho kulanno woyite lowo geeshsha hagiidhanno. (Law. 23:15, 16) Isi xaa yannara loonsanni heeˈnoonniha sabbakate looso laˈˈanno woyite lowo geeshsha hagiidhannoti dihuluullissannote! Lawishshaho, 2020nnihu soqqanshote diro Koroonu vayirese nooha ikkirono, 7,705,765 manna Qullaawa Maxaafa xiinxallinsoommo hattono konni manni giddo 241,994 manni heeshshonsa Yihowara sayise oye cuuamino. Kuni haarote cuuamino mannino, manna Qullaawa Maxaafa xiinxallise Yesuusi rosaano ikkanno gede assanno. (Luq. 6:40) Manna rosaano assate looso loonseemmo woyite Yihowa hagiidhannoti dihuluullissannote.

16. Hiittoo mixo fushshiˈra dandiineemmo?

¹⁶ Manna rosaano assa shota looso diˈˈikkitino; ikkirono Yihowa kaaˈlonni mannu iimi Annanke baxanno gede rosiisate wolqanke assitu geeshsha kaaˈla dandiineemmo. Ajayi ajeenna mitto mancho Qullaawu Maxaafi xiinxallo hanafisiisatenna xiinxallisate mixo fushshiˈra dandaatto? Xaandeemmo manna Qullaawa Maxaafa xiinxallanno gede koyisate afiˈnummo faro baala horoonsiˈneemmoha ikkiro dancha guma afiˈne hagiidhinammora dandiineemmo. Yihowa assineemmore maassiˈrannota dihuluullammeemmo.

17. Manna Qullaawa Maxaafa xiinxallinsummoro mayi atoote afiˈneemmo?

¹⁷ Mannaho halaale sabbakano ikko rosiisa ninkera lowo ayirrinyeeti! Kuni loosi addu hagiirre afiˈneemmo gede assannonke. Soqqamaasinchu Phaawuloosi Teselonqe katamira heeˈrannohu lowo manni rosaano ikkanno gede kaaˈlino; isi hagiirresi xawisanni togo yiino: “Mootichinke Yesuusi Kiristoosi daanno yannara albasiinni ayirrineemmoti hexxonke, woy hagiirrinke woy qeellete worraaqqanke dikiˈneeti? Addintanni kiˈne ayirrinyenkeetinna hagiirrenkeeti.” (1 Tes. 2:19, 20; Soq. 17:1-4) Xaa yannarano batinyu roduuwi togoo hagiirre afidhino. Istefaani yinanni rodoo minaannise ledo, lowo manni cuuamanno gede kaaˈlitino; ise togo yitino: “Mannu heeshshonsa Yihowara sayise aanno gede kaaˈlate geeshsha hagiirsiisannori dino.”