Yihowa adhantinori hagiirraamma ikkitaranna mimmitu ledo geedanno jaalooma kalaqidhe heedhara hasiˈranno. (Mat. 19:4-6) Mine kalaqiˈrate heddinoonniha ikkiro, dancha galte afiˈra dandiitinannihu hiittoonniiti? Yihowa Kalaqaanchonke ikkino daafira, adhamanke hagiirru noota ikkitanno gede maa assa hasiissannonkero afino. Hakko daafira, isi uyinoha xintu seera harunsitinanniha ikkiro, baalunkuri seyannoˈne. Hanni konni xintu seeri giddo mito laˈno.

Umihunni, wodaninke daafira huwata hasiissannonkeri no; Qullaawu Maxaafi, “Mannu wodani baalunkurinni roore xagaraamoho; diinofayyannoho” yaanno. (Erm. 17:9) Mittu labbaahunna meyati adhama hasiˈre yanna sayisanno woyite muddame mimmito lubbora baxara dandaanno; tini qolte gura qiniite layidhanni qaafa qarra ikkitannonsa gede assitara dandiitanno. Labbaahunna meyati baxillu amadinonsa daafira calla muddame adhamansa, duucha woyite qarru giddo tuggannonsa. (Law. 28:26) Hakko daafira, labbaahunna meyati mimmito seekke egennikkinni kuˈu koˈiira baxille leellisha woy mimmitoho qaale ea hayyo diˈˈikkitino.

Lawishsha 22:3 togo yitanno: “Egennaamu manchi bushare afiro maaxamanno; hawanyu kayinni eˈˈe qarramanno.” Galte hasiˈnanni webisayite horoonsiˈra mayi qarra abbitara dandiitanno? Mitootu egentinokki manchi ledo interneetete widoonni xaadde yanna sayissuhu gedensaanni, hakku manchi doginonsata affe lowo geya xissiisidhino. Qoleno yawaawulu manni tenne webisayitera kaphu akkaawunte faˈne beebbaataammu manniwiinni woxe adhanno. Togoo coye assannohu mitu manni Yihowa Farciˈraasine ikkinohu gede asse coyiˈrino.

Galte hasiˈnanni webisayite horoonsiˈra afidhinoha wole qarrano hanni laˈno. Mite galte hasiˈnanni webisayite, hiikku hiikkonni ledo yanna sayisa hasiissannonsaro doorate kompiyuterete pirogiraame horoonsidhanno. Ikkollana tini hayyo kaaˈlitannota leellishshanno taje dino. Adhama dishaaˈˈa coyeeti; ikkina konne shaaˈˈa ikkinokki coye doodhinanni woyite kompiyuterete pirogiraame ammana hayyoteni? Kompiyuterete pirogiraame Qullaawu Maxaafihu xintu seeri ledo taalantannota diˈˈikkitino.—Law. 1:7; 3:5-7.

Lawishsha 14:15te togo yaannohu xintu seeri no: “Gowwu manchi yinire baala adda assiˈranno; egennaamu kayinni layiˈranni qaafanno.” Adhamate  heddannori mimmito seekke egenna hasiissannonsa. Ikkollana interneetete widoonni xaandoonni mancho seekke egenna qarra ikkitara dandiitanno. Interneetete widoonni kuˈu koˈii daafira affinoonniha woy mimmitu ledo lowo yanna hasaabbinoonniha ikkiro nafa, hakko mancho seekkitine egentinoonni yaa dandiinanni? Mitootu interneetete widoonni dancha baxillaancho afidhinoha lawinsarono, xaaddanno woyite kayi heddinohu gedeeha ikkinokki daafira lowo geya massino.

Faarsaasinchu togo yiino: “Kaphaanote songo disongeemmo; lawisiisaanote ledo dihoseemmo.” (Far. 26:4) Mitootu mannu baxansara yite, interneetete aana insaneeti daafira kapho ikkinore borreessitanno; insa togoore assa rosaminoreeti yite heddanno. Insa busha akatansa maaxxara woy interneetete widoonni hasaabbanno woyite tenne anfanninsakki gede assate woˈnaaltara dandiitanno. Mitu manni ninke Yihowa Farciˈraasineeti yaara dandaanno; kayi insa cuuante addanka Yihowa Farciˈraasine ikkitinoreeti? Insa Yihowa baxxannoreeti? Isi ledo muli jaaloomi noonsareeti? Songote giddo danchu suˈmi noonsa? Insa dancha lawishsha ikkitannokkireeti? Woy ‘busha jaalla’ gede assine laˈnannireeti? (1 Qor. 15:33; 2 Xim. 2:20, 21) Insa Qullaawu Maxaafihu xintu seeri garinni adhama dandiitannoreeti? Kuri coyibba buuxa hasiissanno; kayinni, adhamate hendoonni mancho seekke egenninohu wolu Yihowa Farciˈraasinchi kaaˈlinkekkinni hakko manchi daafira afa qarra ikkitara dandiitanno. (Law. 15:22) Mittu ammanaminohu Yihowa soqqamaanchi Yihowa Farciˈraasincho ikkinokkihu ledo ‘maxxagamate’ heda nafa hasiissannosikkiti egennantinote.—2 Qor. 6:14; 1 Qor. 7:39.

Galte hasiˈnanni webisayite horoonsiˈra qarra afidhino daafira, ayirrinye afiˈrino garinni galte hasiˈnanniti wole addi addi doogga no. Ikkina dancha galte hasiˈra dandiinannihu hiittoonniiti? Mitteenni xaande gamba yaa dandiinanni yannara, songote gambooshshiwa, woradu gambooshshiwa, qoqqowu gambooshshiwa, woy wole gambooshshuwawa Yihowa Farciˈraasine mimmitu ledo egennama dandiitanno.

Mitteenni xaande gamba yaa dandiinannikki yannara lawishshaho Koroonu vayirese yannara songote gambooshshe assiˈrate elektirooniksete uduunnicho horoonsiˈneemmo; tenne yannara adhantinokki roduuwi ledo egennammeemmo faro afiˈneemmo. Insa gambooshshunniwa dawaro qoltanno gara hattono ammanansa xawissanno gara laˈˈa dandiitinanni. (1 Xim. 6:11, 12) Qoleno songoˈne gambooshshe assidhannohu interneetete widoonni ikkiro, gambooshshu gedensaanni Birekiawuti ruumi yinanni hayyo horoonsidhine hasaawa dandiitinanni. Interneetete widoonni roduuwu ledo gaamo gaamo ikkitine hasaabbinanni yannara, baxxinoonni rodoo woy rodii wolootu ledo hasaawanno gara laˈˈa dandiitinanni; tini ise woy isi hiittoohoro afate kaaˈlitannoˈne. (1 Phe. 3:4) Mimmito egentinanni hadhinanni woyite, mixoˈnenna balaxisiissinanni coyi mittu garihoronna teˈee affinanni; hattono dancha minaannanna minaama ikka dandiitinannironna teˈee huwattinanni.

Adhantinokki roduuwi galte hasidhannohu Qullaawu Maxaafihu xintu seeri ledo sumuu yaanno garinni ikkiro, Lawishshu maxaafira noo hedo halaale ikkase huwattanno; qummeeshshu togo yaanno: “[“Dancha,” NW] galte afiˈrinohu maasso afiˈrino; Kaaliiqiwiinnino ayirrinye adhino.”—Law. 18:22.