1. Dano kalaqantanno woyitira qixxaawa hayyote yineemmohu mayiraati?

 QIXXAAWA heeshsho gatissanno. Lawishshaho dano kalaqantanno woyitira qixxaawino manni roore woyite heeshshonsa gatisiˈranno; hattono woloota kaaˈla dandaanno. Awuroppaho heedhannoti mitte manna kaaˈlitanno dirijjite, “Dancha gede qixxaawa heeshsho gatissara dandiitanno” yitino.

2. Bayiru qarrira qixxaawa hasiissannonkehu mayiraati? (Maatewoosi 24:44)

² “Lowo qarri” woy bayiru qarri hedeweelcho hanafanno. (Mat. 24:21) Ikkirono wole dano gede bayiru qarri baalanka manna hedeweelcho diamadanno. Yesuusi mitu 2,000 diri albaanni harunsaanosi konni barrira qixxaabbanno gede qorowisiisinonsa. (Maatewoosi 24:44 nabbawi.) Qixxaambeemmoha ikkiro, hattenne qarru yannara cincine saˈˈanna wolootuno cincite saˈanno gede kaaˈla dandiineemmo.—Luq. 21:36.

3. Cinca, mararronna baxillu bayiru qarrira qixxaambe heeˈneemmo gede kaaˈlannonkehu hiittoonniiti?

³ Hanni bayiru qarrira qixxaambe heeˈneemmo gede kaaˈlitannonketa sase akatta laˈno. Kaajjado yoote sokka dudumbeemmo gede kullinkeronna mannu giwinkero ma assineemmo? (Aju. 16:21) Yihowa agarannonketa addaxxine isira hajajamate cincineemmore ikka hasiissannonke. Ammanate roduuwinke noonsaha maalaamittete coye gama woy baalanka hoogguro ma assineemmo? (Imb. 3:17, 18) Insara hasiisannonsare assine kaaˈlate mararreemmore ikka hasiissannonke. Buusantino daga Maganu manna siˈanno woyite, mite yanna geeshsha batinyu ammanate roduuwinke ledo mitteenni heeˈra hasiissunkero ma assineemmo? (Hiz. 38:10-12) Insa godowinta baxa hattenne qarrissanno yanna dandiine saˈneemmo gede kaaˈlitannonke.

4. Qullaawu Maxaafi woˈmanka woyite cincineemmore, mararreemmorenna baxillu noonkere ikkineemmo gede kulannonkehu hiittoonniiti?

 ⁴ Maganu Qaali cinca, mararronna baxillu heeˈrannonke gede assiˈnammora jawaachishannonke. Luqaasi 21:19 “Cincitiniro, lubboˈne gatisidhinanni” yitanno. Qolasiyaasi Sokka 3:12 “Mararro . . . uddidhe” yitanno. Qoleno 1 Teselonqe 4:9, 10 togo yitanno: “Mimmitu ledo baxama kiˈnenni Maganuwiinni rossinoonni. . . . Ikkollana xaano hakkiinni roorsitine baxxinanni gede huucciˈneemmoˈne.” Kuri qummeeshshuwara noo hedo baala borreessinoonnihu wonanni cinca, mararronna baxille leellishshanni noo rosaanoraati. Ikkirono insa woˈmanka woyite kuri akatta lossiˈra hasiissinonsa. Ninkeno hatto assa hasiissannonke. Tennera kaaˈlitannonke gede, hanni hunda heeˈrino Kiristaani kuri mitto mittonka akata leellishinohu hiittoonniitiro laˈno. Hakkiinni insa lawishsha harunsineemmo garanna tini bayiru qarrira qixxaambeemmo gede kaaˈlitannonkehu hiittoonniitiro laˈneemmo.

5. Hunda heeˈrino Kiristaani iillinonsa fonqolo dandee sainohu hiittoonniiti?

⁵ Hunda heeˈrino Kiristaani cinca hasiissinonsa. (Ibi. 10:36) Insara manna baalaho iillanno qarri iillinonsatano agurranna wolu qarrino iillinonsa. Insa giddo batinye, Yihudunniti ammaˈnote massagaanonna Roomu gashshaano calla ikkikkinni maatensano darantanno gede assitinonsa. (Mat. 10:21) Qoleno mito woyite songote giddo noo kaadasinenna insa rosiissannohu shokkashshu rosi hunannonsakki gede sharrama hasiissinonsa. (Soq. 20:29, 30) Ikkirono kuni Kiristaani iillinonsa qarra dandee saino. (Aju. 2:3) Hiittoonni? Insa Qullaawa Borro giddo kulloonnihu cincate dancha lawishsha ikkanno manni xagge lawishshaho Iyyoobi daafira hiincitino. (Yai. 5:10, 11) Qoleno jawaante afiˈrate huuccatto assidhino. (Soq. 4:29-31) Hattono cincituro afidhannoha dancha guma illachishshino.—Soq. 5:41.

6. Meerita maatese gibbuse yannara cincite saˈˈate assitinorinni maa rosootto?

⁶ Ninkeno ganyine Qullaawu Maxaafinna borruwanke giddo kulloonnihu, cincate dancha lawishsha ikkanno manni xagge xiinxallineemmohanna hiincineemmoha ikkiro iillannonke qarra cincine saˈˈa dandiineemmo. Albaaniyaho heedhannoti Meerita yinanni rodoo togo assase maatese effidhe gibbuse yannara cincite saˈanno gede kaaˈlitinose. Ise togo yitino: “Qullaawu Maxaafi giddo nooti Iyyoobi xagge lowo geeshsha jawaachishshinoe. Iyyoobira buutote qarri iillinosi; isi qarra abbinosihu ayetiro afinokkiha ikkirono, ‘Reyammo geeshsha keeraanchimmaˈya diagureemmo’ yiino. (Iyo. 27:5) Iyyoobira iillinosi qarra hendiro anera iillinoe qarri shiima ikkinota wodanchoomma. Iyyoobi qarru iillannosi gede assinohu ayetiro diafino; ani kayinni iillanni nooe qarrira kaimu ayetiro afoomma.”

7. Xaa yannara buutote qarri iillanni noonkekkiha ikkiro nafa, xaanni maa assa rosa hasiissannonke?

⁷ Ganyine Yihowa huucciˈnenna giddonketa baala isira hasaaphine albinni roore cincineemmore ikka dandiineemmo. (Fil. 4:6; 1 Tes. 5:17) Xaa yannara buutote qarri iillinohekkiha ikkara dandaanno. Ikkirono hanqisannorinna gurchaawatto gede assannori tuncu yaannohe woyite woy kadde amadattori baˈˈannohe woyite Yihowa huucciˈratto? Barru barrunkunni iillannohe coyira Yihowa huucciˈrattoha ikkiro, albillitte lowo qarri iillannohe woyiteno hatto assa qarra diˈˈikkitannohe. Hatto ikkiro isi ate mamootenna hiittoonni kaaˈlannohero afinota addaxxa dandaatto.—Far. 27:1, 3.

8. Miira lawishshi xaa yannara iillannonke qarra dandiine saˈˈa albillitte iillannonke qarrira kaaˈlitannonketa leellishannohu hiittoonniiti? (Yaiqoobi 1:2-4) (Misileno lai.)

⁸ Xaa yannara iillannonke qarra cincine saˈneemmoha ikkiro, albillitte bayiru qarri  yannara cincine saˈˈa qarra diˈˈikkitannonke. (Rom. 5:3) Hatto yineemmohu mayiraati? Batinyu ammanate roduuwinke ammanansanni kainohunni iillannonsaha mitto mittonka qarra dandiite saˈˈansa, hakkiinni aane iillannonsa qarrira kaaˈlitinonsata huwattino. Iillannonsa qarra cincite saˈˈansa Yihowa insa kaaˈla hasiˈrannota albinni roore ammantanno gede kaaˈlitinonsa. Ammana qolte hakkiinni aane iillannonsa fonqolo dandiite saˈanno gede kaaˈlitinonsa. (Yaiqoobi 1:2-4 nabbawi.) Albaaniyaaho heedhannoti Miira yinanni suwisaancho alba iillinose qarra cincite saˈˈase xa iillinose qarrano cincite saˈˈate kaaˈlitinoseta huwattino. Ise mito woyite, lowo qarri iillannoseti ise calla ikkitinohu gede assite heddannota maaxxukkinni coyidhino. Ikkirono 20 diri giddo Yihowa ise kaaˈlate assinore qaagguti iseneetira togo yitino: ‘Ammanante heeˈri! Yihowa lowo diro iillinohe qarra dandiite saˈˈatta gede kaaˈlihehu gedensaanni xa isira soqqama agurtooti.’ Atino Yihowa iillinohe qarra dandiite saˈˈatto gede kaaˈlinohe gara hiinca dandaatto. Isi iillannoheha mitto mittonka qarra dandiite saˈˈattota laˈˈannotanna baˈraasannoheta addaxxa dandaatto. (Mat. 5:10-12) Hakkiinni bayiru qarri hanafanno woyite cinca dandiinanni gara rosatto; hattono albillitte cincite heeˈrate murciˈratto.

9. Sooriyu Antsookira heedhanno Kiristaani marartannore ikkansa leellishshinohu hiittoonniiti?

⁹ Hanni Yihudaho heeˈranno Kiristaana buutote hude amaddu yannara mayi ikkinoro laˈno. Sooriyu Antsookira heedhanno songo tenne hude daafira macciishshituhu gedensaanni, Yihudaho heedhannore ammanate roduuwansa lowo geeshsha marartino. Hakko daafira insa ammanate roduuwansa kaaˈlate mitore assitino. Insa, “Yihudaho heedhanno roduuwira noonsa wolqanni woxe fushshite [sokkino].” (Soq. 11:27-30) Hude gawajjitino roduuwi xeertiˈre nooha ikkirono, Antsookiyaho heeˈranno Kiristaani insa kaaˈlate murciˈrino.—1 Yoh. 3:17, 18.

10. Ammanate roduuwinkera dano iillitannonsa woyite insa mararreemmota leellisha dandiineemmohu hiitte doogganniiti? (Misileno lai.)

¹⁰ Xaa yannara ninkeno ammanate roduuwinkera dano iillitinonsata anfummoro mararreemmonsata leellisha dandiineemmo. Togoo roduuwa kaaˈla dandiineemmohu hiittoonniitiro songote cimeeyye xaˈmine, alamete doyicho loosira woxe fushshine hattono dano gawajjitino roduuwi daafira huuccatto assine tenne assa dandiineemmo. b (Law. 17:17) Lawishshaho 2020nni, Koroonu fayya gawajjitino roduuwa kaaˈlate alamete doyichora 950 saˈannota Danote Yannara Kaaˈlitanno Komite xintinoonni. Tenne komite giddo soqqantanno roduuwa lowo geeshsha galanteemmonsa. Insa ammanate roduuwansa marartino daafira maalaamittete hasiisannore massitinonsa, ayyaanaamittetenni jawaachishshinonsa hattono mito bayicho roduuwunnitanna Yihowa magansiˈnanni minna gatamartino woy mintino.—Layinki Qorontoosi 8:1-4 ledo heewisiisi.

11. Woloota mararre assineemmori iimi Anninke ayirranno gede assannohu hiittoonniiti?

¹¹ Dano kalaqantuhu gedensaanni roduuwanke mararreemmota leellinsheemmo woyite wolootu assineemmore huwattanno. Lawishshaho 2019nni Bahamasi yinanniwa Doriina yinanni hombobolatte Gambooshshu Addaraashe diiggino. Roduuwu tenne Gambooshshu Addaraashe wirro mintanni heedhe mittu Yihowa Farciˈraasincho ikkinokki hanaatsichi mito looso loosanno gede kulte mageeshshi woxe baantannisiro xaˈmitino. Isi togo yiino: ‘Ani mine minnanni uduunnenna wolqaˈya oye hattono wolere asse dirijjiteˈne kaaˈla hasiˈreemmo. Jaallaˈne  marartinanni gari dhagge ikkinoe.’ Alamete aana noohu rooru manni Yihowa diafino. Kayinni batinyu manni Yihowa Farciˈraasine woloota kaaˈlate assitannore laˈˈanno. Woloota mararreemmota leellishanke mannu “maarote dureessa” ikkinohu Yihowawa daanno gede assitannota afanke lowo qoossooti!—Efe. 2:4.

12. Xaa yannara mararreemmore ikkanke bayiru qarrira qixxaambeemmo gede assitannonkehu hiittoonniiti? (Yohaannisi Ajuuja 13:16, 17)

¹² Bayiru qarri yannara mararreemmore ikkanke leellisha hasiissannonkehu mayiraati? Qullaawu Maxaafi poletikaho kaaˈlantannokkirira xaano ikko bayiru qarri yannara qarru iillannonsata kulanno. (Yohaannisi Ajuuja 13:16, 17 nabbawi.) Ammanate roduuwinkera heeshshote hasiisannore afiˈrate kaaˈlo hasiissannonsaha ikkara dandaanno. Mootichinke Kiristoosi Yesuusi yoo yaate daanno woyite woloota mararreemmota leellinshanna afankera hasiˈneemmo; qoleno ‘gashshoote ragiˈneemmo’ gede assankera halchineemmo.—Mat. 25:34-40.

13. Roomu Sokka 15:7 kultanno garinni umi xibbi diri Kiristaani baxillinsa lexxanno gede assiˈrinohu hiittoonniiti?

¹³ Hundi Kiristaani mimmitonsa baxansa mannu baalu insa bade afanno gede assitino. Insara mimmito baxa shota ikkitinonsa? Hanni Roomaho heedhino songo daafira laˈno. Tenne songo giddo, Muse Seerira hajajama hasiissannonsata rosinohu Ayihudete manninna wole daga wido ikkinohu addi addi budi noonsa manni no. Mitootu borojje ikkitukki digattino; wolootu kayinni borojje ikkitinokkireeti mitu qolte borojju noonsare ikkitara dandiitanno. Kuni Kiristaani mereeronsa togoo badooshshi heeˈrirono baxillinsa lexxanno gede assiˈra dandaannohu hiittoonniiti? Soqqamaasinchu Phaawuloosi insa “mimmitoˈne haadhe” yee amaalinonsa. (Roomu Sokka 15:7 nabbawi.) Hatto yaasi mayyaate? “Haaˈra” yine tirroonni qaali, mittu manchira shaqqille leellisha woy wosinsiˈra, lawishshaho mininkera koyisa woy isi ledo yanna sayisa leellishannoho. Lawishshaho Phaawuloosi, Filimooni isiwiinni xooqino borojjichosi Anaasimoosi ma garinni ‘haaˈrannoro’ kulinosi. (Film. 17) Qoleno Aqiilanna Phirisqilla Kiristinnu daafira insa geeshsha afinokkiha Aphiloosi ‘haadhe mininsara massitino.’ (Soq. 18:26) Umi xibbi diro heeˈrino Kiristaani addi addi budi noonsare ikkansa mereeronsa babbadooshshu kalaqamanno gede assitara diwodhino; hatteentenni mimmito anga fane haaˈrino.

14. Aananna minaannise baxille leellishinohu hiittoonniiti?

¹⁴ Ninkeno ledonke yanna sayissanno gede anga fanne haaˈne ammanate roduuwinkera baxille leellisha dandiineemmo. Tini, insano ninkera baxille leellishshanno gede assitannonsa. (2 Qor. 6:11-13) Hanni Aananna minaannise woˈnaalsha laˈno. Insa Galchimi Afirikira misiyoone ikkite soqqantara wole bayicho gaammeennansa hadhuhunni shiima yanna gedensaanni Koroonu fayya ubbino. Koroonu fayyanni kainohunni insa haarote martino songora noo roduuwi ledo xaada didandiitino. Kuri minaanninna minaama baxillensa leellisha dandaannohu hiittoonniiti? Insa viidiyote widoonni roduuwu ledo xaadino; hattono insa ledo roore egennama hasidhannota kultinonsa. Songote giddo noo roduuwino lowo geeshsha hagiidhite silke dowwoltinonsa; hattono borrote sokka sokkinonsa. Kuri minaanninna minaama togo assate sharrantinohu mayiraati? Aana togo yitino: “Roduuwu aneranna maateˈyara faffote yannarano ikko qarru yannara leellishshinonke baxille horo dihaweemma; insa lawishshi anino baxille leellisheemma gede kakkayisinoe.”

15. Vaaneesa lawishshinni baalanka roduuwa baxate daafira maa rosootto? (Misileno lai.)

¹⁵ Batinye songuwa giddo noo roduuwi budinna akatinsa addi addiho. Ikkirono songonke  giddo noo roduuwi baalunkuha dancha akatansa illachinshe baxillinke lexxanno gede assiˈra dandiineemmo. Niwuzilaandete soqqantannote Vaaneesa yinanni rodoora songosera noohu mitu roduuwi ledo dancha aante heedhannose gede assiˈra qarra ikkitinose. Ikkirono gedensoonni ise caacceessitannose akatta noonsa roduuwiwiinni xeertiˈra agurte insa ledo roore yanna sayisate murcidhino. Hatto assase Yihowa kuri roduuwa baxannonsahu mayiraatiro huwattanno gede kaaˈlitinose. Vaaneesa togo yitino: “Minaanniˈya woradu aliidi laˈˈaancho ikki yannanni hananfe addi addi akati noonsari batinyu roduuwi ledo yanna sayinsoommo; tini roduuwunniwa aana qarra ikkitannoekki gede kaaˈlitinoe. Xa addi addi akati noonsa roduuwa lowo geeshsha baxeemma. Yihowa minisira abbinohu addi addi manna ikkino daafira isino addi addi akatta noonsa manna baxannoti dihuluullissannote.” Woloota Yihowa laˈˈanno garinni laˈˈa ronsummoro insa banxeemmonsata leellinsheemmo.—2 Qor. 8:24.

16. Bayiru qarri yannara baxillu lowo geeshsha hasiisannoha ikkinohu mayiraati? (Misileno lai.)

¹⁶ Bayiru qarri yannara baxillu lowo geeshsha hasiisannoho. Kuni qarri hanafanno woyite agarooshshe afiˈneemmohu mamiinniiti? Hanni hunda Baabiloone siˈni yannara Yihowa mannasi mayyee hajajinoro laˈno; isi togo yiino: “Mannaˈya, miniˈnera eˈine cufana cufidhe; hanqu saˈˈa geeshsha shiima yanna maaxamme.” (Isa. 26:20) Bayiru qarri yannara kuni biddishshi ninkeno harunsineemmoha ikkara dandaanno. Konni qummeeshshira ‘mine’ yinoonnihu songuwa kulate ikkara dandaanno. Yihowa ammanate roduuwinke ledo isira mittimmatenni soqqama agurreemmokkiha ikkiro, bayiru qarri yannara agarannonketa kule qaale eino. Hakko daafira roduuwinke laanfe agurre saˈˈa calla ikkikkinni insa godowinta baxate sharrama hasiissannonke. Ganteemmohu hatto assinummoro callaati!

17. Xaanni qixxaambeemmoha ikkiro bayiru qarri yannara maa assa dandiineemmo?

¹⁷ “Jawu [Yihowa] barri” mannu baalu lowo geeshsha qarramanno gede assanno. (Sof. 1:14, 15) Yihowa mannirano qarru iillannonsa. Kayinni xaanni qixxaambeemmoha ikkiro, wodanaaˈmine heeˈranna woloota kaaˈla dandiineemmo. Iillannonke qarra baala cincine saˈneemmo. Ammanate roduuwinke qarrantanno woyite insa mararreemmota leellishatenna hasiisannonsare assine kaaˈlate dandiinummore baala assineemmo. Qoleno xaanni ammanate roduuwanke baxa ronsummoro albillitte insa baxa qarra diˈˈikkitannonke. Hatto ikkiro, danonna qarra horo qaangannikki alamera Yihowa hegere heeshsho oye baˈraasannonke.—Isa. 65:17.