1. Qullaawa Maxaafa xiinxalla hanafitto yannara hiikkonne halaale rosootto?

 QULLAAWA MAXAAFA xiinxalla hanafitto yanna qaagatto? Maganoho suꞌmu noosita afittoti dhagge assiꞌroottoha ikkara dandaanno. Qoleno Maganu manna sioolete giiranni beebba assiꞌrannokkita afittoti fooliishsho afiꞌroottoha ikkara dandaanno. Hattono shiiꞌrootto manninni galagalte xaadatenna gannate ikkitino uullara insa ledo heeꞌrate hexxo nooheta afittoti lowo geeshsha hagiidhoottoha ikkara dandaanno.

2. Qullaawu Maxaafi halaale rosoottotano agurranna ayyaanaamittetenni lophate wolere maa assootto? (Efesooni Sokka 5:1, 2)

² Qullaawa Maxaafa xiinxallitto kiiro Yihowara noohe baxillino lexxanni haꞌrino. Kuni baxilli rosoottore loosu aana hosiisatto gede kakkayisinohe. Qullaawu Maxaafiha xintu seera harunsite dancha doorsha doodhootto. Magano hagiirsiisa hasiꞌrootto daafira amanyootekkinna akatakki woyyeessiꞌrootto. Mittu qaaqqi baxannosi annisinna amasi lawishsha harunsannonte gede, atino iimi Annikki lawishsha harunsootto.—Efesooni Sokka 5:1, 2 nabbawi.

3. Ninkeneeto mayine xaꞌma hasiissannonke?

³ Ninkeneeto togo yine xaꞌma dandiineemmo: ‘Yihowara nooe baxilli Kiristaancho ikkummo yannanni roore xa lexxino? Cuuamummo yannanni kayise, hedeemmo garinna assootiꞌya hakko iso ammanate roduuwiꞌyara baxille leellishate Yihowa lawishsha harunsanni noommota leellishanno?’ ‘Alba noohe baxilli’ mito geeshsha qiidinoha ikkiro hexxo mudhitooti. Umi xibbi diro heeꞌrino Kiristaanirano togoori tuncu yiinonsa. Kayinni Yesuusi hexxo mudhe insa diagurinonsa; ninkeno diagurannonke. (Aju.  2:4, 7) Isi, umo halaale ronsummo woyite noonke baxilli galagale heeꞌrannonke gede assiꞌra dandiineemmota afino.

4. Konni birxichira maa ronseemmo?

⁴ Konni birxichira Yihowaranna wolootaho noonke baxilli lexxanno gede assiꞌra dandiineemmo gara ronseemmo. Hakkiinni baxillinke lexxanno gede assiꞌnummoro, ninke afiꞌneemmohanna wolootu afidhannoha mito atoote laꞌneemmo.

5-6. Phaawuloosi soqqamanni heeꞌreenna qarra ikkannori mayi tuncu yiinosi? Isi Yihowara soqqama agurannokki gede kaaꞌlinosiri maati?

⁵ Soqqamaasinchu Phaawuloosi Yihowara hagiirrunni soqqamino; ikkirono isi lowo qarra dandee saino. Isi duucha hige seeda doogo haꞌrino; hatte yannara togoo doogo haꞌra qole shota diꞌꞌikkitino. Isi tenne doogo haꞌri woyite “wayinna lolahu hattono mulqidhannori” qarrissinosi. Qoleno gibbannosiri gantinosi woyiti no. (2 Qor. 11:23-27) Hakkiinni saeno ammanate roduuwisi Phaawuloosi insa kaaꞌlate sharraminotera woꞌmanka woyite digalattinosi.—2 Qor. 10:10; Fil. 4:15.

⁶ Phaawuloosi Yihowara soqqama agurannokki gede kaaꞌlinosiri maati? Isi Qullaawa Borro giddonni hattono iillinosi coyinni Yihowa akatta daafira lowore rosino. Phaawuloosi Maganu Yihowa baxannosita huwatino. (Rom. 8:38, 39; Efe. 2:4, 5) Qoleno isi Yihowa lowo geeshsha baxanno. Phaawuloosi ‘qullaawa manna kaaꞌle’ Yihowa baxannota leellishino.—Ibi. 6:10.

7. Yihowara noonke baxilli lexxanno gede assiꞌra dandiineemmoti mitte doogo hiitteeti?

⁷ Maganu Qaale diinaggaambe xiinxalline Yihowara noonke baxilli lexxanno gede assiꞌra dandiineemmo. Qullaawa Maxaafa nabbawatto woyite mittu mittunku gafi Yihowa daafira maa kulannoro huwatate woꞌnaali. Ateneeto togo yite xaꞌmi: ‘Tini xagge Yihowa baxannoeta leellishshannohu hiittoonniiti? Yihowa baxeemmo gede assitannoehu ma garinniiti?’

8. Huuccatto Maganoho noonke baxilli lexxanno gede kaaꞌlitannonkehu hiittoonniiti?

⁸ Yihowara noonke baxilli lexxanno gede assiꞌra dandiineemmoti wole doogo ganyine giddonketa Yihowara hasaaphate. (Far. 25:4, 5) Yihowano huuccattonkera dawaro qolanno. (1 Yoh. 3:21, 22) Iisiyaho heedhannoti Keeni yinanni rodoo togo yitino: “Umi qara Yihowa baxoommahu isi daafira rosoommahuraati; kayinni isi huuccattoꞌyara dawaro qolino gara huwatummata isira nooe baxilli lexxino. Tini iso hagiirsiisannore asseemma gede kaaꞌlitinoe.” b

9. Ximootewoosi ammanate roduuwisira noosi baxilli lexxanno gede assiꞌrinota leellishinohu hiittoonniiti?

⁹ Phaawuloosi Kiristaancho ikkihunni shiimu diri gedensaanni, Ximootewoosi yinannihu danchu wedellichi ledo egennamino. Ximootewoosi Yihowano mannano baxannoho. Phaawuloosi Filiphisiyusi heeꞌranno Kiristaanira togo yiino: “Kiꞌne daafira ane gede ikke yaadannohu [Ximootewoosi] agurranna wolu dinoe.” (Fil. 2:20) Phaawuloosi kowiicho kulanni noohu Ximootewoosite coye qineessatenna mannu albaanni coyiꞌrate dandoosi daafira diꞌꞌikkino; hatteentenni isi Ximootewoosi ammanate roduuwasi lowo geeshsha baxannota kulanni no. Ximootewoosi towaatanno songuwa, isi daannota quqquxante agadhitannoti dihuluullissannote.—1 Qor. 4:17.

10. Aananna minaannise ammanate roduuwinsara baxille leellishinohu hiittoonniiti?

¹⁰ Ninkeno ammanate roduuwanke kaaꞌlineemmo doogga hasiꞌneemmo. (Ibi. 13:16) Hanni sai birxichira kulliteha Aana woꞌnaalsha laꞌno. Lowo hombobolatte kaꞌuhu gedensaanni, isenna minaannise Yihowa Farciꞌraasine ikkitinota mitte  maate laꞌꞌara haꞌrino; hakkiinni insa bubbe minensa iimiido diigginota afi. Hakko daafira hatti maate uddidhannohu uduunninsa baalu xure goofino. Aana togo yitino: “Uduunnensa haaꞌne hayishshinenna tokkonse biddi assine uyinoommonsa. Hatto assa ninkera shiima coyeeti; ikkirono tini techo geeshsha insa ledo jaalla ikkine heeꞌneemmo gede assitinonke.” Baxillu, Aananna minaannise ammanate roduuwinsara mitore asse kaaꞌlanno gede kakkayisinonsa.—1 Yoh. 3:17, 18.

11. (a) Baxille leellishate sharramanke woloota kaaꞌlitannohu hiittoonniiti? (b) Lawishsha 19:17 kultanno garinni wolootaho baxille leellinsheemmota Yihowa ma garinni laꞌꞌanno?

¹¹ Wolootu baxillenna shaqqille leellinsheemmonsa woyite hendeemmorinninna assineemmorinni Yihowa lawishsha harunsate sharrammanni heeꞌnoommota wodanchitanno. Qoleno insa assinoommonsa danchumma ninke hendoommohunni roorsite naaddara dandiitanno. Aleenni qummi assiniti Keeni kaaꞌlitinose roduuwa qaaggannota coyidhino. Ise togo yitino: “Ledonsa soqqansho fuleemma gede kaaꞌlitinoere muxxe roduuwa baalanka galateemmansa. Insa dagge miniꞌyanni haadhe hadhannoe, sagale koyissannoe hattono minira keere iilloommatanna teꞌee buuxxanno. Insa tenne assate lowo geeshsha sharrantinota xa huwatoomma. Insa tenne assitinohu lowo geeshsha baxxannoe daafiraati.” Hige assinoommonsarira galatannonkehu baalanka manna diꞌꞌikkino. Keeni kaaꞌlitinose roduuwi daafira togo yitino: “Insa assitinoehu danchu coyi baalaho galata qoꞌloommaro tashshi yaannoe; kayinni xa insa baalunku mama heedhannoro diafoomma. Ikkirono Yihowa afino; anera assitinoerira isi baꞌraasannonsa gede huucceemma.” Keeni yitinori garaho. Yihowa woloota kaaꞌlate shaqqillunni assineemmoha shiima coye nafa laꞌꞌanno. Isi togoo coye isira shiqishiꞌnoommote waaga afidhino kakkalo gedenna isira liqiissinoommo coyi gede asse laꞌꞌanno.—Lawishsha 19:17 nabbawi.

12. Labballu roduuwi songote giddo noo roduuwa baxxannota leellisha dandiitannohu hiittoonniiti? (Misillano lai.)

 ¹² Labballu roduuwi, wolootaho baxille leellishanna insa kaaꞌla dandiitannohu hiittoonniiti? Jordaani yinannihu wedellichu rodii albinni roore songo kaaꞌlate ma assa dandaannoro mitto songote cimeessa xaꞌmino. Songote cimeessi isi konni albaanni ayyaanaamittetenni lophate assinorira galatisihu gedensaanni, albinni roore soqqamate maa assa dandaannoro kulinosi. Lawishshaho, songote cimeessi Jordaani gambooshshe yannatenni haꞌranno gede, woloota keere haaꞌranno gede, gambooshshunniwa dawaro qolanno gede, soqqanshote gaamosi ledo ganye soqqamanno gedenna mitore asse woloota kaaꞌlanno faro hasiꞌranno gede kulinosi. Jordaani tenne amaale harunsasi haaro dandoo rosanno gede calla ikkikkinni ammanate roduuwisira noosi baxilli lexxanno gede assiꞌrate kaaꞌlitannosi. Jordaani, mittu rodii songote soqqamaancho ikkanno woyite woloota kaaꞌla hanafanni nooha ikkikkinni wonanni kaaꞌlanni noonkulla roore kaaꞌlate diinaggaawannota wodanchino.—1 Xim. 3:8-10, 13.

13. Kiristiyaani yinanni rodoo baxillu galagale songote cimeessa ikkate ikkado ikkanno gede kakkayisinosihu hiittoonniiti?

¹³ Konni albaanni songote soqqamaancho woy songote cimeessa ikkite soqqamoottohalla ikki? Yihowa konni albaanni loosootto loosonna konne looso loosatto gede kakkayisinohe baxille qaaganno. (1 Qor. 15:58) Qoleno isi woꞌmanka woyite leellishatto baxille dihawanno. Kiristiyaani yinanni rodii songote cimeessa ikke soqqamate qoossosi hoogiti dadillino. Ikkirono isi togo yiino: “Mite qoosso heedhuerono hoogguerono Yihowara baxillunni soqqamate danduummore baala assate murciꞌroommo.” Isi gedensoonni galagale songote cimeessa ikkino. Kiristiyaani noore maaxikkinni togo yiino: “Galagale songote cimeessa ikke soqqama shiima geeshsha  waajjoommo. Kayinni Yihowa maarosinni galagale songote cimeessa ikke soqqameemmo gede fajjie geeshsha Isonna ammanate roduuwaꞌya baxeemmo daafira songote cimeessa ikke soqqamate murciꞌroommo.”

14. Joorjiyaho heedhanno rodoo coyidhinorinni maa rosootto?

¹⁴ Yihowa soqqamaano Yihowa Farciꞌraasine ikkinokki mannano baxxannota leellishshanno. (Mat. 22:37-39) Lawishshaho Joorjiyaho heedhannoti Eleena yinanni rodoo togo yitino: “Umi qara sabbakeemmahu Yihowa baxeemma daafira callaati. Kayinni iimi Anniꞌyara nooe baxilli lexxanni haꞌrita mannaho nooe baxillino lexxino. Insara mayi qarri iillanni noonsaronna insa kaaꞌlannohu hiittoo birxichootiro hedate woꞌnaaleemma. Konni garinni mannu daafira hedumma kiiro albinni roore insa kaaꞌla hasiꞌreemma.”—Rom. 10:13-15.

15-16. Misile leellishshannonte gede wolootaho baxille leellinshiro afiꞌnanni atooti maati?

¹⁵ Ammanate roduuwinkera baxille leellinshummoro horo afidhannori insa calla diꞌꞌikkitino. Koroonu fayya ubbuhu gedensaanni Pawulo yinanni rodiinna minaamasi jajjabbu meya roduuwi elektirooniksete uduunnichonsa horoonsiꞌre farciꞌranno gara rosiissinonsa. Umi qara elektirooniksete uduunnichose horoonsiꞌra qarra ikkitinoseti mitte rodoo gedensoonni rossino. Ise elektirooniksete uduunnicho horoonsidhe fiixase Qaagooshshu Ayyaanira koyisa dandiitino. Fiixase ikkannohu 60 manni viidiyote widoonni konni gambooshshira eino! Tini rodoonna fiixise baalu Paawulonna minaamasi assinorinni horo afiꞌrino. Gedensoonni ise Paawulora togo yite borreessitino: “Ninke jajjabba  rosiissinoonninke daafira galaxxineemmoꞌne. Yihowa ninke daafira hedino garanna kiꞌneno ninke kaaꞌlate sharrantinoonni gara horo dihaweemma.”

¹⁶ Kuni woꞌnaalshi Paawulo kaajja roso rosanno gede assinosi. Isi baxillu egennotenni woy kalaqamu dandoonni roore hasiisannoha ikkinota huwatino. Albita qaage isi togo yiino: “Alba woradu aliidi laꞌꞌaancho ikke soqqamoommo. Roduuwu shiqishoommo lallawo qaaga hooggara dandiitanno; ikkirono insa mitore asse kaaꞌloommonsata xaa geeshsha habbannokkita wodanchoommo.”

17. Wolootaho baxille leellinshummoro horo afiꞌrannohu wolu ayeti?

¹⁷ Wolootaho baxille leellinsheemmo woyite ninke uminke hendoommokki atoote afiꞌneemmo. Niwuzilaandete heeꞌrannohu Joonaataani yinanni rodii tini halaale ikkase buuxino. Isi mitte yannara Qidaamete barra arrishsho iibbite heedheenna mittu suwisaanchi doogote callisi farciꞌranna lai. Joonaataani Qidaame barra barra konni suwisaanchi ledo sabbakate murciꞌri. Isi konni garinni baxille leellishasi iso umosi kaaꞌlitannosita hatte yannara dihuwatino. Joonaataani noore maaxikki coyiꞌranni togo yiino: “Hatte yannara soqqansho fula dibaxeemmo. Kayinni kuni suwisaanchi rosiisanno garanna soqqanshosinni afiꞌrino guma laummoti, ani umiꞌya soqqansho baxa hanafummo. Qoleno ayyaanaamittetenni lopheemmo gede, soqqansho baxeemmo gedenna Yihowawa shiqeemmo gede kaaꞌlannoeha dancha jaala afiꞌroommo.”

18. Yihowa ma assinammora hasiꞌranno?

¹⁸ Yihowa ninke baalunku isiranna ammanate roduuwinkera noonke baxilli lexxanno gede assiꞌnammora hasiꞌranno. Konni birxichira ronsummonte gede, Qullaawa Maxaafa nabbambenna hiincine hattono woꞌmanka woyite huuccattotenni Yihowa hasaawinse Yihowara noonke baxilli lexxanno gede assiꞌra dandiineemmo. Ammanate roduuwinkera mitore assine kaaꞌline insara noonke baxilli lexxanno gede assiꞌra dandiineemmo. Baxillinke lexxanni haꞌriro, Yihowawanna ayyaanaamittete maatenkewa albinni roore shinqeemmo. Qoleno insa ledo hegerera jaalla ikkine heeꞌneemmo!