Anniˈya Kanaadaho Yunayitidi yinanni Beetekiristaanera cimeessaho; hakko daafira anenna rodooˈya lamalate kiiro Sambatu rosi minira soyannonke; hakkuyi gedensaanni 5 saatenni isi ledo xaande beetekiristaane haˈneemmo. Hawarro kayinni amanke ledo Yihowa Farciˈraasine gambooshshe haˈneemmo. Konni garinni lamente ammaˈno mereero noo badooshshe afa dandiinoommo.

Amaˈya Qullaawu Maxaafinni rossino halaale Boobinna Mariyooni Hachiseni yinanniri seeda yanna jaallasera kultu; insano halaale macciishshe adhino. Hakkiinni 1958nni Niwu Yorkete Katamira settu barriha Maganu Fajjo yaannoha Daga Dagiyyote Gambooshshe assinoonni; Boobinna Mariyooni Hachiseni sase oosonsa ledo konne gambooshshe haadhe hadhinoe. Insara hakkawaro, ane gambooshshe haadhe haˈra shota ikkitinonsakkita gedensoonni wodanchoommo; kayinni hakku gambooshshi kaaˈlinoe gara horo dihaweemmo.

Shiimu noommo yannara addi addi saada noonke; ani qole saada towaata baxeemmo. Hakko daafira saadate akime ikka hasiˈroommo. Amaˈya tenne songote cimeessira kultu. Isi shaqqillunni, heeˈnoommohu ‘goofimarchu barri’ giddo ikkinota qaageemmo gede assinoe; hattono lowo diro yuniversitete roso rosa Yihowa ledo nooe jaalooma huntara dandiitannota wodancheemmo gede kaaˈlinoe. (2 Xim. 3:1) Hakko daafira yuniversite eˈˈe rosa giwummo.

 Kayinni, layinki dirimi roso gudummoro ma asseemmoro heda diaguroommo. Qidaamenna Sambata soqqansho ganye fuleemmoha ikkirono soqqansho dihagiirsiissannoe; hattono suwisaancho ikkeemmo yee dihedeemmo. Hatte mereero, Yihowa Farciˈraasincho ikkinokki anniˈyanna wosiiliˈya Toronto katamira noote jawa inshuraansete dirijjite giddo woˈma barra looseemmo gede jawaachishshinoe. Wosiiliˈyara hatte dirijjite giddo lowo silxaane noosi; hakko daafira hakko loosate maahoyye yuummo.

Torontote roore yanna sayiseemmohu looso loosanniiti; qoleno Yihowa Farciˈraasine ikkitinokkiriwa aana hanafummo; tini ayyaanaamittete coye ganye asseemmokki gede assitinoe. Umo heeˈroommohu Yihowa Farciˈraasincho ikkinokkihu ahaahiˈya ledooti; isi reyihu gedensaanni kayinni heeˈreemmohu wolu bayichi hasiisinoe.

Boobinna Mariyhoni Hachiseni yaano 1958 gambooshshe haadhe hadhueri anera annunna amate gede ikkitinoe. Insa minensa heeˈreemmo gede koyissinoe; hattono ayyaanaamittetenni lopheemmo gede kaaˈlitinoe. Hakkiinni 1960nni Jooni yinanni beettinsa ledo cuuamummo. Jooni suwisaancho ikke soqqama hanafi; tini anino albinni roore soqqameemmo gede jawaachishshinoe. Songote giddo noo roduuwi ayyaanaamittetenni lophanni noommota wodanchitu; gedensoonni Tiokiraasete Rosi Mini soqqamaancho assine shoommie. a

Hakkiinni 1966nni diinaggaabbe soqqantanno suwisaanchonna sabbakkannori roore hasiissannowa hadhe soqqamate quqquxantannote Raandi Bergi yinanni rodoo ledo adhammummo. Woradu aliidi laˈˈaanchi ninkera hedannonketa leellishinonke; hattono Ontaariyo Oriilla yinanniwa noo songo haˈne kaaˈlineemmo gede jawaachishinonke. Hakko daafira uduunnenke gamba assiˈne bayichonkonni hakkiira haˈnummo.

Oriilla iillinanni heeˈneennanni Raandi ledo woˈma yanna suwisaancho ikke soqqama hanafummo. Ise diinaggaabbe soqqantanno gari wonanni halchishe nooe! Suwisaancho ikke dancha gede sabbaka hanafummohu gedensaanni, Qullaawa Maxaafa horoonsiˈre sabbakanna mannu halaale macciishshe adhanna laˈˈa  lowo geeshsha hagiirsiissinoe. Oriilla heeˈrannori mittu minaanninna minaama heeshshonsa biddi assiˈre Yihowara soqqamanno gede kaaˈlinoommo daafira lowo geeshsha hagiidhinoommo.

Toronto haˈnoommowa Beeteelete albisa ikkite soqqantanno roduuwi giddo Arinooldi Makinamaara yinanni rodiinni xaadummo. Isi baxxitino suwisaano ikkine soqqama hasiˈneemmoronna teˈee xaˈminke. Bayichonkonni, “Eewana! Kiwubeekella ikka hoogiro” yuummo. Hatte yannara Kanaadaho heeˈrannohu Ingilizete afoo coyiˈranno manni Faransayete afoo coyiˈnannihu Kiwubeeki qoqqowi daafira coyiˈrannori hakko qoqqowi daafira gara ikkinokkire hedeemmo gede assinoe. Hatti yanna Kiwubeeki qoqqowira heeˈranno manni Kanaadunni baxxe fula hasiˈre gashshooteho finqilanni noote.

Arinooldi qole, “Sinu biiro xaa yannara baxxitino suwisaano soya hasidhanno bayichi Kiwubeeki callaati” yiie. Anino bayichonkonni hakkiira haˈrate sumuu yuummo. Raandi wonanni hakko hadhe soqqama hasidhannota afoommo. Gedensoonni, kuni heeshshonke giddo doodhinoommohu kaajju doorshi giddo mitto ikkinota huwatoommo!

Onte lamala geeshsha Faransayete afoo ronsummohu gedensaanni, Raandinna ani wolu minaanninna minaama ledo Montiriyaaliyaho aliyye soojjaati widoonni 540 kiilo meetire xeertiˈre nooha Rimoski yinanni bayicho haˈnummo. Ikkirono xaano rosa hasiissannonkeri lowori no; mitto egensiishsha nabbawummo yannara Faransayete afoo lende rosa hasiissinonketi xabbe leeltino. “Aanannohu jawa gambooshshira Ostiriyu gobbanni lowo wosini daanno” yaammora hasiˈre, “aanannohu jawu gambooshshira lowo ostiriiche (bajja yinanniti lowo cea) dagganno” yoommo.

Rimoski haˈnummoti ninke shoolunku, mine assiˈrinokkiri diinaggaawe soqqamannori shoolu seenni, Huberdeesi yinanni rodiinna minaamasi hattono lamu seennisi ledo egennammummo. Huberdeesi lamala kifile afiˈrino mine karaayyae heeˈranno; suwisaanono isira woxe baattanni hakko heedhanno; insa waajjo qalame gannoonni daafira konne mine Waajjo Mine yitanno. Hakko mine duucha woyite 12 woy 14 manni heeˈneemmo. Baxxitino suwisaano ikkinoommo daafira Raandinna ani soodo, barranna hawarro soqqansho fulleemmo; hakko daafira, woˈmanka woyite wole agurina hawado qiidu yannara hawarro nafa ledonke soqqamannoha dihoongeemmo.

Kuri ammanantino suwisaano ledo lowo geeshsha egennammoommo daafira insa ninkera maatete gede ikkitinonke. Mito woyite gobba giira giidhine baalunku mitteenni sagale qishiˈneemmo. Ninke giddo mittu rodii muuziiqa dandaannoha ikkino daafira duucha woyite Sambatu hashsha sirbinanni godoˈlineemmo.

Rimoski qoqqowira dancha guma afiˈnoommo! Ontu diri giddo Qullaawu Maxaafi rosaano ayyaanaamittetenni lophite cuuantanna laˈne hagiidhinoommo. Halashshaanote kiiro lexxite 35 balla ikkitino.

Kiwubeeki heeˈnoommo yannara wongeellu loosira kaaˈlannonkeha kaajja qajeelsha afiˈnoommo. Yihowa soqqanshonkeranna maalaamittenkera hasiisannonkere wonshe kaaˈlinonke gara laˈnoommo. Qoleno Faransayete afoo coyiˈranno manna, qaalensanna budensa baxa ronsoommo; tini qolte wolu manni budeno banxeemmo gede assitinonke.—2 Qor. 6:13.

Hedeweelcho sinu biiro Niyu Birunsiwikira soojjaatoonni baaru qaccera nooha Tirakadayi yinanni katama haˈneemmo gede kultunke. Galleemmo mine karaayyaˈne kaˈnoommohuranna mittu rosi mine darate barra rosiisate maahoyye yoommo daafira tenne agure haˈra shota diˈˈikkitinoe. Qoleno mite Qullaawu Maxaafi rosaanonke xaalla halashshaano ikkite no; hattono Gambooshshu Addaraashe minnanni mereedhine heeˈnoommo.

 Heeˈnoommohu Rimoski qooxeessinni lowo geeshsha baxxannohu Tirakadayi katama haˈrate daafira Qidaamenna Sambata woˈma barra huuccatto assiˈnoommo. Kayinni Yihowa hakkiira haˈnammora hasiˈrino daafira haˈrate murciˈnoommo. Yihowa fonqolle laˈnoommo; isino guficho ikkannoha mitto mittonka coye hoolinonke. (Mil. 3:10) Raandi ayyaanaamittetenni worba, umise horo agurtannotanna muushshi assannore coyidhannota ikkase hakkiira haˈra shota ikkitannonke gede kaaˈlitinonke.

Haarote marroommo songora cimeessu Rooberti Roosi callaati. Isi minaamasi Linda ledo suwisaancho ikke soqqamanno; insa umi qaaqqonsa ilihu gedensaannino hakkiicho heeˈrate murciˈrino. Insa qaaqqonsa towaaxxanni heeˈrenni wosina adhanno garinna diinaggaawe soqqamanno gari Raandinna ane lowo geeshsha jawaachishinonke.

Tirakadayaho lame diro suwisaano ikkine soqqammummohu gedensaanni xaano hendoommokkire kullinke; yaano woradu aliidi laˈˈaano ikkine soqqammeemmo gede koyinsinke. Ingilizete afiinni massanganni songuwa lamala diro towaantummohu gedensaanni, Kiwubeeki qoqqowira noota Faransayete afiinni massanganni songuwa towaanteemmo gede gaamminke. Kiwubeeki qoqqowira awuraajju aliidi laˈˈaancho ikke soqqamannohu roduu Liyoonsi Kiripolti shiqisheemmo lallawora galatannoe. Kayinni isi, “Lallawokki roore kaaˈlitannota ikkitanno gede ma assa dandaatto?” yee woˈmanka woyite xaˈmannoe. b Isi ane kaaˈlate assinori rosiisate dandooˈya woyyeessiˈreemmo gedenna huwatate qarrisannokki garinni rosiiseemmo gede kaaˈlinoe.

Xaa geeshsha haweemmokki loosi giddo mittu 1978nni Montiriyaaliyaho assinoonnihu “Qeeltanno Ammana” yaannohu Daga Dagiyyote Gambooshshiwa uyinoonnie loosooti. Hakkiicho sagale qinshanniwa loosoommo. Gambooshsheho 80,000 ikkanno manni daanno yine hendoonni; hattono sagale qixxeessinoonni gari konni albaanni qixxeessinoonni garinni baxxinoho. Baalunku coyi haaroho: sagale qixxeessinoonni uduunni, sagalete daninna sagale qinshoonni gari. Sagale qiissitannota 20 jajjabba firiije qixxeessinoonni; mito woyite tini firiije loosa gibbe waaddannonke. Pirogiraame gaˈa gede heedheenna ispoortete godoˈle noo daafira istaadiyeeme eˈne baalanka coye biddi assate hashshu taalooti geeshsha agarroommo. Qoleno soodo gutu kaˈne mannu afoo seekkiˈrannore qixxeessa hasiissannonke! Lowo geeshsha daafurroommo; ikkirono diinaggaabbe loossannori, ayyaanaamittete gikki yitinorinna muushshi assannore coyidhannori ammanate  roduuwiˈyawiinni lowore rosoommo. Tini mimmitu ledo xaa geeshsha jaalla ikkineemmo gede kaaˈlitinonke. Lowo darti nooha ikkirono 1940 nna 1960 mereero Kiwubeeki assinoonnihu konni hambannikki gambooshshinni lowo hagiirre afiˈnoommo!

Montiriyaalaho assinoonnihu jawu gambooshshiwa ledoˈya aliidi laˈˈaano ikkite soqqantino roduuwiwiinni lowore rosoommo. Mitto diro, xaa yannara Aliidi Bisi miila ikke soqqamannohu roduu Deevidi Ispileeni konni gambooshshira aliidi laˈˈaancho ikke soqqamino. Wole yannara assinoonni gambooshshira hakko looso ani looseemmo gede kullie; hatte yannara roduu Deevidi lowo geeshsha kaaˈlinoe.

Raandinna ani 36 diro woradu aliidi laˈˈaano ikkine soqqammummohu gedensaanni 2011nni Songote Cimeeyyera Qixxeessinoonni Rosi Mine rosiiseemmo gede koyinsie. Raandinna ani lamu diri giddo calla addi addihu 75 daallasira gonxoommo; ikkirono tini gaabbissannota diˈˈikkitino. Mitte mittente lamala jeefora songote cimeeyye Aliidi Bisi ayyaanaamittensa daafira mageeshshi geeshsha hedannoro huwattannohura lowo geeshsha hagiidhitanno.

Gedensoonni Maganu Mangiste Sawaakooti Rosi Mine rosiisoommo. Rosaano rosu batiˈrannonsa daafira duucha woyite daafurtanno, hatto yaaddanno; mitto barra kifilete ofolte lamala saate woˈma rossanno, hawarrote kiiro sase saate woˈma mini looso loossanno hattono mitte lamala giddo shoole woy onte kifile shiqishshanno. Aninna ledoˈya rosiisanno rosiisaanchi, rosaano tenne assa dandiitannohu Yihowa kaaˈlinsaro calla ikkinota kulleemmonsa. Rosaano Yihowa addaxxite, heddinohunni nafa roorinore assite dhagge assidhannota woˈmanka woyite qaageemmo.

Amaˈya wolootaho heddannota ikkase Qullaawu Maxaafi rosaanose ayyaanaamittetenni lophitanno gede kaaˈlitino; hattono anniˈyara nafa halaaleho noosi lao soorrantanno gede assitino. Amaˈya reyituhunni sasu barri gedensaanni anniˈya lallawo macciishshate Gambooshshu Addaraashe dayita dhagge assiˈnoommo; isi hatte yannanni kayise 26 diri geeshsha gambooshshe haˈra diagurino. Anniˈya xaa geeshsha cuuaminokkiha ikkirono songote cimeeyye lamalate kiiro gambooshshe balaxe daannota kultannoe.

Amaˈya roduuwiˈyaranna anera dancha lawishsha ikkitinonke. Sasenti roduuwiˈyanna minaannuwinsa Yihowara ammaname soqqamanni no. Lame roduuwiˈya soqqamannohu sinu biiroraati; mitte Porchugaalete mitte qolte Heyiti soqqantanno.

Raandinna ani xa Ontaariyo Hamilteni yinanniwa baxxitino suwisaano ikkine soqqammanni heeˈnoommo. Woradu looso loonseemmo yannara roduuwu galagalte marte hasaawisatenna Qullaawa Maxaafa xiinxallisate hadhanno woyite ledonsa haˈneemmo. Xa kayinni ninke uminke rosaano ayyaanaamittetenni lophitanna laˈne hagiidhinoommo. Xa heeˈnoommote haaro songora noo roduuwi ledo dancha jaalooma kalaqiˈnoommo; hattono Yihowa insa qarrunna faffote yannara kaaˈlinonsa gara laˈˈanke jawaachishshinonke.

Batinyu roduuwi ninke daafira heddannota leellishshino gara qaangeemmo woyite insa galanteemmonsa. Ninkeno wolootu ayyaanaamittetenni lophitanno gede kaaˈline hendeemmonsata leellishate dandiinummore baala assinoommo. (2 Qor. 7:6, 7) Lawishshaho mitte maate giddo ama, beettisenna beettose woˈma yanna soqqamaano ikke soqqamanno. Minaanni suwisaancho ikkate daafira hede egenninoronna teˈee xaˈmummo. Isi minesi nooha sasenka suwisaano ikkino manna kaaˈlanni noota kulie. Hakkiinni, “Ati insa Yihowa kaaˈlannohunni roorsite kaaˈla dandaatto?” yee xaˈmummosi. Hakkiinni isino insa assitannore asse hagiidhanno gede jawaachishummosi. Isino lewu agani gedensaanni suwisaancho ikkino.

Raandinna ani “dagganno ilamara” dhagge ikkannoha Yihowa looso kula diagurreemmo; insano Yihowara soqqante hagiirre afidhanno yine hexxineemmo.—Far. 71:17, 18.