Ninke baalunkura, hojju xiinxallo assiˈneemmota gari yanna afiˈra qarra ikkitannonke. Ikkina noonke yanna danchu garinni horoonsiˈra dandiineemmohu hiittoonniiti? Umihunni, iimi iimi adda nabbabbooti. Iimi iimi adda lowo borro nabbawantenni yanna gaaˈmite shiima borro xiinxalla kaaˈlitannohe.

Hakkiinni, hiikkonne coye balaxisiisattoro mixo fushshiˈri. (Efe. 5:15, 16) Hanni aane noore assate woˈnaali:

• Qullaawa Maxaafa barru baala nabbawi. (Far. 1:2) Kiristaanu Heeshshonna Soqqansho Gambooshshira gaammoonniti lamalanniti Qullaawu Maxaafi niwaawe pirogiraame tennera kaaˈlitahera dandaatto.

• Agarooshshu Shae Xiinxalloranna Kiristaanu Heeshshonna Soqqansho Gambooshshira qixxaawi. Qoleno gambooshshunniwa dawaro qolate qixxaawi.—Far. 22:22.

• Qoleno yanna afiˈrittoro wole ayyaanaamittete sagale yaano, mannaho ellanni metseete, viidiyubbanna jw.org aana fultanno borro nabbawi.

• Baxisinohe birxicho doorte xiinxalli. Lawishshaho, iillinohe qarri daafira, dawaro afiˈra hasiˈratto xaˈmo daafira woy albinni roore huwata hasiˈroottoha mitto Qullaawu Maxaafi birxicho doorte xiinxalla dandaatto. Kaaˈlitannohe hedo afiˈrate, jw.org aana nooha “Qullaawu Maxaafi Xaggenni Ronseemmo Roso” yaanno maxaafa lai.