XIINXALLOTE BIRXICHO 30
FAARSO 36 Wodananke Agadhino
Israeelete Mootoolla Xaggenni Ronseemmoha Kaajja Roso
“Hatte yannara anera soqqamannoehura danchu manchira assinannisi danchummanna soqqamannoekkihura bushu manchira iillannosi qarra manniˈya laˈˈanno.”—MIL. 3:18.
GUULCHO HEDO
Israeelete mootoolla daafira rosanke Yihowa hagiirsiisate maa assa hasiisannonkero huwanteemmo gede kaaˈlitannonke.
1-2. Qullaawu Maxaafi mite Israeelete mootoolla daafira maa kulannonke?
QULLAAWU MAXAAFI Israeelete mootoolla ikke gashshinohu 40 saˈˈanno manni suˈma kulanno. a Insa giddo mitootu assitino coye maaxikkinni kulanno. Lawishshaho, mite dancha mootoolla nafa busha coye assitino. Hanni danchu Moote Daawiti lawishsha laˈno. Yihowa isi daafira coyiˈranni, “coˈo yiino wodaninni hajajoˈya agadhinohunna ani baxeemmo coye assinohu soqqamaanchiˈya Daawiti” yiino. (1 Mot. 14:8) Ikkirono kuni manchi minaanni noose mancho ledo foorino; hattono minaannase olunniwa shinanni gede gano ganino.—2 Sam. 11:4, 14, 15.
2 Wole batinye ammanantinokki mootoolla kayinni mito dancha coye assitino. Hanni Roobiaami lawishsha laˈno. Isi Yihowa albaanni “busha coye assino.” (2 Dud. 12:14) Ikkirono Roobiaami tonne gaˈre gashshootisi giddonni baxxite fultanno gede Yihowa kulino biddishshira hajajamino. Qoleno isi duucha katammara huxxa huxxe Israeele diinnansa anganni agarino.—1 Mot. 12:21-24; 2 Dud. 11:5-12.
3. Dawaro afiˈra hasiissannonketi kaajja xaˈmo hiittenneeti? Konni birxichira maa xiinxallineemmo?
3 Israeelete mootoolla busha coyeno dancha coyeno assitinoha ikkina, Yihowa mitto moote ammanaminoho woy diammanaminoho yaannohu maa laeeti? Tenne xaˈmora qollanni dawaro Yihowa ninke maa assinammora hasiˈrannoro huwanteemmo gede kaaˈlitannonke. Konni birxichira, Yihowa Israeelete mootoolla ammanantinoreeti woy diammanantinoreeti yaate laˈˈannoha sase coye ronseemmo. Insano: wodaninsa garaati, cubbo loossuro maaro eate hattono halaalu magansiˈra seekke cuˈmiˈrate.
INSA WOˈMU WODANINSANNI YIHOWA BAXXINO
4. Ammanantino mootoollanna ammanantinokki mootoolla mereero noohu mittu badooshshi maati?
4 Yihowa woˈmu wodaninsanni magansidhino mootoolla iso hagiirsiissino. b Danchu Moote Iyosaafiixi ‘Wolqasi uyitu geeshsha Kaaliiqira soqqamino.’ (2 Dud. 22:9) Qullaawu Maxaafi Iyosiyaasi daafira kulanni, “Woˈmu wodanisinni . . . Kaaliiqira soqqaminohu Iyosiyaasi gedee moote isira albaannino ikko gedensaanni horontanni dino” yaanno. (2 Mot. 23:25) Geedhimmasi yannara busha coye assinohu Selemoonina? Isi “Kaaliiqira diammanamino.” (1 Mot. 11:4) Qoleno Qullaawu Maxaafi ammanaminokki moote Abiya daafira kulanni, “Coˈo yiino wodaninni Maganisi Kaaliiqira diammanamino” yaanno.—1 Mot. 15:3.
5. Yihowara woˈmu wodaninni soqqamate yaa mayyaatero xawisi.
5 Ikkina Yihowara woˈmu wodaninni soqqamate yaa mayyaate? Yihowara woˈmu wodaninni soqqamanno manchi isira soqqamannohu hatto assa hasiissannosi daafira calla diˈˈikkino. Hatteentenni Yihowara soqqamannohu Yihowa baxannonna ayirrisanno daafiraati. Hakkiino sae isi heeshshosi diro woˈma Yihowa baxanninna ayirrisanni heeˈranno.
6. Yihowara woˈmu wodaninni soqqammanni heeˈra dandiineemmohu hiittoonniiti? (Lawishsha 4:23; Maatewoosi 5:29, 30)
6 Yihowara ammanantinonna woˈmu wodaninsanni soqqantino mootoolla lawishsha harunsa dandiineemmohu hiittoonniiti? Bushare assineemmo gede xixxiiwannonkere giwatenniiti. Lawishshaho, gara ikkinokki boohaarshi wodaninke bebbeehamanno gede assara dandaanno. Busha hoshshanna maalaamittete coyi daafira hedano wodaninke bebbeehamanno gede assitanno. Hakko daafira mitu coyi Yihowara noonke baxilli baˈˈanno gede assanni noota wodanchinummoro bayichonkonni hooˈlino.—Lawishsha 4:23; Maatewoosi 5:29, 30 nabbawi.
7. Bushare assineemmo gede xixxiiwannonke coye hooˈla hasiissannota ikkitinohu mayiraati?
7 Wodaninke bebbeehamara wodha dihasiissannonke. Qoropha hoongummoro, batinye ayyaanaamittete coye assinummo geeshsha bushare assineemmo gede xixxiiwannonkere gargadha dandiineemmo yine ninkeneeto dongammora dandiineemmo. Hanni lawishshaho gobba lowo qorrinna bubbe noowa nootto yine hendo. Minira eittoro giiranniwa gamba yaatto. Kayinni waalcho cufiˈrittokkilla aguritto? Qiidu gudisame minira eanno. Konni lawishshinni maa ronseemmo? Yihowa ledo noonke jaalooma kaajjishshannota ayyaanaamittete sagale sagaˈlatenni sainore assa hasiissannonke. Alamete “qiidi” yaano bushare assineemmo gede xixxiiwannonke coyi wodaninke giddora eˈˈe wodananke bebbeehannokki gede, wodaninke waalcho cufiˈra hasiissannonke.—Efe. 2:2.
INSA CUBBINSARA MAARO EˈINO
8-9. Moote Daawitinna Moote Hiziqiyaasi seejjininsata ma assitino? (Aaniidi qoolira noo misile lai.)
8 Aleenni qummi assininte gede Moote Daawiti lowo soˈro loosino. Kayinni masaalaanchu Naataani loosino cubbo kulisita, Daawiti umosi heeshshi asse maaro eino. (2 Sam. 12:13) Daawiti Faarso 51 borreessinori isi addu maaro einota leellishanno. Daawiti Naataani dogate woy qorichunni gatate yee maaro einoha lawate diwoˈnaalino; hatteentenni addu maaro eino.—Far. 51:3, 4, 17.
9 Moote Hiziqiyaasino Yihowa dadillisino. Qullaawu Maxaafi isi daafira kulanni togo yaanno: “Wodanisira booˈna woˈmite noo daafira, . . . Kaaliiqi hanqi, Yihudunna Yerusaalamete manni aana dirri.” (2 Dud. 32:25) Hiziqiyaasi booˈninohu mayiraati? Jiro noosi daafira, Asooru manna qeelino daafira woy maalaletenni hurino daafira ikkara dandaanno. Isi Baabiloonootaho jirosi leellishinohu booˈnino daafira ikkara dandaanno; tini masaalaanchu Isayaasi seejjannosi gede assitino. (2 Mot. 20:12-18) Kayinni Daawiti gede Hiziqiyaasino umosi heeshshi asse maaro eino. (2 Dud. 32:26) Hakko daafira Yihowa jeefote iso, ‘Kaaliiqi baxanno coye assinohu’ ammanamino moote gede asse lainosi.—2 Mot. 18:3.
Moote Daawitinna Moote Hiziqiyaasi loossino soˈro ammantuti umonsa heeshshi assite maaro eˈino (Gufo 8-9 lai)
10. Moote Amesiyaasi seejjinisita ma assino?
10 Yihudu moote Amesiyaasi kayinni, gara ikkinore assinoha ikkirono assinohu “diwoˈmu wodaninniiti.” (2 Dud. 25:2) Isi loosino soˈro maati? Yihowa kaaˈleennasi Edoomoota qeelihu gedensaanni, kaphu magannansara kumbuulino. c Hakkiinni Yihowa masaalaanchi iso seejjisita Amesiyaasi kakkache macciishsha giwino.—2 Dud. 25:14-16.
11. Layinki Qorontoosi 7:9, 11 kultanno garinni, maaro afiˈrate maa assa hasiissannonke? (Misillano lai.)
11 Konni lawishshinni maa ronseemmo? Cubbinkera maaro eanna hakko cubbo galagalle loonseemmokki gede dandiinummore baala assa hasiissannonke. Songote cimeeyye shiima labbanno soˈrora nafa amaaltannonkehalla ikki? Yihowa woy songote cimeeyye baxxannonkekkihu gede assine heda dihasiissannonke. Israeelennita dancha mootoolla nafa amaalloonninsa hattono seejjinoonninsa. (Ibi. 12:6) Seejjinanninke woyite aane noore assa hasiissannonke; (1) umonke heeshshi assine maahoyye yaa, (2) biddi assiˈra hasiissannonkere biddi assiˈranna (3) woˈmu wodaninkenni Yihowara agurrummokkinni soqqama. Cubbinkera maaro eˈnummoro Yihowa gatona yaannonke.—2 Qorontoosi 7:9, 11 nabbawi.
Seejjinanninke woyite, (1) umonke heeshshi assine maahoyye yaa, (2) biddi assiˈra hasiissannonkere biddi assiˈranna (3) woˈmu wodaninkenni Yihowara agurrummokkinni soqqama hasiissannonke (Gufo 11 lai) f
INSA HALAALU MAGANSIˈRA SEEKKITE CUˈMIDHINO
12. Ammanantino mootoolla ammanantinokki mootollawiinni baxxitanno gede assannohu qaru coyi maati?
12 Yihowa ammanantinori gede asse lainonsa mootoolla halaalu magansiˈra seekkite cuˈmidhinoreeti. Insa gashshitino mannino hatto assanno gede jawaachishshino. Hige aleenni laˈnummonte gede insa soˈro loossino. Kayinni insa Yihowa calla magansidhino hattono kaphu maganna uullate aaninni hunate sharrantino. d
13. Yihowa Moote Akiaabi diammanaminoho yiinohu mayiraati?
13 Yihowa diammanantinoreeti yiino mootoollana? Insa assitinohu baalunku coyi busha ikkinokkiti egennantinote. Bushu Moote Akiaabi nafa isinni kainohunni Naabute shinoonnita macciishshihu gedensaanni mito geeshshano ikkiro umosi heeshshi assino hattono dadillino. (1 Mot. 21:27-29) Qoleno isi addi addi katamma minino hattono Israeelete qeelle abbino. (1 Mot. 20:21, 29; 22:39) Kayinni Akiaabi lowo geeshsha busha coye assino; isi galtesi shombinni foole kaphu magansiˈra halashshino. Tenne soˈrosira isi maaro dieino.—1 Mot. 21:25, 26.
14. (a) Yihowa Moote Roobiaami ammanaminokkihu gede asse lainohu mayiraati? (b) Ammanantinokki mootoolla bande anfannihu mayinniiti?
14 Hanni wolu ammanaminokki moote yaano Roobiaami daafira laˈno. Aleenni kullinte gede isi gashshootisi yannara batinye dancha coye assino. Kayinni isi gashshootisi kaajji yannara Yihowa seera harunsa agure kaphu maganna magansiˈra hanafino. (2 Dud. 12:1) Hakkunni gedensaanni mito woyite Yihowa magansiˈrannoha mito woyite kaphu maganna magansiˈrannoha ikkino. (1 Mot. 14:21-24) Halaalu magansiˈra agurtino mootoolla Roobiaaminna Akiaabi calla diˈˈikkitino. Isinni ammanantinokki mootoolla giddo rooru kaphu magansiˈrara halantino. Yihowa mitto moote danchaho woy bushaho yaannohu halaalu magansiˈra seekke cuˈmiˈrinoronna teˈee lae ikkinoti dihuluullissannote.
15. Halaalu magansiˈra seekke cuˈmiˈra Yihowa albaanni lowo waaga afidhinohu mayiraati?
15 Yihowa magansiˈra isi albaanni lowo waaga afidhinohu mayiraati? Mittu korkaati, mootoolla Maganu manni halaalu magansiˈrara halamanno gede kaaˈlate qeechi noonsahuraati. Qoleno, kaphu magansiˈra jawa cubbo loonsanni gedenna woloota miincanni gede assitanno. (Hos. 4:1, 2) Hatteeno agurranna mootoollanna insa gashshitino manni Yihowara dooraminoho. Hakko daafira insa Yihowara ammanama gibbe kaphu maganna magansidhinohura, Qullaawu Maxaafi foortinohu gede asse kulino. (Erm. 3:8, 9) Mittu manchi foorannoha ikkiro galtesi baddalanni no. Hatteente gede Yihowara dooraminohu mittu manchi kaphu maganna magansiˈriro Yihowa lowo geeshsha xissiisiˈranno. e—Mar. 4:23, 24.
16. Yihowa albaanni danchanna busha mancho bande anfanni gede assannohu qaru coyi maati?
16 Maa ronseemmo? Kaphu maganna giwate murciˈra hasiissannonketi egennantinote. Ikkirono woˈmanka woyite halaalu magansiˈra cuˈmiˈre heeˈrano hasiissannote. Masaalaanchu Milkiyaasi Yihowa albaanni mitto mancho danchaho woy bushaho yinannisi gede assannori maatiro xawise coyiˈrino. Isi togo yee borreessino: “Anera soqqamannoehura danchu manchira assinannisi danchummanna soqqamannoekkihura bushu manchira iillannosi qarra manniˈya laˈˈanno.” (Mil. 3:18) Hakko daafira aye coyino, guuntete xeˈnenkenna loonseemmo soˈro nafa hexxo mudhine Yihowara soqqama agurreemmo gede assitankera wodha dihasiissannonke. Yihowara soqqama agura umise jawa cubbooti.
17. Galte qorophine doodha hasiissannonkehu mayiraati?
17 Mine kalaqiˈrate heddinanni heedhinoonniha ikkiro, Milkiyaasi coyiˈrinori dancha galte doodhitinanni gede kaaˈlaˈnera dandaanno. Mittu manchira mite dancha akatta heedhasira dandiitanno; kayinni hakku manchi halaalaancho Magano magansiˈrannokkiha ikkiro, Yihowa albaanni keeraanchoho yaa dandiinanni? (2 Qor. 6:14) Togoo adhama Yihowara ammanamme heeˈnanni gede assitanno? Hanni tenne hedi: Moote Selemooni adhinohu wole maganna magansiˈranno meentira mite dancha akatta noonsaha ikkara dandaanno. Ikkollana insa Yihowa magansiˈrannore diˈˈikkino; hakko daafira sunu sununni Selemooni kaphu maganna magansiˈranno gede assino.—1 Mot. 11:1, 4.
18. Annuwunna amuuwu oosonsara maa rosiisa hasiissannonsa?
18 Annuwanna amuuwa, mootoollate daafira kultannota Qullaawu Maxaafi xagge horoonsidhine, oosoˈnera Yihowa diinaggaawe magansiˈrate hasatto heedhannonsa gede kaaˈlensa. Yihowa mitto moote danchaho woy bushaho yaannohu halaalu magansiˈrara halaminoronna teˈee lae ikkinota huwattanno gede kaaˈlensa. Oosoˈnera, ayyaanaamittete coye lawishshaho Qullaawa Maxaafa xiinxalla, gambooshshe haˈranna soqqansho fula wolu baalunku coyinni roore balaxisiisa hasiissannota ikkitinota coyidhinannirinninna assitinannirinni rosiissensa. (Mat. 6:33) Hakkuyi kaˈa oosoˈne, Yihowa Farciˈraasincho ikkate yaa maatensa ammaˈno harunsa ikkitinohu gede assite heddara dandiitanno. Konninni kainohunni insa halaalu magansiˈra balaxisiisa hooggara woy woˈmunni woˈma Yihowa magansiˈra agurtara dandiitanno.
19. Yihowara soqqama agurtinorira mayi hexxo noonsa? (“ Yihowawa Higa Dandaatto!” yitanno saaxineno lai.)
19 Mittu manchi Yihowara soqqama aguriro galagale isiwa higa didandaanno yaateni? Deeˈni. Isi maaro eanna galagale halaalu magansiˈrara halama dandaanno. Tenne assate isi umosi heeshshi assannohanna songote cimeeyye kaaˈlo maahoyye yee adhannoha ikka hasiissannosi. (Yai. 5:14) Yihowawa higate assinanniri gaabbisannore diˈˈikkino!
20. Ammanantino mootoolla lawishsha harunsinummoro Yihowa ma garinni laˈˈannonke?
20 Ikkina Israeelete mootoolla xaggenni maa ronsoommo? Woˈmu wodaninkenni Yihowara ammanamme heeˈneemmoha ikkiro, ammanantino mootoolla gedeere ikka dandiineemmo. Loonsoommo soˈronni ronso, cubbinkera maaro eˈno hattono biddi assiˈra hasiissannonkere biddi assiˈno. Qoleno halaalaancho Magano calla magansiˈra hasiissannota ikkitinota qaango. Yihowawa gamba yite heeˈrattoha ikkiro, Yihowa ateno isi albaanni dancha coye assino manchi gede asse laˈˈannohe.
FAARSO 45 Wodaniˈyanni Hiinceemmore
a Konni birxichira “Israeelete mootoolla” yinoonnihu, lame gaˈre amadinohu Yihudu gashshootira, tonne gaˈre amadinohu Israeelete gashshootiranna 12nte gaˈrera mookkinore Yihowa manna gashshitino mootoolla baalanta kulateeti.
b HARANCHO XAWISHSHA: Qullaawu Maxaafi giddo duucha woyite “wodana” yaanno qaale horoonsiˈnoonnihu, mittu manchi halcho, hedo, dooˈˈo, lao, dandoo, hasattonna mixo kulateeti.
c Wole maganna magansidhanno mootoollara, qeeltino daga maganna magansiˈrate rosi noonsaha ikkara dandaanno.
d Moote Aasa jawa cubbo loosino. (2 Dud. 16:7, 10) Ikkirono, Qullaawu Maxaafi isi Yihowa albaanni danchare assinota kulanno. Isi umi qara seejjo adha giwinoha ikkirono, gedensoonni maaro einoha ikkara dandaanno. Assinohu danchu coyi loosinoha busha coye rooranno. Aasa Yihowa calla magansiˈrino hattono gashshootisi giddonni kaphu maganna hunate sharramino.—1 Mot. 15:11-13; 2 Dud. 14:2-5.
e Tonne hajajo giddonni umiti lame hajajo Israeele Yihowa aguranna aye manchono woy aye coyeno magansiˈra hasiissannonsakkita leellishshannota qaagge.—Ful. 20:1-6.
f MISILLATE XAWISHSHA: Mittu wedellichu cimeessi mittu rodiira agoho noosi lao yaachishshinosita kulanni no. Roduu amaale umosi heeshshi asse adhino, biddi assiˈra hasiissannosire biddi assiˈrino hattono Yihowara ammaname soqqama diagurino.
