XIINXALLOTE BIRXICHO 29
FAARSO 121 Meessaneeto Qeeꞌla Hasiissanno
Jifamate Giddora Eꞌinannikki Gede Qorophe
“Jifamate giddora eꞌinannikki gede baqqi yitine agadhe, hattono agurtinikkinni huuccidhe.”—MAT. 26:41.
GUULCHO HEDO
Cubbonna hakkira qole massannore qoropha hasiissannohu mayiraatiro ronseemmo.
1-2. (a) Yesuusi rosaanosi mayyee qorowisiisino? (b) Rosaanosi iso hunte xooqqinohu mayiraati? (Misileno lai.)
“HIGE ayyaanu qixxaawaho, maalu kayinni daafuraamoho.” a (Mat. 26:41b) Yesuusi hatto yaasi guuntete xeꞌne noonkerenna soꞌro loonseemmore ikkinoommota afinota leellishshanno. Kayinni isi coyiꞌrinori quwa saꞌne ninkeneeto addaxxineemmokki gedeno qorowishsha ikkannonke. Rosaanosi hakko hashsha, isiwiinni horo baxxitannokkita woꞌma giddonsanni coyidhino. (Mat. 26:35) Insa hatto yitinohu dancha giddonniiti. Ikkirono fonqolu iillinsaro mulenni qeelantannota diwodanchitino. Hakko daafira Yesuusi, “Jifamate giddora eꞌinannikki gede baqqi yitine agadhe, hattono agurtinikkinni huuccidhe” yee qorowisiisinonsa.—Mat. 26:41.
2 Ikkirono Yesuusi rosaanora baqqi yite agadha qarra ikkitinonsa. Yesuusa amandita insa isiwiinni baxxa hoogate murcidhaanso waajjite iso agurte xooqqakka? Yesuusi rosaano baqqi yite agadhitinokki daafira, horo diassineemmo yitinore assitino yaano Yesuusa agurte xooqqino.—Mat. 26:56.
Yesuusi rosaanosi baqqi yite agadhitanno gedenna jifamate giddora eꞌannokki gede amaalinonsa; insa kayinni iso agurte xooqqino (Gufo 1-2 lai)
3. (a) Yihowara ammanamme heeꞌrate quwa saꞌne ninkeneeto addaxxa qoropha hasiissannonkehu mayiraati? (b) Konni birxichira maa xiinxallineemmo?
3 Quwa saꞌne ninkeneeto addaxxa dihasiissannonke. Hige Yihowa dadillisannore assineemmokki gede murciꞌnoommo. Ikkirono guuntete xeꞌne noonke hattono gara ikkinokkire assa rakkannonke. (Rom. 5:12; 7:21-23) Hedeweelcho gara ikkinokkire assate fonqolammammora dandiineemmo. Yihowaranna Beettisira ammanamme heeꞌrate, Yesuusi jifamate giddora ea qorophineemmo gede amaalinonke amaale harunsa hasiissannonke. Kuni birxichi tenne assineemmo gede kaaꞌlannonke. Umo, roorenkanni qoropha hasiissannonke coyi maatiro ronseemmo. Hakkiinni jifamate giddora eꞌneemmokki gede qorophineemmohu hiittoonniitiro ronseemmo. Jeefote, baqqi yine heeꞌra dandiineemmo gara ronseemmo.
ROORE WOYITE FONQOLO IKKANNONKERI MAATI?
4-5. Woꞌmanka woyite shiima cubbo nafa qoropha hasiissannonkehu mayiraati?
4 Shiimu cubbi nafa Yihowa ledo noonke jaalooma hunara dandaanno. Qoleno togoo cubbi jawa cubbo loonseemmo gede assankera dandaanno.
5 Ninke baalunkura cubbo loonseemmo gede assanno fonqoli tuncu yaannonke. Ikkirono ninke mittu mittunkura uminke laanfe noonke; hakko daafira fonqolo ikkannonke coyino babbaxxanno. Lawishshaho, mittu manchi fooranno gede assannosi fonqolo qeeꞌlate sharramanni nooha ikkara dandaanno. Wolu qole busha rosicho lawishshaho maasterbeeshiinete gade qeeꞌlate woy teeda baꞌino misilla laꞌꞌa hoogate sharramanni nooha ikkara dandaanno. Wolu manchi qole, manna waajja, naaxxa, hanqoho muddama woy wole coye qeeꞌlate sharramanni nooha ikkara dandaanno. Yaiqoobi yiinonte gede, “mittu mittunku manchi jifamannohu umisi yortonni goshooshamanninna dogamanniiti.”—Yai. 1:14.
6. Ammanne adha hasiissannonkeri maati?
6 Roore woyite fonqolo ikkannohe coyi maatiro afootto? Laanfenke lashshi assine agura woy anera konne coye hooꞌlate dandoo nooe yee heda ninkeneeto dogate. (1 Yoh. 1:8) Phaawuloosi, ‘ayyaanaamma ikkitinori’ nafa baqqi yite agadha hoogguro fonqolu giddora eꞌara dandiitannota kulino. (Gal. 6:1) Ninkeneeto dongummokkinni laanfenke ammanne adha hasiissannonke.—2 Qor. 13:5.
7. Roore qoropha hasiissannonkeri maati? Lawishsha kuli.
7 Roore fonqolo ikkannonke coyi maatiro bande anfummohu gedensaanni maa assa hasiissannonke? Konne fonqolo gargadhate albinni roore sharrama hasiissannonke. Lawishshaho, hundi waro diinu katama siate roore waalchu widoonni eanno. Hakko daafira katamu waalcho seekkine agarranni. Hatteente gede ninkeno laanfenke bande anfummohu gedensaanni fonqolu giddora eꞌneemmokki gede seekkine qoropha hasiissannonke.—1 Qor. 9:27.
QOROPHA DANDIINEEMMO GARA
8-9. Lawishsha fooliishsho 7te kulloonni wedellichi jawa cubbo loosannokki gede maa assa dandaanno? (Lawishsha 7:8, 9, 13, 14, 21)
8 Cubbo loonseemmokki gede qoropha dandiineemmohu hiittoonniiti? Hanni Lawishshu maxaafa fooliishsho 7te kulloonni wedellichi lawishshinni maa ronseemmoro laꞌno. Isi foora mancho ledo foorino. Kiiro 22 kuni wedellichi “sammi yee hoodese haꞌri” yitanno. Isi woshshaadote giddora einohu hedeweelcho lawara dandaanno. Kayinni hakkuyira aleenni noo kiiro leellishshannonte gede, isi sunu sununni cubbunniwa massannosiha haammata coye assino.
9 Iso cubbo loosanno gede assinosiri maati? Umo isi leeshshote “minise [foora mancho] maddera noo doogo amade” haꞌrino. Hakkiinni minisewa hige haꞌrino. (Lawishsha 7:8, 9 nabbawi.) Mancho laiti qole isewiinni agure dihaꞌrino. Hatteentenni isi sunqitasira sammi yee wodhino; hattono mittimmate kakkalo shiqishidhinota kultannasi sammi yee macciishshino; tenne kultinosihu ise busha mancho ikkitinokkihu gede asse hedara yite ikkara dandaanno. (Lawishsha 7:13, 14, 21 nabbawi.) Kuni wedellichi cubbo loosanno gede assannosi coye qorophoommero, fonqolu giddora dieanno hattono cubbo diloosanno.
10. Xaa yannara mittu manchi kuni wedellichi loosino gedee soꞌro loosara dandaannohu hiittoonniiti?
10 Tini xagge, Yihowa magansiꞌrannohu baalunku mannira tuncu yaara dandaannore leellishshanno. Mittu manchi jawa cubbo loosaranna gedensoonni baalunku coyi hedeweelcho ikkinohu gede asse hedara dandaanno. Kayinni isi taxxi yee hediro, cubbunniwa massinosiha gara ikkinokki coye assinota wodanchara dandaanno. Isi Yihowa baxxannokkire jaalla assiꞌrinoha ikkara dandaanno. Qoleno doodhino boohaarshi, daaꞌꞌatino webisayite woy haꞌrino bayichi Kiristaanaho malinoha ikka hoogara dandaanno. Qoleno isi huuccatto assiꞌra, Qullaawa Maxaafa nabbawa, gambooshshe haꞌra woy soqqansho fula agurinoha ikkara dandaanno. Lawishshu maxaafira kulloonni wedellichi gede isino cubbo loosinohu hedeweelcho ikka hoogara dandaanno.
11. Cubbo loonseemmokki gede maa qoropha hasiissannonke?
11 Ninke tennenni maa ronseemmo? Cubbo calla ikkikkinni cubbunniwa massannoreno qoropha hasiissannonke. Salamooni wedellichunna foora mancho xagge kulihu gedensaanni “hoodese hadhooti” yee borreessino. (Law. 7:25) Qoleno isi “Hattoo manchowiinni xooqi; nafaraseenni higge nafa saꞌooti” yiino. (Law. 5:3, 8) Addanko woꞌmanka woyite cubbu widira massannonke coyiwiinni xeertiꞌne cubbo loosa qoropha dandiineemmo. b Togo yaa Kiristaanaho hoolloonnikkiha ikkirono, fonqolammeemmo woy gara ikkinokkire assineemmo gede assannonkeha ikkiro hakko coyiwiinni xeertiꞌneemmo yaate.—Mat. 5:29, 30.
12. Iyyoobi ma assate murciꞌrino? Tini jifamate giddora eannokki gede kaaꞌlitinosihu hiittoonniiti? (Iyyoobi 31:1)
12 Cubbu widira massannore assineemmokki gede murciꞌra hasiissannonke. Iyyoobi hatto assino. Isi yortote illenni wole ‘meyata laꞌꞌannokki gede, isonooto qorophisiisino.’ (Iyyoobi 31:1 nabbawi.) Tenne assate murciꞌrasi foorretewiinni xeertiꞌranno gede kaaꞌlitinosi. Ninkeno cubbu widira massankera dandaannoha aye coyeno giwate murciꞌra dandiineemmo.
13. Hendeemmore qoropha hasiissannonkehu mayiraati? (Misileno lai.)
13 Hendeemmoreno qoropha hasiissannonke. (Ful. 20:17) Mitu manni assalla hoongi geeshsha gara ikkinokkire heda qarra diafidhino yee ammananno. Kayinni hattoo hedo digaraho. Woꞌmanka woyite gara ikkinokkire hedanno manchira hakko coye assate hasattosi lexxitanno. Tini gara ikkinokkire assa qoropha qarra ikkitannosi gede assitanno. Hige mito woyite gara ikkitinokki hedo waaddannonke. Qaru coyi togoo hedo ranke hooꞌlatenna dancha danchare hedate. Togo assanke gara ikkitinokki hedo lexxitanni hadhe waaddannonkekki gedenna, jawa cubbo loosate widira massitannonkekki gede kaaꞌlitannonke.—Fil. 4:8; Qol. 3:2; Yai. 1:13-15.
Jifamate giddora eessankera dandaannoha aye coyeno qoropha hasiissannonke (Gufo 13 lai)
14. Fonqolo qorophineemmo gede kaaꞌlankera dandaannori woluri maati?
14 Fonqolo qorophate wolere maa assa dandiineemmo? Yihowa seerira hajajama woꞌmanka woyite kaaꞌlitannonketa ammana hasiissannonke. Mito woyite hedonkenna hasattonke Yihowa fajjo ledo sumuu yitanno gede assiꞌra qarra ikkitannonke; kayinni tenne assate dandiinummore baala assineemmoha ikkiro addu hagiirre afiꞌneemmo.
15. Gara ikkinore assate hasatto heedhannonke gede assiꞌra jifamate giddora eꞌneemmokki gede kaaꞌlitannonkehu hiittoonniiti?
15 Gara ikkinore assate hasatto heedhannonke gede assiꞌra hasiissannonke. ‘Busha coye giwanna dancha coye baxa’ ronsummoro, gara ikkinore assatenna cubbunniwa qole massannonke coye giwate albinni roore murciꞌneemmo. (Amo. 5:15) Qoleno gara ikkinore assate hasatto heedhunkero hedeweelcho fonqolanno coyi tuncu yaannonke woyite gargadha dandiineemmo.
16. Ayyaanaamittete coye assa agarooshshe ikkitannonkehu hiittoonniiti? (Misileno lai.)
16 Gara ikkitino hasatto heedhannonke gede assiꞌra dandiineemmohu hiittoonniiti? Ganyine ayyaanaamittete coye assa tennera kaaꞌlitannonke. Kiristaanu gambooshshiwa woy soqqansho fulloommowa heeꞌne gara ikkinokkire assate difonqolammeemmo. Hatteentenni Yihowa hagiirsiisate noonke hasatto lexxitanno gede assiꞌneemmo. (Mat. 28:19, 20; Ibi. 10:24, 25) Maganu Qaale nabbambe, xiinxallinenna hiincine albinni roore dancha coye baxanna busha coye giwa dandiineemmo. (Iya. 1:8; Far. 1:2, 3; 119:97, 101) Yesuusi rosaanosira “Jifamate giddora eꞌinannikki gede . . . agurtinikkinni huuccidhe” yinota qaango. (Mat. 26:41) Huuccatto assiꞌnummo kiiro iimi Anninke kaaꞌlannonke hattono iso hagiirsiisate murciꞌneemmo.—Yai. 4:8.
Ayyaanaamittete coye ganyine assate rosichi heeꞌrinkero jifamate giddora eessannonke coye albinni roore gargadha dandiineemmo (Gufo 16 lai) c
QOROPHITINE HEEDHE
17. Pheexiroosira qarra ikkite keeshshitinosi laanfe hiittenneeti?
17 Mite laanfenke woꞌmunni woꞌma qeeꞌlinoommoha ikkara dandaanno. Kayinni mite laanfenke qeeꞌlate sharrammanni keeshshinoommoha ikkara dandaanno. Hanni soqqamaasinchu Pheexiroosi lawishsha laꞌno. Isi manna waajjino daafira Yesuusa sase hige kaadino. (Mat. 26:69-75) Pheexiroosi Sanihediriini shongowa worbimmatenni farciꞌri woyite waajjasi qeeꞌlinoha lawanno. (Soq. 5:27-29) Ikkirono boodu diri gedensaanni, “ammantinori barcima hasiissannonsa” yitannori dagguta insa waajje mite yanna geeshsha Yihudu wido ikkinokki Kiristaani ledo ita agurino. (Gal. 2:11, 12) Pheexiroosi galagale manna waajja hanafino. Isi manna waajja woꞌmunni woꞌma qeeꞌlinokkiha ikkara dandaanno.
18. Mite laanfenke galagalte ma assitankera dandiitanno?
18 Ninkerano Pheexiroosira iillinori gedeeri iillankera dandaanno. Hiittoonni? Qeeꞌlinoommo yine hendoommo laanfe galagalte waaddankera dandiitanno. Lawishshaho, mittu rodii togo yiino: “Tonnu diri geeshsha teeda baꞌino misilla laꞌꞌa qorophe keeshshoommo; hakko daafira xaate qarraꞌya qeeꞌloommo yee hedoommo. Kayinni laanfeꞌya rie injiitanno yanna agare siannohu badda moyichi gede ikkitinoe.” Ikkirono isi hexxo dimudhino; tini hagiirsiissannote! Tenne busha gade qeeꞌlate barru baala sharrama hasiissannosita wodanchino; sharrama hasiissannosihu tenne busha alamera lubbotenni noo geeshsha ikkara dandaanno. Isi minaamasinna songote cimeeyye kaaꞌlitinosi daafira, teeda baꞌino misilla laꞌꞌannokki gede albinni roore qorophino.
19. Xaa geeshsha qeeꞌlate sharrammanni heeꞌnoommo laanfe heedhunkero maa assa dandiineemmo?
19 Qeeꞌlinoommokki laanfe heedhunkero gara ikkinokkire assineemmokki gede maa assa dandiineemmo? Yesuusi “Baqqi yitine agadhe” yee amaalino amaale harunsa hasiissannonke; tini jifamate giddora eꞌneemmokki gede kaaꞌlitannonke. Laanfekki qeeꞌloottoha lawannohe woyite nafa jifamate giddora massahera dandaanno coye woꞌmanka woyite qorophi. (1 Qor. 10:12) Laanfekki qeeꞌlatto gede kaaꞌlinohe coye woꞌmanka woyite assa agurtooti. Jifamate giddora eattokki gede dandiittore baala assi.—2 Ph. 3:14.
QOROPHINE HEEꞌNIRO AFIꞌNANNI BAꞌRAAꞌRA
20-21. (a) Jifamate giddora eꞌneemmokki gede qorophine heeꞌnummoro afiꞌneemmo baꞌraaꞌri maati? (b) Dandiinummore assinummoro Yihowa maa assannonke? (2 Qorontoosi 4:7)
20 Jifamate giddora eꞌneemmokki gede woꞌmanka woyite qorophine heeꞌra gaabbissannota ikkitinokkita addaxxa dandiineemmo. ‘Cubbo loonsiro yannate geeshshi hagiirre’ afiꞌnanniha ikkara dandaanno; Yihowa biddishshi garinni heeꞌne afiꞌnanni hagiirri kayinni lowo geeshsha rooranno. (Ibi. 11:25; Far. 19:8) Korkaatuno kalaqammoommohu isi biddishshi garinni heeꞌnammoraati. (Kal. 1:27) Yihowa hagiirsiisanno garinni heeꞌnummoro keeraanchu tiiꞌꞌi heeꞌrannonke hattono albillitte hegere heeshsho afiꞌneemmo.—1 Xim. 6:12; 2 Xim. 1:3; Yih. 20, 21.
21 ‘Maalu daafuraamo’ ikkinoti egennantinote. Kayinni togo yaa laanfenke qeeꞌlate assa dandiineemmori dino yaa diꞌꞌikkitino. Yihowa hasiissannonke wolqa oye ninke kaaꞌlate qixxaawaho. (2 Qorontoosi 4:7 nabbawi.) Ikkirono Maganu aannonketi mannu wolqara aleenni ikkitino wolqa ikkinota wodanche. Kayinni umo fonqolu giddora eꞌneemmokki gede ninke assa dandiineemmore baala assa hasiissannonke. Ninke dandiineemmore baala assinummoro Yihowa hasiissanno yannara lede jawaante oyenke huuccattonkera dawaro qolannota addaxxa dandiineemmo. (1 Qor. 10:13) Addanko Yihowa kaaꞌlonni jifamate giddora eꞌneemmokki gede woꞌmanka woyite qoropha dandiineemmo.
FAARSO 47 Barru Baala Yihowa Huucciꞌno
a HARANCHO XAWISHSHA: Maatewoosi 26:41 ‘Ayyaana’ yinoonnihu, mitto coye assineemmo woy hendeemmo gede xixxiibbannonkete giddonke noo wolqaati. ‘Maala’ yinoonnihu qole guuntete xeꞌnenkeeti. Gara ikkinore assate hasatto noonkeha ikkirono, qoropha hoongummoro Qullaawu Maxaafi digaraho yaannore assate fonqolammammora dandiineemmo.
b Jawa cubbo loosino mancho, Hegerera Hagiidhitanni Heeꞌra Dandaatto! yaanno maxaafa roso 57 naxiwe 1-3 nna Bocaasa 2020te Agarooshshu Shaera qoola 27-29 gufo 12-17 fulinohu “Illekki Albillittete Yanna ‘Dhaabbe Laꞌo’” yaanno birxichira noo hedo kaaꞌlitasira dandiitanno.
c MISILETE XAWISHSHA: Mittu rodii soodo barru qummeeshsha nabbawanni no, barra sagalete fooliishsho yannara Qullaawa Maxaafa nabbawanni no; hattono hawarro Kiristaanu Heeshshonna Soqqansho Gambooshshe haꞌre no.
