1-2. Saadooqi ayeti? (1 Duduwo 12:22, 26-28)

 HANNI tenne hedi. Daawiti Israeele woꞌmate moote assate 340,000 saꞌꞌanno manni gamba yiino. Mannu Kebirooni mule noohu kinna batidhino ilaalira osoꞌlanni, hasaawanni hattono Yihowara galatunnita hagiirru faarso faarsanni sase barra keeshshino. (1 Dud. 12:39) Hakkiicho lowo manni mereero Saadooqi yinanni wedellichi noota mannu afinoha dilawanno. Kayinni Yihowa ninke isi hakko noota anfeemmo gede assino. (1 Duduwo 12:22, 26-28 (NW) nabbawi. a) Saadooqi ayeti?

² Saadooqi Kakkalaanote Biili Abiyaataari ledo soqqamanno kakkalaanchooti. Maganu Saadooqira lowo hayyonna isi fajjo wodanchate dandoo uyinosi. (2 Sam. 15:27) Mannu dancha amaale hasiꞌranno woyite Saadooqiwa haꞌranno. Qoleno isi worba manchooti. Konni birxichira isi worba ikkasi leellishino gara ronseemmo.

3. (a) Yihowa manni worbuulle ikka hasiissannonsahu mayiraati? (b) Konni birxichira maa ronseemmo?

³ Tenne goofimarchu yannara Sheexaanu Maganu manna albinni roore sianni no. (1 Phe. 5:8) Yihowa Sheexaanenna busha alame hunannota agadhine heeꞌnoommote tenne yannara worbuulle ikka hasiissannonke. (Far. 31:24) Hanni Saadooqi gede worbuulle ikka dandiineemmota sase doogga laꞌno.

MAGANU GASHSHOOTIRA HALAMME

4. Yihowa manni Gashshootisira halamate worbuulle ikka hasiissannonsahu mayiraati? (Misileno lai.)

⁴ Yihowa manna ikkinoommo daafira, Gashshootisira woꞌma  giddonkenni halammeemmo; kayinni hatto assate worbuulle ikka hasiissannonke. (Mat. 6:33) Lawishshaho, tenne busha alame giddo Yihowa biddishshi garinni heeꞌratenna Maganu Gashshootiha dancha duduwo duduwate worbuulle ikka hasiissannonke. (1 Tes. 2:2) Qoleno tini alame poletikunni bebbeehante biilla biinxa fultanni no; hakko daafira poletikaho anga wodhinummokki heeꞌrateno worbuulle ikka hasiissannonke. (Yoh. 18:36) Batinye Yihowa Farciꞌraasine poletikaho anga wodha woy olaho haꞌra gibbino daafira, woxensa hooggino, ganne gawajjinoonninsa hattono usurroonninsa.

5. Saadooqi Daawitira halamate worba ikka hasiissinosihu mayiraati?

⁵ Saadooqi Kebirooni haꞌrinohu Daawiti moohisate calla diꞌꞌikkino. Isi hakkira haꞌrinohu olu uduunnichosi adhe hattono olamate qixxaaweeti. (1 Dud. 12:38) Isi olaho Daawiti ledo haꞌratenna Israeelete diinna ledo olamate qixxaawino. Saadooqira olaho gari dandoo hooggasira dandiitanno; ikkirono isi lowo geeshsha worbaho.

6. Saadooqi worba ikkanno gede Daawiti dancha lawishsha ikkinosihu hiittoonniiti? (Faarso 138:3)

⁶ Kakkalaanchu Saadooqi worbimma rosinohu mamiinniiti? Isi noohu jawaatanna worbuulle ikkinohu batinyu labballi ledooti. Iso insa lawishshi kaaꞌlinositi dihuluullissannote. Lawishshaho, Daawiti worbimmatenni ‘Israeelete mannira gaadaanna’ ikkino daafira, baalunku Israeelete manni isira woꞌma giddonni halamino. (1 Dud. 11:1, 2) Daawiti diinnasi ledo olamanno yanna baalantera Yihowa addaxxanno. (Far. 28:7; Faarso 138:3 nabbawi.) Qoleno Saadooqi, Yoodahenna bareedu beettisi Beenayanni hattono Daawitira halantinori 22 roorrooti lawishshinni worbimma rosino. (1 Dud. 11:22-25; 12:26-28) Kuri labballi baalunku Daawiti gashshootira halamate murcidhino.

7. (a) Worbuulle ikkineemmo gede kaaꞌlannonkehu yannankera noo lawishshi hiikkonneeti? (b) Viidiyo leellishshannonte gede roduu Nisilu lawishshinni maa rosootto?

 ⁷ Worbimmatenni Yihowa gashshootira halantinori lawishsha xiinxallineemmo woyite, jawaante afiꞌneemmo hattono worbuulle ikkineemmo. Mootenke Kiristoosi Yesuusi tenne Sheexaanu alamera anga wodhanno gede xixxiimbisita tiyyire giwino. (Mat. 4:8-11; Yoh. 6:14, 15) Isi jawaante afiꞌrate woꞌmanka woyite Yihowa addaxxino. Yannankerano poletikaho anga wodhanna olaho haꞌra gibbinori batinyu wedelli lawishshi no. Insa woꞌnaalsha jw.org aana nabbawa dandaatto. b

AMMANATE RODUUWAꞌNE KAAꞌLE

8. Songote cimeeyye ammanate roduuwansa kaaꞌlate worbimma hasiissannonsahu hiittoo woyite ikkara dandaanno?

⁸ Yihowa manni mimmito kaaꞌla baxanno. (2 Qor. 8:4) Ikkirono mito woyite tenne assate worbimma hasiissanno. Lawishshaho olu kaꞌꞌanno woyite, songote cimeeyye ammanate roduuwinsara jawaantenna ayyaanaamittete woy maalaamittete kaaꞌlo hasiissannonsata huwattanno. Songote cimeeyye ammanate roduuwansa baxxanno daafira, gawajjanno coyi heeꞌrirono insara hasiisannore shiqishshanno. (Yoh. 15:12, 13) Tenne assite insa Saadooqi gede worbuulle ikkansa leellishshanno.

9. Layinki Saamueeli 15:27-29 kultanno garinni, Daawiti Saadooqi maa assanno gede kulinosi? (Misileno lai.)

⁹ Daawiti heeshsho qarru giddo no. Beettisi Abeseloomi gashshootesi adhate murciꞌrino. (2 Sam. 15:12, 13) Daawiti hakkawoyintenni Yerusaalametenni agure xooqa hasiissinosi! Isi soqqamaanosira togo yiino: “Kaꞌe ranke xoonqona. Hakkuyi kaꞌa kayinni Abeseloomi daye gudannonke, angasinni gatannohu diheeꞌranno.” (2 Sam. 15:14) Soqqamaanosi hadhanni heedheenna Daawiti Yerusaalamete gate Abeseloomi assara hedinore kulannosi  manchi hasiisannota wodanchino. Hakko daafira isi Saadooqinna wole kakkalaano agurte katama higge qottanno gede soyino. (2 Saamueeli 15:27-29 nabbawi.) Insa lowo geeshsha qoropha hasiissannonsa. Daawiti kuri kakkalaano assitara kulinonsa coyi gawajjannoho; wole agurina insa shinansara nafa dandiinanni. Finqilu, umosi calla baxannohunna annasi nafa kaadinohu Abeseloomi, Saadooqinna wole kakkalaano Daawiti agarate iso qottanni noota afiro insa ma assannoro hanni hedi!

10. Saadooqinna ledosi noori Daawiti agartinohu hiittoonniiti?

¹⁰ Daawiti Saadooqinna wole ammanamino jaalasi Kuusi kaaꞌlitannosi gede xaꞌmiꞌrino. (2 Sam. 15:32-37) Kuusi Daawiti kuꞌlino garinni Abeseloomi kaaꞌlinoha lawe Daawiti gawajja dandaanno gara amaalinosi; tini Daawiti qixxaawanno yanna afiꞌranno gede assitinosi. Hakkiinni Kuusi Saadooqiranna Abiyaataarira assara hedinore kulinonsa. (2 Sam. 17:8-16) Kuri lamunku manni Daawitira sokka sokkino. (2 Sam. 17:17) Yihowa kaaꞌleennansa Saadooqinna ledosi kakkalaano Daawiti heeshsho gatisate lowore assitino.—2 Sam. 17:21, 22.

11. Ammanate roduuwanke kaaꞌlineemmo woyite worbuulle ikkate Saadooqi lawishsha harunsa dandiineemmohu hiittoonniiti?

¹¹ Qarru yannara ammanate roduuwanke kaaꞌlineemmo gede kullinkero, Saadooqi gede worbuulle ikkinoommota leellisha dandiineemmohu hiittoonniiti? (1) Biddishsha harunse. Togoo woyite mittooꞌmine heeꞌra lowo geeshsha hasiissannote. Sinu biiro uyitanno biddishshira hajajamme. (Ibi. 13:17) Songote cimeeyye dano kalaqantanno woyitira qixxaawate daafira kulanno biddishsha ganyite laꞌꞌanna dano kalaqantanno woyite maa assitannoro heda hasiissannonsa. (1 Qor. 14:33, 40) (2) Worbuulle kayinni qorophitinannire ikke. (Law. 22:3) Mitto coye assitinara albaanni balaxxine hedde. Dandaami deerrinni gawajjanno coye qorophe. (3) Yihowa addaxxe. Yihowa kiꞌnerano ikko ammanate  roduuwiꞌne fayyimma daafira lowo geeshsha hedannota qaagge. Isi gawajjanno coye iilliꞌnekkinni ammanate roduuwaꞌne kaaꞌlitinanni gede kaaꞌlannoꞌne.

12-13. Vikitoorinna Viitaali woꞌnaalshinni maa rosootto? (Misileno lai.)

¹² Hanni Yukireenete olu kai yannara ammanate roduuwinsara sagalenna waa shiqishate sharrantinori Vikitoorinna Viitaali yinanni roduuwi woꞌnaalsha laꞌno. Vikitoori togo yiino: “Sagale baalankawa hansoommo. Duucha woyite qooxeessinkera qawwe tokkonsanna macciishshineemmo. Mittu rodii worino bayichinni fushshe roduuwaho iillinsheemmo sagale uyino. Tini sagale mite yanna geeshsha batinye halashshaano kaaꞌlitino. Tenne sagale makeenaho hogombanni heeꞌneenna ninke heeꞌnoommowiinni 20 meetire xeertiꞌre bombu dhoohi. Halashshaano kaaꞌla agureemmokki gede Yihowa hasiissannoe jawaante aaera barra woꞌma eeggifate huucciꞌroommo.”

¹³ Viitaali togo yiino: “Lowo geeshsha worbuulle ikka hasiissinonke. Umo calliꞌya 12 saate woꞌma haꞌroommo. Yihowa barra woꞌma huucciꞌroommo.” Viitaali worbaho; ikkirono qorophino. Isi lede togo yiino: “Yihowa hayyo aaeranna dhukaꞌya afeemmo gede kaaꞌlaera woꞌmanka woyite huucciꞌroommo. Makeena gashshootu fajjino doogora calla kadoommo. Roduuwu mitteenni loossanna laꞌꞌaꞌya ammanaꞌya kaajjishshino. Insa makeenunni haꞌneemmo woyite doogotenni raqaxaminore hooltino, sagale, waa hattono wolere hasiisannore abbite makeenaho hogobbino; qoleno haꞌneemmo woyite doogote inteemmo sagalenna galleemmo bayicho qixxeessitinonke.”

YIHOWARA AMMANANTINE HEEDHE

14. Banxeemmo manchi Yihowara ammanamannokkiha ikkiro, ma ikkinammora dandiineemmo?

¹⁴ Maatenke miili woy muli jaalinke halaalu mininni agure fulanno woyite lowo geeshsha xissiisiꞌneemmo. (Far. 78:40; Law. 24:10) Konni manchi ledo noonke aante lowo geeshsha kaajjado ikkituro isinni tenne ammane adha lowo geeshsha qarra ikkitankera dandiitanno. Togoohu xissiisanno coyi iillinoheha ikkiro, Saadooqi ammanamino gara kultanno xagge jawaachishshannohe.

15. Saadooqi Yihowara ammaname heeꞌrate worba ikka hasiissinosihu mayiraati? (1 Mootoolla 1:5-8)

¹⁵ Muli jaalisi Abiyaataari Yihowara ammanama hooga doodhita, Saadooqi Yihowara ammaname heeꞌrino. Kuni coyi ikkinohu Daawiti gashshooti jeeforaati. Daawiti reyara kae noo yannara beettisi Adooniyaasi Yihowa Selemoonira aara qaale eino zuufaane adhara woꞌnaalino. (1 Dud. 22:9, 10) Abiyaataari Adooniyaasira halama doodhino. (1 Mootoolla 1:5-8 nabbawi.) Abiyaataari hatto assino daafira Daawitira calla ikkikkinni Yihowarano ammanamikki gatino! Hanni Saadooqi mageeshshi geeshsha dadillinoronna hexxo mudhinoro hedi. Isi 40 saꞌꞌanno diro Abiyaataari ledo kakkalaancho ikke soqqamino. (2 Sam. 8:17) Insa lamunku halaalaanchu ‘Magani Taaboota’ dukkino. (2 Sam. 15:29) Lamunku umi qara Daawiti gashshootira halantino; hattono Yihowara soqqamate wole batinye coye assitino.—2 Sam. 19:11-14.

16. Saadooqi ammaname heeꞌranno gede kaaꞌlinosiri maa ikkara dandaanno?

¹⁶ Abiyaataari ammanaminokkiha ikka doodhirono Saadooqi Yihowara ammaname heeꞌrino. Daawiti Saadooqi ammanaminoha ikkasi horo dihuluullamino. Adooniyaasi ganino gano xawo fultuta, Daawiti Selemooni Moote assite buurtanno gede Saadooqi, Naataaninna Beenaya doorino. (1 Mot. 1:32-34) Yihowara ammanante soqqantinorinna Daawiti gashshootira halantinori Naataaninna wolootu lawishshi Saadooqi jawaachishinositi dihuluullissannote.  (1 Mot. 1:38, 39) Selemooni moote ikkiti, ‘Abiyaataari darga, kakkalaancho Saadooqi wori.’—1 Mot. 2:35.

17. Muli jaalikki Yihowara ammanama hoogiro, Saadooqi lawishsha harunsa dandaattohu hiittoonniiti?

¹⁷ Saadooqi lawishsha harunsa dandaattohu hiittoonniiti? Muli jaalikki halaalu mininni agure fulanno woyite, Yihowara ammanamoottoha ikkakki leellishi. (Iya. 24:15) Yihowa hasiissannohe jawaante aannohe; qoleno worba ikkatto gede kaaꞌlannohe. Huuccatto assidhe hattono isira ammanante soqqantino roduuwiwa aante Yihowa addaxxi. Yihowa isira ammanamakki naadanno hattono baꞌraasannohe.—2 Sam. 22:26.

18. Maarkonna Sidsee woꞌnaalshinni maa rosootto?

¹⁸ Hanni Maarkonna minaamasi Sidsee woꞌnaalsha laꞌno; insari lame seenni halaale agure fulino. Maarko togo yiino: “Qaaqquullinke ilantu yannanni kayinse insa lowo geeshsha banxeemmo. Gawajjannonsa coyinni agarateno dandiinummore baala assineemmo. Hakko daafira insa halaalu mininni agurte fula doodhitanno woyite, lowo geeshsha xissiisiꞌneemmo.” Isi lede togo yiino: “Kayinni Yihowa ledonke no. Isi ani wolqiweeleemmo woyite minaamaꞌya jawaattanno gede assanno, ise wolqiweeltanno woyite kayinni ani jawaateemmo gede assanno.” Sidseeno togo yitino: “Yihowa hasiissannonke jawaante aa hoogoommenkero, dandiine saꞌꞌa qarra ikkitannonke. Seenniꞌya Yihowara soqqama agurinohu anewa gatteennaati yee heda agura qarra ikkitinoe; hakko daafira giddoꞌyata Yihowara hasaaphoomma. Shiima yanna gedensaanni, lowo diro xaandummokki keeshshinoommoti mitte rodoo dagge angase qotiꞌyara worte ane seekkite laꞌanni, ‘Sidsee ate soꞌro ikkitinokkita qaagi!’ yitinoe. Yihowa kaaꞌlinoe daafira galagale isira soqqamme afiꞌnanni hagiirre afiꞌra dandoomma.”

19. Maa assate murciꞌrootto?

¹⁹ Yihowa baalanti soqqamaanosi Saadooqi gede worbuulle ikkitara hasiꞌranno. (2 Xim. 1:7) Ikkirono Yihowa umonke ikkikkinni iso addaxxinammora hasiꞌranno. Hakko daafira worba ikka hasiissannohe coyi tuncu yaannohe woyite alba Yihowawa higi. Isi Saadooqi gede worba assannoheta addaxxa dandaatto!—1 Phe. 5:10.