YESUUSI, harunsaanosi goofimarchu barra baete guma afidhannota masaalino. (Mat. 9:37; 24:14) Hanni Yesuusi coyiˈrino masaalo Yukireenete gobbara Tiraansikaripeetiya yinanniwa woˈmitino gara laˈno. Hakko qooxeessira mule mule noote sase katammara calla 50 songuwanna 5,400 saˈanno halashshaano no. * Isinni sasunku katamira nooha xaphooma manna Yihowa Farciˈraasine ledo taashshiniro, shoolu manchi giddo mittu Yihowa Farciˈraasinchooti!

Hakkiicho heeˈranno manni hiittooho? Vaasile yinannihu hakko qooxeessira heeˈranno rodii togo yiino: “Mannu Qullaawa Maxaafa ayirrisanno, hattono taashsho baxanno, qoleno mininsa manni ledo gamba yee heeˈranno, hattono mimmito kaaˈlate sharramanno. Mito woyite insa ninke ammana ledo sumuu yaa hooggara dandiitanno. Ikkirono, Qullaawu Maxaafinni mitte hedo leellinsheemmonsa woyite seekkite macciishshitanno.”

Roduuwinke halashshaanote kiiro batidhinohu konni qoqqowira soqqantanno woyite fonqolo ikkannori iillannonsa. Lawishshaho, 134 halashshaano afidhinote mitte songo qoqqowi giddo mannu mini 50 callaho! Roduuwu togoo qoqqowira ma garinni soqqantanno?

Batinyu roduuwi sabbakkannori roore hasiissannowa hadhe soqqamate sharrantanno. Yoonaashi yinannihu 90 diro ikkannosi rodii togo yiino: “Songonkera noo halashshaano qoqqowinke giddo noo mini ledo taashshiniro, mittu halashshaanchira 2 mini calla iillannosi. Xa xiwanni waadannoe daafira, qachiˈyara calla sabbakeemmo; konni albaanni kayinni 160km meddi yaannowa haˈre Hangaari Afiinni sabbakeemmo.” Halashshaano wole qoqqowo hadhe sabbakate uminsa horo agura hasiissannonsa. Yoonaashi lede togo yiino: “Baabura giddate hashshihunni 10 saatenni kaeemmo. Hakkiinni hawarro 12 saate geeshsha soqqamummo gedensaanni minira higeemmo. Lamalate giddo lame woy sase barra hatto asseemmo.” Kuni rodii hatto assasinni gaabbinoni? Isi togo yiino: “Konni garinni soqqamaˈyanni tashshi yaannoe. Xeertote nooti mitte maate halaale macciishshitanno gede kaaˈlate qoosso afiˈroommo.”

Songote giddo noo roduuwi baalu xeertowa haˈre sabbaka dandaanno yaa diˈˈikkino. Ikkirono geerruno ikko baalanti halashshaano songote giddo noo qoqqowo baala loosse guda dandiitino. Konni daafira, 2017nni Qaagooshshu Ayyaanira sasunku katami giddo gamba yiino manni halashshaanote ero ikkanno; togo yaa qole hakko qoqqowira noo manni giddo daratu Qaagooshshu Ayyaana dayino yaate. Ee, soqqammeemmo qoqqowi ikkihano ikkiro, loonsannihu ‘lowohu Mootichu loosi’ no.—1 Qor. 15:58.